Smol Rod Blong Kasem Fasin Fri

OL MAN we oli gat save, oli no save agensem trutok ya se olgeta samting long skae mo wol oli folem ol loa. Ol loa ya oli kontrolem olgeta samting, stat long ol smosmol atoma i go kasem ol bigbigfala grup blong plante bilyan sta. Sipos i no gat ol loa olsem, man i no save mekem ol plan mo bambae i no gat save. Mo laef tu i no save stap. From we man i kasem save mo i obei long ol loa ya, hem i naf blong mekem plante samting blong sapraes, olsem blong wokbaot long mun, mo blong mekem ol naes pija we oli gat kala blong eni ples long wol no long skae, i kamaot long televisin blong ol wanwan man long haos blong olgeta.

Be, ?olsem wanem long ol loa long saed blong stret fasin? ?Oli save givhan long yumi tu, mo yumi save kasem gudfala frut sipos yumi folem olgeta? Plante man oli gat tingting se i no gat loa long saed blong stret fasin, mo oli jusum blong folem waes blong man no wan skul we i agri long enikaen fasin nomo, from we samting ya i stret long wanem we oli wantem.

Be, i gat samfala man we oli jusum wan defren rod, hemia ‘get ya we i smol mo i blong go kasem laef,’ olsem Baebol i talem. Yumi no mas sapraes se i no gat plante man we oli jusum smol rod ya, from we Jisas i talem se: “Smol man nomo oli faenem.” (Matyu 7:14) ?From wanem i gat smol man nomo?

From we long smol rod ya, i gat ol loa mo rul blong God we oli putum tabu long sam samting. Rod ya i stret nomo long tingting blong ol man we oli rili wantem mekem laef blong olgeta i laenap wetem ol loa blong God. Bigfala rod i mekem man i ting se hem i fri, be rili hem i olsem wan slef. Rod ya i defren olgeta long smol rod, we i luk olsem se i putum tabu long plante samting, be hem i rili mekem man i fri long olgeta impoten haf blong laef. Ol rul we oli putum tabu long sam samting, oli kamaot long ‘loa ya we i stret olgeta, mo hem i save mekem man i fri.’​—Jemes 1:25.

?Olsem Wanem Smol Rod i Mekem Man i Fri?

I tru, i no isi oltaem blong stap long smol rod. Olgeta man tede oli no stretgud olgeta, mo oli bon wetem fasin ya blong wantem mekem nogud oltaem. Taswe, maet wan man i save gat tingting ya se i wantem livim rod ya blong smoltaem. Nating se i olsem, ol fasin blong stretem mo jenisim yumi wan we yumi mas mekem blong gohed oltaem blong folem ‘rod ya we i strong,’ oli save karem plante blesing long yumi, from we God ‘i stap tijim yumi blong givhangud long yumi.’​—Aesea 48:17; Rom 3:23.

Hemia wan pijatok: Ol papa mama we oli waes, oli save makemaot wan ‘strong rod’ long saed blong ol kakae we pikinini blong olgeta i mas kakae. From samting ya, samtaem oli mas strong long pikinini long taem blong kakae. Be taem ol pikinini ya oli gruap, bambae oli gat tangkyu from fasin stretem we papa mama blong olgeta i bin givim wetem lav. Taem oli kam bigman, bambae oli gat fasin blong jusum ol kakae we oli gud long helt blong olgeta. Mo i gat plante defren kaen kakae we oli gud long bodi, taswe, bambae oli neva save harem se i strong tumas blong folem fasin ya.

Long saed blong speret, God i stap mekem semkaen fasin long olgeta we oli wokbaot long smol rod we i go kasem laef. Hem i mekem tingting blong wantem ol gudfala samting i gru long olgeta we oli gat tingting daon, blong samting ya bambae i lidim olgeta blong kasem gladtaem mo trufala fasin fri. Hem i mekem olsem tru long Tok blong hem, Baebol. Antap moa, hem i singaotem yumi blong prea long hem blong askem speret blong hem we i save givhan long yumi. Mo hem i givim oda long yumi blong joen wetem ol narafala Kristin we oli save leftemap tingting blong yumi blong gohed blong wokbaot long smol rod. (Hibrus 10:​24, 25) Yes, God hem i lav, mo bigfala fasin ya i stampa blong olgeta samting we hem i tingting blong mekem, mo olgeta fasin blong hem.​—1 Jon 4:8.

Taem lav, pis, gud fasin, bos long tingting, mo ol narafala frut blong speret blong God oli stap oltaem long yumi, yumi no gat tingting se smol rod ya i putum tabu long plante tumas samting. Olsem Baebol i talem, “ol fasin olsem, i no gat loa we i save blokem olgeta.” (Galesia 5:​22, 23, NW) ‘Taem speret ya blong Masta blong yumi i stap wetem man, hem i stap mekem man i fri.’ (2 Korin 3:17) Naoia tu, ol trufala Kristin oli stap kasem fasin fri ya long sam samting. Oli fri long plante fasin fraet we oli stap kasem ol man tede, olsem fasin blong fraet long fyuja mo fraet long ded from ol gyaman bilif long saed ya. Yumi haremgud tumas blong tingbaot fyuja, taem “bambae wol ya i fulap tru long save blong Jeova olsem we ol wora oli kavremap solwora.” (Aesea 11:9) Ale, long taem ya, bambae yumi no moa fraet long ol man blong brekem loa. Ol lok long doa mo aean long windo bambae oli lus blong olwe. Olgeta man bambae oli fri mo oli stap sef​—long dei mo long naet, long haos blong olgeta mo afsaed tu. !Hemia nao trufala fasin fri!

Yumi Save Sua Long Help Blong God

I tru se, i nidim fasin traehad blong laef folem ol loa blong God. Be “ol loa blong hem oli no strong tumas blong folem,” mo samting ya i tru long ol sinman tu. (1 Jon 5:3) Taem yumi stap jenisim sam samting long laef blong yumi blong wokbaot long smol rod ya, mo yumi luksave ol blesing we yumi stap kasem from we yumi wokbaot long hem, yumi stat blong no laekem nating ol fasin mo tingting blong olgeta we oli stap wokbaot long bigfala rod. (Ol Sam 97:10) Fasin blong obei long ol loa blong God i mekem se voes blong hat we God i givim long yumi i stap kwaet. Defren olgeta long ‘hat we i trabol’ mo ‘tingting we i foldaon’ we plante man oli gat tede, God i promes se: “!Yu luk! Ol man blong wok blong mi bambae oli singaot bigwan from we oli haremgud long hat blong olgeta.” Yes, wan hat we Jeova i trenem hem i glad mo i fri.​—Aesea 65:14.

Jisas i ded blong mekem rod blong yumi blong kasem trufala fasin fri. Baebol i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Naoia Jisas, we i King long Kingdom blong God long heven, i stap givim ol blesing we oli kamaot from sakrifaes ya blong hem. Kolosap nao, bigfala rod mo olgeta we oli stap folem bambae oli lus long “bigfala trabol.” Biaen, bambae Jisas i wok wetem longfala tingting blong lidim ol man we oli obei, long las haf blong smol rod ya go kasem en blong hem, hemia taem we bambae ol man oli kam stretgud olgeta. (Revelesen 7:​14-17; Matyu 24:​21, 29-31) Long taem ya, nambawan promes ya bambae i kamtru long yumi, se: ‘Ol samting we God i mekem, olgeta tu bambae oli fri, oli no moa slef blong kruked fasin, mo bambae oli save kasem gudfala fasin fri, we i blong ol pikinini blong God.’ I no gat wan narafala samting we i moa gud bitim fasin fri ya we God bambae i givim. Ded tu, bambae i lus.​—Rom 8:21; Revelesen 21:​3, 4.

Taem wan man i luksave mo i kasem save klia weples nao smol rod ya i stap go long hem, hem i naf blong jusum rod ya mo gohed blong wokbaot long hem. Rod ya i givhan long ol yangfala tu, blong oli no tingbaot naoia nomo be oli lukluk i go long fyuja. Mo hem i halpem olgeta blong no harem nogud long sam samting we oli no save mekem, we loa blong God i putum tabu long olgeta. Oli lanem blong luk ol loa ya olsem wan pruf se God i laekem olgeta tumas, mo olsem wan sil we i blokem ol rabis fasin blong ol man we oli wokbaot long bigfala rod, blong oli no kasem olgeta. (Hibrus 12:​5, 6) I tru tumas, yumi mas gat longfala tingting. Yumi mas rimemba se i tekem taem blong kasem ol fasin mo tingting we oli laenap wetem ol samting we God i wantem, olsem wan tri i tekem taem blong karem gudfala frut. Be tri ya bambae i gat ol frut sipos wan man i lukaotgud long hem mo i givim wora long hem.

Taswe, yumi mas stadi long Tok blong God, joen wetem ol narafala Kristin, mo ‘prea oltaem’ blong askem God blong givim tabu speret. (1 Tesalonaeka 5:17) Trastem God blong bambae i halpem yu blong “mekem ol rod blong yu oli stret.” (Proveb 3:​5, 6) ?Be i tru se olgeta samting ya oli save givhan long yumi? ?Oli save wok long laef blong man? Yes, oli wok long laef blong Tom mo Mary, we yumi tokbaot long faswan haf blong magasin ya.

Oli No Moa Wokbaot Long Bigfala Rod

Tom i raetem se: “Samwe long 1975, mifala i mitim ol Wetnes blong Jeova, taem wan long olgeta i kam long haos blong mifala. Storeyan blong mifala i lidim mifala i go long wan Baebol stadi. Sloslou, mi stat blong stretem laef blong mi. Mi baptaes long 1982 mo naoia mi stap mekem wok insaed long kongregesenb long eria blong mi. Naoia, pikinini boe blong mitufala i baptaes tu. Mi talem tangkyu long woman blong mi from we hem i soemaot longfala tingting long mi long olgeta yia we oli pas, bifo we mi save trutok. Mo antap olgeta, mi talem tangkyu long Jeova mo Pikinini blong hem, Jisas Kraes, from olgeta samting we tufala i givim long mifala mo from hop ya we mifala i gat naoia long saed blong fyuja.”

?Mo olsem wanem long Mary? Hem i ting se bambae God i neva fogivim hem, be hem i wantem lanem moa long saed blong God from we hem i tingbaot ol pikinini blong hem. Taem hem i harem we ol Wetnes blong Jeova oli stap tijim wan man we i stap kolosap long haos blong hem long saed blong Baebol, hem i askem olgeta blong givhan long hem tu. Be, ol nogud fasin blong hem we oli stap longtaem finis, oli mekem i hadwok long hem blong gohed gud. Stadi i go gud blong smoltaem, afta i gat samtaem we i hadwok, samting ya i hapen plante taem. Be, smol gel blong hem we i gat seven yia nomo, i stap leftemap tingting blong hem blong gohed. Hem i stap talem se, “Ale, Mama. !Yu yu save winim!” Nao Mary i traehad moa.

Taem man blong hem, we long taem ya tufala i no mared yet, mo we hem tu i stap tekem drag, i kambak long haos, hem i joen long stadi. Sloslou, tufala i winim ol nogud fasin blong tufala. Nao afta we tufala i stretem mared blong tufala mo tekem baptaes, oli glad tumas, mo, long fastaem long laef blong tufala, oli harem we oli stap olsem wan trufala famle. Sore tumas, we biaen Mary i ded from sik ya AIDS. Be taem hem i ded, hat blong hem i stap strong long promes blong Baebol long saed blong laef bakegen long ded long wol ya we i kam paradaes, mo we i no moa gat enikaen doti blong bigfala rod ya we i rabis.

Yes, man i save aot long bigfala rod we i go blong lus. Jisas Kraes i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) Taswe, ?from wanem yu no mekem strong disisen blong wokbaot long smol rod ya we i go kasem laef? Sipos yu tinghevi long ol samting we yu lanem long Tok blong God, mo yu folem long laef blong yu, promes ya blong Baebol bambae i kamaot long laef blong yu wan, we i talem se: “Bambae yufala i save ol trutok, mo trutok ya bambae i mekem yufala i friman.”​—Jon 8:32.

[Ol futnot]