Fasin Jelas Kolosap i Spolem Laef Blong Mi

FASIN JELAS i stat blong kasem mi taem mi mared wetem seken hasban blong mi, Mark.a Mitufala i stap lukaot long ol step pikinini blong mitufala, mo samtaem mitufala i mas toktok wetem man mo woman we mitufala i mared long tufala bifo. Samtaem, ol samting ya i winim paoa blong mi. Taem i gat rao long famle, i luk olsem se Mark i no sapotem mi. Mi stat blong harem se hem i laekem yet faswan waef blong hem. Mi no agensem fasin jelas blong mi, be mi letem fasin ya i kam bos long laef blong mi. Taem faswan waef blong Mark i stap kolosap, mi harem nogud long filing blong mi.

Oltaem mi stap lukluk Mark. Mi stap lukluk ae blong hem tu, blong save weples hem i stap lukluk i go long hem. Mi luk fasin we hem i soem long fes blong hem, nao mi gat ol tingting we oli no stret nating. Samtaem mi tok stret long hem, se hem i laekem yet faswan waef blong hem. From samting ya, wan taem hem i harem nogud tumas, nao hem i girap mo i goaot long wan Kristin asembli. Mi harem se mi mekem wan samting we i nogud tumas long fored blong Jeova. Mi mekem famle blong mi i harem nogud tu, from we biaen, samting ya i gat paoa long ol pikinini blong mifala. Mi no laekem mi wan nating from ol samting ya we mi stap mekem. Be, nating se mi traehad blong bos long fasin jelas blong mi, mi no save winim.

Mark i no sapotem mi, be hem i stat blong givimbak long mi. Taem mi jajem hem wetem ol tok blong mi, hem i singaot strong long mi se, “Jelas, yu yu jelas nomo.” Mo long tingting blong mi, i luk olsem we hem i stap traehad blong mekem mi mi jelas. Maet hem i ting se samting ya bambae i mekem se mi winim fasin jelas blong mi, be i mekem ol samting oli kam moa nogud. Hem i stat blong lukluk ol narafala woman, hem i stap talem se oli naes tumas. Samting ya i mekem mi mi harem moa se mi no gud inaf mo se hem i no wantem mi. Samting ya i gohed gogo wan narafala nogud filing​—fasin blong no laekem nating narafala​—i kamaot. Long taem ya, tingting blong mi i fasfas we i fasfas, mekem se mi wantem nomo blong ronwe long hem mo famle blong hem.

Taem Baebol i talem se “fasin jelas i mekem ol bun oli kam rotin,” hem i stret. (Proveb 14:30) Helt blong mi i stat kam nogud. Mi kasem ol soa insaed long bel blong mi, mo oli tekem longtaem blong kamgud bakegen. Mi gohed blong mekem laef blong mi i nogud, from we mi no trastem Mark long evri samting we hem i mekem. Mi stap lukluk insaed long poket blong ol klos blong hem, mo sipos mi faenem wan pepa we i gat namba blong telefon long hem, mi stap telefon blong harem hu i ansa. Long hat blong mi, mi stap sem long mi wan. Mi stap krae from we mi sem long fored blong Jeova. Be mi no save stopem fasin ya. Mi kam olsem enemi blong mi wan bakegen.

Mi kam slak long saed blong speret gogo mi no moa save prea. Mi laekem tumas Jeova, mo mi wantem tumas blong mekem samting we i stret. Mi save olgeta vas blong Baebol long saed blong ol hasban mo waef, be mi no save folem olgeta. Hemia fastaem long laef blong mi, we mi harem se mi wantem ded, nating se mi gat ol gudfala pikinini.

Ol elda long Kristin kongregesen oli leftemap tingting blong mi bigwan mo oli traehad blong givhan long mi. Be taem oli stat blong tokbaot fasin jelas blong mi, mi haedem se mi jelas, from we mi sem tumas, mo mi no wantem agri se mi gat nogud fasin ya.

Biaen, helt blong mi i kam nogud moa, nao mi mas go slip long hospital, blong dokta i katem mi. Taem mi stap slip long hospital, mi luksave se laef blong mifala i no save gohed olsem. Mi mo Mark, mitufala i mekem disisen blong seraot blong tri manis, blong skelemgud laef blong mifala we i no gat filing i pulum mitufala. Long taem ya, wan gudfala samting i hapen. Long wan Wekap! magasin we i kamaot, i gat wan haf we nem blong hem, “Help Blong Ol Bigman We Oli Pikinini Blong Ol Man We Oli Stap Dipen Long Alkol.”b

Yu luk, mama blong mi i wan woman we i stap dipen long alkol. Nating se papa mo mama blong mi tufala i no mekem nogud long mi long saed long bodi, be tufala i neva soemaot lav long tufala mo long mi. Mi no save rimemba wan taem we mama blong mi i talem long mi se hem i laekem mi, mo i putum han blong hem i goraon long mi. Taswe mi gruap wetem fasin we mi no save olsem wanem blong soem lav long narafala, mo samting we i impoten sem mak, olsem wanem blong kasem lav.

Plante taem, mama blong mi i tokbaot ol rabis fasin blong papa blong mi wetem ol narafala woman, mo hem i talem long mi se hem i neva trastem Papa. Taswe, ating mi tu mi gruap wetem fasin we mi no trastem ol man. From laef blong mi taem mi pikinini, oltaem mi harem se mi daon long ol narafala, mo filing ya i strong moa long saed blong ol narafala woman. Mi ridim Wekap! ya, mo hem i givhan long mi blong kasem mining blong ol filing ya. Hemia i fastaem we mi kasem save long ol stampa risen blong fasin jelas blong mi.

Mi soem Wekap! ya long hasban blong mi, Mark, mo i givhan long hem tu blong kasem save moa long mi. I no longtaem, mi mo Mark, mitufala i naf blong folem advaes blong Baebol long ol man mo woman we oli gat tingting blong seraot. Mitufala i frengud bakegen. (1 Korin 7:​10, 11) Naoia, mared blong mitufala i moagud bitim olgeta yia bifo. Kolosap olgeta samting, mitufala i mekem tugeta, antap moa ol Kristin wok blong mitufala. Mark i stap kasem save moa long ol filing blong mi. Kolosap evri dei hem i talem long mi se hem i laekem mi tumas, mo naoia mi bilivim hem fulwan.

Sipos mi save se bambae mitufala i luk woman we Mark i mared long hem bifo, mi prea long Jeova blong kasem paoa long tingting blong mi, mo blong askem hem blong givhan long mi blong soem fasin blong wan Kristin we i bigman long saed blong speret. Mo Jeova i stap ansarem prea blong mi. Mo tu, ol filing blong mi blong no laekem woman ya oli stap godaon. Mi no moa stap tingting long nogud saed blong ol samting. Mo mi no moa tingbaot ol samting we oli no tru, olsem mi tingbaot bifo, taem mi no trastem Mark.

Mi gat yet sam filing blong jelas we oli no stret. Laef we i stretgud olgeta long nyufala wol blong God, hemia nomo bambae i tekemaot fasin jelas ya fulwan long mi. Be naoia, mi lanem finis blong bos long fasin jelas, bitim we mi letem fasin ya i bos long mi. Yes, kolosap fasin jelas i spolem laef blong mi. Be mi talem tangkyu long Jeova mo ogenaesesen blong hem, we naoia mi glad moa, mo helt blong mi i kamgud bakegen. Naoia mi gat gudfala fasin fren wetem God blong mi, Jeova, bakegen. Wan woman i raetem store ya.

[Ol futnot]