Man We i Jelas Long Narafala From i Gat Moa Jans Bitim Hem
LONG Hibru lanwis, i gat wan tok nomo blong “fasin jelas.” Taem oli stap tokbaot ol sinman, oli save tanem Hibru tok ya i kam “fasin blong jelas long narafala we i gat moa jans” no “fasin blong traem winim narafala.” (Jenesis 26:14; Eklesiastis 4:4) Be, long Grik lanwis, i gat moa long wan tok blong talem fasin jelas. Wod ya zeʹlos i save gat tu mining, sem mak long Hibru, wan hemia fasin jelas we i stret mo narawan hemia fasin jelas we i olsem wan sin. Narafala Grik tok, phthoʹnos, i minim nomo fasin jelas we i no stret. Long New World Translation, oltaem oli tanem tok ya i kam “fasin blong jelas long narafala we i gat moa jans.”
?Olsem wanem ol man Gris bifo oli bin yusum tok ya phthoʹnos? The Anchor Bible Dictionary i talem se: “Man we i gat phthonos i no olsem wan griri man. Maet hem i no wantem kasem olting blong narafala from we hem i harem nogud we narafala i gat olting ya. Hem i wantem nomo we narafala i no gat ol olting ya. Hem i defren long man we i wantem winim narafala, from we hem wan i no wantem win, be hem i wantem blokem narafala blong hem i no save win.”
Man we i gat fasin jelas ya, plante taem hem i no save se tingting blong hem i stampa blong ol trabol blong hem. Sem diksonari ya i eksplenem se: “Wan fasin we i joen wetem phthonos, hemia se man i no luksave se hem i gat fasin ya. Man we i gat phthoneros, sipos hem i mas eksplenem from wanem hem i stap mekem fasin olsem, bambae hem i talem long hem wan mo long ol narafala se, i stret nomo we hem i givimbak fasin agens long hemia we hem i agensem, from plante samting we narafala ya i bin mekem, mo se ol samting we oli hapen long hem we oli no stret, oli pusum hem blong tok agensem narafala ya. Sipos yumi askem long hem olsem wanem hem i save tok agensem wan fren blong hem olsem, bambae hem i talem se hem i stap mekem olsem blong traem givhan long fren blong hem.”
Gospel blong Matyu mo Mak, tufala i yusum Grik tok phthoʹnos blong tokbaot tingting we i pusum olgeta we oli kilim Jisas i ded. (Matyu 27:18; Mak 15:10) Yes, nogud fasin jelas ya i lidim olgeta. Sem nogud filing ya i bin mekem sam man we oli lego trutok mo agensem hem, oli kam strong tumas long fasin blong olgeta blong no laekem nating olgeta we oli brata blong olgeta bifo. (1 Timote 6:3-5) !Yumi no sapraes se ol man we oli gat nogud fasin jelas ya bambae oli no save go insaed long Kingdom blong God! Jeova God i talem finis se olgeta man we oli gohed blong ‘fulap long nogud fasin jelas ya,’ bambae hem i jajem olgeta se oli “mas ded.”—Rom 1:29, 32; Galesia 5:21.
[Tok blong pija long pej 7]
Yu no mas letem nogud fasin jelas i spolem laef blong yu