Ol Wetnes Blong Jeova Raonabaot Long Wol—India

!INDIA! Sipos yumi seraotem olgeta man long wol long 6 haf, namba we i stap long 1 haf, hemia nao namba blong ol man we i stap long India. I gat ol defren kaen man mo lanwis long ples ya, i bitim 1,000 lanwis evriwan. Bighaf blong ol man, hemia 83 pesen, oli Hindu, mo 11 pesen oli Muslim. Ol narawan oli Sik, Budis, Jain, mo samfala oli talem se oli Kristin.

Namba blong ol Wetnes blong Jeova i kam antap bigwan long India long ol yia we oli jes pas. Oli faenem ol man we oli olsem sipsip, we oli rere blong stanap long saed blong Kingdom blong Jeova, nating se oli kasem ol traem mo fasin agens blong ol man.

Eksampel, wan gel long wan famle Hindu, i no save wokbaot from hem i bin kasem sik ya polio taem hem i pikinini. Sik blong hem mo fasin blong harem nogud from, i mekem hem i tingbaot God mo mining blong laef. Hem i go long plante jyos blong traem faenem ansa long ol kwestin blong hem. Be hem i no faenem wan we i mekem tingting blong hem i stap kwaet. Samting we i kamaot se, hem i no moa bilif long jyos blong hem. Be hem i bilif yet long God.

Long taem ya, tu Wetnes we oli stap prij long ol haos wanwan oli mitim gel ya. Hem i talem se: “Ol wora blong ae blong mi i ron taem mi harem tufala i ridim Revelesen 21:​4.” Hem i karem fulap buk blong Watch Tower Sosaeti, mo hem i agri se oli save stadi Baebol wetem hem, nating se mama blong hem i stap agensem hem. Gel ya i jenisim plante fasin blong hem, mo hem i no fraet long fasin agens blong famle blong hem. Hem i tekem baptaes olsem wan Wetnes. Hem i talem se: “Mi mi kam strong long saed blong speret, mo mi bin hadwok tumas blong mekem olsem. Be oltaem Jeova God i bin stap wetem mi, mo hem i bin givim bigfala pis mo glad long mi.”

Strong Tingting Blong Sapotem Klin Wosip Long Skul

Tija blong wan yangfala sista i askem hem blong go long wan jyos blong ol Katolik, wetem ol narafala yangfala long klas blong hem. Sista ya i talem long kaen fasin se bambae hem i no joen wetem olgeta. Hem i talem se hem i wan Wetnes blong Jeova, mo se hem i save mekem wosip long Jeova nomo, be i no long wan narafala man no narafala samting. Tija i talem se taem ol narafala yangfala oli go long jyos, hem tu i mas go. Be sista ya i stanap strong. Hem i talem se, ol narafala ya we oli go long jyos, bambae oli no prea long Jeova, taswe hem i no save joen wetem olgeta.

From we gel ya i stanap strong, tija blong hem i wantem save moa. Taswe, long nekis dei, sista ya i givim wan haf blong Wajtaoa long hem, we i tokbaot fasin blong wosip long Jeova. Tija i sapraes long ol save ya we hem i ridim, ale hem i talem long gel ya se hem i no nidim blong joen long ol samting long saed blong jyos we skul i mekem. Sista ya i givim ten magasin long hem mo long ol narafala tija.

Obei Long Loa Blong God Long Saed Long Blad i Karem Pei

I no longtaem, wan strong fiva i stap goraon long sam ples long Kerala. Sik ya i spolem bigwan kidni blong ol man ya we oli kasem, mo i mekem se oli mas yusum wan mesin blong klinim blad blong olgeta. Plante taem, ol dokta oli putum blad long ol man ya blong traem winim sik ya. Long wan taon, 14 man we oli kasem sik ya oli go slip long hospital. Wan long ol man ya i wan Wetnes, wan elda blong kongregesen long ples ya. Ol dokta oli talem long hem se i gat wan rod nomo blong winim sik ya, hemia blong tekem blad. Elda ya i eksplenem ol bilif blong hem we oli stanap long Baebol, mo hem i talem stret se hem i no wantem tekem blad. (Ol Wok 15:​28, 29) Ol dokta oli talem plante toktok long hem, mo oli talem se bambae hem i ded from we hem i no wantem tekem blad.

Ol 13 narafala sikman oli tekem blad. Sore tumas, olgeta evriwan oli ded sam dei biaen. !Brata ya nomo i stap laef! Ol dokta mo nes oli sapraes tumas. Mo tu, olgeta we oli wok long hospital oli sapraes we ol memba blong kongregesen oli kam visitim hem oltaem. Afta we brata ya i aot long hospital, hem i go blong talem tangkyu long ol dokta, be oli talem se: “?From wanem yu talem tangkyu long mifala? Talem tangkyu long God blong yu, Jeova. Hem nao i sevem yu. Plis prea from mifala tu long God blong yu, Jeova.”

[Bokis blong pija long pej 24]

LUKLUK LONG OL NAMBA BLONG KANTRI YA

1994 Sevis Yia

BIGFALA NAMBA BLONG OLGETA WE OLI STAP PRIJ: 14,271

SKELEM: 1 Wetnes long 65,266 man

NAMBA BLONG OL MAN WE OLI KAM LONG MEMORIOL: 38,192

MEDEL NAMBA BLONG OL PAENIA: 1,780

MEDEL NAMBA BLONG OL BAEBOL STADI: 12,453

NAMBA BLONG OL MAN WE OLI TEKEM BAPTAES: 1,312

NAMBA BLONG OL KONGREGESEN: 410

BRANJ OFIS: LONAVLA

[Tok blong pija long pej 25]

Branj ofis, Lonavla

[Tok blong pija long pej 25]

Wok blong prij we i joen wetem ”Gud Nyus Blong Olwe” asembli long 1963

[Tok blong pija long pej 25]

Prij long wan man we i stap salem ol samting afsaed Red Fot long Deli