Trutok Long Saed Blong Ol Enjel

Sipos yu wantem savegud wan man, yu mas lanem sam samting long saed blong famle blong hem tu. Samting ya i sem mak taem yumi stap traem blong kasem save long Jeova God. I gat plante moa samting oli joen long bisnes ya, bitim we yumi lanem nem blong hem nomo. Yumi mas save sam samting tu long saed blong “famle” blong hem long heven. (Skelem wetem Efesas 3:​14, 15.) Baebol i kolem ol enjel se “ol pikinini” blong God. (Job 1:6) Taem yumi luk impoten wok blong olgeta we Baebol i tokbaot, yumi mas wantem blong save moa olsem wanem oli givhan blong mekem stampa tingting blong God i kamtru.

WAN nyufala kastom i kamaot. Plante moa man oli stap talem se oli bilif long ol enjel. Be i no hemia nomo. Namba blong ol man we oli talem se ol enjel oli bin mekem sam samting long laef blong olgeta, i stap go antap. Taem oli askem kwestin long 500 man Amerika, se, “?Yufala i bin filim samtaem se enjel i stap wetem yufala?” kolosap wan long evri tri man, i ansa se yes. !Yumi sapraes tu long namba blong ol yangfala we oli talem se oli bilif long ol enjel! !Wan stadi long Yunaeted Stet i soem se 76 pesen blong olgeta oli bilif! I klia se ol man oli intres long ol enjel. ?Tingting we ol man oli gat naoia long saed blong ol enjel i laenap wetem trutok blong Baebol?

Mekem Wok Blong Setan i Luk Gud Nomo

Taem yumi tokbaot ol enjel, yumi no mas fogetem ol rabis enjel. Hemia ol speret man long heven we Baebol i talem se oli rebel agens long God. Faswan long olgeta ya, hemia Setan. Wan buk we plante man oli ridim, we nem blong hem Ask Your Angels, i talem se Setan i jes “wan haf blong God nomo.” Hem i givhan long ol man blong mekem “masel blong olgeta long saed blong speret” i kam strong moa, taem oli stap kasem traem. Ol man we oli raetem buk ya oli talem se, nating se Setan i “wantem soemaot lav,” long ol handred yia we oli pas, ol man oli mekem mastik, oli talem se hem i stampa blong olgeta rabis wok. Antap bakegen, oli talem se Setan mo Jisas, “nating se tufala i no sem mak, be tufala i stap long sem saed, olsem we tufala i tu impoten haf blong wan bodi nomo.” Ol tok ya oli mekem yumi sapraes tumas. ?Be Baebol i talem wanem?

Baebol i mekem i klia se Setan i no “wan haf blong God” be i wan enemi blong God. (Luk 10:​18, 19; Rom 16:20) Hem i agensem Hae Rul blong Jeova, mo tingting blong hem long saed blong ol man i no blong soem “lav” nating. !Hem i no sore nating taem hem i soemaot kros blong hem long ol man blong God long wol ya! !Hem i stap talemaot poen blong olgeta long fes blong God long dei mo long naet!a (Revelesen 12:​10, 12, 15-17) Tingting blong Setan i blong yusum enikaen rod blong spolem olgeta. Taem hem i mekem i nogud tumas long stret man ya Job, hem i soemaot klia se hem i no sore nating long ol man we oli stap safa.​—Job 1:​13-19; 2:​7, 8.

Setan mo Jisas tufala i no stap “long sem saed.” Tufala i enemi long tufala fulwan. Yes, i klia se Setan nao i pulum Herod blong stanemap oda ya blong kilim i ded olgeta smol pikinini. !Setan i mekem samting ya blong kilim i ded smol pikinini ya Jisas! (Matyu 2:​16-18) Mo Setan i gohed nomo blong agensem Jisas go kasem we Hem i ded. (Luk 4:​1-13; Jon 13:27) Taswe, Jisas mo Setan, tufala i no “impoten haf blong wan bodi.” Be tufala i agensem tufala fulwan. Profet tok blong Baebol i soem se tufala i badfren. (Jenesis 3:15) I stret nomo we Jisas ya we i laef bakegen, hem nao bambae i kilim i ded Setan, long stret taem we God i makemaot finis.​—Revelesen 1:18; 20:1, 10.

?Ol Prea Oli Go Long Hu?

Sam long ol man we oli intres tumas long ol enjel oli talem se, i gud blong tingting dip mo mekem sam narafala fasin blong toktok wetem ol enjel. Wan buk i talem se: “Sipos yu askem wetem fulhat blong yu blong toktok wetem wan memba blong famle blong heven, bambae hem i lesin long yu. Sipos yu askem, bambae hem i ansa long yu.” Maekel, Gabriel, Uriel, mo Rafael, hemia sam long ol enjel we buk ya i talem se yumi save toktok long olgeta.b

Be Jisas i tijim ol man blong hem blong prea long God, i no long ol enjel. (Matyu 6:​9, 10) Long sem fasin, Pol i raetem se: “Sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem.” (Filipae 4:6) From samting ya, ol Kristin oli prea long Jeova nomo, oli no prea long wan narafala man. Mo oli sanem prea blong olgeta tru long nem blong Jisas Kraes.c​—Jon 14:​6, 13, 14.

?Ol Enjel Oli No Gat Wan Skul?

Eileen Elias Freeman, wan woman we i lukaot long wan program blong televisin we oli kolem Enjel Watj, i talem se, “Ol enjel oli hae moa bitim olgeta skul, olgeta waes blong man, mo evri kastom blong man. Yes, ol enjel oli no stap long wan skul, olsem ol man.”

Be Baebol i mekem i klia se ol enjel blong God oli gat wan skul. Oli wosip long trufala God, Jeova, we i no wantem se oli wosip long enikaen narafala god. (Dutronome 5:​6, 7; Revelesen 7:11) Taswe, wan enjel olsem i talemaot hem wan long aposol Jon se hem i “man blong wok nomo” blong olgeta we oli stap obei long ol loa blong God. (Revelesen 19:10) I no gat wan vas blong Baebol we i talem se ol enjel blong God oli stap folem wan narafala fasin blong wosip. Oli wosip long Jeova nomo.​—Eksodas 20:​4, 5.

“Stampa Blong Ol Gyaman Toktok”

Plante man oli talem se oli bin luk ol enjel taem oli stap traem blong toktok wetem ol dedman. Wan woman we nem blong hem Elise, hem i ting se hem i kasem wan saen, nao i talem se: “Mi gat filing ya se angkel blong mi i faenem wan rod blong toktok wetem mi, mo blong mekem mi mi save se naoia, hem i hapi.” Woman ya, Terri, hem tu i tingbaot wan gudfala fren we i ded. Hem i talem se: “Wan wik afta we mifala i berem hem, hem i kam long mi long wan samting we mi ting se i wan drim. Hem i talem long mi se mi no mas harem nogud from ded blong hem, from we hem i hapi mo i stap long pis.”

Be Baebol i talem se ol dedman oli “no save wan samting nating.” (Eklesiastis 9:5) Mo tu, Baebol i talem se taem wan man i ded, “long sem dei ya ol tingting blong hem i finis.” (Ol Sam 146:4, NW) Be Setan, hem “i stampa blong ol gyaman toktok.” (Jon 8:44) Hem nao i stampa blong gyaman tok ya se sol blong man i gohed blong stap laef afta we man i ded. (Skelem wetem Esikel 18:4.) Plante man tede oli bilivim samting ya. Hemia nao samting we Setan i wantem, from we i mekem se ol man oli no moa nidim bilif ya se ol dedman oli save laef bakegen​—wan stampa bilif blong Kristin Skul. (Jon 5:​28, 29) Taswe, fasin blong toktok wetem ol dedman no blong kasem mesej long olgeta, i wan narafala haf blong bilif ya long saed blong ol enjel we plante man oli stap folem naoia, we God i no agri long hem.

?Oli Kam Kolosap Long Ol Enjel No Ol Rabis Speret?

Plante man we oli joen long ol grup blong man we oli intres tumas long ol enjel, oli wok wetem ol rabis speret. Tingbaot samting we i hapen long woman ya, Marcia. Hem i talem se: “Stat long Septemba kasem Desemba 1986, mi stat blong kasem ol mesej we ‘i kam long ol speret man.’ Mi luk ol gos mo mi kasem ol nogud drim long saed blong wan ‘laef we mi bin gat bifo.’ Mi toktok wetem ol fren we oli ded finis, mo mi kasem sam ekspiryens long laef blong mi we oli soemaot se mi gat wan narakaen paoa we i mekem se mi save ol samting long laef blong ol man we mi jes mitim olgeta. Mo tu, mi kasem presen ya we ol speret man oli muvum han blong mi blong raetem sam samting, mo oli karem sam mesej i kam long mi. Samfala we mi neva bin luk olgeta taem oli laef long wol ya, oli yusum mi blong talemaot mesej blong olgeta long ol narafala man.”

Fasin blong “toktok” wetem ol enjel blong traem save wanem bambae i kamtru long fyuja, hem i wan fasin we plante man oli folem. Wan buk i talem stret long ol man we oli ridim hem blong yusum ol majik ston, ol kad blong talem fyuja, ol mane blong I Ching, fasin blong lukluk ol mak long han, mo fasin blong wok wetem ol sta blong talem fyuja. Ol man we oli raetem buk ya oli talem se: “Letem samting we i stap dip insaed long yu i lidim yu i go long stret ples blong faenemaot samting we yu wantem save. Mo yu mas bilif se bambae wan enjel i mitim yu long ples ya.”

Be Baebol i soem klia se hemia we bambae i ‘mitim yu long ples ya’ i no wan enjel blong God. ?From wanem? From we God i agensem fasin ya we man i talemaot fyuja. Mo tu, ol trufala man blong wosip long God​—long heven mo long wol​—oli no joen nating long ol samting olsem. !Yes, long Isrel, fasin blong talemaot fyuja i wan bigfala sin we man i mas ded from! Loa i talem se: “Long tingting blong Jeova, ol man we oli stap mekem ol samting ya oli rabis nomo.”​—Dutronome 13:​1-5; 18:​10-12.

“Wan Enjel Blong Laet”

Yumi no sapraes se Devel Setan i save mekem fasin blong talemaot fyuja i luk olsem wan gudfala samting, olsem wan samting we wan enjel i mekem. Baebol i talem se Setan “i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:14) Hem i save mekem ol saen, mo biaen, hem i mekem oli kamtru. Hem i mekem olsem blong gyaman long olgeta we oli stap lukluk, blong oli ting se ol saen ya oli kamaot long God. (Skelem wetem Matyu 7:​21-23; 2 Tesalonaeka 2:​9-12.) Be olgeta wok blong Setan​—nating we i luk olsem se i gud no i nogud​—oli blong mekem wan long tufala plan ya blong hem i kamtru: blong pulum ol man blong oli tanem baksaed long Jeova, no blong satem tingting blong olgeta blong oli no luk ‘laet blong gud nyus blong Jisas Kraes we i stap saenaot i go long olgeta.’ (2 Korin 4:​3, 4) Plante taem, seken rod ya blong gyaman long ol man i gat moa paoa.

Tingbaot store blong Baebol, we i tokbaot wan gel blong wok long faswan handred yia. Gel ya i stap winim plante mane blong ol masta blong hem, from we hem i stap talemaot ol samting we bambae i kamtru. Hem i stap wokbaot biaen long ol aposol, long plante dei, mo i stap talem se: “Ol man ya oli man blong wok blong God ya we i Antap Tumas. Oli stap talemaot rod long yufala, blong God i sevem yufala.” Ol samting we hem i talem oli tru. Be, store ya i talem long yumi se, i no wan enjel we i stap lidim hem, be hem i ‘wan rabis speret we i stap soemaot long hem ol samting we bambae oli kamtru.’ Biaen, Pol i ‘tanraon, i talem long rabis speret ya we i stap long gel ya, i se: “Long nem blong Jisas Kraes, mi mi talem long yu, yu aot long gel ya.” Nao wantaem nomo, rabis speret ya i aot long gel ya, i go.’​—Ol Wok 16:​16-18.

?From wanem Pol i ronemaot speret ya? Speret ya i stap winim plante mane blong ol masta blong gel ya. From paoa blong ol speret man, maet gel ya i bin talem long ol man blong wokem garen, stret taem we oli mas planem garen, i talem long ol yangfala gel wetaem oli mas mared, mo i talem long ol man blong lukaot gol, weples oli save faenem gol. !Yes, speret ya i pusum gel ya tu blong talem sam trutok, taem hem i stap presem ol disaepol long fes blong ol man!

Nating se i olsem, hemia i ‘wan rabis speret we i stap soemaot ol samting we bambae oli save kamtru.’ Hem i wan rabis speret, taswe hem i no gat raet blong tokbaot Jeova mo rod blong hem blong sevem man. Maet rabis speret ya i talem ol gudfala tok blong mekem ol man oli bilivim ol tok blong gel ya, mo long rod ya, i pulum ol man blong no lesin long ol trufala man blong Kraes. Pol i gat gudfala risen blong givim woning long ol Kristin long Korin se: ‘Yufala i no save sidaon blong kakae long tebel blong Jeova, nao bakegen long tebel blong ol rabis speret.’ (1 Korin 10:​21) Yumi no sapraes se ol Kristin blong faswan handred yia oli bonem evri buk blong olgeta, we oli joen wetem wok blong talemaot fyuja.​—Ol Wok 19:19.

Wan “Enjel i Stap Flae Antap Long Skae”

Olsem yumi luk finis, Baebol i soemaot se plante tingting blong ol man we oli intres bigwan long ol enjel naoia, oli joen fulwan wetem Enemi blong God, Devel Setan. ?Samting ya i min se ol tabu enjel oli no joen long ol bisnes blong ol man? No gat. Naoia ol enjel oli stap mekem wan bigfala wok we i gat paoa long laef blong ol man long wol ya. ?Wanem wok ya? Blong faenem ansa, yumi mas lukluk long Baebol, long buk blong Revelesen. Buk ya i tokbaot ol enjel, plante taem moa, i bitim ol narafala buk blong Baebol.

Long Revelesen 14:​6, 7, yumi ridim vison long saed blong profet tok we Jon i kasem: “Nao mi luk i gat wan narafala enjel i stap flae antap long skae, i stap talemaot gud nyus ya we i blong oltaem nomo, i no save finis. Enjel ya i stap talemaot gud nyus ya long olgeta man long wol, long olgeta blong evri kala mo laen mo lanwis mo kantri. Hem i stap singaot bigfala, i talem se ‘Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwora mo springwora, mo yufala i mas foldaon long fes blong hem blong presem hem.’ ”

Vas ya i makem wok we ol enjel oli stap mekem tede, we i moa impoten long ol narafala wok blong olgeta. Oli joen long wan wok we i impoten tumas​—hemia wok blong talemaot gud nyus blong Kingdom blong God. Jisas i stap tingbaot wok ya, taem hem i promes long ol man blong hem se: “Bambae mi mi stap wetem yufala oltaem, gogo wol ya i finis.” (Matyu 28:​18-20) ?Olsem wanem Jisas i stap wetem ol man blong hem? Wan rod, hemia se hem i yusum ol enjel blong givhan long olgeta blong finisim bigfala wok ya.

Evri yia, ol Wetnes blong Jeova oli spenem moa long wan bilyan haoa long wok blong talemaot gud nyus blong Kingdom blong God. Taem oli stap mekem wok ya, oli luk plante pruf we i soem se ol enjel oli stap lidim olgeta. Long wok blong prij long ol haos wanwan, plante taem, oli faenem sam man we oli jes prea, blong askem God blong i sanem wan man i kam blong halpem olgeta blong kasem save long stampa tingting blong Hem. !From we ol enjel oli soem rod, mo ol Wetnes oli gat strong tingting blong go long haos blong ol man, i gat plante handred taosen man oli kasem save long Jeova evri yia!

?Yu yu stap lesin long enjel we i stap flae antap long skae? I gud we, nekis taem ol Wetnes blong Jeova oli visitim yu, yu storeyan moa wetem olgeta long saed blong mesej blong enjel ya.

[Ol futnot]

[Bokis blong pija long pej 8]

?HU YA OL ENJEL?

I NO tru, olsem plante man oli bilif, se ol enjel oli ol sol we oli aot long bodi taem man i ded. Baebol i talem klia se ol dedman “oli no save wan samting nating.” (Eklesiastis 9:5) ?Oraet, ol enjel oli kam weples? Baebol i soem se God i wokem wanwan long olgeta bifo we hem i wokem wol ya. (Job 38:​4-7) !Ating long famle blong God long heven, i gat plante handred milyan enjel, maet plante bilyan, no i bitim! Sam long ol enjel ya oli joen wetem Setan taem hem i rebel agensem God.​—Daniel 7:10; Revelesen 5:11; 12:​7-9.

From we Jeova i no wan God we i olbaot, yumi no sapraes we bigfala hif blong ol enjel long famle blong hem oli wok folem plan.​—1 Korin 14:33.

• Enjel we i stap long fasples, we i gat bigfala paoa mo haenem bitim ol narafala enjel, hemia jif blong ol enjel, Jisas Kraes, we Baebol i kolem hem Maekel. (1 Tesalonaeka 4:16; Jud 9) Ol seraf, ol jerubim, mo ol enjel, oli stap aninit long paoa blong hem.

• Ol seraf oli stap wok kolosap long bigfala jea blong God. I klia se wok blong olgeta, i blong talemaot tabu fasin blong God mo blong lukaot long ol man blong hem se oli mas gat klin fasin oltaem.​—Aesea 6:​1-3, 6, 7.

• Ol jerubim tu oli stap kolosap long Jeova. From we oli stap lukaotgud long bigfala jea blong God, oli stap leftemap haenem blong hem.​—Ol Sam 80:1; 99:1; Esikel 10:​1, 2.

• Ol enjel (i minim “ol man blong karem mesej”), oli stap wok long nem blong Jeova mo oli mekem wok we Jeova i sanem olgeta blong mekem. Oli mekem wil blong God i kamtru, nating se i blong sevem ol man blong God no blong spolem ol man nogud.​—Jenesis 19:​1-26.

[Tok blong pija long pej 7]

?Yu yu stap lesin long enjel we i stap flae antap long skae?