Oli ‘Mekem Stret Olsem God i Talem’
“Sipos yumi laekem God tumas, hemia i min se yumi stap folem ol loa blong hem.”—1 JON 5:3.
1. ?Yumi save talem wanem long saed blong lav blong God?
‘GOD I STAMPA BLONG LAV.’ Olgeta we oli kasem save long God mo oli obei long ol loa blong hem, oli gat bigfala tangkyu long lav ya blong hem we i bigfala tumas. “Stampa blong fasin ya i no we yumi laekem God tumas, i we God i laekem yumi tumas, nao i sanem Pikinini blong hem blong i ded blong mekem rod blong God i tekemaot ol sin blong yumi.” Taem yumi soemaot bilif long nambawan sakrifaes blong Jisas we i pemaot yumi, ‘yumi joen long lav blong God.’ (1 Jon 4:8-10, 16) Olsem nao, yumi save haremgud long plante blesing long saed blong speret naoia. Mo long nyufala wol we i stap kam, bambae yumi kasem laef we i no save finis.—Jon 17:3; 1 Jon 2:15, 17.
2. ?Olsem wanem fasin blong obei long ol loa blong God i givim blesing long ol man blong hem?
2 Long Baebol, i gat plante eksampel blong ol man we God i blesem olgeta bigwan from oli obei long ol loa blong hem. Sam long olgeta, hemia ol wetnes ya we oli laef bifo long Kristin taem, we Pol i tokbaot long leta blong hem, se: “Olgeta man ya oli stap bilif long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we oli stap longwe yet long olgeta, be oli glad tumas tu blong luk olgeta. Nao oli stap talemaot long klia ples, we oli stap long wol ya, be i olsem we oli strenja nomo, wol ya i no stret ples blong olgeta.” (Hibrus 11:13) Biaen, ol Kristin we oli givim laef blong olgeta long God, oli kasem blesing from “gladhat mo trutok [we] oli kamtru long Jisas Kraes.” (Jon 1:17) Long ol 6,000 yia long histri blong man, Jeova i stap givim pei long ol trufala wetnes blong hem, we oli obei long ol loa blong hem, mo ol loa ya “oli no strong tumas blong folem.”—1 Jon 5:2, 3.
Long Taem Blong Noa
3. ?Long wanem rod Noa i mekem ‘stret olsem God i talem’?
3 Baebol i talem se: “From we Noa i stap bilif long God, taswe hem i harem tok ya blong God, taem God i talemaot ol samting ya long hem fastaem, we i no gat man i luk yet. Taswe hem i obei long God, i wokem bigfala sip ya blong sevem olgeta famle blong hem. Long fasin ya, i olsem we Noa i jajem ol man, mo from fasin ya, hem i kasem stret laef ya we God i stap givim long olgeta we oli stap bilif long hem.” Olsem “wan prija blong talemaot stret fasin,” Noa i obei fulwan long God, nao i givim woning long ol rabis man we oli laef bifo long Bigfala Wora, se dei blong God blong jajem ol man i kolosap. (Hibrus 11:7; 2 Pita 2:5) Taem hem i wokem bigfala sip, hem i folemgud plan we God i givim long hem. Afta, hem i tekem ol defren kaen anamol mo kakae oli go insaed long sip. ‘Noa i mekem olgeta samting we God i talem long hem. Hem i mekem stret olsem God i talem.’—Jenesis 6:22.
4, 5. (a) ?Olsem wanem wan rabis paoa i stap spolem ol man long taem ya? (b) ?From wanem yumi mas mekem ‘stret olsem God i talem’ blong obei long ol rul blong hem?
4 Noa mo famle blong hem, oli mas stanap strong agensem ol rabis wok blong ol enjel we oli no obei long God. Ol speret pikinini ya blong God oli tekem bodi olsem man, mo oli slip wetem ol woman long wol ya. Nao oli karem ol pikinini we oli ol bigbigfala man mo we oli stap mekem ol raf fasin long ol narafala man. “Long taem ya, olgeta man long wol oli stap mekem nogud, mo oltaem, tingting blong olgeta i fulap long ol samting nogud.” Jeova i sanem Bigfala Wora blong spolem ol rabis man long taem ya. (Jenesis 6:4, 11-17; 7:1) Stat long taem blong Noa kam kasem tede, God i no letem ol rabis enjel ya blong tekem bakegen bodi olsem man. Nating se i olsem, ‘fulwol i stap yet long paoa blong rabis man ya,’ Setan. (1 Jon 5:19; Revelesen 12:9) Tru long profet tok, Jisas i talem se ol stronghed man long taem blong Noa oli sem mak long ol man we oli tanem baksaed long hem afta long 1914, taem saen blong soem se hem i ‘stap finis,’ i stat blong kamtru.—Matyu 24:3, 34, 37-39; Luk 17:26, 27.
5 Tede, olsem long taem blong Noa, Setan i stap traem blong spolem olgeta man mo wol blong yumi. (Revelesen 11:15-18) Taswe, i impoten tumas se, kwiktaem yumi folem advaes ya we i kamaot long God, se: “Yufala i mas putum olgeta klos blong faet, we God i givim long yufala, blong bambae yufala i save stanap strong agens long ol gyaman trik blong Setan.” (Efesas 6:11, futnot, NW) Long saed ya, yumi kasem paoa taem yumi stadi long Tok blong God mo mekem i wok long laef blong yumi. Mo tu, i gat ogenaesesen blong Jeova we i stap keagud long yumi, wetem tabu “slef ya we i stret mo waes,” mo ol elda we oli gat lav, blong lidim yumi wetem longfala tingting long rod ya we yumi mas folem. Yumi gat wok blong mekem, hemia blong talemaot gud nyus long olgeta ples long wol. (Matyu 24:14, 45-47, NW) Olsem Noa, we i obeigud long samting we God i talem long hem blong mekem, oltaem yumi mas mekem ‘stret olsem God i talem.’
Moses—Man We i Gat Tingting Daon i Bitim Ol Narafala Man
6, 7. (a) ?Moses i jusum wanem rod we i givim blesing long hem? (b) ?Wanem eksampel blong no fraet we Moses i soem long yumi?
6 Tingbaot wan narafala man blong bilif—Moses. Sipos hem i wantem, hem i save gat wan isi laef we hem i haremgud long ol sas samting long Ijip. Be hem i no jusum ol samting ya. Hem i ‘joen long ol man blong God blong harem nogud wetem olgeta. Hem i no wantem we i haremgud blong smoltaem nomo, long ol rabis fasin we hem i save mekem.’ From we Jeova i singaot hem blong mekem wan wok, ‘hem i stap luk oltaem long pei we bambae God i givim long hem. Mo i stap gohed olwe nomo, olsem we i stap luk God ya we man i no save luk long ae blong hem.’—Hibrus 11:23-28.
7 Long Namba 12:3, yumi ridim se: “Man ya Moses, tingting blong hem i stap daon moa i winim ol narafala man long wol long taem blong hem.” Fero blong Ijip i defren olgeta, hem i soem se hem i flas moa i winim ol narafala man. Taem Jeova i sanem Moses mo Eron blong talemaot jajmen blong Hem long Fero, ?tufala i mekem wanem? Baebol i talem long yumi se: ‘Moses mo Eron, tufala i mekem ol samting ya we Jeova i talem long tufala. Tufala i mekem stret olsem God i talem.’ (Eksodas 7:4-7) !Hemia wan nambawan eksampel long yumi blong no fraet blong talemaot jajmen blong God tede!
8. ?Olsem wanem ol man Isrel oli mas mekem ‘stret olsem God i talem,’ mo olsem wanem glad we oli bin kasem bambae i kamaot sem mak bakegen long fyuja?
8 ?Ol man Isrel oli sapotem Moses wetem fulhat blong olgeta? Afta we Jeova i kilim Ijip wetem namba naen blong ol ten trabol, hem i givim plante rul long ol man Isrel blong soem olsem wanem oli mas mekem lafet blong Pasova. ‘Nao taem oli harem tok ya, oli bodaon, oli mekem wosip long Jeova. Nao ol man Isrel oli mekem samting we Jeova i talem long Moses mo Eron. Oli mekem stret olsem God i talem.’ (Eksodas 12:27, 28) Long medel naet blong Naesan 14, long yia 1513 B.K.T.,a wan enjel blong God i kilim i ded olgeta fasbon blong ol man Ijip, be hem i pas ova long ol haos blong ol man Isrel. ?From wanem ol fasbon blong Isrel oli sef? From blad blong smol sipsip blong Pasova, we oli sakem long doa blong olgeta. Oli mekem stret olsem we Jeova i talem long Moses mo Eron. Yes, oli ‘mekem stret olsem God i talem.’ (Eksodas 12:50, 51) Long Red Si, Jeova i mekem wan narafala merikel blong sevem ol man blong hem we oli obei, be i kilim i ded Fero mo i spolem ol strongfala ami blong hem. !Ol man Isrel oli glad tumas! I sem mak tede, ol man we oli obei long ol loa blong Jeova, bambae oli glad tumas taem oli luk we Hem i win olgeta long Amageden.—Eksodas 15:1, 2; Revelesen 15:3, 4.
9. ?Eksampel blong ol man Isrel we oli ‘mekem stret olsem God i talem’ blong wokem haos tapolen, i saen blong wanem nambawan wok tede?
9 Taem Jeova i talem long ol man Isrel blong givim presen mo wokem haos tapolen long draeples, oli sapotem fulwan wetem gladhat. Ale, Moses mo ol man blong hem we oli glad blong wok, oli folemgud ol smosmol samting long plan we Jeova i givim. ‘Nao ol laen blong Isrel oli finisim olgeta wok blong haos tapolen ya, mo oli wokem evri samting blong hem stret olsem we Jeova i talem long Moses. Oli mekem stret olsem God i talem.’ I sem mak, taem Moses i makemaot ol pris, ‘hem i mekem olgeta samting ya folem ol tok blong Jeova. Hem i mekem stret olsem God i talem.’ (Eksodas 39:32; 40:16) Tede, yumi gat jans blong sapotem wetem fulhat blong yumi, wok ya blong talemaot gud nyus mo program blong mekem wok blong Kingdom i go moa. Taswe, yumi gat jans blong joen blong mekem ‘stret olsem God i talem.’
Josua—Hem i No Fraet Mo i Gat Strong Tingting
10, 11. (a) ?Wanem i mekem we Josua i nafgud blong mekem wok blong hem? (b) ?Olsem wanem yumi save gat paoa blong fesem ol hadtaem tede?
10 Taem Moses i jusumaot Josua blong lidim ol man Isrel oli go long Promes Lan, maet oli gat Tok blong Jeova i stap nomo long faef buk blong Moses, wan no tu Sam, mo buk blong Job. Moses i talem long Josua se taem oli kasem Promes Lan, hem i mas hivimap ol man mo “ridim loa ya long fored blong olgeta man Isrel, blong oli harem.” (Dutronome 31:10-12) Mo tu, Jeova hem wan i talem long Josua se: “Buk ya blong loa i no mas lus long maot blong yu, mo yu mas ridim long smol voes long dei mo long naet, blong yu save lukaotgud blong mekem olgeta samting we oli raetem insaed long hem; nao bambae yu save win long rod blong yu mo bambae yu save wok long fasin waes.”—Josua 1:8.
11 Fasin ya blong ridim “buk” blong Jeova evri dei, i mekem se Josua i nafgud blong winim ol hadtaem we hem i mas fesem biaen. I sem mak, fasin blong ridim Baebol, Tok blong Jeova evri dei, i givim paoa long ol Wetnes blong Hem tede, blong stanap strong tru long ol hadtaem blong ol “lasdei” ya we laef i strong tumas. (2 Timote 3:1) From we yumi stap long wol we i fulap long raf fasin, i gud yumi folem advaes ya we God i talem long Josua se: “Yu no mas fraet mo yu mas gat strong tingting. Yu no mas seksek no yu fraet, from we God blong yu, Jeova, i stap wetem yu long evri ples we yu go long hem.” (Josua 1:9) Afta we ol man Isrel oli winim Kenan, God i givim bigfala pei long olgeta taem oli stapgud long graon ya we oli tekem. “Ale ol man Isrel oli mekem stret olsem we Jeova i bin talem long Moses.” (Josua 14:5) Tede tu, yumi save kasem bigfala pei olsem, sipos yumi ridim Tok blong God mo mekem i wok long laef blong yumi, yes sipos yumi obei mo mekem ‘stret olsem God i talem.’
Ol King—Olgeta We Oli Stap Tru Long God Mo Olgeta We Oli No Obei
12. (a) ?God i givim wanem loa long ol king long Isrel? (b) ?Taem ol king oli no obei, wanem frut i kamaot?
12 ?Olsem wanem long ol king long Isrel? Jeova i givim rul ya long king se: “Taem hem i sidaon olsem king long kingdom blong hem, hem i mas kopi long wan buk, loa ya we i stap long han blong ol pris, hemia ol Livaet. Mo hem i mas holem buk ya oltaem, mo i mas ridim long olgeta dei long laef blong hem blong lanem fasin fraet long Jeova, God blong hem. Olsem ya nao bambae hem i holem olgeta tok blong loa ya mo ol rul ya, bambae hem i folem olgeta.” (Dutronome 17:18, 19) ?Ol king blong Isrel oli obei long ol tok ya? Bighaf blong olgeta oli no obei. From samting ya, oli kasem ol trabol we Dutronome 28:15-68 i tokbaot. Biaen, ol man Isrel oli go wanwan, “stat long wan saed blong wol i go kasem narasaed blong wol.”
13. ?Olsem Deved, olsem wanem yumi save kasem blesing taem yumi soem se yumi laekem tumas Tok blong Jeova?
13 Be, Deved—faswan king long Isrel we i stap tru long God—i soem nambawan fasin blong onagud long Jeova. Hem i pruvum se hem i ‘wan pikinini laeon long Juda,’ we i pija blong Jisas Kraes, ‘laeon long laen blong Juda, rus blong Deved’ we i stap win long faet. (Jenesis 49:8, 9; Revelesen 5:5) ?Deved i kasem paoa blong hem weples? Hem i gat bigfala tangkyu long Tok blong Jeova we oli raetem, mo hem i folem long laef blong hem. Long Ol Sam 19, ‘wan singsing blong Deved,’ yumi ridim se: “Loa blong [Jeova] i stretgud.” Afta we hem i tokbaot ol rul, ol loa, ol komanmen, mo fasin blong Jeova blong jajem man, Deved i gohed, i se: “Man i wantem olgeta moa, i winim we hem i wantem gol we i beswan, mo oli swit moa, i winim eg blong sugabag. Oli stap givim save long mi, we mi mi man blong wok blong yu. Yu yu stap givim pei long mi, from we mi stap obei long olgeta.” (Ol Sam 19:7-11) !Sipos fasin blong ridim Tok blong Jeova evri dei mo tingting dip long hem i givim pei 3,000 yia bifo, ale tingbaot olsem wanem fasin ya i save givim moa pei tede!—Ol Sam 1:1-3; 13:6; 119:72, 97, 111.
14. ?Wanem fasin blong Solomon we i soem se save nomo i no naf?
14 Be, save nomo i no naf. I impoten tu we ol man blong God oli mekem save ya i wok long laef blong olgeta, blong yusum save ya blong mekem ol samting we God i wantem—yes, blong mekem i ‘stret olsem God i talem.’ Yumi save luk samting ya long eksampel blong boe blong Deved, Solomon, we Jeova i jusumaot “blong sidaon long jea blong king blong [Hem] long Isrel.” Jeova i givim wok long Solomon blong bildim haos prea. Mo hem i mas folem plan we “God i givim” long Deved. (1 Kronikel 28:5, 11-13) ?Olsem wanem Solomon i save mekem bigfala wok ya? Jeova i ansa long wan prea blong Solomon, nao i givim waes mo save long hem. Wetem waes mo save ya, mo from we hem i folemgud plan we God i givim, Solomon i wokem naesfala haos ya, we biaen i fulap long paoa blong Jeova. (2 Kronikel 7:2, 3) Be biaen, Solomon i foldaon. ?I foldaon long wanem? Long saed blong king we i rul long Isrel, loa blong Jeova i talem se: “Hem i no mas gat plante waef, blong oli no tanem hat blong hem i gowe long God.” (Dutronome 17:17) Be Solomon i “gat seven handred waef, ol gel blong king, mo tri handred woman bakegen we hem i stap wetem olgeta. Nao sloslou, ol waef blong hem . . . oli pulum hat blong hem blong mekem wosip long ol narafala god.” Long ol yia we oli kam biaen, Solomon i no moa mekem ‘stret olsem God i talem.’—1 King 11:3, 4; Nehemaea 13:26.
15. ?Olsem wanem Josia i ‘mekem stret olsem God i talem’?
15 I gat sam king blong Juda we oli obei. Josia i laswan long olgeta ya. Long yia 648 B.K.T., hem i stat blong klinimaot fasin blong wosip long aedol long kantri ya, mo i mekem haos prea blong Jeova i kam nyuwan bakegen. Long haos prea ya, hae pris i faenem “buk blong loa blong Jeova, we han blong Moses i raetem.” ?Josia i mekem wanem wetem buk ya blong loa? “Nao king wetem olgeta man long Juda mo evriwan we oli stap long Jerusalem, ol pris mo ol Livaet, ol haeman wetem olgeta we oli no gat nem, oli go long haos blong Jeova. Nao hem i ridimaot ol tok blong buk ya blong promes, we oli faenem long haos blong Jeova, blong ol man oli harem. Mo king i stap stanap long ples blong hem mo i mekem wan promes long fored blong Jeova. Hem i promes se bambae hem i folem Jeova mo obei long ol loa mo ol tok blong hem mo ol rul blong hem long olgeta hat mo laef blong hem, mo bambae hem i folem ol tok blong kontrak we oli raetem long buk ya.” (2 Kronikel 34:14, 30, 31) Yes, Josia i mekem ‘stret olsem God i talem.’ Hem i obei long Jeova. From samting ya, Jeova i wet kasem taem blong ol stronghed pikinini blong Josia, blong mekem jajmen blong hem i kamtru long ol man Juda we oli no stap tru long hem.
Mekem Tok Blong God i Wok
16, 17. (a) ?Yumi mas biaenem Jisas long wanem samting? (b) ?Hu ya ol narafala man blong stap tru long God we oli givim eksampel long yumi?
16 Long olgeta man we oli laef long wol, Masta Jisas Kraes i nambawan eksampel long fasin blong tingting dip long Tok blong God mo mekem i wok. Tok blong God i olsem kakae blong hem. (Jon 4:34) Hem i talem long ol man we oli stap lesin long hem se: “Mi, mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem.” (Jon 5:19, 30; 7:28; 8:28, 42) Jisas ‘i mekem stret olsem God i talem.’ Hem i talem se: “Mi no kamaot long heven blong mekem ol samting we mi nomo mi wantem. Mi kam blong mekem ol samting we hemia we i sanem mi, hem i wantem.” (Jon 6:38) Yumi we i givim laef blong yumi finis long God olsem ol Wetnes blong Jeova, yumi kasem advaes blong mekem ‘stret olsem God i talem’ taem yumi biaen long Jisas.—Luk 9:23; 14:27; 1 Pita 2:21.
17 Oltaem, wok blong God i stap long fasples long tingting blong Jisas. Hem i savegud Tok blong God, mo from samting ya, hem i naf blong givim ansa we i stanap long Baebol. (Matyu 4:1-11; 12:24-31) Sipos yumi ridim Tok blong God oltaem, yumi tu i save kam ‘waes long olgeta samting, bambae yumi gat evri samting blong mekem ol gudfala wok we i stap.’ (2 Timote 3:16, 17) I gud yumi folem eksampel blong ol trufala man blong Jeova long taem bifo mo long ol yia we oli kam biaen. Mo, nambawan eksampel we yumi mas folem, hemia Masta, Jisas Kraes, we i talem se: “Mi mas mekem ol man long wol oli save we mi laekem Papa blong mi tumas mo mi stap mekem ol samting nomo we hem i talem long mi blong mi mekem.” (Jon 14:31) Yumi tu i mas gohed blong mekem ‘stret olsem God i talem.’ Olsem nao, yumi soem se yumi laekem God tumas.—Mak 12:29-31.
18. ?Wanem i mas pusum yumi blong “mekem ol samting we tok ya i talem,” mo bambae yumi tokbaot wanem samting biaen?
18 Taem yumi tingting dip long fasin obei blong ol man blong God long taem we oli raetem Baebol, samting ya i save leftemap tingting blong yumi blong wok strong long ol las dei ya blong rabis wol blong Setan. (Rom 15:4-6) Yes, samting ya i mas pusum yumi blong “mekem ol samting we tok ya i talem” long wan fasin we i fulwan, olsem bambae yumi tokbaot long haf we i kam biaen.—Jemes 1:22.
[Futnot]
a B.K.T. i minim Bifo Kristin Taem.
?Yu Yu Tingbaot?
◻ ?Sipos yumi “laekem God tumas,” bambae yumi mekem wanem?
◻ ?Yumi lanem wanem long eksampel blong Noa, Moses, mo Josua?
◻ ?Ol king long Isrel oli obei long “tok” blong God go kasem wanem mak?
◻ ?Olsem wanem Jisas i Eksampel blong yumi long fasin blong mekem ‘stret olsem God i talem’?
[Tok Blong Pija Long Pej 15]
Noa, Moses, mo Josua, oli mekem ‘stret olsem God i talem’