Oli Hivap Wanples Olsem Ol Hapi Man Blong Presem God

OL MAN blong Jeova God bifo, oli kasem oda ya se oli “mas haremgud nomo” taem oli hivap wanples blong wosip. (Dutronome 16:15) Ol Distrik Asembli long 1995 go kasem 1996 we stampa tok blong olgeta, “Ol Hapi Man blong Presem God,” oli givim gudfala risen long ol Wetnes blong Jeova blong glad.

From ol asembli ya, bilif blong ol man i kam strong moa. Oli soemaot tu, olsem wanem blong faenem glad long wol ya we i no gat glad. Bambae yumi tokbaot wanwan dei blong asembli ya.

‘!Yufala i Presem Jeova . . . Yufala i Glad!’

Tok ya antap we i stampa tok blong faswan dei blong asembli ya, i stanap long Ol Sam 149:​1, 2. Tok ya “Yumi Gat Gudfala Risen Blong Singaot From Glad,” i tokbaot profet tok blong Aesea japta 35 mo olsem wanem hem i kamtru. Profet tok ya i kamtru long ol man Isrel bifo. Mo hem i kamtru long taem blong yumi tu, taem ol man blong Jeova oli kasem bakegen olgeta blesing mo gudfala samting long wan paradaes long saed blong speret. Taswe, ol man we oli kam long asembli, oli gat risen blong singaot from glad. ?From wanem? From stampa tingting we God i gat long saed blong ol man blong hem, hemia wan paradaes long saed blong speret, mo i no longtaem, wan prapa paradaes long wol.

Bigfala tok blong asembli, “Stap Olsem Wan Grup Blong Ol Hapi Man Blong Presem God Long Ful Wol,” i givim ansa long kwestin ya se: ?Wanem i mekem se yumi defren long wol ya? Ansa se, fasin blong yumi blong joengud long wosip blong Jeova. Nomata weples ol Wetnes blong Jeova oli stap long wol ya, oli tokbaot mo oli tijim sem samting nomo. Mo tu, oli glad long stampa tingting blong Jeova blong mekem nem blong hem i tabu, mo blong leftemap hae rul blong hem tru long Kingdom blong hem. ?Be olsem wanem Jeova i stap givhan long yumi blong joen long stampa tingting ya blong hem? Hem i putum trutok blong Baebol long han blong yumi. Hem i givim tabu speret blong hem long yumi. Hem i blesem yumi wetem wan kampani blong ol brata mo sista long olgeta ples long wol. Mo hem i stanemap wan plan we yumi save folem blong wosip long hem long klin fasin. Famle blong yumi raonabaot long wol i givhan long yumi blong mekem wok blong Jeova wetem bigfala glad long hat blong yumi.

“Stap Longwe Long Ol Fasin Blong Wol We i No Gat Wan Doti Blong Hem i Stap Long Yumi.” Tok ya i makemgud se yumi nidim blong stap longwe long ol doti blong wol ya, olsem fasin blong no mekem i sem mak long olgeta man, mo fasin blong tinghae moa long ol rij man i bitim ol puaman. (Jemes 2:​5-9) Maet samfala oli joen nomo wetem olgeta ya we oli blong sem kantri olsem olgeta, no oli gat plante mane olsem olgeta. Be, maet oli no joen wetem ol Kristin brata mo sista we oli pua mo we oli no gat plante samting. Maet sam narafala oli gat fasin blong laekem moa olgeta we oli lidim kongregesen.a Oli fogetem se nambawan blesing we eni man i save gat, i blong stap olsem wan Wetnes blong Jeova. From samting ya, yumi no mas letem ol fasin blong wol ya oli mekem yumi kam doti mo spolem pis blong kongregesen.​—⁠2 Pita 3:⁠14.

Tok ya “?Mi Mi Rere Blong Mared?” i soem se plante oli mared kwiktaem tumas. Samfala oli mared blong ronwe long ol trabol we oli kasem long haos, no from we ol fren blong olgeta oli mared. Be, ol gudfala risen blong mared hemia: blong joen wetem wan narafala we i gat sem tingting blong kasem ol mak long saed blong speret, from trufala lav, from we yumi nidim wan gudfala fren mo yumi wantem harem sef, mo maet from we yumi wantem gat pikinini. Wan man we i wantem mared, i nidim blong kasem trening long saed blong speret fastaem. Antap long ol narafala samting, hem i nidim blong putum nyufala laef mo wokem ol gudfala fasin. I waes tu blong mekem sua se man no woman we bambae yu mared wetem hem, i soemaot klia se hem i gat wan trufala fasin fren wetem Jeova, mo i soemaot respek long ol narafala. I waes tu blong askem advaes blong sam Kristin we oli bigman long saed blong speret.​—⁠Proveb 11:⁠14.

Biaen long tok ya we i givimaot plante waes advaes, i gat wan narafala tok we nem blong hem, “Ol Papa Mama We Oli Haremgud Long Ol Pikinini Blong Olgeta.” Taem wan bebi i bon, oltaem i mekem bigfala glad i kamaot. Be, i wan bigfala wok tu blong gat pikinini. (Ol Sam 127:⁠3) Olsem nao, i impoten we ol papa mama oli tijim ol pikinini blong olgeta blong laekem Jeova tumas. Ol papa mama oli save mekem olsem, sipos oli tokbaot Jeova oltaem long ol pikinini blong olgeta, mo sipos oli folem ol rul blong Baebol long famle blong olgeta.

Faswan dei blong asembli i finis wetem wan sapraes​—⁠nyufala buklet we nem blong hem Jehovah’s Witnesses and Education. Buklet ya i eksplenem klia se ol Wetnes “oli leftemap tingting blong ol pikinini blong olgeta blong wok had mo blong tinghevi long ol skul wok blong olgeta.” Mo tu, buklet ya i eksplenem nambawan frut we i kamaot long ol klas we ol Wetnes blong Jeova oli mekem plante yia finis long Naejeria, Meksiko, mo sam narafala kantri, blong tijim ol man blong rid mo raet. Buklet ya i mas givhan long ol tija blong luk se ol Wetnes blong Jeova oli tinghevi long edukesen.

‘Presem God Oltaem, Olsem Wan Sakrifaes We Yumi Givim Long Hem’

Stampa tok ya blong seken dei i stanap long Hibrus 13:15. Long moning, i gat wan tok we i gat tri haf blong hem, stampa tok blong hem se, “Obei Long Tok We i Singaot Yumi Blong Presem Jeova.” Nomata hamas yia yumi gat, yumi save obei long tok ya we i singaot yumi. Ol Sam 148:​12, 13 i talem long ol yangfala man, ol gel, ol olfala man, mo ol boe, blong presem Jeova. Plante hapi man blong Jeova oli tekem jans blong presem Jeova moa. Long olgeta ples blong wol, bitim 600,000 brata sista oli stap mekem wok blong prij fultaem, hemia wok blong paenia. Bitim 15,000 oli wok olsem spesel paenia, mo kolosap 15,000 oli wok long ol Betel.

“Fasgud Mo Wok Wetem Ogenaesesen Blong Jeova,” i wan tok we i soem se ol man blong God oli nidim fasin fasgud long God. Blong fasgud long Jeova, i minim se yumi fasgud long hem wetem ona we i dip mo i strong tumas, i olsem wan strong glu. Blong fasgud long God yumi mas lukaotgud blong no brekem loa blong Hem, nating se ol narafala oli luk no oli no luk yumi. Mo tu, yumi mas fasgud long ol tijing blong Baebol we yumi faenem long ol Wajtaoa mo Wekap! mo long ol narafala kakae long saed blong speret we Watch Tower Sosaeti i stap givim long yumi. Biaen long tok ya, i gat tok blong baptaes. !Bigfala glad i kamaot taem plante man oli tekem baptaes blong soemaot klia se oli givim laef blong olgeta long Jeova!

Ol tok blong Hosea 4:​1-3 i stampa blong tok long aftenun, “Ol Nambawan Fasin No Ol Rabis Fasin​—⁠?Yu Stap Traehad Blong Kasem Weswan?” Nating se tingting blong wol i kam nogud long saed blong ol gudfala fasin, ol Kristin oli mas “traehad” blong holemtaet ol fasin we oli nambawan. (2 Pita 1:⁠5) Samting ya i stat long tingting nomo. Sipos tingting blong man i klin, bambae hem i talem ol tok we i klin, i gud, mo i leftemap tingting. Mo bambae hem i traehad oltaem blong folem stret fasin mo tok tru long ol narafala man. Blong folem nambawan fasin, i minim tu se yumi mas traem blong kasem save mo soem sore long ol Kristin we oli harem nogud from sam trabol, no from we tingting blong olgeta i foldaon.​—⁠1 Tesalonaeka 5:⁠14.

Narafala tok ya, “Lukaotgud Blong No Foldaon Long Ol Trap Blong Setan,” i givim woning long ol Kristin blong no pulum paoa blong ol rabis speret i kam long laef blong olgeta. Long saed blong ol defren rod we ol Kristin oli save yusum blong winim sik, oli mas lukaotgud blong no yusum ol fasin olsem hypnotismb no ol rod we oli joen wetem wok blong ol rabis speret. I stap long olgeta wanwan blong jusum wanem narafala rod oli wantem yusum blong keagud long helt blong olgeta.

Seken dei blong asembli i finis wetem wan sapraes we i mekem yumi glad tumas​—⁠wan nyufala smol buk blong givhan long ol man we hat blong olgeta i stret. Olsem nao, bambae oli gohed kwiktaem kasem mak ya we oli naf blong givim laef blong olgeta long Jeova mo tekem baptaes. Nyufala buk ya we nem blong hem, Save Blong Lidim Yu Long Laef We i No Save Finis, i gat 192 pej blong hem. Buk ya Save, i eksplenem trutok long wan fasin we i leftemap tingting. Hem i no talem tumas toktok blong pruvum olsem wanem ol gyaman bilif oli rong. Ol klia tok we hem i yusum mo fasin blong hem blong eksplenemgud ol samting, i mas mekem i isi blong yusum buk ya blong lidim ol Baebol stadi, mo blong givhan long ol man blong kasem nambawan save long saed blong God, we bambae i mekem olgeta oli haremgud.

“Yufala i Haremgud, Yufala i Glad Olwe”

Ol tok ya blong Aesea 65⁠:​18, oli stampa tok blong namba tri dei blong asembli. Ol profet tok blong Baebol we oli stap kamtru, oli soemaot 1914 olsem yia we ol las dei blong rabis wol ya oli stat. Taswe, tok ya we i gat tu haf blong hem, “Ol Hapi Man Blong Presem God Long Ol Las Dei Blong Wol Ya,” i pulum tingting blong olgeta we oli stap lesin. Ol brata we oli mekem tufala tok ya oli soemaot olsem wanem wol ya we i leftemap fasin griri mo raf fasin i pulum plante man. Biaen, bambae ol man ya oli kasem jajmen wetem wol ya we Setan i rul long hem. Taswe, naoia i taem blong jusum wan rod. ?Yumi wantem stap long wanem saed? ?Yumi wantem wosipim Jeova mo leftemap hae rul blong hem, no yumi glad blong mekem ol samting we Setan i wantem mo letem hem i rul long yumi? Yumi evriwan i mas soemaot klia se yumi stanap strong long saed blong Jeova.

Pablik tok blong asembli ya we nem blong hem, “!Presem King Blong Olwe!” i givim strongfala kakae long olgeta we oli lesin. Ol man oli no naf blong kasem save se laef blong olwe i olsem wanem, be Jeova i kasem save fulwan long kaen laef olsem. Man blong raetem Sam i singsing se: “Hae God [Jeova], bambae yu yu stap King oltaem, gogo i no save finis.” (Ol Sam 10:16) King ya blong olwe i mekem rod, tru long pikinini blong hem, Jisas Kraes, blong ol man oli save haremgud long laef blong olwe. (Jon 17:⁠3) Brata we i givim tok i talem se: “Yes, yumi ol sinman, yumi save kasem laef blong olwe tru long tijing blong God mo bilif long ransom sakrifaes blong Jisas.”

Long en blong asembli, laswan tok we nem blong hem, “Glad Blong Presem Jeova Evri Dei,” i leftemap tingting blong olgeta we oli kam long asembli ya. Oli glad blong harem ripot we i soemaot se wok blong mekem disaepol long olgeta ples long wol i stap gohed gud. Tok ya i pusum olgeta man we oli kam long asembli ya blong ‘presem Jeova evri dei mo leftemap nem blong hem blong olwe.’​—⁠Ol Sam 145:⁠2.

Ol rabis fasin we ol man oli stap mekem long ol narafala man oli bitim mak, mo oli karemaot glad long wol. Be, ol man we oli bilif fulwan long Jeova, oli save kasem glad we God i stap givim. From samting ya, ol Wetnes blong Jeova, we oli olsem wan kampani blong ol brata long olgeta ples blong wol, oli save talem bakegen ol tok blong Ol Sam 35:​27, 28 se: “Olgeta ya we oli wantem tumas blong yu yu talemaot se mi mi stret man, i gud olgeta ya oli glad, oli stap singsingaot bigwan, i gud oli stap taltalem oltaem se ‘!Hae God, hem i hae we i hae! Hem i glad tumas taem man blong wok blong hem i win.’ Nao bambae mi mi talemaot stret fasin blong yu, mo bambae mi stap presem yu evri dei nomo, i stat long moning, gogo kasem tudak.”

[Ol futnot]

[Tok Blong Pija Long Pej 7]

Bambae buklet ya “Jehovah’s Witnesses and Education” i givhan long olgeta famle

[Tok Blong Pija Long Pej 8, 9]

Nyufala buk ya, “Save Blong Lidim Yu Long Laef We i No Save Finis,” i eksplenem trutok blong Baebol long wan fasin we i leftemap tingting

[Tok Blong Pija Long Pej 9]

Plante man oli tekem baptaes blong soemaot se oli givim laef blong olgeta long Jeova

[Tok Blong Pija Long Pej 9]

Drama blong asembli ya we nem blong hem “Ona Long Ol Gudfala Brata Mo Sista Taem Oli Kam Olfala,” i kasem hat blong plante man we oli luk hem