Yu No Mas Mestem Distrik Asembli Ya “Ol Hapi Man Blong Presem God”

Tri dei blong haremgud long tijing blong Baebol i stap rere long yu. Yu mas stap taem program i stat wetem myusek long 9:40 long Fraede moning. Haremgud long faswan tok, “!Welkam Yufala, Ol Hapi Man Blong Presem Jeova!” mo stampa tok, “Stap Olsem Wan Grup Blong Ol Hapi Man Blong Presem God Long Ful Wol.”

Program blong Fraede aftenun bambae i tokbaot ol yangfala, ol papa mama blong olgeta, mo edukesen. Plante bambae oli glad blong harem tok ya “?Mi Mi Rere Blong Mared?” Ol papa mama oli mas lesingud long haf ya “Ol Papa Mama We Oli Haremgud Long Ol Pikinini Blong Olgeta.” Laswan tok long program blong aftenun ya hemia, “Yusum Edukesen Blong Presem Jeova.” Samting we i kamaot bambae i halpem ol yangfala blong gohed gud long skul.

Long Sarede moning, tok we i gat ol defren haf blong hem bambae i leftemap tingting blong plante man, nem blong hem se, “Obei Long Tok We i Singaot Yumi Blong Presem Jeova.” Laswan tok long moning ya, hemia tok blong baptaes. Long aftenun, bambae i gat wan klia tok blong soem olsem wanem Setan i bin yusum fasin we man i gat blong wantem seks, blong mekem plante i foldaon, stat long taem bifo kasem naoia. Program blong dei ya bambae i finis wetem sam save we bambae i mekem ol man blong God oli naf blong gohed wetem wok blong prij long fasin we i karem moa frut.

Program blong Sande moning bambae i tokbaot ol nambawan save long saed blong bigfala nid blong no wet blong ron kwik insaed long sefples, bifo we “bigfala trabol” i stat. (Matyu 24:21) Program bambae i finis wetem impoten drama ya “Ona Long Ol Gudfala Brata Mo Sista, Taem Oli Kam Olfala.” Long aftenun, wan narafala impoten haf blong asembli bambae i kamaot, hemia pablik tok, “!Presem King Blong Olwe!”

Bambae oli mekem asembli ya long Haos Kingdom blong ol Wetnes blong Jeova, long Luganville, Santo, long Desemba 8 kasem 10, 1995.