!Kam Long Distrik Asembli Blong “Ol Man We Oli Laekem Fasin Fri”!
YU SAVE kasem fulap save long Baebol long tri gudfala dei blong asembli ya. I gud yu stap long ples blong asembli long Fraede moning, from we long 20 menet i lusum 10 kilok, asembli bambae i stat wetem myusek. Yu save harem gud long faswan tok ya: “?From Wanem Yumi Mas Luklukgud Long Loa Ya Blong Fasin Fri, We i Stret Olgeta?” Lashaf blong program long moning ya, hemia stampa tok blong asembli: “?Blong Wanem God i Givim Fasin Fri Long Yumi, Mo Olsem Wanem Blong Yusum Fasin Ya?”
Long Fraede aftenun, ol Kristin oli save kasem ol gudfala advaes blong givhan long olgeta blong mekem minista wok blong God. Tu long ol tok blong aftenun ya, hemia: “?Yu Yu Bisi Long Ol Wok We Oli Blong Ded Nomo No Long Ol Wok Blong Jeova?” mo “Ol Man Ya Oli Fri, Be Oli Mas Talemaot Long Fes Blong God Ol Samting We Oli Mekem.” Bambae sam man oli dresap gud blong plei long wan drama we i pulum yumi blong yusum fasin fri blong yumi blong mekem wok blong Jeova. Drama ya bambae i soemaot sam samting we oli kamaot long Esra mo ol fren blong hem long 468 B.K.T., taem oli aot long Babilon blong gobak long Jerusalem blong flasem haos blong God.
Long Sarede moning i gat wan tok long program we i gat tri haf blong hem: “Fasin Fri Wetem Responsabiliti Insaed Long Famle.” Afta i gat wan tok we i givhan long yumi blong skelemgud laef blong yumi: “Holem Fasin Fri Blong Mekem Wok Blong Jeova.” Nao biaen bakegen, i gat tok long saed blong ol Kristin we oli givim laef blong olgeta i go long Jeova mo baptaes. Long Sarede aftenun, plante man bambae oli wet blong harem haf ya blong program: “?Mared Hem i Stampa Blong Fasin Glad?” Program blong dei ya bambae i finis wetem wan bigfala samting we bambae i givim bigfala glad long ol man we oli laekem fasin fri.
Yu mas stap long ples blong asembli long Sande moning blong harem wan tok we i gat tri haf blong hem: “Yumi Mekem Wok Olsem Man Blong Pulum Man.” Tok ya bambae i storeyan long parabol blong Jisas long man blong pulum net. Bambae hem i tokbaot olsem wanem yumi save wok blong mekem parabol ya i kamtru. Tufala las tok blong moning ya i impoten tumas: “Stap Wekap Long ‘Taem Blong En’ ” mo “?Hu Bambae i Ronwe Long ‘Taem Blong Trabol’?” Long aftenun, yu no mas mestem pablik tok ya: “Singaot From Nyufala Wol Blong God We Fasin Fri Bambae i Stap Long Hem.” Afta, wan tok bambae i storebaot Stadi blong Wajtaoa long wik ya. I gud yu karem magasin blong yu i kam long asembli long dei ya. Nao biaen, las tok blong asembli bambae i wekemap yumi blong gohed long wok blong Jeova.
Long manis Desemba 1991, i stat long 6 kasem 8, bambae oli mekem asembli ya long Haos-Kingdom blong ol Wetnes Blong Jeova long Port-Vila.