!Kam Long Distrik Asembli “Bilif Bong Tok Blong God”!

Plante milyan man bambae oli hivap long plante handred ples raon long wol. Long Yunaeted Stet nomo, oli mekem plan blong 193 asembli. Bambae oli mekem faswan asembli long Mei 23-​25, mo laswan long Septemba 12-​14. Ating wan long ol asembli ya blong tri dei ya​—Fraede kasem Sande​—bambae i stap long wan taon kolosap long ples blong yu.

Bambae yu kasem plante tijing long saed blong Baebol we oli givhan bigwan long laef blong yu. Long plante ples, program bambae i stat wetem myusek long haf pas naen long moning. Blong 25 menet long Fraede moning, bambae oli askem ol kwestin long sam brata mo sista, we bilif long Tok blong God i bin jenisim laef blong olgeta bigwan. Laswan tok long moning ya, hemia stampa tok blong asembli, “Yumi Stap Wokbaot From Bilif, i No From Ol Samting We Yumi Stap Luk.”

Faswan tok long Fraede aftenun, bambae i tokbaot impoten ples we ol yangfala oli gat long Kristin kongregesen.a Biaen, bambae i gat wan tok we i gat tri defren haf blong hem. Bambae hem i tokbaot ol rul blong Baebol we oli joen wetem fasin blong ol Kristin, long saed blong toktok, respek mo kaen fasin, mo fasin blong putum klos mo mekem hea. Biaen, bambae i gat tufala tok ya, “Lukaotgud Blong No Kam Slak Long Saed Blong Bilif,” mo “Tok Blong God i Laef.” Bambae oli tokbaot ol gudfala advaes long Hibrus japta 3 mo 4. Laswan tok blong Fraede hemia, “Wan Buk Blong Olgeta Man.”

Faswan tok blong Sarede moning hemia, “Bilif We i No Gat Wok i Go Wetem, i Ded.” Long moning ya, bambae i gat wan narafala tok we i impoten, “Yumi Mas Putum Rus i Godaon Dip Mo Stanap Strong Long Trutok.” Bambae hem i soem olsem wanem yumi save gru moa long saed blong speret. Laswan tok blong moning ya, hemia wan we yumi gat oltaem long ol asembli, “Bilif Long Tok Blong God i Lidim Yumi Blong Tekem Baptaes.” Afta long samting ya, bambae ol nyufala disaepol oli save tekem baptaes.

Faswan tok blong Sarede aftenun, “Faet Strong Blong Holemtaet Bilif,” i tokbaot ol advaes long buk blong Jud long Baebol. Wan narafala tok blong wan haoa we i gat ol defren haf blong hem, nem blong hem se “Bambae Yumi Go Long Haos blong Jeova.” Bambae hem i tokbaot ol blesing we yumi kasem long ol Kristin miting. Dei ya bambae i finis wetem tok ya, “Plante Samting i Traem Bilif Blong Yu Finis.”

Long Sande moning, bambae i gat wan tok we i gat tri haf blong hem. Hem i tokbaot buk blong Joel, mo i soem olsem wanem ol tok blong Joel oli kamtru long taem blong yumi. Biaen, i gat wan drama we i stanap long Baebol, nem blong hem, “Mekem Ae Blong Yu i Stap Klia Gud.” Wan bigfala samting long asembli ya, hemia pablik tok long aftenun ya, “Bilif Mo Fyuja Blong Yu.”

I sua se, bambae yu strong moa long saed blong speret sipos yu stap long asembli ya. Bambae ol Wetnes oli welkamem gud yu long evri haf blong asembli ya. Mekem plan naoia blong kam. Blong save asembli we i kolosap moa long ples blong yu, askem ol Wetnes blong Jeova long Haos Kingdom, no raet i kam long ol man we oli wokem buk ya. Mo tu, yu save faenem adres blong ol asembli long Yunaeted Stet, Kanada, Briten, mo Aerlan, long Wekap! (Engglis) blong Ogis 22.

[Futnot]