!Yu No Mas Mestem Samting Ya!
?MESTEM wanem? !Hemia Distrik Asembli blong ol Wetnes blong Jeova, “Ol Man Blong Talemaot Pis Blong God,” we i stap kam kolosap nao! Long plante ples, asembli ya bambae i stat wetem myusek long haf pas naen long Fraede moning. Fastaem, bambae oli askem kwestin long sam brata mo sista, mo bambae yumi lesin long ol tok blong olgeta we i save mekem bilif blong yumi i kam strong moa. Nem blong haf ya, “Tok Blong Samfala We Oli Wok Strong Blong Talemaot Pis.” Afta long samting ya, bambae yumi glad blong lesin long wan narafala tok we i leftemap tingting, nem blong hem, “?God i Wantem Yumi Blong Mekem Wanem?”
Long Fraede aftenun, i gat stampa tok blong asembli ya we i wekemap tingting blong yumi, nem blong hem, “Wok Blong Yumi Olsem Ol Man Blong Talemaot Pis Blong God.” Biaen, tok ya, “Givhan Long Ol Narafala Blong Kasem Save Long Ol Samting We God i Wantem Olgeta Blong Mekem,” bambae i givim sam advaes long fasin blong tijim ol nyuwan. Afta long hemia, bambae i gat wan tok we i gat ol defren haf blong hem, “Lukaot Blong No Foldaon Long Ol Trap We Oli Haed Long Ol Pleplei.” Ol laswan tok long Fraede, hemia “Agensem Setan—Yu No Mas Letem Hem i Traem Winim God Long Laef Blong Yu,” mo “Sapotem mo Fasgud Long Trutok Blong Baebol.”
Program blong Sarede moning bambae i soemaot olsem wanem wok ya blong mekem disaepol i impoten tumas, long wan tok we i gat tri haf blong hem, “Ol Man Blong Karem Mesej Long Saed Blong Gud Nyus Blong Pis.” Ol laswan tok long moning ya hemia, “Fasin Blong Givim Presen Wetem Gladhat Insaed Long Ogenaesesen Blong Jeova” mo “Laef Mo Pis Tru Long Fasin Blong Givim Laef i Go Long God Mo Baptaes.” Afta long samting ya, bambae ol nyufala disaepol oli gat jans blong tekem baptaes.
Tok long Sarede aftenun, “Tingbaot Wanem Tingting Blong Jeova Long Ol Samting” bambae i ansarem ol kwestin olsem hemia, ‘?Ol Kristin oli stap joen long wan wok blong seraotem ol man tede?’ mo ‘?Wanem tingting blong Baebol long saed blong fasin blong kilim man i ded blong panisim hem?’ Mo tu, bambae yu glad blong harem wan tok we i gat tu haf blong hem, “God Blong Pis i Stap Tingbaot Yu,” antap moa, laswan tok we nem blong hem, “Traehad Blong Kasem Pis Blong God Long Famle Laef.”
Long Sande moning, bambae i gat wan tok we i gat tri haf blong hem, “Makemaot Ol Trufala Man Blong Karem Mesej Blong Pis” mo tok ya “Lesin Mo Obei Long Tok Blong God.” Laswan tok long moning ya, hemia wan drama we ol man blong plei long hem bambae oli putum ol klos blong bifo. Bambae hem i soemaot ol impoten lesen we yumi mas lanem long store blong Baebol long saed blong Jaj Gideon.
Long laswan haf blong asembli ya long Sande aftenun, bambae i gat wan pablik tok we nem blong hem, “!Trufala Pis i Kam Nao!—?Wanem Stampa Blong Hem?” Ale, asembli i finis wetem nambawan tok ya, “Stap Gohed Olsem Ol Man Blong Talemaot Pis Blong God.”
Mekem plan naoia blong stap long asembli ya. Blong save stret ples blong hem we i kolosap long ples blong yu, askem ol Wetnes blong Jeova long Haos Kingdom, no raet i kam long ol man we oli wokem buk ya.