Ripot Long Wok Blong Kingdom
“Saenaot Olsem Ol Laet Long Wol”
OL WETNES BLONG JEOVA oli defren long ol narafala skul. Mo oltaem oli kasem nogud tok from we oli no agri blong karem blad blong narafala long bodi blong olgeta. Be tingting ya we oli gat, i stanap strong long Baebol. Baebol i soemaot se God i no agri we man i yusum blad long fasin we i no stret, from we blad i sas long ae blong hem. (Jenesis 9:3, 4; Levitikas 17:14) Ol Wetnes blong Jeova oli stadigud long ol tok blong Baebol long saed ya. Taswe, oli kasem klia se taem Baebol i talem ‘no tekem blad,’ i minim tu fasin ya we oli yusum tede blong putum blad long ol sikman.—Ol Wok 15:19, 20, 28, 29.
Long ol yia we oli jes pas, plante dokta mo man we oli wok blong givhan long ol sikman, wetem kot blong samfala kantri, oli sapotem disisen blong ol Wetnes blong Jeova blong no tekem blad. Eksampel, long Denmak, wan yangfala mama we i save tok blong Baebol long saed blong blad, i ded from wan akseden long trak. Hem i no agri blong karem blad. Taswe, blong wan manis, ol dokta blong hem oli pusum ol man blong mekem plante toktok agensem ol Wetnes blong Jeova, long radyo, nyuspepa, mo televisin.
Papa mama blong yangfala woman ya, oli askem ol bigman blong lukluk i go moa long bisnes ya. Nao long Epril 1994, Grup Blong Man We Oli Lukluk Long Ol Komplen Blong Ol Sikman long Denmak, oli talemaot wan disisen. Oli talem se yangfala woman ya i ded, i no from we hem i no karem blad, be from we ol dokta oli no mekemgud wok blong olgeta. Disisen ya i stanap long ol stadi we Bod blong Forensik Meresin mo ol bigman long saed blong helt oli mekem. Nasnal Bod blong Helt i sanem wan leta i go long olgeta hospital long Denmak. Leta ya i talem se, hemia wok blong ol dokta blong yusum ol narafala rod we oli beswan, blong givhan long ol Wetnes blong Jeova, wetem respek long disisen blong olgeta blong no tekem blad.
Narafala eksampel, hemia long saed blong Dan, wan Wetnes we i gat 15 yia mo i ded from sik ya lukimia. Ol dokta oli respektem strongfala disisen blong Dan blong no tekem blad. From samting ya, ol man oli tok nogud long ol dokta tru long radyo mo nyuspepa, se ded blong Dan i fol blong olgeta. Be, plante narafala man oli no agri long ol toktok agens ya.
Eksampel, hedmasta blong skul we Dan i bin go long hem, i kam long Haos Kingdom blong harem tok we oli mekem blong berem Dan. Hem i talem se hem i sapraes long ol gyaman toktok we oli talem long radyo, televisin mo nyuspepa long saed blong ded blong Dan. Hem i askem sam kwestin long saed blong ol Wetnes blong Jeova, long wan Wetnes we i wok wetem hem. Hem i agri blong karem video kaset ya Jehovah’s Wetnesses—The Organization Behind the Name. Hem i glad tumas long ol samting we hem i luk long kaset ya. Taswe hem i mekem plan blong soem kaset ya long olgeta tija long skul. Biaen, oli soem long olgeta studen long skul tu, wan klas afta narawan.
Minista blong Helt long Denmak, hem tu i no agri long ol nogud toktok we i kamaot long radyo mo televisin agensem ol dokta blong Dan, we oli sapotem disisen blong Dan. Hem i talem se ol dokta oli mekem i stret, taem oli respektem waes disisen blong Dan mo strongfala bilif blong hem.
I gat plante milyan man blong talemaot Kingdom we oli stap obei fulwan long ol loa blong God. From fasin obei blong olgeta, oli defren long ol narafala man, mo oli “saenaot olsem ol laet long wol.”—Filipae 2:12, 15, NW.