Glad Naoia Mo Blong Olwe
“Yufala i mas haremgud, yufala i mas glad blong olwe from ol samting we mi mi stap wokem. From we mi stap mekem Jerusalem i kam samting blong glad from, mo mi stap mekem ol man blong hem oli kam samting blong haremgud tumas from.”—AESEA 65:18.
1. ?Long ol handred yia we oli pas, trufala wosip i bin mekem wanem long ol man?
LONG ol handred yia we oli pas, fulap man oli faenem bigfala glad taem oli stap mekem wok blong trufala God, Jeova. Deved i wan we i glad tumas blong mekem trufala wosip. Baebol i talem se taem oli karem bokis blong kontrak i kam long Jerusalem, “Deved mo olgeta man Isrel oli tekem bokis blong Jeova i go long Jerusalem, we oli stap singaot bigfala from glad.” (2 Samuel 6:15) Glad ya blong mekem wok blong Jeova, i no wan samting blong bifo nomo. Yu save kasem glad ya. !Mo tu, yu save kasem ol nyufala glad, i no longtaem long fyuja!
2. Antap long faswan taem we Aesea japta 35 i kamtru long ol man Jyu we oli gobak long kantri blong olgeta, ?hu ol man tede we oli joen blong mekem i kamtru bakegen?
2 Long faswan stadi, yumi tokbaot faswan taem we nambawan profet tok blong Aesea japta 35, i kamtru. I stret nomo we yumi save kolem profet tok ya se, profet tok blong ples we i stanap bakegen, from we hemia nao samting we i hapen long ol man Jyu bifo. Long taem blong yumi, profet tok ya i stap kamtru long fasin we i kolosap sem mak. ?Olsem wanem? Stat long ol aposol blong Jisas mo ol narafala we oli hivap long dei blong Pentekos long yia 33 K.T.,a Jeova i yusum ol man Isrel long saed blong speret. Hemia ol man we tabu speret blong God i makemaot olgeta, we oli joen long grup ya we aposol Pol i kolem “Isrel blong God.” (Galesia 6:16; Rom 8:15-17) Mo tu, tingbaot se long 1 Pita 2:9, Pita i kolem ol Kristin ya se, “wan laen we God i jusumaot, wan kampani blong pris mo king, wan tabu nesen, ol man we oli blong God nomo.” (NW) Hem i gohed blong tokbaot wok we God i givim long Isrel long saed blong speret, se: “ ‘Yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.” (NW)
Profet Tok Ya i Kamtru Long Taem Blong Yumi
3, 4. ?Wanem ol samting we oli stap kamaot long wol taem Aesea japta 34 i kamtru bakegen long taem blong yumi?
3 I gat wan taem biaen long yia 1900 we smol grup blong Isrel long saed blong speret long wol ya, oli no gohed strong blong talemaot mesej ya. Oli no glad fulwan long nambawan laet blong God. Yes, oli stap long bigfala tudak. ?Wetaem ya? ?Mo Jeova i mekem wanem long olgeta?
4 Hemia long taem blong Faswan Bigfala Faet Blong Wol, smoltaem afta we Kingdom blong Mesaea blong God i stanap long heven long 1914. Ol nesen, we ol lida blong ol skul long plante kantri oli sapotem olgeta, oli kros tumas, oli stap raorao. (Revelesen 11:17, 18) Yes, God i agensem ol jyos blong Krisendom we oli tanem baksaed long trufala wosip, wetem ol lida blong olgeta, we oli leftemap olgeta antap long ol narafala man, sem mak olsem hem i agensem nesen blong Idom we i flas tumas. Taswe, Aesea japta 34 bambae i kamtru long taem blong yumi long ol skul blong Krisendom we Idom i pija blong olgeta. Yumi save sua we tok ya se Krisendom i mas lus blong olwe, bambae i kamtru, olsem we i kamtru fastaem long Idom bifo.—Revelesen 18:4-8, 19-21.
5. ?Olsem wanem Aesea japta 35 i kamtru long taem blong yumi?
5 ?Olsem wanem long profet tok blong Aesea japta 35, we i toktok plante long saed blong glad? Hemia tu i kamtru long taem blong yumi. ?Olsem wanem? Hem i kamtru taem Isrel long saed blong speret i kamfri long wankaen kalabus, mo i stanap strong bakegen. Yumi traem luk ol samting we oli kamaot long tiokratik histri, long ol yia we oli pas i no longtaem, we plante blong yumi i pastru long olgeta finis.
6. ?From wanem yumi save talem se smol grup blong ol man Isrel long saed blong speret oli bin stap long kalabus?
6 Long Faswan Bigfala Faet Blong Wol, blong smoltaem, smol grup blong ol man Isrel long saed blong speret, oli no stap klingud, mo oli no folemgud samting we God i wantem. Sam long olgeta oli kam doti from sam gyaman tijing, mo oli lego bilif from oli no stanap strong long saed blong Jeova taem oli kasem traem blong sapotem ol nesen we oli stap faet. Long ol yia ya blong faet, oli kasem ol defren kaen fasin agens, mo long plante ples, gavman i putum tabu long ol buk blong olgeta we oli tokbaot Baebol. Afta, oli holem sam impoten brata, mo oli putum olgeta long kalabus from sam gyaman poen agens long olgeta. Taem yumi tingtingbak, i isi blong luksave se, long wan fasin, ol man blong God long taem ya oli stap kalabus, oli no fri. (Skelem wetem Jon 8:31, 32.) Oli bin gat wan bigfala problem, hemia se oli no save lukluk klia nating long saed blong speret. (Efesas 1:16-18) Oli no moa yusum maot blong olgeta plante blong presem God. From samting ya, oli no karem frut long saed blong speret. (Aesea 32:3, 4; Rom 14:11; Filipae 2:11) ?Yu yu luksave olsem wanem samting ya i laenap wetem laef blong ol man Jyu long kalabus long Babilon bifo?
7, 8. ?Long wanem fasin smol grup ya blong ol tabu man long taem blong yumi oli bin stanap strong bakegen?
7 ?Be God i lego ol man blong hem long ol yia ya we oli pas i no longtaem, blong oli stap olsem nomo? No gat. Hem i gat strong tingting blong mekem olgeta oli stanap strong bakegen, folem profet tok blong Aesea. Taswe, profet tok ya long japta 35 i kamtru klia long taem blong yumi, taem smol grup blong ol man Isrel long saed blong speret oli kam rij mo strong bakegen long paradaes long saed blong speret. Long Hibrus 12:12, Pol i soem se Aesea 35:3 i pija blong wan samting. From samting ya, yumi luk se i stret we haf ya blong profet tok blong Aesea i mas gat wan mining long saed blong speret.
8 Afta long Faswan Bigfala Faet Blong Wol, i olsem we smol grup ya blong ol tabu man Isrel long saed blong speret, oli kamfri long kalabus. Jeova God i yusum Jisas Kraes, Bigfala Saeras, blong mekem olgeta oli kamfri. Olsem nao, smol grup ya oli save mekem wok blong bildim ol samting bakegen, olsem smol grup blong ol man Jyu bifo, we oli gobak long kantri blong olgeta blong bildim bakegen haos prea long Jerusalem. Mo tu, ol man Isrel long saed blong speret long taem blong yumi, oli save stat blong wokem mo kasem frut long wan paradaes long saed blong speret we i naes tumas, olsem wan garen blong Iden long saed blong speret.
9. ?Olsem wanem samting we Aesea 35:1, 2, 5-7 i stap tokbaot i bin kamtru long taem blong yumi?
9 Yumi holem ol save ya long tingting blong yumi, nao yumi lukluk bakegen long Aesea japta 35, fastaem long vas 1 mo 2. Ples we i luk olsem se i drae, i no gat wora nating, i stat blong gat plante flaoa mo karem plante frut, olsem flat ples blong Saron long taem bifo. Nao, lukluk vas 5 kasem 7. Smol grup blong ol tabu Kristin, we sam long olgeta oli laef yet tede mo oli gohed strong yet long wok blong Jeova, i olsem we ae blong olgeta i open mo oli kasem save long plante samting. Oli luksave moa klia, mining blong ol samting we i hapen long 1914 mo biaen. Samting ya i givhan bigwan long yumi long ‘bigfala kampani’ tu, we naoia yumi stap wok kolosap long smol grup blong ol tabu man ya we oli stap yet long wol.—Revelesen 7:9.
?Yu Yu Joen Blong Mekem Profet Tok Ya i Kamtru?
10, 11. (a) ?Olsem wanem yu bin joen blong mekem Aesea 35:5-7 i kamtru? (b) ?Wanem tingting blong yu long ol jenis ya?
10 Tingbaot yu wan, olsem wan eksampel. Bifo we yu save ol Wetnes blong Jeova, ?yu yu ridim Baebol oltaem? Sipos yes, ?yu bin kasem save long hem? Naoia, yu save trutok long saed blong ol dedman oli stap olsem wanem. Ating yu save soem long ol man we oli intres long kwestin ya, ol vas long saed ya, olsem Jenesis japta 2, Eklesiastis japta 9, Esikel japta 18, mo plante narafala vas. Yes, ating yu kasem save long ol tok blong Baebol long saed blong plante poen mo kwestin. Blong talem long isi fasin, naoia Baebol i klia long yu, mo yu save eksplenem plante samting long Baebol long ol narafala, olsem yu mekem finis plante taem.
11 Be, i gud we yumi wanwan i askem se: ‘?Olsem wanem mi bin lanem ol trutok ya blong Baebol? Bifo we mi stadi wetem ol man blong Jeova, ?mi mi faenem finis ol vas ya we yumi jes tokbaot? ?Mi mi kasem save long mining blong olgeta mo mi luksave stret risen from wanem oli impoten?’ Ating trufala ansa long ol kwestin ya se no gat. Yu no mas kros taem yu ridim tok ya, be yumi save talem se bifo, i olsem we yu blaen long saed blong ol vas ya mo mining blong olgeta. ?Samting ya i tru, no? Ol vas ya oli stap long Baebol, be yu yu no faenem olgeta mo kasem save long mining blong olgeta. Oraet, ?olsem wanem ae blong yu i open long saed blong speret? From samting we Jeova i bin mekem long smol grup blong ol tabu man blong hem, folem profet tok blong Aesea 35:5. Ale biaen, ae blong yu tu i open. Yu no moa stap long tudak long saed blong speret. Naoia yu save lukluk klia.—Skelem wetem Revelesen 3:17, 18.
12. (a) ?From wanem yumi save talem se naoia i no stret taem blong ol merikel long saed blong bodi? (b) ?Olsem wanem laef blong Brata F. W. Franz i soem mining blong Aesea 35:5 long taem blong yumi?
12 Ol man we oli stadigud long Baebol mo long ol wok blong God long ol handred yia we oli pas, oli save se naoia i no stret taem long histri blong luk ol merikel blong mekem ol sikman oli kamgud. (1 Korin 13:8-10) Taswe, yumi no wet se Jisas Kraes bambae i openem ae blong ol blaenman blong pruvum se hem i Mesaea, Profet blong God. (Jon 9:1-7, 30-33) Mo hem i no stap mekem ol man we sora blong olgeta i fas, oli harem ol samting. Taem Frederick W. Franz, wan tabu man blong God mo presiden blong Watch Tower Sosaeti bifo, i kasem kolosap 100 yia blong hem, kolosap hem i blaen, mo hem i mas yusum wan smol tul blong givhan long hem blong harem ol samting. Sam yia finis, hem i no save rid from ae blong hem i nogud. ?Be hu i save talem se hem i blaen mo i no save harem samting, long fasin we Aesea 35:5 i tokbaot? Nambawan fasin blong hem blong luklukgud long saed blong speret i wan blesing long olgeta man blong God raon long wol.
13. ?Wanem jenis no fasin blong stanap strong bakegen we ol man blong God long taem blong yumi oli bin kasem?
13 ?Olsem wanem long tang blong yu? Maet ol tabu man blong God oli no bin toktok taem oli stap kalabus long saed blong speret. Be taem God i mekem olgeta oli kamfri, tang blong olgeta i singaot wetem glad, from ol save we oli gat long saed blong Kingdom blong God we i stanap, mo from ol promes blong hem blong fyuja. Maet ol promes ya oli bin givhan long yu blong yusum tang blong yu tu. ?Long ol yia we oli pas, yu yu toktok plante long ol narafala long saed blong ol trutok blong Baebol? Maet i gat wan taem we yu bin tingting se: ‘Mi laekem blong stadi, be neva mi save go toktok wetem ol strenja.’ Be naoia, ?i tru se “tang blong man we i no save toktok” i stap “singaot from glad”?—Aesea 35:6.
14, 15. ?Olsem wanem plante oli stap wokbaot long “Tabu Rod” long taem blong yumi?
14 Ol man Jyu we oli kamfri long Babilon bifo, oli mekem wan longfala trep blong gobak long ples blong olgeta. ?Hemia i pija blong wanem long taem blong yumi? Traem ridim Aesea 35:8: “Bambae i gat wan bigfala rod long ples ya, yes wan rod. Bambae oli kolem rod ya se Tabu Rod. Ol man we oli no klin, oli no save wokbaot long rod ya.”
15 Afta we grup blong ol tabu man oli kamfri long kalabus long saed blong speret, olgeta, wetem plante milyan narafala sipsip, oli kamaot long Bigfala Babilon. Oli wokbaot long wan samting olsem wan rod, wan klin rod we i tabu, we i go kasem wan paradaes long saed blong speret. Yumi stap traehad fulwan blong kam naf mo blong stap oltaem long Tabu Rod ya. Tingbaot yu wan. ?Ol fasin blong yu naoia mo ol rul we yu stap folem, oli hae moa long olgeta we yu folem taem yu stap long wol? ?Yu yu stap traehad moa blong mekem tingting mo ol fasin blong yu oli laenap wetem hemia blong God?—Rom 8:12, 13; Efesas 4:22-24.
16. ?Wanem ol blesing we yumi save kasem taem yumi stap wokbaot long Tabu Rod ya?
16 Taem yu stap wokbaot long Tabu Rod ya, yu no fraet tumas se ol man we oli gat fasin olsem ol wael anamol bambae oli spolem yu. I tru se, long wol yu mas lukaotgud se ol griri man mo olgeta we oli no laekem narafala man oli no spolem yu, olsem we oli kakae yu. Plante man oli wantem tumas blong spolem narafala blong kasem samting blong olgeta. !Ol man blong God oli gat narafala fasin! Long medel blong olgeta, yu harem se yu stap sef. I tru, ol Kristin brata mo sista blong yu oli no stretgud olgeta. Samtaem, wan i mekem mastik no i mekem narafala i harem nogud. Be yu save se ol Kristin brata blong yu oli no stap traem blong mekem yu yu harem nogud no spolem yu. (Ol Sam 57:4; Esikel 22:25; Luk 20:45-47; Ol Wok 20:29; 2 Korin 11:19, 20; Galesia 5:15) Oli defren olgeta, oli soem se oli intres long yu. Oli givhan long yu. Oli wantem wok kolosap long yu.
17, 18. ?Long wanem fasin i gat wan paradaes naoia, mo paradaes ya i mekem wanem long yumi?
17 Taswe, taem yumi stadi long Aesea japta 35, yumi save tingbaot olsem wanem vas 1 kasem 8 i stap kamtru long taem blong yumi. ?I klia long yu se yumi faenem finis wan trufala paradaes long saed blong speret? I tru, paradaes ya i no stretgud olgeta—no yet. Be hem i wan trufala paradaes, from we long hem, yumi luk finis “paoa blong Jeova, ol naesfala wok blong God blong yumi,” olsem vas 2 i talem. ?Wanem risal blong samting ya? Vas 10 i talem se: “Olgeta we Jeova i sevem olgeta, bambae oli kambak, mo bambae oli kam long Saeon we oli stap singaot from glad. Bambae glad i stap long hed blong olgeta blong longtaem. Bambae oli singaot mo oli glad, bambae oli no moa krae mo fasin blong harem nogud bambae i finis olgeta.” Tru ya, from we yumi kamaot finis long ol gyaman skul mo yumi stap traehad blong folem trufala wosip we God i glad long hem, yumi kasem bigfala glad.
18 Glad we yumi kasem from trufala wosip i stap kam antap oltaem, ?i tru? Yu luk ol nyuwan we oli mekem ol jenis long laef blong olgeta mo oli stat blong stanap strong long trutok blong Baebol. Yu luk ol yangfala long kongregesenb we oli kam bigman, mo oli gohed gud long saed blong speret. Yu go long ol ples blong baptaes, mo yu luk baptaes blong plante we yu savegud olgeta. ?Ol samting ya, oli givim risen long yu blong glad, yes blong glad bigwan tede? Yes. !Yumi glad tumas taem ol narafala oli joen long fasin fri blong yumi long saed blong speret, mo long ol gudfala samting long paradaes long saed blong speret!
!Profet Tok Ya Bambae i Kamtru Bakegen!
19. ?Aesea japta 35 i fulumap yumi wetem wanem hop long saed blong fyuja?
19 Yumi bin tokbaot olsem wanem Aesea japta 35 i kamtru fastaem long ol man Jyu, taem oli gobak long kantri blong olgeta, mo olsem wanem hem i stap kamtru tede long saed blong speret. Be hem i no finis long ples ya. I gat plante moa samting blong kamaot yet. Profet tok ya i joen tu wetem promes blong Baebol blong gat wan paradaes wol bakegen long fyuja.—Ol Sam 37:10, 11; Revelesen 21:4, 5.
20, 21. ?From wanem i stret mo i laenap wetem Baebol blong bilif se Aesea japta 35 bambae i kamtru bakegen long fyuja?
20 Bambae i no stret sipos Jeova i yusum ol klia tok blong eksplenem wan paradaes, mo biaen i mekem ol tok ya oli kamtru long saed blong speret nomo. Hemia i no min se fasin blong profet tok ya blong kamtru long saed blong speret i no impoten. Nating se i gat wan prapa paradaes long wol ya, bambae yumi no save haremgud long ol naesfala samting long hem mo ol anamol we oli kam kwaet, sipos i gat ol rabis man raonabaot long yumi, ol man we oli gat fasin olsem ol wael anamol. (Skelem wetem Taetas 1:12.) Yes, hem i mas kamtru long saed blong speret fastaem, from we hemia i moa impoten.
21 Nating se i olsem, Paradaes long fyuja i no minim nomo ol gudfala samting long saed blong speret we yumi haremgud long olgeta naoia, mo we bambae yumi haremgud moa long olgeta long fyuja. Yumi gat gudfala risen blong bilif se ol profet tok olsem Aesea japta 35 bambae oli kamtru long wan prapa Paradaes. ?From wanem? From we, profet tok blong Aesea japta 65 i tokbaot “nyufala heven mo nyufala wol.” Aposol Pita i talem tok ya bakegen taem hem i eksplenem ol samting we bambae oli kamaot afta long bigfala dei blong Jeova. (Aesea 65:17, 18; 2 Pita 3:10-13) Pita i soemaot se ol samting we Aesea i tokbaot bambae oli kamtru long “nyufala wol” ya. Hemia ol samting we yu save long olgeta finis—bildim ol haos mo stap long olgeta, planem garen mo kakae frut blong olgeta, haremgud long wok we yumi mekem wetem han blong yumi, wael dog mo sipsip bambae oli stap wanples, mo no gat wan nogud samting i kamaot long ful wol. Long ol narafala tok, hemia i minim longfala laef, ol haos we oli sef, fulap kakae, wok we yumi haremgud long hem, ol anamol oli stap long pis, mo ol man oli gat pis wetem ol anamol.
22, 23. ?Taem Aesea japta 35 i kamtru long fyuja, bambae i gat wanem risen blong glad?
22 ?Hop ya i givim fulap glad long yu? Hem i mas, from we God i wokem yumi blong stap long wan wol olsem. (Jenesis 2:7-9) Ale, ?olsem wanem samting ya i joen wetem profet tok we yumi stap stadi long hem long Aesea japta 35? I minim se yumi gat sam moa risen blong singaot from glad. Ol draeples long wol mo ol ples we oli no gat wora, bambae oli gat ol naes flaoa long olgeta, mo bambae yumi glad from. Ol man we oli gat blu ae, braon ae, no wan narafala naes kala blong ae, be we oli blaen, bambae oli lukluk. Ol Kristin brata blong yumi we sora blong olgeta i fas, mo olgeta we oli save harem smol nomo, bambae oli harem evri samting i klia nomo. !Bambae oli glad tumas blong harem ol Tok blong God taem narafala i ridim mo eksplenem long olgeta, mo tu, blong lesin long noes blong win long ol tri, wan pikinini we i laf, mo singsing blong ol pijin!
23 Samting ya i minim tu se olgeta we oli no save wokbaot, olsem olgeta we ol joen blong olgeta oli soa, bambae oli wokbaot gud we oli no gat soa nating. !Bambae oli haremgud tumas! Ol bigfala reva bambae oli ron strong long draeples. Bambae yumi luk ol bigfala wora ya, mo bambae yumi harem noes blong hem, taem i ron strong. Bambae yumi wokbaot long ples ya mo tajem grin gras mo ol gras ya papiras. Bambae hem i wan trufala Paradaes bakegen. ?Olsem wanem long glad we bambae yu kasem taem yu stap kolosap long wan laeon no wan narafala anamol olsem, be yu no fraet long hem? Yumi no nidim blong eksplenem moa, from we yumi gat wan naesfala pija i stap finis long tingting blong yumi.
24. ?From wanem yu save agri wetem ol tok blong Aesea 35:10?
24 Aesea i promes long yumi se: “Olgeta we Jeova i sevem olgeta, bambae oli kambak, mo bambae oli kam long Saeon we oli stap singaot from glad. Bambae glad i stap long hed blong olgeta blong longtaem.” Taswe yumi save agri se yumi gat risen blong singaot from glad. Yumi save glad from ol samting we Jeova i stap mekem long ol man blong hem naoia long paradaes long saed blong speret. Mo yumi save glad from ol samting we yumi save kasem long fyuja long wan prapa Paradaes we i kolosap nao. Long saed blong ol man we oli glad—hemia yumi ya—Aesea i raetem se: “Bambae oli singaot mo oli glad, bambae oli no moa krae mo fasin blong harem nogud bambae i finis olgeta.”—Aesea 35:10.
[Ol futnot]
a K.T. i minim Kristin Taem.
b Wan grup blong man we oli joen wanples blong wosip.
?Yu Yu Makem Ol Poen Ya?
◻ ?Olsem wanem Aesea japta 35 i kamtru namba tu taem?
◻ ?Ol bigfala merikel we Aesea i tokbaot, oli pija blong wanem samting long saed blong speret?
◻ ?Olsem wanem yu bin joen blong mekem profet tok ya i kamtru?
◻ ?From wanem yumi save talem se Aesea japta 35 i givim fulap hop long yumi long saed blong fyuja?
[Tok Blong Pija Long Pej 15]
Kalabus long Raimon Rod, Bruklin, Nyu Yok, we oli holem seven impoten brata long Jun 1918
[Tok Blong Pija Long Pej 16]
Kolosap Brata Franz i blaen taem hem i kam olfala, be hem i stap gohed blong lukluk klia long saed blong speret
[Tok Blong Pija Long Pej 17]
Yumi gat risen blong glad taem yumi luk ol narafala we oli gru mo gohed gud long saed blong speret