Ripot Long Wok Blong Kingdom

Ol Gudfala Wok We Oli Givim Ona Long Jeova

LONG Bigfala Toktok we Jisas i mekem antap long Hil, hem i talem long ol disaepol blong hem se: “Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.” (Matyu 5:​16) Long sem fasin, ol trufala Kristin tede oli joen long ol “gudgudfala wok” we oli leftemap nem blong Jeova.

?Wanem ya ol gudgudfala wok ya? Hemia i minim wok blong talemaot gud nyus. Be gudfala fasin blong yumi tu, i wan impoten haf blong wok ya. Plante taem, gudfala fasin blong yumi i faswan samting we i pulum ol man oli kam long Kristin kongregesen.a Olgeta ekspiryens we oli kam biaen oli soemaot klia olsem wanem ol Wetnes blong Jeova long Matinik oli ‘letem laet blong olgeta i saenaot i kasem ol man.’

◻ Wan Wetnes blong Jeova we i stap prij long ol haos wanwan, i visitim wan woman Katolik. Long 25 yia finis, woman ya i stap wetem wan man we tufala i no mared. Hem i save ol tijing blong ol Wetnes blong Jeova, from we hem i bin kasem buk ya Yu Save Laef Foreva Long Paradaes Long Wol, kolosap seven yia bifo finis.b Woman ya i talem long Wetnes ya se: “I gat plante tumas skul. Mi mi no save se bambae mi bilif long hu, tingting blong mi i fasfas.” Wetnes ya i eksplenem se hem i save faenem trutok long Baebol nomo, mo blong faenem trutok ya, hem i mas stadigud Baebol mo prea blong kasem tabu speret blong God blong lidim hem.

Be, nating se woman ya i wantem stadi Baebol, hem i no wantem kam long ol Kristin miting long Haos Kingdom blong ol Wetnes blong Jeova. ?From wanem? Hem i wan woman we i stap sem bigwan. Be, afta we oli singaotem hem blong kam long Memoriol blong ded blong Jisas Kraes, hem i winim fasin sem blong hem mo i kam long miting ya.

Samting we i mekem hem i sapraes moa long miting ya, hemia lav we i stap bitwin ol man long Haos Kingdom. !Hem i neva luk trufala fasin fren olsem long jyos blong hem! Biaen, hem i kam long evri miting we ol lokol Wetnes oli stap mekem. I no longtaem biaen, hem i mared wetem man ya we i bin stap wetem hem longtaem finis. Naoia, hem i baptaes finis mo i wan memba blong kongregesen.

◻ Ol gudfala wok blong wan woman we hem i wan Wetnes i karem nambawan frut. Hem i gat wan hae ples long wok blong hem long wan ofis. Ale, wan man long aelan blong Réunion i kam wok long ples ya, nao sam man blong wok oli stap jikim man ya oltaem from we hem i sot. Hem i kam wan man we ol narafala oli laf long hem mo jikim hem nomo. Be, Wetnes ya i soem kaengud fasin mo respek oltaem long man ya. Nao man ya i wantem save from wanem Wetnes ya i defren.

Wetnes ya i eksplenem se fasin blong hem blong respektem narafala i kamaot from ol rul blong Baebol we ol Wetnes blong Jeova oli bin tijim hem long olgeta. Hem i soem long hem tu, wanem we Baebol i talem long saed blong stampa tingting blong God mo hop blong wan nyufala wol. Man ya i agri blong stadi Baebol, i stat blong kam long olgeta Kristin miting, mo i mared wetem woman we i stap wetem hem.

Biaen, hem i gobak long Réunion. Bifo, hem i bin kasem hadtaem wetem ol famle blong hem, antap moa wetem famle blong woman blong hem. Be naoia, olgeta ya oli sapraes bigwan long ol gudfala Kristin fasin blong hem. Man ya i baptaes mo naoia hem i wan man blong givhan. Sam memba blong famle, olsem woman blong hem mo tufala gel blong hem, oli joen long Kristin kongregesen mo oli stap talemaot gud nyus blong Kingdom blong God.

[Ol futnot]