?From Wanem Trufala Wosip i Kasem Blesing Blong God?

“!Yumi presem God! God blong yumi, hem i sevem yumi finis, nem blong hem i hae we i hae, mo olgeta paoa i blong hem nomo. Fasin blong hem blong jajem man i tru, mo i stret olgeta.”​—REVELESEN 19:​1, 2.

1. ?Bigfala Babilon bambae i lus olsem wanem?

“BIGFALA BABILON” i foldaon finis long lukluk blong God, mo i no longtaem bambae hem i lus blong olwe. Ol profet tok blong Baebol oli soemaot se i no longtaem, ol man blong politik bambae oli spolemgud woman blong rod ya, hemia olgeta gyaman skul blong wol ya we oli stap frengud wetem politik. Bambae hem i lus wantaem mo kwiktaem nomo. Revelesen we Jisas i soemaot long Jon i karem ol profet tok ya se: “Wan strong enjel i tekem wan ston we i bigfala tumas, i sakem i go long solwora. Mo i talem se ‘Babilon, yu yu wan bigfala taon. Hemia wan saen blong soemaot fasin we God bambae i mekem long yu. Hem bambae i sakemdaon yu, we bambae man i no save luk yu bakegen samtaem.’ ”​—Revelesen 18:​2, 21.

2. ?Ol man blong Jeova bambae oli mekem wanem taem Babilon i lus?

² Plante man blong wol ya blong Setan, bambae oli krae long taem ya we Bigfala Babilon i kasem jajmen blong hem. Be, ol man blong God, we oli stap long heven mo long wol, bambae oli no harem nogud. Bambae oli glad mo oli singaot i go long God se: “!Yumi presem God! God blong yumi, hem i sevem yumi finis, nem blong hem i hae we i hae, mo olgeta paoa i blong hem nomo. Fasin blong hem blong jajem man i tru, mo i stret olgeta. Woman ya blong rod we i nogud we i nogud, we i stap mekem wol i kam nogud long ol rabis fasin blong hem, God i jajem hem finis, i givim panis long hem finis. God i givimbak long hem finis, from ol man blong hem, from we woman ya i kilim olgeta oli ded.” ​—Revelesen 18:​9, 10; 19:​1, 2.

?Wanem Ol Frut We Trufala Skul i Mas Soemaot?

3. ?Wanem sam kwestin we yumi wantem kasem ansa blong olgeta?

³ Taem wol i kam klin long olgeta gyaman skul, ?wanem kaen wosip bambae i stap? ?Olsem wanem yumi save luksave weswan skul we i stap tede, bambae i no lus long taem ya we olgeta gyaman skul blong Setan olbaot long wol, oli lus? ?Wanem ol gudfala frut we grup ya i mas karem? I gat ten mak blong luksave trufala wosip blong Jeova.​—Malakae 3:​18; Matyu 13:43.

4. ?Wanem faswan mak blong trufala wosip, mo olsem wanem Jisas i soemaot eksampel long saed ya?

⁴ Faswan samting we i impoten tumas, hemia se ol trufala Kristin oli mas leftemap hae rul ya we Jisas i ded from​—hemia hae rul blong Papa blong hem. Jisas i no lego laef blong hem from samkaen bisnes long saed blong politik, wan laen blong man, wan nesen, no blong stretem wan trabol bitwin long ol man. No gat. Hem i putum Kingdom blong Papa blong hem i stap fastaem, bifo long politik blong ol man Jyu mo olkaen tingting we oli gat blong agensem gavman. Taem Setan i wantem givim olgeta gavman blong wol ya long Jisas, hem i ansa se: “Yu goaot yu, Setan. Baebol i talem se ‘Bambae yu mekem wosip long Hae God ya we i God blong yu. Bambae yu mekem ol wok blong hem nomo.’ ” Hem i save se Hibru haf blong Baebol i talem we Jeova i trufala Hae Rula antap long ful wol. ?Weswan skul nao i sapotemgud rul ya blong Jeova i bitim politik blong wol ya?​—Matyu 4:​10; Ol Sam 83:18.

5. (a) ?Ol trufala man blong wosip, oli mas tingbaot nem blong God olsem wanem? (b) ?Wanem i soem se ol Wetnes blong Jeova oli ona long nem ya?

⁵ Seken samting, hemia se trufala wosip i mas leftemap nem blong God mo mekem i tabu. God ya we i gat olgeta paoa i talem long ol man Isrel se, nem blong hem hemia Jeova, (long sam Baebol oli putum se Yahweh), mo nem ya i stap plante taosen taem long Hibru haf blong Baebol. Bifo long taem ya finis, Adam, Iv, mo sam narafala bakegen, oli save nem ya, be plante taem oli no soem respek long hem. (Jenesis 4:1; 9:​26; 22:14; Eksodas 6:2) Plante man blong ol skul blong Krisendom mo Jyu we oli tanem Baebol i go long narafala lanwis, oli karemaot tabu nem ya long ol Baebol blong olgeta. Ol Wetnes blong Jeova nomo oli gat respek long nem ya, mo oli livim i stap long stret ples blong hem long New World Translation of the Holy Scriptures. Oli ona long nem ya, long sem fasin we ol faswan Kristin oli mekem. Jemes i talem se: “Saemon i talemaotgud long yumi we God i kamtru olsem wanem fastaem long ol narafala nesen, blong tekemaot wan kampani blong olgeta, blong oli holem nem blong hem. Mo tok blong ol Profet i agri long samting ya, . . . Blong bambae olgeta man oli save faenem Jeova, wetem ol man blong olgeta nesen we oli holem nem blong mi. Hemia tok blong Jeova, we i stap mekem ol samting ya i kamtru.”​—Ol Wok 15:14-​17, NW; Emos 9:​11, 12.

6. (a) ?Wanem namba tri mak blong trufala wosip? (b) ?Wanem tok blong Daniel mo Jisas long saed blong rul blong Kingdom? (Luk 17:20, 21)

⁶ Namba tri mak blong trufala wosip, hemia se hem i mas leftemap Kingdom blong God olsem wan rod ya nomo we man i save trastem mo we i naf, blong finisim olgeta problem long saed blong rul blong man. Jisas i tijim ol man blong hem blong prea blong Kingdom ya i kam, blong bambae rul blong God i kam bos long wol. Tabu speret i pusum Daniel blong talemaot profet tok ya long saed blong ol las dei se: “God blong heven bambae i stanemap wan kingdom we neva i save brokdaon. . . . Bambae hem i smasem mo i finisim olgeta kingdom ya [blong wol mo politik], mo hem nomo bambae i stanap olwe.” Long ol yia biaen long 1900, ?hu ya ol man we oli soemaot long laef blong olgeta se oli sapotem Kingdom ya fulwan? ?Hemia olgeta skul blong Bigfala Babilon no ol Wetnes blong Jeova?​—Daniel 2:​44; Matyu 6:​10; 24:14.

7. ?Wanem tingting blong ol trufala man blong wosip, long saed blong Baebol?

⁷ Namba fo mak we skul i mas gat blong God i agri long hem, hemia se ol trufala man blong God oli mas sapotem Baebol se hem i Tok we i kamaot long God. From samting ya, ol man blong hae save we oli strong blong agensem Baebol, bambae oli no save winim olgeta. Ol man ya oli stap traem blong daonem Baebol, se hem i gat plante mastik from we ol tok blong hem oli kamaot long man nomo. Ol Wetnes blong Jeova oli bilif se Baebol i kamaot long God tru long tabu speret blong hem. Olsem we Pol i raetem i go long Timote, se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”a Taswe, ol Wetnes blong Jeova oli letem Baebol i lidim olgeta, buk ya i bos long laef blong olgeta evri dei, mo hem i stampa blong hop we oli gat long fyuja.​—2 Timote 3:​16, 17.

Wan Skul We i Gat Lav, i No Gat Fasin Blong No Laekem Narafala

8. ?Wanem namba faef mak blong trufala wosip?

⁸ ?Olsem wanem Jisas i makemaot ol trufala man blong hem? Ansa we hem i givim i soemaot namba faef impoten mak blong trufala wosip. Jisas i talem se: “Mi mi givim wan nyufala loa long yufala, se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala. Nao from we yufala i stap laeklaekem yufala, bambae olgeta man oli luksave se yufala i man blong mi.” (Jon 13:34, 35) ?Olsem wanem Jisas i soemaot lav blong hem? Hem i givim laef blong hem olsem wan sakrifaes blong pemaot ol man. (Matyu 20:28; Jon 3:​16) ?From wanem trufala lav i wan fasin we ol trufala Kristin oli mas gat? Jon i eksplenem se: “Ol fren. Yumi mas laeklaekem yumi, from we fasin ya blong laekem tumas ol man, hem i kamaot long God . . . Man we i no laekem ol man, hem i no save God, from we God i stampa blong fasin ya blong laekem tumas ol man.”​—1 Jon 4:​7, 8.

9. ?Hu i soemaot trufala lav mo olsem wanem?

⁹ ?Hu ol man long taem blong yumi, we oli soemaot lav olsem, nating se ol narafala oli gat fasin blong no laekem man from kala, nesen, no laen blong hem? ?Hu ya i winim ol bigfala traem, go kasem we oli ded, from we oli wantem holemtaet lav ya blong olgeta? ?Yumi save talem se ol pris mo ol sista blong Katolik jyos we oli joen long raf fasin blong kilim man i ded long Ruwanda long 1994, oli gat lav ya? Ol skul blong Otodoks long Sebia mo ol Katolik long Kroasia, we oli joen long wok blong “kilimaot wan ful laen blong man,” mo ol narafala rabis fasin blong faet we oli no Kristin, long Balkans, ?olgeta ya nao oli soemaot lav ya? ?Olgeta lida blong Katolik mo Protestan we oli sapotem fasin agens mo fasin blong no laekem narafala man we i bin kamaot long Not Aerlan long plante yia we oli jes pas, oli gat lav ya? Ol Wetnes blong Jeova oli no bin joen nating long ol faet olsem. Oli bin harem nogud long ol presin mo rabis kalabus, go kasem we samfala oli ded, i bitim we oli lego Kristin lav blong olgeta.​—Jon 15:17.

10. ?From wanem ol trufala Kristin oli no joen long wol ya?

¹⁰ Namba sikis mak blong wosip we God i agri long hem, hemia blong no joen nating long politik blong wol ya. ?From wanem ol Kristin oli no mas joen nating long politik? Pol, Jemes, mo Jon oli givim wan strongfala risen. Aposol Pol i raetem se Setan i “rabis god blong wol ya,” mo hem i stap traem evri rod blong satem tingting blong ol man we oli no bilif. Wan long ol rod ya we hem i yusum hemia politik, we i stap seraotem ol man. Disaepol Jemes i talem se ‘man we i mekem fren wetem wol, wantaem nomo hem i mekem badfren wetem God.’ Mo aposol Jon i talem se “olgeta man blong wol oli stap long paoa blong Setan.” Taswe, wan trufala Kristin i no save lego fasin fasgud long God, blong go joen wetem ol kruked fasin blong politik mo ol man we oli gat bigfala paoa long wol ya blong Setan.​—2 Korin 4:4; Jemes 4:4; 1 Jon 5:​19.

11. (a) ?Wanem tingting blong ol Kristin long saed blong faet? (b) ?Wanem tok blong Baebol i sapotem disisen ya? (2 Korin 10:​3-5)

¹¹ Folem tufala mak we yumi jes tokbaot, namba seven mak i kam klia, hemia se ol trufala Kristin man blong wosip oli no mas joen long ol faet. Ol man long trufala skul oli joengud olsem ol stret brata long olgeta ples blong wol, from we oli gat lav. From samting ya, i no gat wan samting we i save seraotem no spolem grup blong ‘ol brata ya long olgeta ples blong wol.’ Jisas i tijim ol man blong laekem ol narafala man, i no tijim man long fasin blong no laekem narafala. Hem i tijim ol man blong gat pis, i no blong faet. (1 Pita 5:9; Matyu 26:51, 52) Semfala ‘rabis man ya,’ Setan, we i pulum Ken blong kilim Ebel i ded, i stap gohed blong traem mekem man i no laekem narafala, mo i traem mekem ol man oli faet mo kilim narafala i ded from politik, skul, mo from we narafala i blong defren laen blong man. Ol trufala Kristin oli “no moa lanem fasin blong faet,” nating se oli mas kasem bigfala trabol from. Olgeta ya oli ‘tekem hama, oli tanem ol naef blong faet blong olgeta oli kam aean blong brekem graon long garen, mo ol spia blong olgeta oli kam sisis blong katem han blong tri.’ Oli soemaot gudfala frut blong tabu speret blong God, hemia pis.​—1 Jon 3:​10-​12; Aesea 2:​2-4; Galesia 5:​22, 23.

God i Blesem Ol Fasin Mo Tijing We Oli Klin

12. (a) ?Wanem namba eit mak, be wanem sam samting we yu save talem long saed blong ol skul we oli seraot? (b) ?Olsem wanem Pol i soemaot klia namba eit mak ya?

¹² Kristin fasin joen hem i namba eit mak blong trufala wosip. Be, ol skul blong Krisendom we oli seraotem ol man, oli no givhan long saed ya. Plante bigfala skul blong wol oli seraot long plante smosmol grup we oli folem wanwan man, mo from samting ya tingting blong plante man i fasfas. Wan eksampel, tingbaot skul Baptis long Yunaeted Stet. Skul ya i seraot long tu haf, wan haf i kam Baptis blong Not (Amerikan Baptis Jyos long Yunaeted Stet) mo narafala haf se Baptis blong Saot (Baptis Convensen blong Saot), mo i gat plante narafala grup blong Baptis we oli stanap from fasin seraot olsem. (World Christian Encyclopedia, pej 714) Plante taem, jyos i seraot from ol man oli no agri long saed blong ol tijing no fasin blong ol haeman blong jyos (olsem Presbiterian, Episkopelian, Kongregesenal). Fasin seraot blong ol jyos blong Krisendom i sem mak long hemia long ol narafala skul​—nating se hem i skul Budis, Islam, no Hindu. ?Aposol Pol i givim wanem advaes long ol faswan Kristin? “Ol brata mo sista. Long nem blong Jisas Kraes ya, Masta blong yumi, mi mi talem strong long yufala se mi wantem tingting blong yufala i kam wan nomo. Bambae yufala i no moa seraot long ol narnarafala kampani. Yufala i mas gat wan tingting nomo mo fasin blong yufala i mas wan nomo.”​—1 Korin 1:​10; 2 Korin 13:11.

13, 14. (a) ?Wanem mining blong ‘stap tabu mo klingud’? (b) ?Olsem wanem blong mekem se trufala wosip i stap klin oltaem?

¹³ ?Wanem namba naen mak blong skul we God i agri long hem? Wan rul blong Baebol i stap long Levitikas 11:​45, se: “Yufala i mas stap tabu mo klingud, from we mi mi tabu mo klingud.” Aposol Pita i talem bakegen samting ya, taem hem i raetem se: “God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala tu i mas klin gud.”​—1 Pita 1:​15.

¹⁴ ?Yumi nidim blong stap tabu mo klingud, i minim wanem? Hemia se ol man we oli wosipim Jeova, oli mas klin long saed blong speret mo fasin. (2 Pita 3:​14) I no gat ples blong ol man we oli no wantem tanem tingting blong olgeta from sin, mo we oli wantem nomo blong stap mekem sin. Ol man we oli mekem fasin olsem, oli soem se oli no tinghae nating long sakrifaes blong Jisas Kraes blong pemaot ol man. (Hibrus 6:​4-6) Jeova i wantem se Kristin kongregesenb i stap klin mo tabu oltaem. ?Olsem wanem samting ya i save kamtru? Wan samting, hemia blong sakemaot eni man we i stap mekem nogud fasin mo i save mekem kongregesen i kam doti.​—1 Korin 5:​9-​13.

15, 16. ?Wanem ol jenis we plante Kristin oli bin mekem long laef blong olgeta?

¹⁵ Plante man, bifo we oli save trutok blong ol Kristin, oli mekem ol rabis fasin, oli mekem eni samting blong haremgud long laef, mo oli tingbaot olgeta nomo. Be tok long saed blong Jisas i jenisim laef blong olgeta, mo God i fogivim ol sin blong olgeta. Pol i givim wan strong woning long saed ya taem hem i raetem se: ‘?Wanem? ?Yufala i no save se ol man nogud oli no save go insaed long Kingdom blong God? Yufala i no mastik long samting ya. Ol man we oli mekem nogud long saed blong seks, mo ol man we oli stap prea long ol narafala god, mo ol man we oli stilim woman blong narafala man, mo ol woman we oli stilim man blong narafala woman, mo ol man we oli mekem ol fasin blong sem, mo ol man we oli stap slip wetem man, mo ol stil man, mo olgeta we oli griri, mo ol man blong drong, mo ol man we oli stap spolem nem blong narafala man, mo ol man we oli stap mekem kruked bisnes blong stilim mane, olgeta man ya bambae oli no save kasem kingdom blong God. I tru, bifo, sam long yufala i olsem nomo. Be naoia God i mekem yufala i klin finis.’​—1 Korin 6:​9-​11.

¹⁶ I klia se Jeova i agri long olgeta man we oli tanem tingting blong olgeta from ol fasin we oli agensem Baebol, nao oli lego ol fasin ya mo kam ol trufala man blong folem Kraes mo ol tijing blong hem. Oli rili laekem ol man raonabaot long olgeta, olsem we oli stap laekem olgeta nomo. Oli soemaot fasin ya long plante rod, olsem taem oli gohed strong long wok blong prij blong givim mesej blong laef long olgeta man we oli wantem harem.​—2 Timote 4:5.

‘Trutok Bambae i Mekem Yufala i Friman’

17. ?Wanem namba ten mak blong trufala wosip? Givim sam eksampel.

¹⁷ Namba ten mak we Jeova i putumap blong olgeta we oli wosipim hem wetem speret mo trutok​—hemia ol tijing we oli tru. (Jon 4:​23, 24) Jisas i talem long ol man blong hem, i se: “Bambae yufala i save ol trutok, mo trutok ya bambae i mekem yufala i friman.” (Jon 8:​32) Trutok blong Baebol i mekem yumi fri long ol bilif we oli no ona long God, olsem sol we i no save ded, helfaea, mo pegatri. (Eklesiastis 9:​5, 6, 10; Esikel 18:​4, 20) Hem i mekem yumi fri long tokhaed blong Babilon we Krisendom i kolem “Triniti we i Tabu Tumas.” (Dutronome 4:​35; 6:4; 1 Korin 15:27, 28) Taem ol man oli folem trutok blong Baebol, oli gat fasin blong laekem narafala, oli tingbaot narafala, oli kaengud, mo oli sore long ol man. Insaed long trufala Kristin skul long ol yia we oli pas, i neva gat ol man we oli wantem givimbak, we oli strong tumas long ol man, mo we oli kilim i ded olgeta man we oli no agri long bilif blong jyos, olsem man ya Tomás de Torquemada i bin mekem. Mo tu, i neva gat ol man we oli no laekem nating narafala man, mo oli sapotem ol faet, olsem ol pop we oli sapotem ol Krused. Be, long ol yia we oli pas, Bigfala Babilon i karem plante nogud frut olsem, i stat long taem blong Nimrod i kam kasem naoia.​—Jenesis 10:​8, 9.

Wan Nem We i Makemaot Ol Man Ya

18. (a) ?Hu ya i laenap wetem ol ten mak ya blong trufala wosip, mo olsem wanem? (b) ?Yumi wanwan i mas mekem wanem blong kasem blesing we i stap long fored blong yumi?

¹⁸ ?Tede, hu i stap folem ten mak ya blong trufala wosip? ?Ol man oli luksave se hu nao oli holemstrong long bilif mo oli gat pis oltaem? Raonabaot long wol, ol man oli luksave se ol Wetnes blong Jeova oli “no man blong wol ya.” (Jon 15:19; 17:14, 16; 18:36) Ol man blong Jeova oli glad blong karem nem blong God mo blong stap olsem ol Wetnes blong hem, olsem we Jisas Kraes hem i nambawan wetnes blong Papa blong hem. Yumi holem tabu nem ya, mo yumi luksave se wok blong yumi i blong mekem laef blong yumi i laenap wetem mining blong nem ya. !Mo from we yumi ol Wetnes blong hem, yumi gat wan nambawan fyuja long fored blong yumi! Hemia blong stap insaed long wan famle blong man we oli obei, oli joengud, mo we oli wosip long Hae Rula blong Heven mo Wol, taem wol ya i kam wan paradaes olsem bifo. Blong kasem blesing olsem, yumi mas gohed blong soemaot klia se yumi joen long trufala wosip. !Mo, yumi mas glad blong karem nem ya, ol Wetnes blong Jeova, from we ‘fasin blong God blong jajem man i tru, mo i stret olgeta’!​—Revelesen 19:2; Aesea 43:10-​12; Esikel 3:​11.

[Ol futnot]

?Bambae Yu Ansa Olsem Wanem?

◻ ?Wanem tingting blong ol man blong Jeova taem bambae Bigfala Babilon i lus?

◻ ?Wanem sam impoten mak blong trufala wosip?

◻ ?Olsem wanem trutok i mekem yu yu kam friman?

◻ ?Yumi ol Wetnes blong Jeova, yumi gat wanem spesel blesing?

[Tok Blong Pija Long Pej 17]

Ol Wetnes blong Jeova oli stap talemaot mo tijim gud nyus blong Kingdom blong God

[Tok Blong Pija Long Pej 18]

Long ol yia we oli pas, ol trufala Kristin oli neva joen long politik mo ol faet blong wol ya

[Credit Line]

Airplane: Courtesy of the Ministry of Defense, London