Wan Kwestin

Jisas i talem se: “Sipos yufala i fogivim man from sin blong hem, hemia God i fogivim hem, i tekemaot sin blong hem. Be sipos yufala i no fogivim man from sin blong hem, hemia God i no fogivim hem, i no tekemaot sin blong hem.” ?Tok ya i minim se ol Kristin oli gat paoa blong fogivim sin blong narafala?

I no gat wan tok long Baebol se God i givim paoa long ol Kristin, mo long ol elda blong kongregesena tu, blong oli save fogivim sin. Be, tok ya we Jisas i talem long ol disaepol blong hem long Jon 20:23, we i stap antap, i soemaot se God i bin givim spesel paoa ya long ol aposol. Mo tok ya blong Jisas maet hem i joen wetem wanem we hem i talem long Matyu 18:18 long saed blong ol disisen long heven.

Ol Kristin oli save fogivim sam smosmol rong blong narafala, folem advaes blong aposol Pol long Efesas 4:​32: “Yufala i mas wokem i gud long yufala, yufala i mas gat gladhat long yufala. Mo yufala i mas fogivim yufala, olsem we God i fogivim yufala finis, we yufala i joen long Kraes.” Long ples ya, Pol i stap tokbaot ol problem we oli save kamaot bitwin long ol Kristin, olsem ol tok we i mekem narafala i harem nogud. Oli mas traehad blong stretem ol problem ya, oli mas fofogivim olgeta. Tingbaot ol tok blong Jisas se: “Sipos yu kam long olta blong God blong givim presen long hem, nao yu tingbaot we yu gat poen long brata blong yu, yu mas livim presen ya i stap long fes blong olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.”​—Matyu 5:​23, 24; 1 Pita 4:8.

Be, ol vas raonabaot long Jon 20:23 oli soemaot se Jisas i stap tokbaot ol sin we oli bigwan moa. Samting ya i kam klia long ol narafala tok we hem i talem long spesel grup blong man we oli stap lesin long hem. Bambae yumi luk from wanem.

Long dei we Jisas i laef bakegen, hem i kamtru long ol disaepol blong hem. Oli stap long wan rum long Jerusalem we oli lokemgud doa blong hem. Store i talem se: “Nao Jisas i talem long olgeta bakegen, i se ‘Pis i stap wetem yufala. Olsem we Papa blong mi i sanem mi mi kam, oraet, long sem fasin, mi mi sanem yufala i go.’ Nao taem i talem tok ya finis, hem i bloem win blong hem i go long olgeta, i talem long olgeta, i se ‘Yufala i kasem Tabu Speret. Sipos yufala i fogivim man from sin blong hem, hemia God i fogivim hem, i tekemaot sin blong hem. Be sipos yufala i no fogivim man from sin blong hem, hemia God i no fogivim hem, i no tekemaot sin blong hem.’ ”​—Jon 20:21-​23.

I klia se ol disaepol we vas ya i tokbaot, hemia i minim moa ol aposol we oli stap tru long God. (Skelem wetem vas 24.) Taem we Jisas i bloem win i go long olgeta mo i talem se “Yufala i kasem tabu speret,” hem i givim wan saen long olgeta se i no longtaem bambae oli kasem tabu speret. Jisas i gohed blong talem se bambae oli gat paoa blong fogivim ol sin. I stret blong ting se tufala tok ya blong hem oli joen tugeta, from we hem i talem wan jes biaen long narawan.

Long dei blong Pentekos, fefte dei afta we Jisas i laef bakegen long ded, hem i sanem tabu speret i kam. ?Wanem samting i kamaot from? Wan samting hemia se, olgeta we oli kasem tabu speret ya oli bon bakegen olsem ol pikinini blong God long saed blong speret, mo oli gat hop ya blong rul wetem Kraes long heven. (Jon 3:​3-5; Rom 8:​15-​17; 2 Korin 1:​22) Be tabu speret ya we hem i givim, i mekem wan narafala wok tu. Sam long olgeta we oli kasem tabu speret ya oli gat paoa blong wokem merikel. From samting ya, samfala oli save toktok long ol narafala lanwis we oli no save bifo. Sam narafala oli save talemaot ol profet tok. Mo sam narafala bakegen, oli save mekem ol sikman oli kamgud, mo mekem ol dedman oli laef bakegen.​—1 Korin 12:​4-​11.

Ol tok blong Jisas long Jon 20:22 oli tokbaot taem ya we tabu speret i kasem ol disaepol blong hem. Taswe, i luk olsem se ol tok we hem i talem biaen, long saed blong fasin blong fogivim ol sin, hem i minim se tru long tabu speret, God i givim spesel paoa ya long ol aposol blong fogivim sin no blong no fogivim sin blong man.​—Lukluk Wajtaoa Maj 1, 1949, pej 78.

Baebol i no talem fulwan store blong evri taem we ol aposol oli yusum paoa ya. Be tu, hem i no tokbaot evri taem we oli yusum spesel paoa ya blong toktok long ol defren lanwis, blong talem ol profet tok, mo blong mekem ol sikman oli kamgud bakegen.​—2 Korin 12:12; Galesia 3:5; Hibrus 2:4.

Wan eksampel we i soemaot paoa blong ol aposol blong fogivim no blong no fogivim sin, hemia store blong Ananaeas mo Safaera, we oli gyaman long tabu speret. Pita, we i bin harem ol tok blong Jisas long Jon 20:22, 23, i talemaot long klia ples sin blong Ananaeas mo Safaera. Fastaem Pita i tok long Ananaeas, we wantaem nomo hem i foldaon, i ded. Biaen, Safaera i kamtru mo i gohed blong gyaman, ale Pita i talemaot jajmen long hem tu. Pita i no fogivim sin blong hem, be i talem long hem se: “?Yu harem ol man ya long doa oli stap wokbaot i kam? Oli berem man blong yu finis. !Mo bambae oli karem yu tu yu go afsaed!” Wantaem nomo, woman ya tu i ded.​—Ol Wok 5:​1-​11.

Long taem ya, aposol Pita i yusum spesel paoa ya we hem i gat blong no fogivim sin. Tru long fasin we i olsem merikel, hem i save se God bambae i no fogivim sin blong Ananaeas mo Safaera. I luk olsem se spesel paoa ya we i kamaot long God i mekem se ol aposol oli luksave mo oli sua taem God i fogivim wan man long sin blong hem tru long sakrifaes blong Jisas. Taswe, ol aposol ya we oli kasem paoa blong tabu speret, oli save talemaot sipos wan man i kasem fogif from sin blong hem no no gat.b

Samting ya i no minim se olgeta elda we tabu speret i makemaot olgeta long taem bifo oli kasem paoa ya tru long wan merikel. Yumi save samting ya from tok we aposol Pol i bin talem long saed blong wan man we kongregesen blong Korin i bin sakemaot hem. Pol i no talem se: ‘Mi fogivim sin blong man ya’ no, ‘Mi save se long heven oli fogivim hem, taswe bambae mi agri blong hem i kambak.’ No gat. Pol i pulum fulwan kongregesen blong fogivim Kristin ya we i kambak bakegen, mo blong soem lav long hem. Pol i ademap se: “Ol man we yufala i fogivim olgeta, mi tu mi fogivim olgeta.”​—2 Korin 2:​5-​11.

Taem man ya i kambak insaed long kongregesen, olgeta Kristin brata mo sista oli save fogivim hem long rod ya we oli no moa agensem hem from samting we hem i bin mekem. Be, fastaem, hem i mas tanem tingting blong hem from sin we hem i mekem, mo hem i mas kambak insaed long kongregesen. ?Olsem wanem samting ya i save kamaot?

I gat sam bigfala sin we ol elda blong kongregesen oli mas stretem, olsem fasin stil, gyaman, no rabis fasin long saed blong seks. Oli traem stretem olgeta we oli mekem i rong mo traem pulum olgeta blong tanem tingting blong olgeta from sin ya. Be, sipos wan man i stap mekem bigfala sin mo hem i no wantem tanem tingting blong hem, ol elda oli mas folem advaes blong God mo sakemaot hem long kongregesen. (1 Korin 5:​1-5, 11-​13) Tok we Jisas i talem long Jon 20:23 i no stret long ol bisnes olsem. Ol elda ya oli no gat sam spesel paoa we tabu speret i givim long olgeta. Oli no save mekem ol sikman oli kamgud bakegen, mo oli no save mekem ol dedman oli laef bakegen. Ol spesel paoa ya oli mekem wok blong olgeta finis long faswan handred yia, mo biaen oli finis. (1 Korin 13:​8-​10) Mo tu, ol elda tede, oli no kasem spesel paoa we God i givim blong fogivim wan man we i mekem bigfala sin, olsem we oli save talem se man ya we i sin bigwan i kam klin long fored blong Jeova. Fasin fogif olsemia i mas stanap long ransom sakrifaes blong Jisas, mo Jeova nomo i save fogivim man tru long sakrifaes ya.​—Ol Sam 32:5; Matyu 6:​9, 12; 1 Jon 1:9.

Olsem man ya long Korin bifo, taem wan man i mekem wan bigfala sin mo i no wantem tanem tingting blong hem from, oli mas sakemaot hem long kongregesen. Sipos biaen, hem i tanem tingting blong hem mo i mekem ol wok we oli soemaot samting ya, God i save fogivim hem. (Ol Wok 26:20) Long ol taem olsem, Baebol i soem long ol elda from wanem oli save bilif se Jeova i rili fogivim man ya we i mekem sin. Ale, taem man ya i joen bakegen long kongregesen, ol elda oli save halpem hem long saed blong speret blong kam strong long bilif. Ol narafala insaed long kongregesen oli save fogivim man ya long sem fasin olsem ol Kristin long Korin oli fogivim man ya we oli bin sakemaot hem nao hem i kambak bakegen.

Taem ol elda oli mekem ol wok olsem, oli no stanemap ol prapa rul blong olgeta blong jajem man. Oli folemgud ol rul blong Baebol mo ol rod we Jeova i soemaot long Baebol. Taswe, sipos ol elda oli fogivim no oli no fogivim wan man, fasin blong olgeta i stret long tok blong Jisas long Matyu 18:18: “Tru mi talem long yufala, ol samting we yufala i blokem long wol ya, bambae God i blokem long heven. Mo ol samting we yufala i letem long wol ya bambae God i letem olgeta long heven.” Fasin blong olgeta i soemaot tingting blong Jeova olsem i stap insaed long Baebol.

From samting ya, ol tok we Jisas i talem long Jon 20:​23, i no agensem ol narafala haf blong Baebol. Be hem i soemaot se ol aposol oli bin kasem wan spesel paoa blong fogivim man, we i laenap wetem spesel wok we oli gat insaed long Kristin kongregesen we i jes stanap long taem blong olgeta.

[Ol futnot]