Ol Blesing No Ol Trabol—Ol Eksampel Blong Yumi Tede
“Olgeta trabol ya we ol man ya bifo oli kasem, oli blong tijim olgeta. Mo oli raetem store blong olgeta long buk blong wekemap yumi ya we yumi stap laef naoia, we Lasdei blong wol i kolosap.”—1 KORIN 10:11.
1. Long sem fasin we yumi jekemap wan tul, ?yumi mas jekemap wanem samting long saed blong yumi?
TAEM rosta i kamaot long wan pis aean we oli pentem antap long hem, yumi no save luk se sloslou hem i stap kakae aean ya. Maet longtaem i save pas bifo we rosta ya i kam long klia ples. Samting ya i sem mak long ol tingting mo fasin long hat blong man. Maet ol fasin mo tingting ya oli save stat kam nogud longtaem bifo we trabol i kamaot, no longtaem bifo we ol narafala man oli luksave samting ya. Yumi waes sipos yumi stap jekemap wan tul no aean blong luk sipos hem i stat blong rosta. Ale, long sem fasin, sipos yumi luklukgud long hat blong yumi mo stretem sam samting long hem oltaem, yumi save holemtaet Kristin fasin blong fasgud long God. Hemia i min se, yumi save kasem ol blesing we oli kamaot long God, mo stap longwe long ol trabol we oli kamaot long God. Maet samfala oli ting se ol blesing mo ol trabol we oli kamaot long Isrel bifo, oli no gat bigfala mining long ol man blong naoia we oli stap laef long ol lasdei blong wol ya. (Josua 8:34, 35; Matyu 13:49, 50; 24:3) Be, samting ya i no tru. Ol samting we i kamaot long ol man Isrel, olsem 1 Korin japta 10 i tokbaot, oli olsem woning we i save givhan bigwan long yumi.
2. ?Fas Korin 10:5, 6 i tokbaot wanem samting we i kamaot long ol man Isrel long draeples?
2 Aposol Pol i talem se ol man Isrel we Moses i lidim olgeta bifo, oli sem mak long ol Kristin we Jisas Kraes i stap lidim olgeta tede. (1 Korin 10:1-4) Ol man Isrel oli gat jans blong go insaed long Promes Ples. Be “God i no glad long bighaf blong olgeta ya, taswe bighaf blong olgeta oli ded olbaot long drae ples.” From samting ya, Pol i talem long ol Kristin brata blong hem, se: “Olgeta samting ya i olsem wan saen, we i blong wekemap yumi. I nogud yumi stap wantem ol rabis fasin, olsem we olgeta ya bifo oli stap mekem.” (1 Korin 10:5, 6) Fasin blong wantem wan samting i stat fastaem long hat, taswe yumi nidim blong lesin long ol eksampel ya we Pol i tokbaot we oli olsem woning long yumi.
Woning Agensem Fasin Blong Wosip Long Aedol
3. ?Wanem sin we ol man Isrel oli mekem taem oli wokem smol buluk ya long gol?
3 Faswan woning blong Pol, hemia se: “I nogud yumi stap prea long ol narafala god, olsem we sam long olgeta ya bifo oli stap mekem. Baebol i tokbaot olgeta, i se ‘Ol man ya oli go sidaon blong kakae mo blong dring mo biaen oli girap blong go pleplei olbaot.’ ” (1 Korin 10:7) Fasin blong ol man Isrel blong folem ol man Ijip mo blong wokem wan smol buluk wetem gol olsem god blong olgeta, i wan woning long yumi. (Eksodas, japta 32) Disaepol Steven i eksplenem stampa blong problem ya, i se: “Ol olfala blong yumi oli no wantem harem [Moses we i talemaot tok blong God]. Oli no wantem folem hem, mo long [hat] blong olgeta, oli stap wantem gobak long Ijip. Taswe oli talem long Eron, se ‘Plis yu yu wokem sam god blong yumi, blong olgeta oli go fastaem, yumi biaen. From we Moses ya, we i tekemaot yumi long Ijip blong yumi kam long ples ya, yumi no save olsem wanem long hem.’ Nao long taem ya, olgeta oli wokem wan smolfala bul, nao oli stap kilim anamol blong mekem wosip long bul ya, olsem we hem i god blong olgeta. Mo oli glad tumas long samting ya we olgeta nomo oli wokem.” (Ol Wok 7:39-41) Makem se ol stronghed man Isrel ya oli wantem samting we i no stret long ‘hat blong olgeta,’ nao samting ya i lidim olgeta blong wosip long aedol. “Oli wokem wan smolfala bul, nao oli stap kilim anamol blong mekem wosip long bul ya, olsem we hem i god blong olgeta.” Antap moa, oli “glad tumas long samting ya we olgeta nomo oli wokem.” I gat myusek, singsing, danis, kakae, mo dring. I klia se, fasin we oli mekem taem oli wosip long aedol i pulum ol man, i olsem wan pleplei we i mekem olgeta oli haremgud.
4, 5. ?Wanem ol nogud fasin blong wosip long aedol we yumi mas stap longwe long olgeta?
4 Ijip i pija blong wol blong Setan. I olsem we ol man blong wol ya oli stap wosip long ol pleplei we i mekem olgeta oli haremgud, olsem we samting ya i wan god blong olgeta. (1 Jon 5:19; Revelesen 11:8) Oli ona long ol bigman blong sinema, singsing, mo spot, wetem ol danis mo myusek blong olgeta, mo ol tingting blong olgeta long saed blong wanem nao i gudfala pleplei mo wanem nao i save givim gudfala taem. Plante man we oli talem se oli stap wosip long Jeova, oli kasem traem we i pulum olgeta blong joen fulwan long ol pleplei olsem. Taem kongregesen i mas stretem wan Kristin from wan nogud samting we hem i mekem, plante taem oli faenemaot se hem i kam slak long saed blong speret, stat long taem we hem i dring alkol, danis, mo gat gudfala taem, long wan fasin we i kolosap sem mak long wosip blong aedol. (Eksodas 32:5, 6, 17, 18) Samfala pleplei oli gud mo oli save mekem yumi glad. Be tede, bighaf blong olgeta myusek, danis, sinema, mo video blong wol ya, oli pulum ol man blong wantem ol rabis fasin long saed blong bodi nomo.
5 Ol trufala Kristin oli no joen long fasin blong wosip long aedol. (2 Korin 6:16; 1 Jon 5:21) Sem mak, yumi wanwan i mas lukaotgud se yumi no wantem oltaem ol pleplei we oli save kam olsem ol aedol. Samting ya i save mekem se yumi joen fulwan long ol fasin blong wol blong gat wan gudfala taem, nao yumi save kasem trabol from. Sipos yumi letem wol ya i pulum yumi, ol nogud fasin mo ol samting we ol man blong wol oli wantem, oli save go insaed long tingting mo hat blong yumi, we yumi no save nating. Sipos yumi no stretem olgeta, oli save mekem se bambae yumi ‘ded long draeples,’ hemia wol ya blong Setan.
6. ?Wanem strong aksin we maet yumi nidim blong folem long saed blong ol pleplei?
6 Olsem Moses, long taem we ol man Isrel oli wokem buluk long gol, long sem fasin, ‘slef we i stret mo waes’ i stap talem se: “Man we i stap yet long saed blong Hae God i kam long ples ya.” Sipos yumi tekem strong aksin blong soemaot se yumi stanap strong long saed blong trufala wosip, samting ya i save sevem laef blong yumi. Laen blong Moses, hemia ol man Livae, oli tekem aksin kwiktaem blong kilim i ded olgeta man we oli mekem rabis fasin ya. (Matyu 24:45-47; Eksodas 32:26-28) Taswe, yu mas jekemap gud olgeta pleplei, myusek, video, mo narafala samting, we yu stap jusum. Sipos ol samting ya we yu jusum oli no stret long wan rod, stanap strong long saed blong Jeova. Wetem prea mo fasin blong dipen long God, jenisim ol pleplei mo myusek we yu stap jusum. Olsem we Moses i spolem buluk we ol man Isrel oli wokem long gol, long sem fasin, yu mas spolem ol samting we oli mekem i nogud long yu long saed blong speret.—Eksodas 32:20; Dutronome 9:21.
7. ?Olsem wanem yumi save lukaotgud long hat blong yumi?
7 ?Olsem wanem yumi save blokem hat blong yumi blong i no kam nogud sloslou? Yumi mas stadi dip long Tok blong God, mo letem ol trutok blong hem oli go dip insaed long tingting mo hat blong yumi. (Rom 12:1, 2) Yes, yumi mas joen tu long ol Kristin miting evri wik. (Hibrus 10:24, 25) Sipos yumi jes go nomo long ol miting, hemia i olsem we yumi pentem wan aean blong kavremap rosta we i stap finis long hem. Maet samting ya i save mekem se yumi stapgud blong smoltaem, be i no naf blong winim problem we i stampa blong bisnes ya. Be, sipos yumi reregud fastaem, tingting dip, mo yumi ansa mo joen long ol miting, bambae yumi naf blong tekem aksin blong karemaot eni samting we i stap long hat blong yumi we i save spolem yumi. Samting ya bambae i halpem yumi blong folem Tok blong God, mo bambae hem i mekem yumi strong blong yumi naf blong fesem olgeta traem we oli kasem bilif blong yumi, nao bambae yumi kam ‘stretgud long olgeta samting.’—Jemes 1:3, 4; Proveb 15:28.
Woning Agensem Fasin Blong Slip Olbaot
8-10. (a) ?Wanem eksampel i stap long 1 Korin 10:8 we i givim woning long yumi? (b) ?Olsem wanem yumi save folem ol tok blong Jisas long Matyu 5:27, 28, blong i givhan gud long yumi?
8 Long nekiswan woning blong Pol, yumi kasem advaes ya se: “I nogud yumi stap mekem ol fasin nogud ya wetem gel olsem we sam long olgeta ya bifo oli stap mekem. Nao long wan dei nomo i gat twantetri taosen blong olgeta oli ded.”a (1 Korin 10:8) Aposol ya i stap tokbaot taem ya we ol man Isrel oli bodaon long ol gyaman god mo oli mekem “nogud long saed blong seks wetem ol gel blong Moab.” (Namba 25:1-9) !Nogud fasin long saed blong seks i save karem ded! Sipos yumi no blokem ol nogud tingting mo filing we oli save pulum yumi blong mekem rabis fasin ya, i olsem we yumi letem hat blong yumi i “rosta.” Jisas i talem se: “Yufala i harem finis we ol tija oli bin talem bifo, se ‘Bambae yu no stilim woman blong narafala man.’ Be mi mi talem long yufala, se ‘Man we i stap luk nogud long wan woman olsem we i wantem go long hem, hem i stilim woman ya finis, long tingting blong hem.’ ”—Matyu 5:27, 28.
9 Store blong ol stronghed enjel bifo we Bigfala Wora i ron long taem blong Noa, mo risal blong ol nogud tingting blong olgeta, i soemaot klia wanem samting i save kamaot taem wan man i ‘luk nogud long wan woman olsem we i wantem go long hem.’ (Jenesis 6:1, 2) Mo tu, rimemba se, wan bigfala trabol we King Deved i kasem long laef blong hem, i kamaot from we hem i gohed blong lukluk wan woman wetem tingting we i no stret. (2 Samuel 11:1-4) I defren olgeta long saed blong man ya blong stret fasin, Job, we hem i mared finis. Hem i ‘mekem wan kontrak wetem ae blong hem se bambae hem i no lukluk wan yangfala gel.’ From samting ya, hem i no foldaon long nogud fasin long saed blong seks mo hem i holemstrong oltaem long God. (Job 31:1-3, 6-11) Yumi save talem se ae blong yumi i olsem ol windo blong hat blong yumi. Mo plante rabis samting oli save kamaot long wan hat we i kam nogud.—Mak 7:20-23.
10 Sipos yumi folem tok blong Jisas long laef blong yumi, bambae yumi no letem ol rong tingting oli kasem yumi isi nomo. Bambae yumi no lukluk ol foto mo buk we oli soem ol fasin blong seks, mo bambae yumi no holemtaet sam rabis tingting long saed blong wan Kristin brata no sista blong yumi, wan man we i wok wetem yumi, no wan narafala man. Blong karemaot rosta long aean, i no naf blong brasem ples ya we rosta i stap long hem nomo. Taswe, yu no mas ting se ol nogud tingting mo filing long saed blong seks, oli nating nomo. Tekem strong aksin blong sakemaot ol tingting we oli save pulum yu blong mekem nogud fasin. (Skelem wetem Matyu 5:29, 30.) Pol i talem stret long ol Kristin man se: ‘Yufala i kilimaot ol fasin blong yufala, we oli blong laef ya long wol nomo. Hemia fasin blong mekem nogud wetem man no woman, doti fasin, fasin blong wantem tumas ol samting long saed blong seks, mo wantem tumas ol rabis samting. Mo tu, hemia fasin blong wantem sam samting blong narafala man, we i olsem wosip blong aedol. From ol fasin ya nao, kros blong God i stap kam antap.’ Yes, ‘kros blong God i stap kam antap’ from ol samting ya olsem rabis fasin long saed blong seks, mo bambae hem i mekem panis i kamaot blong soem kros blong hem. Taswe, yumi nidim blong ‘kilimaot’ ol fasin long bodi blong yumi we oli joen wetem ol rabis samting ya.—Kolosi 3:5, 6.
Woning Agensem Ol Tok Rebel
11, 12. (a) ?Wanem woning i stap long 1 Korin 10:9, mo hem i stap tokbaot wanem samting we i hapen long taem bifo? (b) ?Woning blong Pol i mas mekem wanem long yumi?
11 Nao, Pol i givim narafala woning se: “I nogud yumi stap traem Hae God ya, olsem we sam long olgeta ya bifo oli stap mekem. Nao ol snek oli kilim olgeta oli ded.” (1 Korin 10:9) Taem ol man Isrel oli stap wokbaot long draeples kolosap long Idom, oli “stap tok nogud agensem God mo Moses, se: ‘?From wanem yu karemaot mifala long Ijip blong kam ded long draeples ya? I no gat bred mo i no gat wora, mo sol blong mifala i kam les finis blong kakae rabis bred ya,’ ” hemia mana we God i givim tru long wan merikel. (Namba 21:4, 5) !Tingbaot samting ya! !Ol man Isrel ya oli “stap tok nogud agensem God,” oli talem se samting we God i givim i rabis!
12 From ol tok agens blong ol man Isrel ya, oli stap traem longfala tingting blong Jeova. Hem i no blokem panis, from we biaen, yumi luk se Jeova i sanem ol posen snek oli kam kakae olgeta, mo plante oli ded from. Afta we ol man oli tanem tingting blong olgeta from sin we oli bin mekem, Moses i toktok i go long God from olgeta, nao God i stopem trabol ya. (Namba 21:6-9) Tru ya, store ya i mas stap olsem wan woning long yumi se yumi no mas gat wan tingting we i rebel, no we i toktok smol agensem narafala, antap moa agensem God mo ol tiokratik rod blong hem.
Woning Agensem Fasin Blong Toktok Smol
13. ?Fas Korin 10:10 i givim woning agensem wanem samting, mo Pol i stap tingbaot wanem fasin rebel long ples ya?
13 Nao Pol i givim laswan woning we yumi kasem from ol man Isrel long draeples. Hem i raetem se: “Mo i nogud yumi stap tok smosmol agens long God, olsem we sam long olgeta ya bifo oli stap mekem. Nao enjel blong kilim man i kam kilim olgeta oli ded from.” (1 Korin 10:10) Fasin rebel i kamaot taem Kora, Datan, Abiram, mo sam narafala man bakegen, oli no folem tiokratik plan, nao oli stap talem se Moses mo Eron tufala i no gat raet blong lidim olgeta. (Namba 16:1-3) Afta we ol rebel ya oli lus, ol man Isrel oli stat toktok smol. Hemia from we oli gat tingting ya se i no stret nating we ol rebel ya oli ded. Namba 16:41 i talem se: “Long nekis dei nomo, kampani blong olgeta man Isrel, i stat blong toktok smol agensem Moses mo Eron, se: ‘Yutufala ya, yutufala i kilim i ded ol man ya we oli man blong Jeova.’ ” From we oli agensem stret fasin we i kamaot blong jajem ol man ya, ale, 14,700 man Isrel oli ded from panis we God i mekem i kamaot long olgeta.—Namba 16:49.
14, 15. (a) ?Ol “man we oli no ona long God” we oli bin kam insaed long kongregesen, oli mekem wanem sin? (b) ?Yumi save lanem wanem from samting we i kamaot long Kora?
14 Long faswan handred yia K.T.,b i gat sam “man we oli no ona long God” oli kam insaed long Kristin kongregesen. Olgeta ya oli ol gyaman tija mo ol man blong toktok smol agensem narafala. Ol man ya oli “no gat respek long ol masta, mo oli tok nogud long olgeta we i gat haenem,” hemia ol man we tabu speret i makemaot olgeta blong lukaot long kongregesen long saed blong speret. Disaepol Jud i tokbaot ol man ya we oli agensem God mo trufala bilif, se: “Ol man ya, oli stap toktok smol agens long narafala, oli stap tok konkon long saed blong laef blong olgeta, mo oli folem ol samting we olgeta nomo oli wantem.” (Jud 3, 4, 8, 16, NW) Tede, sam man oli gat fasin blong toktok smol from we oli letem wan nogud tingting i gru long hat blong olgeta, mo i stat blong spolem olgeta long saed blong speret. Plante taem, oli tokbaot ol slak fasin blong ol brata we oli stap lukaot long kongregesen, mo oli stat blong toktok smol agensem olgeta. Ol smosmol tok agens, i save go kasem mak we oli tok agensem ol buk blong ‘slef we i stret.’
15 I no rong blong askem ol gudfala kwestin long saed blong wan poen long Baebol. Be, ?olsem wanem sipos yumi gat wan tingting agens, nao yumi talemaot tingting ya taem yumi stap storeyan wetem sam fren we oli stap toktok smol agens tu? I gud we yumi wanwan i tingbaot se, ‘?Wanem samting i save kamaot from ol tok agens ya? Ating i waes moa blong stopem fasin ya, mo prea wetem tingting daon, blong askem God blong givim waes.’ (Jemes 1:5-8; Jud 17-21) Kora mo ol man we oli sapotem hem, oli rebel agensem Moses mo Eron we tufala i stap lidim olgeta. Maet olgeta ya oli sua se tingting we oli gat i stret, ale, taswe oli no traem blong skelem wanem risen nao i pusum olgeta blong toktok olsem. Nating se i olsem wanem, oli rong olgeta. Sem mak long ol man Isrel we oli toktok smol agensem jajmen we i kasem Kora mo ol narafala rebel. !I waes blong letem ol eksampel ya oli wekemap yumi blong skelem tingting we i stap pusum yumi, mo blong stopem fasin blong toktok smol no tok agens, mo blong letem Jeova i stretem yumi!—Ol Sam 17:1-3.
Lanem Samting, Mo Haremgud Long Ol Blesing
16. ?Wanem mining blong tok we i stap long 1 Korin 10:11, 12?
16 Long paoa blong God, Pol i givim wan advaes long yumi afta we hem i tokbaot ol woning ya: “Olgeta trabol ya we ol man ya bifo oli kasem, oli blong tijim olgeta. Mo oli raetem store blong olgeta long buk blong wekemap yumi ya we yumi stap laef naoia, we Lasdei blong wol i kolosap. Man we i ting se i stap stanap strong, hem i mas lukaot gud blong bambae i no foldaon bakegen.” (1 Korin 10:11, 12) Yumi no mas ting nating long gudnem we yumi gat insaed long Kristin kongregesen.
17. Sipos yumi haremsave se i gat wan nogud tingting i stap long hat blong yumi, ?yumi mas mekem wanem?
17 Aean i save kam rosta isi nomo. Long sem fasin, i isi nomo long yumi, ol pikinini blong sinman ya Adam, blong mekem samting we i nogud. (Jenesis 8:21; Rom 5:12) Taswe, yumi no mas letem tingting blong yumi i foldaon sipos yumi haremsave se i gat wan nogud tingting long hat blong yumi we i stap pusum yumi. Be, yumi mas tekem aksin kwiktaem. Taem aean i stap long wan ples we win i wetwet smol no win i blu i kam long solwora, hem i save rosta kwik moa. Yumi mas stap longwe long ‘win’ blong wol ya blong Setan, wetem ol rabis pleplei, mo ol nogud fasin long saed blong seks we oli stap long evri ples, mo ol tingting agens tu.—Efesas 2:1, 2.
18. ?Jeova i mekem wanem long saed blong ol slak fasin we ol man oli gat?
18 Jeova i givim sam rod long man blong faet agensem ol slak fasin we yumi gat taem yumi bon. Hem i givim stret Pikinini blong hem, blong bambae olgeta man we oli bilif long hem oli save kasem laef we i no save finis. (Jon 3:16) Sipos yumi folemgud Jisas mo soemaot fasin olsem Jisas i soem, bambae yumi kam olsem wan blesing long ol man raonabaot long yumi. (1 Pita 2:21) Mo tu, bambae yumi no save kasem trabol, be bambae yumi kasem ol blesing blong God.
19. ?Sipos yumi stadigud long ol eksampel blong Baebol, olsem wanem samting ya i save givhan long yumi?
19 Tede, yumi save foldaon long sin, olsem ol man Isrel bifo. Be, yumi gat fulwan Tok blong God blong lidim yumi. From ol pej blong hem, yumi kasem save long ol fasin we Jeova i bin mekem long ol man. Mo tu, yumi luk nambawan eksampel blong Jisas taem hem i soemaot ol fasin blong God, i ‘soemaot paoa blong God mo hem i stret pija blong God.’ (Hibrus 1:1-3; Jon 14:9, 10) Tru long prea mo fasin blong stadi oltaem long Baebol, yumi save kasem “tingting blong Kraes.” (1 Korin 2:16) Taem sam samting i pulum yumi blong mekem nogud, mo sam samting i traem bilif blong yumi, bambae i givhan long yumi sipos yumi tingbaot ol eksampel blong bifo we oli stap long Baebol, antap moa, nambawan eksampel blong Jisas Kraes. Sipos yumi mekem olsem, bambae yumi no save harem nogud long ol trabol we God i mekem long ol stronghed man. Be, bambae yumi haremgud naoia from we Jeova i glad long yumi, mo bambae yumi haremgud long ol blesing we hem i givim gogo i no save finis.
[Ol futnot]
a Lukluk Wajtaoa blong Julae 15, 1992, pej 4.
b K.T. i minim Kristin Taem.
?Bambae Yu Yu Ansa Olsem Wanem?
◻ ?Olsem wanem yumi save folem advaes blong Pol blong no wosip long aedol?
◻ ?Yumi save mekem wanem blong folem woning blong aposol ya long saed blong fasin blong slip olbaot?
◻ ?From wanem yumi mas stap longwe long fasin blong toktok smol mo tok agens?
◻ ?Olsem wanem yumi save kasem ol blesing long God, be i no ol trabol?
[Tok Blong Pija Long Pej 18]
Sipos yumi wantem kasem blesing blong God, yumi mas stap longwe long wosip blong aedol
[Tok Blong Pija Long Pej 20]
Olsem we yumi mas karemaot rosta long wan samting, yumi mas tekem strong aksin tu blong karemaot ol nogud tingting long hat blong yumi