Ol Blesing No Ol Trabol—!Yumi Save Jusum!

“Mi mi putum laef mo ded, tufala i stap long fes blong yu, yes, ol blesing mo ol trabol. Mo yu mas jusum laef, olsem nao, bambae yu save gohed blong stap laef.”—DUTRONOME 30:19.

1. ?God i wokem ol man we oli naf blong mekem wanem?

JEOVA GOD i wokem yumi, ol man blong hem we yumi gat waes, blong yumi naf mo fri blong mekem prapa disisen blong yumi. Hem i no wokem yumi olsem wan mesin no robot, we narafala i mas mekem yumi wok. No gat. Wan jans we yumi gat mo wan wok we yumi gat, hemia blong mekem ol prapa disisen blong yumi. (Ol Sam 100:3) Faswan man mo woman, Adam mo Iv, tufala i fri blong jusum rod we bambae tufala i folem. Mo biaen, tufala i mas eksplenem long God from wanem tufala i jusum rod ya.

2. ?Adam i jusum wanem rod, mo wanem i kamaot from?

² Man ya we i wokem olgeta samting i givim evri samting we man i nidim, blong laef blong olwe long wan wol we i kam paradaes, mo i fulap long ol blesing. ?From wanem stampa tingting ya i no kamtru yet? From we Adam i jusum rod we i rong. Jeova i givim wan oda long man, se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded from.” (Jenesis 2:​16, 17) Sipos Adam i jusum blong obei, faswan papa mama ya blong yumi tufala i save kasem blesing. From we tufala i no obei, ded i kamaot. (Jenesis 3:​6, 18, 19) Ale, sin mo ded i kasem olgeta man we oli kamaot long Adam.​—Rom 5:12.

God i Mekem Rod Blong Ol Blesing Oli Save Kamtru

3. ?Olsem wanem God i soemaot klia se stampa tingting blong hem long saed blong man, bambae i mas kamtru?

³ Jeova God i stanemap wan rod, blong mekem se bambae stampa tingting blong hem blong blesem ol man i save kamtru. Long profet tok we hem wan i givim long garen blong Iden, hem i talemaot wan Laen, i se: ‘Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu kakae bak blong leg blong hem.’ (Jenesis 3:​15) Biaen, God i promes se ol man we oli obei long hem, bambae oli kasem blesing from Laen ya, wan man we i kamaot long Ebraham.​—Jenesis 22:15-18.

4. ?Jeova i mekem wanem rod blong bambae ol man oli kasem blesing?

⁴ Laen ya we God i promes se bambae i karem blesing i kam, hemia Jisas Kraes. Kristin man ya, aposol Pol, i tokbaot wok we Jisas Kraes bambae i mekem, folem stampa tingting blong Jeova blong blesem ol man. Hem i talem se: “God i soemaotgud lav blong hem long yumi, from we taem yumi sinman yet, Kraes i ded blong sevem yumi.” (Rom 5:​8, NW) Olgeta sinman we oli obei long God mo we oli gat strong bilif long ransom sakrifaes blong Jisas Kraes, bambae oli haremgud long plante blesing. (Ol Wok 4:12) ?Bambae yu yu jusum blong obei mo kasem ol blesing? Fasin blong no obei bambae i karem frut we i defren olgeta.

?Olsem Wanem Long Ol Trabol?

5. ?Wanem mining blong tok ya “trabol” long ples ya?

⁵ Ol trabol oli defren olgeta long ol blesing. Long ples ya, tok ya “trabol” i minim blong tok nogud long saed blong wan man, no blong talemaot trabol long hem olsem wan panis. Hibru tok ya qela·lahʹ i kamaot long tok ya qa·lalʹ, we prapa mining blong hem se “no hevi.” Be, taem oli yusum tok ya olsem wan pijatok, hem i minim ‘singaot trabol i kam long wan man’ no ‘soem fasin blong no respektem nating wan narafala man.’​—Levitikas 20:9; 2 Samuel 19:43.

6. ?Wanem samting i kamaot long Elaesa kolosap long taon blong Betel bifo?

⁶ Tingbaot wan klia eksampel blong trabol we i kamaot kwiktaem olsem wan panis. Samting ya i kamaot taem profet blong God Elaesa i aot long Jeriko, i stap wokbaot i go long Betel. Store i talem se: “Taem hem i stap folem rod i go, i gat sam smol boe we oli kamaot long taon, nao oli stap jikim hem. Oli stap singaot long hem se: ‘!Gowe, yu bolhed! !Gowe, yu bolhed!’ Nao hem i tanraon, i lukluk olgeta, mo i singaot trabol i kam long olgeta long nem blong Jeova. Ale, tu bigfala mama bea oli kamaot long bus mo oli tereterem bodi blong fotetu long ol pikinini ya long ol smosmol pis.” (2 King 2:23, 24) Baebol i no talem stret, ol tok panis we Elaesa i talemaot taem hem i singaot trabol i kam long ol pikinini ya we oli stap jikim hem. Be, tok ya i kamtru from we wan profet blong God we i stap mekem ol samting we God i wantem, i talemaot tok ya long nem blong Jeova.

7. ?Wanem i hapen long ol pikinini we oli jikim Elaesa, mo from wanem?

⁷ I luk olsem se, risen blong ol pikinini ya oli jikim Elaesa, hemia from we hem i stap werem klos we Elaeja i bin werem olsem wan profet blong God. Mo ating ol pikinini ya oli no wantem wan narafala profet olsem Elaeja, i stap bakegen wetem olgeta. (2 King 2:​13) Elaesa i singaot trabol i kamdaon long ol pikinini ya long nem blong God blong Elaeja. Hemia blong soemaot se hem i rili man ya we i karem wok blong Elaeja, mo blong tijim ol pikinini ya mo papa mama blong olgeta, se oli mas gat respek long profet blong Jeova. Jeova i soemaot se hem i agri long Elaesa olsem profet blong hem, taem hem i sanem tu mama bea oli kamaot long bus blong kilim i ded 42 long ol pikinini we oli stap jikim hem. Jeova i tekem aksin kwiktaem, from we oli no gat respek nating long man we hem i stap yusum long taem ya, olsem rod blong talemaot ol tok blong hem.

8. ?Ol man Isrel oli agri blong mekem wanem, mo wanem samting i save kamaot from?

⁸ Sam yia bifo, ol man Isrel oli bin soemaot semkaen fasin blong no gat respek long rod we God i stap yusum. Samting ya i hapen olsemia: Long 1513 B.K.T.,a Jeova i soem long ol man Isrel se hem i laekem olgeta, taem hem i mekem olgeta oli fri long kalabus long Ijip, olsem we hem i karem olgeta long “wing blong igel.” Smoltaem afta long samting ya, oli promes blong obei long God. Makemgud we oli mas obei blong kasem blesing blong God. Jeova i yusum Moses blong talem long olgeta se: ‘Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol, from we fulwol ya i stap long han blong mi.’ Nao olgeta man Isrel oli ansa wetem ol gudfala tok ya se: “Bambae mifala i mekem olgeta samting we Hae God i talem.” (Eksodas 19:4, 5, 8; 24:3) Ol man Isrel oli talem se oli laekem Jeova, oli blong hem, mo oli promes blong obei long olgeta tok blong hem. Sipos oli mekem olsem, bambae oli kasem plante blesing.

9, 10. Taem Moses i stap antap long Bigfala Hil ya Sinae, ?ol man Isrel oli mekem wanem, mo wanem i kamaot from?

⁹ Be bifo we ‘fingga blong God’ i raetemdaon ol stampa loa we oli joen wetem promes ya, ol man ya oli kasem trabol we i kamaot long God from samting we oli mekem. (Eksodas 31:18) ?From wanem i nidim blong oli kasem trabol olsem? Ol man Isrel oli bin talem finis se oli wantem mekem olgeta samting we Jeova i talem. Yes, long ol tok blong olgeta oli lukaot blesing, be long fasin blong olgeta oli jusum rod we oli mas kasem trabol from.

¹⁰ Taem Moses i stap antap long Bigfala Hil blong Sinae blong 40 dei blong kasem ol Ten Komanmen, ol man Isrel oli brekem promes we oli bin mekem blong stap tru long Jeova nomo. Baebol i talem se: “Nao taem ol man oli luk we Moses i stap longtaem tumas antap long hil ya, i no kamdaon kwiktaem, olgeta oli kam hivap raon long Eron, oli tok strong long hem. Oli talem se ‘Moses ya we i tekemaot yumi long Ijip, i lidim yumi i kam long ples ya, naoia yumi no moa save wanem i mekem hem. Mifala i wantem yu yu wokem wan god blong yumi, blong i lidim yumi.’ ” (Eksodas 32:1) Hemia wan narafala eksampel blong no respektem man we Jeova i yusum olsem rod blong hem blong lidim mo tijim ol man blong hem. Ol man Isrel oli folem fasin blong ol man Ijip blong wosip long ol aedol. From samting ya, oli kasem trabol taem naef blong faet i kilim i ded 3,000 long olgeta long wan dei nomo.—Eksodas 32:​2-6, 25-29.

Ol Tok Blong Talemaot Blesing Mo Trabol

11. ?Josua i folem wanem tok long saed blong ol blesing mo trabol?

¹¹ Kolosap long en blong ol 40 yia we ol man Isrel oli wokbaot long draeples, Moses i talemaot ol wanwan blesing we oli save kasem sipos oli jusum blong obei long God. Mo tu, hem i talemaot olgeta trabol we bambae ol man Isrel oli kasem sipos oli jusum blong no obei long Jeova. (Dutronome 27:⁠11 kasem 28:10) Smoltaem afta we ol man Isrel oli kasem Promes Ples, Josua i mekem samting we Moses i bin talem long hem blong mekem, long saed blong ol blesing mo trabol ya. Sikis laen blong ol man Isrel oli stap stanap kolosap long Bigfala Hil ya Ebal, mo ol sikis narafala laen oli stanap long fored blong Bigfala Hil blong Gerasim. Ol man Livae oli stanap long flat ples we i stap long medel blong tufala hil ya. I luk olsem we olgeta laen we oli stap stanap fored blong Bigfala Hil blong Ebal oli talem “!Amen!” long olgeta trabol, no tok panis, we oli ridimaot long olgeta. Ol narafala laen kolosap long Bigfala Hil blong Gerisim, oli ansa long ol blesing we ol man Livae oli ridimaot long olgeta.—Josua 8:30-35.

12. ?Wanem sam long ol trabol we ol man Livae oli talemaot?

¹² Traem tingbaot sipos yu harem ol man Livae oli talem se: “Man we i katem wan pija long wud no i wokem wan aedol long ston, mo i putum long wan ples haed, trabol bambae i kam long hem, from we hemia wan samting we Jeova i no laekem nating. . . . Man we i no soem respek long papa mama blong hem, trabol bambae i kam long hem. . . . Man we i jenisim mak blong graon blong narafala blong mekem i kam smol moa, trabol bambae i kam long hem. . . . Man we i lidim blaenman i go long rong rod, trabol bambae i kam long hem. . . . Man we i jajem wan strenja, wan boe we i no gat papa, no wan wido woman, long fasin we i no stret, trabol bambae i kam long hem. . . . Man we i slip wetem woman blong papa blong hem, trabol bambae i kam long hem from we hem i mekem papa blong hem i sem. . . . Man we i slip wetem enikaen anamol, trabol bambae i kam long hem. . . . Man we i slip wetem stret sista blong hem, pikinini gel blong papa no pikinini gel blong mama blong hem, trabol bambae i kam long hem. . . . Man we i slip wetem mama blong woman blong hem, trabol bambae i kam long hem. . . . Man we i haed mo i kilim brata blong hem i ded, trabol bambae i kam long hem. . . . Man we narafala i pem hem blong kilim i ded wan man we i no mekem rong, trabol bambae i kam long hem. . . . Man we i no folem olgeta tok blong loa ya, trabol bambae i kam long hem.” Afta we oli talemaot ol wanwan tok panis ya, olgeta laen we oli stanap long fored blong Bigfala Hil blong Ebal, oli talem, “!Amen!”​—Dutronome 27:15-​26.

13. Long prapa tok blong yu, ?olsem wanem bambae yu eksplenem sam blesing we ol man Livae oli bin talemaot?

¹³ Nao traem tingbaot sipos yu harem olgeta long fored blong Bigfala Hil blong Gerisim oli ansa wetem strong voes long ol wanwan blesing we ol man Livae oli talemaot: “Bambae yu kasem blesing long taon, mo bambae yu kasem blesing long garen. Bambae pikinini we i kamaot long bel blong yu i kasem blesing, mo blesing bambae i kamaot long graon blong yu, mo long ol anamol blong yu, long yangfala buluk mo long ol pikinini sipsip blong yu. Bambae blesing i kamaot long basket blong yu mo long ples we yu wokem bred long hem. Bambae yu kasem blesing taem yu kam insaed, mo bambae yu kasem blesing taem yu go afsaed.”​—Dutronome 28:​3-6.

14. ?Ol man Isrel oli save kasem blesing sipos oli mekem wanem?

¹⁴ ?Wanem samting i save mekem se oli kasem ol blesing ya? Baebol i talem se: “Sipos yu lesin long tok blong Jeova, God blong yu, mo yu lukaotgud blong folem ol loa blong hem we mi mi talem long yu tede, Jeova, God blong yu, bambae i leftemap yu antap long ol narafala nesen long wol. Mo olgeta blesing ya bambae oli kasem yu, mo bambae oli bitim mak, from we yu gohed blong lesin long voes blong Jeova, God blong yu.” (Dutronome 28:1, 2) Yes, samting we i mekem se oli kasem ol blesing ya long God, hemia fasin blong olgeta blong obei long God. Be, ?olsem wanem long yumi tede? ?Bambae yumi wanwan i gohed blong ‘lesin long voes blong Jeova,’ mo from samting ya, jusum ol blesing mo laef?—Dutronome 30:19, 20.

Lukluk Moa Klia

15. ?Wanem impoten poen we i kamaot long Dutronome 28:3 long saed blong ol blesing, mo olsem wanem samting ya i save givhan long yumi?

¹⁵ I gud yumi tingbaot sam blesing we wan man Isrel i save kasem sipos hem i obei long Jeova. Wan eksampel, Dutronome 28:3 i talem se: “Bambae yu kasem blesing long taon, mo bambae yu kasem blesing long garen.” Blesing blong God i no dipen long ples we yumi stap long hem, no long wok we yumi stap mekem. Maet samfala oli harem olsem se oli stap kalabus long laef blong olgeta, maet from we oli laef long wan kantri we i pua, no we faet i stap gohed long hem. Maet sam narafala oli wantem mekem wok blong Jeova long wan narafala ples. Maet tingting blong sam Kristin man i foldaon, from we oli no kam man blong givhan no oli no kam elda long kongregesen.b Samtaem, ol Kristin woman oli harem nogud, from we oli no gat jans blong joen long fultaem wok blong prij olsem ol paenia no ol misinari. Be, evriwan we oli ‘lesin long voes blong Jeova mo lukaotgud blong folem olgeta samting we hem i wantem olgeta blong mekem,’ bambae oli kasem blesing naoia mo blong olwe.

16. ?Olsem wanem rul blong Dutronome 28:4 i stap kamaot tede long ogenaesesen blong Jeova?

¹⁶ Dutronome 28:4 i talem se: “Bambae pikinini we i kamaot long bel blong yu i kasem blesing, mo blesing bambae i kamaot long graon blong yu, mo long ol anamol blong yu, long yangfala buluk mo long ol pikinini sipsip blong yu.” Long Hibru hanraet, oli yusum tok ya “yu” blong soem se ol blesing ya bambae oli kasem ol wanwan man Isrel we oli stap obei. ?Olsem wanem long ol man blong Jeova tede we oli obei? Namba we i stap kam antap bigwan long ogenaesesen blong ol Wetnes blong Jeova raon long wol, i soemaot se God i stap blesem fasin traehad blong olgeta man blong talemaot gud nyus blong Kingdom, we namba blong olgeta i bitim 5 milyan naoia. (Mak 13:10) Mo namba ya i save kam bigwan moa yet, from we bitim 13 milyan man oli bin kam long Lodsapa long 1995. ?Yu yu stap haremgud long ol blesing blong Kingdom?

I Dipen Long Rod We Isrel i Jusum

17. ?Blong kasem blesing no trabol ‘bitim mak’ i dipen long wanem samting?

¹⁷ Yes, i olsem se ol blesing oli folem wan man Isrel we i stap obei. God i promes se: “Olgeta blesing ya bambae oli kasem yu mo bambae oli bitim mak.” (Dutronome 28:2) Long sem fasin, hem i talem long saed blong ol trabol se: “Olgeta trabol ya bambae oli kasem yu mo bambae oli bitim mak.” (Dutronome 28:15) Sipos yu yu wan man Isrel bifo, ?bambae yu yu kasem ol blesing we i ‘bitim mak’ no ol trabol we i ‘bitim mak’? Samting ya bambae i dipen long fasin blong yu blong obei long God no blong no obei long hem.

18. ?Ol man Isrel oli save blokem ol trabol sipos oli bin mekem wanem?

¹⁸ Dutronome 28:15-68 i tokbaot ol trabol we oli save kamaot from fasin blong no obei. Sam long ol trabol ya oli defren olgeta long ol blesing we Dutronome 28:​3-​14 i tokbaot long saed blong ol man we oli obei. Plante taem, ol man Isrel oli kasem bigfala trabol olsem panis, from we oli jusum blong mekem gyaman wosip. (Esra 9:7; Jeremaea 6:6-8; 44:2-6) !Hemia i nogud tumas! Oli save blokem trabol ya sipos oli bin jusum stret rod, hemia blong obei long ol loa mo rul blong Jeova, we oli soem klia wanem samting i gud mo wanem samting i nogud. Plante man tede oli harem nogud long ol trabol we oli kasem, from we oli jusum blong folem ol gyaman skul we oli agensem ol rul blong Baebol. Mo tu, oli mekem rabis fasin long saed blong seks, oli tekem drag, oli dring alkol bitim mak, mo plante narafala samting bakegen. Olsem long Isrel mo Juda bifo, sipos ol man oli jusum nogud rod, God i no save glad long olgeta, mo oli save kasem plante trabol we oli no nidim blong kasem.​—Aesea 65:12-14.

19. Tokbaot laef we ol man Juda mo Isrel oli gat taem oli jusum blong obei long Jeova.

¹⁹ Ol blesing oli fulap mo pis i stap long evri ples taem ol man Isrel oli obei long Jeova. Wan eksampel, long saed blong taem blong King Solomon, yumi ridim se: “Juda mo Isrel oli plante tumas, olsem sanbij we i stap kolosap long solwora. Mo oli stap kakae mo dring mo oli stap haremgud. . . . Oltaem Juda mo Isrel oli stap sefgud, wanwan long olgeta oli stap sidaon aninit long rop ya blong mekem waen long hem mo aninit long prapa figtri blong olgeta, stat long Dan go kasem Bereseba, long olgeta dei blong Solomon.” (1 King 4:20-25) Long taem blong King Deved tu, nating se ol enemi blong God oli agensem nesen blong hem plante taem, be nesen ya i haremsave se Jeova i stap givhan long olgeta mo blesem olgeta taem oli jusum blong obei long God ya blong trutok.—2 Samuel 7:28, 29; 8:1-15.

20. ?God i sua long wanem samting long saed blong ol man?

²⁰ ?Olsem wanem? ?Bambae yu yu obei long God? no ?Bambae yu no obei long hem? Ol man Isrel oli fri blong jusum. I tru se, yumi evriwan i kasem sin blong Adam, be tu, yumi kasem fasin ya we yumi fri blong jusum wanem samting we yumi wantem mekem. Nating se i gat Setan, rabis wol ya, mo ol slak fasin blong yumi, be yumi save jusum stret rod. Antap moa, Man ya we i wokem yumi i sua se long olgeta taem blong trabol mo traem, bambae i gat sam man we oli jusum stret rod, i no long toktok blong olgeta nomo, be long fasin blong olgeta tu. (1 Pita 5:8-10) ?Yu yu wan long olgeta ya?

21. ?Bambae yumi stadi long wanem samting long nekiswan haf?

²¹ Long nekiswan haf, bambae yumi save skelem tingting mo fasin blong yumi wetem eksampel blong ol man bifo. I gud yumi wanwan i ansa wetem fasin tangkyu long tok blong God we Moses i talemaot, se: “Mi mi putum laef mo ded, tufala i stap long fes blong yu, yes, ol blesing mo ol trabol. Mo yu mas jusum laef, olsem nao, yu save gohed blong stap laef.”​—Dutronome 30:19.

[Ol futnot]

?Bambae Yu Yu Ansa Olsem Wanem?

◻ ?Olsem wanem Jeova i mekem rod blong ol sinman oli save kasem blesing?

◻ ?Wanem ya ol trabol?

◻ ?Olsem wanem ol man Isrel oli save kasem blesing, i no trabol?

◻ ?Wanem ol blesing we ol man Isrel oli kasem taem oli obei long God?

[Tok Blong Pija Long Pej 15]

Ol man Isrel oli hivap long fored blong Hil blong Gerisim mo Hil blong Ebal

[Credit Line]

Pictorial Archive (Near Eastern History) Est.