Kolosap Nao Bambae Trufala Wosip i Win Olgeta

“Jeova i mas kam king antap long ful wol.”​—SEKARAEA 14:9.

1. ?Wanem i hapen long ol tabu Kristin long Faswan Bigfala Faet blong Wol? ?Mo olsem wanem profet tok i bin talemaot samting ya?

LONG Faswan Bigfala Faet blong Wol, ol nesen we oli joen long faet oli mekem ol tabu Kristin oli harem nogud long plante hadtaem, mo oli putum plante blong olgeta long kalabus. Ol man oli blokem olgeta bigwan blong mekem sakrifaes blong presem Jeova. From samting ya, oli kam olsem we oli kalabus long saed blong speret. Profet tok blong Sekaraea 14⁠:2 i tokbaot samting ya. Hem i tokbaot wan taem we olgeta nesen bambae oli kam agensem Jerusalem. Taon we profet tok ya i tokbaot, hem i ‘Jerusalem long heven.’ Hemia Kingdom blong God long heven, ples ya we ‘Bigfala jea blong God mo blong Smol Sipsip’ i stap long hem. (Hibrus 12:22, 28; 13:14; Revelesen 22:3) Ol tabu man blong God long wol ya, oli man blong taon ya. Ol tabu man ya we oli stap tru long God, oli laef tru long faet ya. Oli no letem ol enemi oli tekemaot olgeta long “taon ya” blong go kalabus.a

2, 3. (a) ?Olsem wanem wosip blong Jeova i win bigwan afta 1919? (b) ?Stat long 1935, wanem samting i hapen?

² Long 1919, ol tabu man we oli stap tru long God oli no moa stap olsem we oli kalabus. Kwiktaem nomo, oli yusumgud taem blong pis we i kamaot afta long faet. Ol man ya we oli stap wok long nem blong Jerusalem long heven, oli tekem bigfala jans ya blong talemaot gud nyus blong Kingdom blong God, mo blong hivimap ol laswan memba blong 144,000. (Matyu 24:14; 2 Korin 5:​20) Long 1931, oli tekem nem ya we i stret long olgeta, ol Wetnes blong Jeova, wan nem we i stanap long Baebol.​—Aesea 43:10, 12.

³ Afta long taem ya, ol tabu Wetnes blong God oli gohed strong long wok blong olgeta, oli neva kam slak mo lego. Hitler mo ol ami blong Nasi, olgeta tu oli no naf blong blokem olgeta. Nating se ol man oli mekem i nogud long olgeta, wok blong olgeta i karem frut long olgeta ples blong wol. Stat moa long yia 1935, “bigfala hif blong man” we oli kamaot long olgeta ples blong wol we Revelesen i tokbaot, i joenem olgeta. Ol man ya tu, oli ol Kristin we oli givim laef blong olgeta long God, oli baptaes, mo oli “wasem klos blong olgeta finis blong mekem oli waet long blad blong Smol Sipsip ya we i ded,” Jisas Kraes. (Revelesen 7:​9, 14) Be ol man ya, tabu speret i no makemaot olgeta. Hop blong olgeta i no blong go long heven. Oli gat hop blong kasem laef we Adam mo Iv, tufala i lusum, hemia laef we i stretgud olgeta long paradaes long wol ya. (Ol Sam 37:29; Matyu 25:34) Tede, namba blong bigfala hif blong man ya i bitim faef milyan. Trufala wosip blong Jeova i stap win bigwan, be taem ya we bambae hem i win olgeta i stap kam yet.

Ol Man Blong Narafala Kantri Long Tempel Blong God Long Saed Blong Speret

4, 5. (a) ?Bigfala hif blong man i stap wosip long Jeova long weples? (b) ?Oli kasem wanem blesing, mo samting ya i fulumap wanem profet tok?

⁴ Olsem Baebol i bin talem, bigfala hif blong man ya “oli stap wosip long [God] long dei mo long naet insaed long tempel blong hem.” (Revelesen 7:​15, futnot, NW) Olgeta ya oli no ol pris blong Isrel long saed blong speret. Taswe, ating Jon i luk olgeta oli stap stanap long yad afsaed long tempel, we i ples blong ol man blong narafala kantri. (1 Pita 2:5) !Tempel blong Jeova i kam naes tumas! !Ol vranda blong hem oli fulap wetem bigfala hif blong man, we oli joen wetem smol grup blong Isrel long saed blong speret, nao oli stap presem God!

⁵ Taem bigfala hif blong man ya oli mekem wok blong God, oli no gat fasin ya we yad blong ol pris insaed long tempel i pija blong hem. God i no luk olgeta olsem we oli stret man, we Hem i save tekemaot olgeta oli kam ol pikinini blong Hem long saed blong speret. (Rom 8:​1, 15) Nating se i olsem, taem oli soem bilif long sakrifaes blong Jisas, Jeova i save luk olgeta olsem we oli klin long fes blong hem. Oli kam stret man long fasin ya we oli save frengud wetem God. (Skelem wetem Jemes 2:​21, 23.) Olgeta tu oli kasem blesing ya blong givim sakrifaes we God i agri long hem, antap long olta blong Hem long saed blong speret. Taswe, profet tok blong Aesea 56⁠:​6, 7, i stap kamtru bigwan long bigfala hif blong man ya: “Ol man blong narafala kantri we oli kam long Jeova blong mekem wok blong hem mo blong laekem nem blong Jeova, . . . olgeta tu, bambae mi tekem olgeta oli kam long tabu hil blong mi, mo bambae mi mekem olgeta oli glad tumas insaed long haos prea blong mi. Ol presen mo ol sakrifaes we oli givim long olta blong mi, bambae mi mi agri long olgeta. From we bambae ol man oli kolem haos blong mi se haos blong prea blong olgeta man.”

6. (a) ?Ol man blong narafala kantri oli givim wanem sakrifaes? (b) Besin wora long yad blong ol pris i mekem olgeta oli tingbaot wanem samting?

⁶ Sam long ol sakrifaes we ol man ya blong ol narafala kantri oli givim, hemia ‘frut blong maot [we i olsem sid we oli smasemgud blong givim long God olsem presen] we i stap talemaot nem blong [God] long ol man.’ Mo tu, hemia ‘ol gudfala fasin, mo fasin blong serem olting wetem ol narafala.’ (Hibrus 13:15, 16) Bigfala besin wora we ol pris oli yusum blong wasem han mo leg blong olgeta long hem, hem i wan impoten samting we ol man ya blong narafala kantri tu oli mas tingbaot. Taem Tok blong God i stap kam moa klia sloslou, olgeta tu oli mas letem hem i klinim olgeta long saed blong speret mo long saed blong fasin.

Tabu Ples Mo Ol Samting Insaed Long Hem

7. (a) ?Wanem tingting blong bigfala hif blong man long saed blong wok blong ol tabu pris? (b) ?Sam man blong narafala kantri oli kasem wanem narafala wok?

⁷ ?Olsem wanem? ?Tabu Ples mo ol samting insaed long hem oli gat wan mining long bigfala hif blong man blong ol narafala kantri? I tru se, bambae oli neva save stap long ples ya we i olsem Tabu Ples. Oli no bon bakegen blong kam olsem ol pikinini blong God long saed blong speret we oli gat raet blong go long heven. ?Be oli jelas from samting ya? No gat. Oli no jelas. Oli glad we oli gat jans blong sapotem smol grup blong ol 144,000 we oli stap yet long wol ya. Mo oli soem bigfala tangkyu long God from stampa tingting blong hem blong tekemaot ol speret pikinini ya, we bambae oli joen wetem Kraes long wok blong mekem ol man oli kam stretgud olgeta. Mo tu, bigfala hif blong man ya blong ol narafala kantri, oli gat bigfala tangkyu from kaengud fasin blong God blong givim hop ya long olgeta, we oli save laef foreva long Paradaes long wol. Sam long ol man ya blong ol narafala kantri, olsem ol Netinim bifo, oli kasem blesing blong lukaot long sam wok, blong givhan long ol tabu pris.b (Aesea 61:5) Jisas i putumap sam long olgeta olsem ‘ol prins long olgeta ples long wol.’​—Ol Sam 45:16.

8, 9. ?Olsem wanem i givhan long bigfala hif blong man taem oli tingbaot ol samting we oli stap insaed long Tabu Ples?

⁸ I tru, neva bigfala hif blong man i save go insaed long ples ya we i olsem Tabu Ples. Be, oli lanem sam nambawan samting from mining blong olting we oli stap insaed long Tabu Ples ya. Ol laet long Tabu Ples ya, oltaem oli mas fulumap oel long olgeta. Long sem fasin, ol man ya blong ol narafala kantri oli nidim tabu speret blong givhan long olgeta blong kasem sloslou ol trutok long Baebol, tru long “slef ya we i stret mo waes.” (Matyu 24:45-​47, NW) Mo tu, tabu speret blong God i givhan long olgeta blong ansa long tok ya we i singaot olgeta se: “Tabu speret wetem hemia we i olsem Woman blong Kraes [ol tabu Kristin], tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) Olsem nao, samting blong putum laet i stanap long hem, i blong mekem bigfala hif blong man i tingbaot oltaem, se oli mas saenaot olsem ol Kristin, mo oli mas blokem ol fasin, tingting, toktok, mo wok we i save mekem tabu speret blong God i harem nogud.​—Efesas 4:​30.

⁹ Tebel blong bred ya, i blong mekem bigfala hif blong man i tingbaot se, blong stap strong long saed blong speret, oltaem oli mas tekem kakae long saed blong speret long Baebol, mo long ol buk blong “slef ya we i stret mo waes.” (Matyu 4:4) Olta blong insens i blong mekem oli tingbaot se, i impoten tumas blong prea long Jeova wetem fulhat, blong askem help blong hem blong holemstrong oltaem long hem. (Luk 21:36) Mo tu, oli mas prea long hem blong presem hem, mo blong talem tangkyu long hem wetem ful hat blong olgeta. (Ol Sam 106:1) Olta blong insens i mekem oli tingbaot tu, se oli mas presem God long ol narafala rod, olsem taem oli singim ol singsing blong Kingdom wetem ful hat long ol Kristin miting, mo taem oli reregud blong ‘talemaot rod blong sef long olgeta man.’​—Rom 10:10.

Trufala Wosip i Win Olgeta

10. (a) ?Yumi save lukluk i go long wanem gudfala samting long fyuja? (b) ?Wanem samting i mas kamaot fastaem?

¹⁰ Tede, “plante man” we oli kamaot long olgeta nesen, oli stap kam long haos blong Jeova blong wosip. (Aesea 2:​2, 3) Revelesen 15:4 i talem samting ya, i se: “?Hae God, hu man i no save ona long yu? ?Hu man i no save leftemap nem blong yu? Yu nomo yu tabu. Bambae ol man blong olgeta kantri oli save kam blong mekem wosip long yu, from we yu yu soemaot finis ol stret fasin blong yu.” Sekaraea japta 14 i tokbaot samting we i kamaot biaen. I no longtaem, fasin agens blong bighaf blong ol man long wol bambae i kam antap olgeta, taem oli hivap blong laswan taem, blong faet agensem Jerusalem​—hemia ol man blong Jerusalem long heven we oli stap yet long wol ya. Long taem ya, bambae Jeova i mekem wan samting. Olsem wan God blong faet, “bambae Jeova i girap, i faetem ol nesen ya” we oli wantem mekem faet ya.​—Sekaraea 14:2, 3.

11, 12. (a) ?Bambae Jeova i mekem wanem taem ol man oli girap agensem ol man blong wosip long tempel blong hem long olgeta ples blong wol? (b) ?Wanem risal bambae i kamaot afta long faet blong God?

¹¹ “Hemia nao sik we bambae Jeova i mekem i kamaot long olgeta man we oli mekem faet agensem Jerusalem: Bambae skin blong olgeta i kam rotin mo i foldaon, taem oli stap stanap yet long leg blong olgeta. Bambae ae blong olgeta i kam rotin gogo i lus, mo bambae tang blong olgeta i kam rotin long maot blong olgeta. Mo tru, long dei ya, bambae Jeova i mekem tingting blong olgeta i fasfas, long olgeta ples. Nao bambae evriwan oli holem han blong fren blong olgeta, mo bambae han blong olgeta i faet agensem han blong fren blong olgeta.”​—Sekaraea 14:12, 13.

¹² Yumi mas wet blong luk sipos hemia i wan sik stret no wan pijatok. Be, yumi sua long wan samting. Taem ol enemi blong God oli girap blong faet agensem ol man blong Jeova raonabaot long wol, bambae God i stopem olgeta taem hem i mekem sam narakaen samting blong soemaot paoa blong hem we i bigwan olgeta. Bambae oli no moa save talem wan samting. Bambae i olsem we tang blong olgeta we i stap tok agens, i kam rotin long maot blong olgeta. Bambae oli no moa save luk klia, long tingting blong olgeta, mak ya we oli bin joen wanples blong kasem. Bambae i olsem we ae blong olgeta i kam rotin. Paoa blong olgeta, we fastaem i pusum olgeta blong faet, bambae i lus. Bambae tingting blong olgeta i fasfas. Ale, bambae oli tanraon long olgeta bakegen, oli kilkilim olgeta oli ded. Olsem nao, olgeta man we oli enemi blong trufala wosip blong God, bambae oli lus. Long taem ya, ol samting ya we i hapen bambae i fosem olgeta nesen blong luksave se Jeova i hae rula blong heven mo wol. Profet tok ya bambae i kamtru, se: “Bambae Jeova i kam king long olgeta ples long wol.” (Sekaraea 14:9) Afta long taem ya, Setan mo ol rabis enjel blong hem, bambae oli go kalabus, taem Wan Taosen Yia Rul blong Kraes i stat. Biaen, bambae ol bigfala blesing oli kasem ol man.​—Revelesen 20:​1, 2; 21:​3, 4.

Laef Bakegen Long Wol

13. ?Hu ya ol man “blong olgeta nesen we oli stap yet”?

¹³ Profet tok blong Sekaraea i gohed long japta 14, vas 16, i se: “I mas hapen olsem se, ol man blong olgeta nesen we oli stap yet, we oli stap kam agens long Jerusalem, evri yia, bambae oli go long Jerusalem blong bodaon long King, Jeova blong ol ami, mo blong mekem lafet blong ol wansaed haos.” Baebol i soem se olgeta man we oli stap laef tede, we bambae oli laef kasem en blong rabis fasin blong wol ya, mo we God i jajem olgeta se oli enemi blong trufala wosip, bambae “oli go blong kasem panis ya we i no save finis.” (2 Tesalonaeka 1:​7-9; lukluk tu Matyu 25:31-​33, 46.) Ol man ya oli no save laef bakegen long ded. Ating olgeta ya we “oli stap yet,” hemia olgeta man blong ol nesen we oli ded bifo long laswan bigfala faet blong God, mo oli gat hop blong laef bakegen long ded olsem Baebol i talem. Jisas i promes se: “I gat taem i stap kam we ol dedman we oli stap long beregraon, bambae oli harem voes blong mi, nao bambae oli aot long beregraon. Olgeta we bifo oli stap mekem ol gudfala fasin, oli mas stanap bakegen blong kasem laef. Be olgeta we bifo oli stap mekem ol rabis fasin, oli mas stanap bakegen blong pas long bigfala kot ya, blong mi save jajem olgeta.”​—Jon 5:​28, 29.

14. (a) ?Ol man we bambae oli laef bakegen long ded oli mas mekem wanem blong kasem laef we i no save finis? (b) ?Bambae wanem i hapen long olgeta we oli no wantem givim laef blong olgeta long Jeova mo mekem trufala wosip?

¹⁴ Ol man ya we oli laef bakegen long ded, oli mas mekem wan samting blong oli save kasem laef, i no strongfala jajmen. Oli mas kam insaed long yad blong tempel blong Jeova long wol ya, mo bodaon long God long fasin ya we oli givim laef blong olgeta i go long hem tru long Jisas Kraes. Wan man we i laef bakegen, we i no wantem mekem samting ya, bambae hem i kasem sem sik ya we ol nesen long taem blong yumi oli kasem. (Sekaraea 14:18) Yumi no save stret namba blong ol man we oli laef bakegen, we bambae oli glad blong joen wetem bigfala hif blong man blong mekem samting ya we i olsem Lafet blong ol Wansaed Haos. !Yes, bambae i gat plante! !Mo from samting ya, bigfala tempel blong Jeova long saed blong speret bambae i kam moa naes!

Samting Ya We i Olsem Lafet Blong Ol Wansaed Haos

15. (a) ?Wanem sam nambawan samting long saed blong Lafet blong ol Wansaed Haos blong ol man Isrel bifo? (b) ?From wanem oli givim 70 buluk olsem sakrifaes long lafet ya?

¹⁵ Evri yia, ol man Isrel oli mas mekem Lafet blong ol Wansaed Haos. Lafet ya i gohed blong wan wik, mo oli mekem long en blong wok blong tekem kakae long garen. Hem i wan hapi taem blong talem tangkyu long God. Long wik ya, oli mas stap long ol wansaed haos we oli blokem wetem lif blong ol tri, antap moa, lif blong pamtri. Lafet ya i mekem ol man Isrel oli tingbaot olsem wanem God i bin sevem ol bubu blong olgeta oli aot long Ijip, mo olsem wanem hem i stap lukaotgud long olgeta taem oli stap laef long ol wansaed haos long ol 40 yia we oli wokbaot long draeples gogo oli kasem Promes Ples. (Levitikas 23:39-​43) Long lafet ya, oli bonem 70 buluk antap long olta blong tempel blong mekem sakrifaes. I klia se, haf ya blong lafet i pija blong wok we Jisas Kraes i mekem fulwan, mo we i stretgud olgeta, blong sevem laef blong ol man. Ol blesing blong sakrifaes blong hem bambae oli kasem olgeta pikinini blong ol 70 laen blong man we oli kamaot long Noa.​—Jenesis 10:​1-​29; Namba 29:12-​34; Matyu 20:28.

16, 17. (a) ?Wetaem samting ya we i olsem Lafet blong ol Wansaed Haos i stat, mo olsem wanem hem i gohed? (b) ?Olsem wanem bigfala hif blong man i joen long Lafet ya?

¹⁶ Taswe, Lafet blong ol Wansaed Haos i minim hapi taem ya blong hivimap ol sinman we Jisas i sevem olgeta, insaed long bigfala tempel blong Jeova long saed blong speret. Samting we i olsem Lafet ya i stat blong kamtru long Pentekos long yia 33 K.T. Long taem ya, hapi wok blong hivimap ol man Isrel long saed blong speret insaed long Kristin kongregesen, i stat. (Ol Wok 2:​41, 46, 47) Ol tabu man ya oli luksave se oli “olsem ol strenja nomo” long wol blong Setan, from we oli “man blong heven.” (1 Pita 2:​11; Filipae 3:​20) Fasin blong samfala blong tanem baksaed long trufala wosip mo stanemap ol skul blong Krisendom,c i spolem glad blong lafet ya blong smoltaem. (2 Tesalonaeka 2:​1-3) Be, lafet ya i gohed bakegen long 1919. Long taem ya, oli gohed long hapi wok ya blong hivimap ol laswan memba blong ol 144,000 man Isrel long saed blong speret. Biaen, oli hivimap bigfala hif blong man raon long wol, we Revelesen 7:9 i tokbaot.

¹⁷ Bigfala hif blong man ya, oli holem ol lif blong pamtri long han blong olgeta. Samting ya i soem se olgeta tu, oli glad blong joen long samting ya we i olsem Lafet blong ol Wansaed Haos. Olsem ol Kristin we oli givim laef blong olgeta i go long God, oli glad tumas blong joen long wok blong hivimap moa man blong wosip long tempel blong Jeova. Mo tu, olsem ol sinman, oli luksave se oli no gat raet yet blong laef foreva long wol ya. Olgeta mo ol man we bambae oli laef bakegen, oli mas gohed blong bilif long sakrifaes blong Kraes, kasem taem we oli kam stretgud olgeta long en blong Wan Taosen Yia Rul blong Kraes.​—Revelesen 20:5.

18. (a) ?Bambae wanem i hapen long en blong Wan Taosen Yia Rul blong Jisas Kraes? (b) ?Olsem wanem bambae trufala wosip blong Jeova i win olgeta?

¹⁸ Biaen, ol man blong wosip long God long wol ya bambae oli kam we oli stretgud olgeta long fes blong God. Bambae oli no moa nidim ol pris long heven. Hemia nao taem we bambae Jisas Kraes “i finis long king, i givimbak olgeta paoa blong hem long God, Papa blong hem.” (1 Korin 15:24) Bambae Setan i fri “blong smoltaem” blong traem ol man we oli kam stretgud olgeta. Ol man we oli no stap tru long God, bambae oli lus blong olwe, wetem Setan mo ol rabis enjel blong hem. Olgeta we oli holemstrong long God, bambae oli kasem laef we i no save finis. Bambae oli stap olwe long Paradaes long wol. Olsem nao, samting ya we i olsem Lafet blong ol Wansaed Haos, bambae i kasem nambawan en blong hem. Long taem ya, bambae trufala wosip i win olgeta, i givim ona long Jeova blong olwe, mo i mekem ol man oli glad tumas blong olwe.​—Revelesen 20:​3, 7-​10, 14, 15.

[Ol futnot]

Ol Kwestin Blong Tingtingbak

◻ ?Olsem wanem ol man oli girap agensem “Jerusalem” long Faswan Bigfala Faet blong Wol?​—Sekaraea 14:2.

◻ ?Wanem i hapen long ol man blong God stat long 1919?

◻ ?Tede, hu i joen long samting ya we i olsem Lafet blong ol Wansaed Haos?

◻ ?Olsem wanem bambae trufala wosip i win olgeta?

[Tok blong pija long Pej 23]

Oli yusum ol lif blong pamtri long Lafet blong ol Wansaed Haos