Japta 20
Bigfala Kampani Blong Fulap Man
1. ?Jon i talemaot se 144,000 man oli kasem mak blong God long fes blong ol, nao biaen hem i luk wanem narafala grup bakegen?
JON i talem se ol 144,000 man oli kasem mak blong God long fes blong olgeta. Nao hem i gohed blong talemaot wan long ol nambawan ‘revelesen’ long Baebol. Taem hem i talemaot, ating hat blong hem i pam from glad. Hem i se: “Biaen long ol samting ya, mi mi luk wan bigfala kampani blong man, we i no gat man i save kaontem olgeta. Ol man ya oli kamaot long olgeta nesen, mo long olgeta laen, mo long olgeta kantri, mo long olgeta lanwis. Olgeta oli stap stanap long fes blong jea blong king, mo long fes blong Smol Sipsip, mo oli werem waet klos. Mo olgeta oli stap holem han blong pamtri long han blong olgeta.” (Revelesen 7:9, “NW”) Yes, from we ol enjel oli blokem ol fo win, ol 144,000 memba blong Isrel blong speret oli kasem laef. Be oli givim jans blong wan narafala grup i kasem laef tu: Wan bigfala kampania we i kamaot long olgeta nesen mo olgeta lanwis.—Revelesen 7:1.
2. ?Sam man blong wol we oli eksplenem mining blong Baebol oli talem se bigfala kampani i hu? ?Mo ol Baebol Studen bifo oli ting se grup ya i hu?
2 Sam man blong wol we oli stadi long mining blong Baebol oli talem se bigfala kampani ya hemia ol man we oli no man Jyu, we oli kamaot long ol narafala nesen, nao oli kam Kristin man. Sipos no, oli talem se hemia ol Kristin man we oli ded from bilif blong olgeta, nao oli rere blong go long heven. Ol Baebol Studen bifo oli ting se hemia seken grup we bambae oli go long heven. Oli talem samting ya long 1886 long Buk 1 blong Studies in the Scriptures, The Divine Plan of the Ages. Oli se: “Olgeta oli mestem praes ya, we hem i jea blong king wetem bodi blong speret man olsem God. Bambae oli kam speret man we oli daon moa, oli no save kasem bodi olsem God. Nating we olgeta ya oli givim laef blong ol i go long God finis, be speret blong wol ya i winim olgeta gogo oli no lego laef blong olgeta olsem wan sakrifaes.” Mo long 1930, buk ya Light, Buk 1 i talem se: “Olgeta long bigfala kampani ya, hemia ol man we God i singaot olgeta blong oli wetnes strong long Masta, be olgeta oli no wantem.” Buk ya i talem se grup ya i flas long stret fasin blong olgeta. Mo oli gat save long trutok, be oli no talemaot. Oli talem se grup ya bambae i kasem heven olsem wan seken grup blong heven, be olgeta oli no save rul wetem Kraes.
3. (a) ?Sam man we oli gat gudhat we biaen oli kam strong long wok blong prij, oli kasem wanem hop? (b) ?Long 1923, olsem wanem Wajtaoa i eksplenem mining blong pijatok blong ol sipsip mo nani?
3 Be i gat samfala we oli kampani wetem ol tabu Kristin ya we biaen oli kam strong long wok blong prij. Oli no ting se bambae oli go long heven. Hop blong olgeta i stret long stampa tok blong pablik tok we ol man blong Jeova oli mekem, i stat long 1918 kasem 1922. Fastaem, nem blong hem se: “Wol Ya i Finis Finis—Plante Milyan Man We Oli Laef Naoia Bambae Oli No Save Ded.”b Biaen i no longtaem, magasin ya Wajtaoa (Engglis) long Oktoba 15, 1923, i eksplenem mining blong pijatok blong Jisas long ol sipsip mo ol nani. (Matyu 25:31-46) Hem i talem se: “Ol sipsip ya hemia i no olgeta we tabu speret i makemaot olgeta. Hemia ol man long olgeta nesen we oli laekem stret fasin, we long tingting blong olgeta oli agri se Jisas Kraes i Masta blong yumi, mo we oli wet mo hop long ol gudfala blesing aninit long rul blong hem.”
4. ?Olsem wanem laet long saed blong grup ya we bambae oli laef long wol i kam strong moa long 1931? ?long 1932? ?long 1934?
4 Sam yia biaen, long 1931, buk ya Vindication, Buk 1, i storebaot profet tok blong Esikel japta 9. Hem i eksplenem se ol man we oli kasem mak long fes blong olgeta, nao oli laef tru long en blong wol, hemia ol sipsip long parabol blong Jisas. Buk ya Vindication, Buk 3, we oli prentem long 1932, i storebaot man ya Jonadab, we hem i no man Isrel. Hat blong hem i gud. Hem i jyam antap long kat blong King Jehu blong Isrel, mo hem i lukluk fasin blong Jehu, taem hem i strong blong kilim i ded ol man blong gyaman wosip. (2 King 10:15-17) Buk ya i talem se: “Naoia wan wok i gohed long wol we i olsem wok blong Jehu bifo [wok blong talemaot ol jajmen blong Jeova]. Jonadab hem i pija no saen blong kampani blong ol man long wol we oli glad blong harem ol mesej ya, oli no agri wetem ogenaesesen blong Setan, mo oli stanap long saed blong stret fasin. Hemia olgeta we Masta ya bambae i sevem olgeta long Amageden, oli aot long taem blong trabol ya, nao hem i givim laef long olgeta long wol gogo i no save finis. Hemia nao kampani blong ‘ol sipsip.’ ” Long 1934, Wajtaoa i talem klia se ol Kristin ya we oli hop se bambae oli laef long wol, oli mas givim laef blong ol i go long Jeova mo tekem baptaes. Tru ya, laet ya long saed blong grup ya we bambae oli laef long wol i saenaot i kam strong moa.—Proveb 4:18.
5. (a) ?Long 1935, oli luksave se bigfala kampani i hu? (b) ?Long asembli long 1935, J. F. Rutherford i askem long ol man we oli hop se bambae oli laef blong olwe long wol blong stanap, nao wanem i hapen?
5 !Taem i stret nao blong save long Revelesen 7:9-17 i kam bigwan, olsem we laet i saen fulwan! (Ol Sam 97:11) Oli makemaot Mei 30 kasem Jun 3, 1935, blong mekem wan asembli long Wasington, Amerika. Magasin ya, Wajtaoa i talem bakegen plante taem se oli wantem we asembli ya i “mekem olgeta oli haremgud tumas mo givhan” long olgeta we oli olsem Jonadab bifo. !Yes, asembli ya i mekem olsem! Presiden blong Watch Tower Sosaeti, J. F. Rutherford, i givim wan strong tok we stampa blong hem se “Bigfala Kampani Ya.” Twante taosen man oli harem ol vas we hem i yusum blong pruvum se ol narafala sipsip tede, oli sem mak long bigfala kampani blong Revelesen 7:9. Long en blong tok blong hem, hem i talem se: “Yufala we i hop se bambae yufala i kasem laef blong olwe long wol, plis yufala i stanap.” Bighaf blong ol man we oli lesin long hem oli stanap. Nao presiden ya i talemaot strong, se: “!Yufala i luk! !Hemia nao bigfala kampani ya!” Fastaem ol man oli stap kwaet nomo, be biaen oli singaot from glad we noes blong olgeta i olsem tanda nomo. !Grup ya we i olsem Jon bifo oli glad tumas! !Mo grup ya we i olsem Jonadab oli glad tu! Long nekis dei blong hem, 840 nyufala Wetnes oli tekem baptaes. Bighaf blong olgeta oli bilif se oli blong bigfala kampani.
Oli Pruvum Se Bigfala Kampani Ya i Hu
6. (a) ?From wanem i klia se bigfala kampani i minim grup blong ol Kristin tede we oli givim laef blong olgeta i go long God finis, nao oli hop se bambae oli laef blong olwe long wol? (b) ?Waet klos blong bigfala kampani oli minim wanem?
6 ?Olsem wanem yumi save sua se bigfala kampani ya hemia grup blong ol Kristin tede we oli givim laef blong olgeta i go long Jeova finis, mo oli hop blong laef blong olwe long wol? Bifo finis, long vison blong Jon, hem i luk grup blong olgeta we oli blong go long heven, we Kraes i pemaot olgeta, “oli blong God. . . . Oli kamaot long olgeta laen, mo long olgeta lanwis, mo long olgeta kantri, mo long olgeta kala.” (Revelesen 5:9, 10) Bigfala kampani tu oli kamaot long olgeta ples long wol. Be fyuja blong olgeta i defren. Isrel blong God i gat stret namba blong hem. Be Baebol i no makemaot namba blong bigfala kampani. I no gat man i save talem hamas man bambae oli joen long bigfala kampani ya. Olgeta oli wasem klos blong olgeta finis long blad blong Smol Sipsip ya blong mekem oli waet. Hemia i min se oli stret man long fes blong Jeova from bilif blong olgeta long sakrifaes blong Jisas. (Revelesen 7:14) Mo oli holem han blong pamtri long han blong olgeta, blong ona long Mesaea olsem King blong olgeta.
7, 8. (a) ?Taem Jon i luk ol man long vison we oli holem han blong pamtri, Jon i tingbaot wanem bakegen? (b) ?From we bigfala kampani oli holem han blong pamtri tu, hemia i minim wanem?
7 Jon i stap lukluk vison ya, nao ating hem i tingtingbak long laswan wik blong laef blong Jisas long wol, 60 yia bifo. Long Naesan 9, 33 K.T., taem Jisas i wokbaot i kam long Jerusalem, fulap man oli ona long hem. Oli “tekem ol han blong pamtri, nao oli go blong mitim hem, we oli stap singaot se ‘!Hosana! Hae God [Jeova, NW], yu blesem man ya we i kam long nem blong yu. Yu blesem king ya blong ol man Isrel.’ ” (Jon 12:12, 13) Long vison blong Jon tu, bigfala kampani oli holem han blong pamtri mo oli singaot. Hemia i min se oli glad tumas blong akseptem Jisas olsem King we Jeova i putumap hem.
8 Mo tu, ol han blong pamtri mo bigfala voes we Jon i harem i mas pulum hem blong tingbaot wan lafet blong ol man Isrel bifo, hemia Lafet blong Wokem ol Wansaed Haos. Long saed blong lafet ya, Jeova i talem long olgeta se: “Long fas dei blong hem, yufala i mas karem frut blong ol gudfala tri, mo han blong ol pamtri mo han blong ol tri we oli gat plante han blong olgeta mo ol bigfala tri we oli gru long krik. Nao yufala i mas haremgud long fored blong Jeova we hem i God blong yufala gogo seven dei i pas.” Ol han blong ol pamtri oli blong soemaot se oli haremgud tumas. Ol wansaed haos we oli wokem blong smoltaem nomo, oli blong tingbaot we Jeova i bin sevem ol man blong hem oli aot long Ijip, mo biaen oli go stap long ol haos tapolen long drae ples. “Ol strenja mo ol boe we oli no gat papa mo ol woman we man blong olgeta i ded,” oli joen long lafet ya. Olgeta man Isrel evriwan oli mas “harem gud nomo.”—Levitikas 23:40; Dutronome 16:13-15.
9. ?Bigfala kampani oli singaot, oli talem wanem wetem fasin glad?
9 Taswe i stret nomo we bigfala kampani oli mas holem han blong pamtri tu. Nating we oli no haf long Isrel blong speret, be oli glad mo oli gat tangkyu long hat blong ol. Taswe oli save singaot strong se God mo Smol Sipsip blong hem, tufala i win mo tufala i sevem olgeta. Jon i talem olsem nao: “Nao oli singaot bigfala, oli talem se ‘God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.’ ” (Revelesen 7:10) Nating we bigfala kampani ya i kamaot long olgeta lanwis mo olgeta nesen, be oli singaot long wan ‘bigfala voes’ nomo. Be olgeta oli kamaot long ol defren nesen mo lanwis. ?Olsem wanem oli save singaot long wan voes?
10. ?Nating we bigfala kampani i kamaot long olgeta nesen mo lanwis, be olsem wanem oli save joen long wan ‘bigfala voes’ nomo?
10 I gat wan ogenaesesen nomo long wol tede we ol man blong hem we oli kamaot long ol defren nesen oli rili joengud. Mo bigfala kampani ya i haf long ogenaesesen ya. Olgeta oli no stap jenisim ol rul blong Baebol blong mekem i joen wetem kantri blong olgeta. No gat. Nomata weples long wol oli stap, be oli holemtaet ol stret rul blong Baebol. Oli no faet agens long gavman mo oli no joen long ol ogenaesesen we oli blong leftemap kantri blong olgeta nomo. Oli rili tanem “ol naef blong faet blong olgeta oli kam aean blong brekem graon long garen.” (Aesea 2:4) Oli no stap seraot long ol defren skul no long ol defren bilif. Taswe oli no stap mekem olsem ol skul blong Krisendom, we oli singaot plante mesej we i konfyusum ol man nomo mo oli agensem olgeta nomo. Mo tu, bigfala kampani ya oli no yusum wan grup olsem ol pasta blong tekem wok blong olgeta blong presem God. Oli no singaot se tabu speret i wokem rod blong sevem olgeta. No gat. ?From wanem? From we oli no wosip long wan triniti God. Long 200 ples long wol, oli joen olsem wan voes nomo blong singaot long nem blong Jeova. Long semtaem, oli toktok klin lanwis blong trutok, we hem i wan nomo. (Sefanaea 3:9) Oli talemaot long klia ples se Jeova i God blong sevem ol man, mo Jisas Kraes i Nambawan Man we God i yusum blong sevem laef, nao tufala i mekem rod blong sevem olgeta.—Ol Sam 3:8; Hibrus 2:10.
11. ?Olsem wanem ol teknik blong ol man i givhan long bigfala kampani blong mekem voes blong olgeta i kam antap moa?
11 Ol teknik blong tede i givhan blong mekem voes ya blong bigfala kampani i kam antap moa. I no gat wan narafala skul long wol we oli prentem ol buk long saed blong Baebol long moa long 200 lanwis. Hemia from we i no gat wan narafala grup long wol we oli wantem talemaot wan mesej nomo long olgeta man long wol. Mo tu Hed Kampani blong ol Wetnes blong Jeova we tabu speret i makemaot olgeta, oli lukaot long wok blong ol man we oli mekem wan rod blong prentem plante lanwis wantaem. Oli kolem MEPS (Multilanguage Electronic Phototypesetting System). Taem oli prentem buk ya, oli stap yusum MEPS long 80 hedkwota blong Watch Tower Sosaeti long wol. From samting ya, nambawan magasin blong olgeta we oli prentem tu taem long wan manis, Wajtaoa, naoia oli save prentem long 60 lanwis wantaem. Mo tu ol man blong Jeova oli prentem plante buk, olsem hemia we yu stap ridim, long plante defren lanwis wantaem. Olsem nao, ol Wetnes blong Jeova, we bigfala kampani i bighaf blong olgeta, oli save seremaot plante handred milyan buk evri yia long ol bigfala lanwis. Samting ya i givim jans long fulap moa man long olgeta nesen mo lanwis blong stadi long Tok blong God. Nao oli save joenem voes blong olgeta long bigfala voes ya blong bigfala kampani.—Aesea 42:10, 12.
?Long Heven No Long Wol?
12, 13. ?Olsem wanem bigfala kampani i “stanap long fes blong jea blong king, mo long fes blong Smol Sipsip” ya?
12 ?Taem Baebol i talem se oli “stanap long fes blong jea blong king,” hemia i minim we bigfala kampani ya oli stap long heven? No gat. ?Olsem wanem yumi save samting ya? I gat plante samting blong pruvum poen ya. Eksampel: Grik tok ya we oli tanem “long fes blong” (e·noʹpi·on) hem i rili min se God “i save lukluk olgeta.” Baebol i yusum tok ya plante taem, taem hem i tokbaot ol man long wol we oli stanap “long fes blong” Jeova, no Jeova i save “lukluk” olgeta. (1 Timote 5:21; 2 Timote 2:14; Rom 14:22; Galesia 1:20) Taem ol man Isrel oli stap long drae ples, Moses i talem long Eron se: “Yu go singaot olgeta man blong oli kam stanap long fes blong Hae God [Jeova, NW], from we hem i harem finis ol tok ya blong olgeta we oli stap tok agens long hem.” (Eksodas 16:9) Be ol man Isrel oli no go antap long heven blong stanap long fes blong Jeova. (Skelem wetem Levitikas 24:8.) Oli stap long drae ples nomo long wol. Be Jeova i save lukluk olgeta, mo hem i stap wajem olgeta.
13 Mo tu Baebol i talem se: “Taem Pikinini blong man bambae i kamtru wetem olgeta paoa blong hem, . . . olgeta nesen bambae oli stap stanap long fes blong hem.”c Taem profet tok ya i kamtru, olgeta nesen long wol oli no stap long heven. Tru ya, olgeta we “oli go blong lus blong olwe,” oli no stap long heven. (Matyu 25:31-33, 41, 46, NW) Hem i minim se Jisas i lukluk ol man long wol, nao hem i wajem olgeta blong jajem olgeta. Sem mak nao long bigfala kampani. Oli stap “stanap long fes blong jea blong king, mo long fes blong Smol Sipsip” ya from we Jeova mo King blong hem, Jisas Kraes, tufala i save lukluk olgeta. Nao tufala i save jajem olgeta se olgeta oli trufala man blong God.
14. (a) ?Hu i stap “raonabaot long jea” blong God mo “antap long bigfala hil ya Saeon [long heven]”? (b) ?Nating we bigfala kampani i mekem wok blong God “insaed long haos blong hem,” be from wanem oli no wan grup blong ol pris?
14 Revelesen i talem se ol 24 elda mo ol 144,000 oli stap “raonabaot long jea” blong Jeova mo “antap long bigfala hil ya Saeon [long heven].” (Revelesen 4:4; 14:1) Bigfala kampani ya i no wan grup blong ol pris, mo oli no save kasem haenem olsemia. No gat. Revelesen 7:15 i talem se oli stap mekem wok blong God “insaed long haos blong hem.” Be haos ya blong hem i no minim Tabu Ples we i Tabu Tumas. Hem i minim yad blong haos blong God long saed blong speret, hemia long wol ya nomo. Grik tok ya na·osʹ, oli tanem long ples ya i kam “haos blong God.” Plante taem hem i minim olgeta haf long haos we oli bildim blong mekem wosip long Jeova. Tede, hem i wan plan long saed blong speret long heven mo long wol tu.—Skelem Matyu 26:61; 27:5, 39, 40; Mak 15:29, 30; Jon 2:19-21, New World Translation Reference Bible, futnot.
Oli Singaot Long Heven Mo Long Wol Blong Presem God
15, 16. (a) ?Taem bigfala kampani i hivap, wanem i kamaot long heven? (b) ?Taem Jeova i mekem ol nyufala haf blong plan blong hem oli kamtru, ol enjel oli mekem wanem? (c) ?Olsem wanem yumi long wol, yumi save joen long singsing we i presem God?
15 Bigfala kampani oli stap presem Jeova. Be i gat sam narafala tu we oli singsing blong presem hem. Jon i talem se: “Olgeta enjel oli stap stanap raon long bigfala jea blong God, mo raon long ol elda mo ol fo anamol ya, nao oli foldaon long fes blong God, we i stap sidaon long bigfala jea blong hem, oli ona long hem, oli presem hem. Oli talem se ‘Yes i tru ya. God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkyu long hem, oli mas ona long hem, oli mas talemaot hae nem blong hem, mo oli mas talemaot paoa blong hem, gogo i no save finis. Amen.’ ”—Revelesen 7:11, 12.
16 Taem Jeova i wokem wol ya, olgeta tabu enjel blong hem “oli singaot bigwan tugeta, oli glad, mo olgeta pikinini blong God oli stat singaot from we oli harem gud.” (Job 38:7) Evritaem Jeova i soemaot wan nyufala haf blong plan blong hem, ating samting ya i pulum ol enjel blong singaot bakegen blong presem hem. Olsem nao, taem ol 24 elda, we oli minim ol 144,000 man long heven, oli singaot from we oli akseptem Smol Sipsip ya, ol narafala enjel blong God long heven oli joen wetem olgeta blong presem Jisas mo Jeova God. (Revelesen 5:9-14) Ol enjel ya oli haremgud finis olsem, from we oli stap taem Jeova i mekem plan blong hem i kamtru, nao hem i givim laef bakegen long ol trufala man we hem i makemaot wetem tabu speret, blong oli kasem haenem long heven. Taswe nao, ol gudfala enjel blong Jeova long heven oli singsing bakegen blong presem hem, taem bigfala kampani i hivap. Tru ya, ol man blong Jeova oli glad tumas we oli laef long dei blong Masta, from we ol gudfala samting ya oli stap kamaot long taem ya. (Revelesen 1:10) !Long wol ya, yumi gat bigfala blesing blong talemaot Kingdom blong Jeova! !Long fasin ya yumi joen long singsing we i presem hem!
Bigfala Kampani i Kamtru
17. (a) ?Wan long ol 24 elda ya i stanemap wanem kwestin? ?From we elda ya i save faenemaot ansa long kwestin ya, samting ya i soemaot wanem? (b) ?Wetaem kwestin blong elda ya i kasem ansa blong hem?
17 I stat long taem blong aposol Jon gogo dei blong Masta, ol tabu Kristin oli no gat klia save se hu nao i bigfala kampani. Taswe i stret we wan long ol 24 elda ya, we i minim ol tabu man ya we oli stap finis long heven, hem nao i wekemap tingting blong Jon. Hem i stanemap wan kwestin we i joengud long bisnes ya. “Nao wan long ol elda ya i askem long mi, i se ‘!E! ?Ol man ya we oli werem waet klos blong olgeta, yu save olgeta? ?Yu save weples olgeta oli kamaot long hem?’ Nao mi mi ansa long hem, mi se ‘Olfala, yu nomo yu save.’ ” (Revelesen 7:13, 14a) Yes, elda ya i save faenemaot ansa long kwestin ya mo talem long Jon. Ating samting ya i soemaot se ol 24 elda ya we oli laef bakegen finis oli stap givhan blong pasem ol trutok blong God oli go long ol man tede. Olgeta we oli olsem Jon bifo, taem oli stap long wol, oli stap luklukgud ol wok we Jeova i stap mekem long medel blong olgeta. From samting ya, oli lanem hu nao bigfala kampani ya. Kwiktaem nomo oli luksave bigfala laetning ya blong God we i saenaot long Tiokratik ogenaesesen long stret taem we Jeova i makem, hemia long 1935.
18, 19. (a) ?Long ol yia biaen long 1920 mo 1930, grup we oli olsem Jon oli tokbaot wanem hop moa? ?Be hu i harem trutok, we namba blong olgeta i go antap? (b) ?Taem oli luksave bigfala kampani long 1935, wanem i kam klia long saed blong ol 144,000 man? (c) ?Namba blong ol man we oli go long Memoriol i soemaot wanem?
18 Long ol yia we oli ron biaen long 1920 mo 1930, grup ya we i olsem Jon oli tokbaot laef long heven moa. Oli mekem olsem long ol buk blong olgeta mo long wok blong prij tu. I luk olsem we long taem ya, grup blong ol 144,000 man i no kasem fulnamba blong hem yet. Fulap man oli harem trutok mo oli soemaot se oli wantem wok strong long wok blong prij. Mo namba blong olgeta we oli stap talem se oli wantem laef blong olwe long Paradaes long wol, i stap go antap oltaem. Oli no wantem go long heven. God i no singaot olgeta blong go antap. Olgeta oli no haf long smol kampani ya. Oli blong ol narafala sipsip nomo. (Luk 12:32; Jon 10:16) Long 1935, i kam klia se olgeta nao oli bigfala kampani blong ol narafala sipsip. Mo samting ya i pruvum se kolosap nao, God i jusum finis fulnamba blong 144,000 man blong go long heven.
19 ?Namba blong ol man blong God long taem ya i sapotem samting ya? Yes. Long 1938, i gat 59,047 Wetnes blong Jeova oli stap prij long wol. 36,732 blong olgeta oli kakae bred mo dring waen long Memoriol blong ded blong Jisas. Hemia i soemaot se God i makemaot olgeta blong go long heven. Long ol yia we oli ron biaen, namba blong olgeta i stap godaon sloslou. Hemia from we sam long ol trufala Wetnes ya oli finis long laef ya long wol, oli ded. Long 1990, i gat 8,869 man nomo we oli dring waen mo kakae bred long Memoriol. Hemia i smosmol haf nomo (0.1%) long ol 9,950,058 man we oli kam long Memoriol.
20. (a) ?Taem Namba Tu Bigfala Faet Blong Wol i stap gohed, presiden blong Sosaeti i talem wanem long saed blong bigfala kampani ya? (b) ?Be wanem sam samting blong soemaot se bigfala kampani ya i rili bigfala?
20 Taem namba tu bigfala faet i stat long wol, Setan i mekem plante rabis samting blong traem blokem wok blong hivimap bigfala kampani ya. Hem i putum tabu long wok blong Jeova long plante kantri long wol. Taem ya i tudak nomo. Long Janewari 1942, jes bifo we presiden blong Watch Tower Sosaeti, J. F. Rutherford, i ded, hem i se: “I luk olsem we bigfala kampani ya bambae i no bigfala tumas.” !Be blesing blong God i mekem se i no kamaot olsem! Long 1946, namba blong ol Wetnes long wol i kasem 176,456. Bighaf blong olgeta oli blong bigfala kampani. Long 1990, i gat 4,017,213 Wetnes we oli stap mekem wok blong Jeova long 212 kantri long wol. !Tru ya, hemia i WAN BIGFALA KAMPANI! Mo namba blong olgeta i stap go antap yet.
21. (a) ?Olsem wanem wok blong hivimap ol man blong God long dei blong Masta i stret nomo long vison blong Jon? (b) ?Olsem wanem sam impoten profet tok oli stat kamtru?
21 Taswe wok blong hivimap ol man blong God long dei blong Masta, hem i stret long vison blong Jon: fastaem, wok blong hivimap ol laswan blong 144,000. Afta, wok blong hivimap bigfala kampani. Olsem profet Aesea i talem finis, naoia, “long las haf blong ol dei ya,” fulap man long olgeta nesen oli stap joen long tru wosip blong Jeova. Mo tru ya, yumi singsing bigwan blong talem tangkyu long Jeova from we hem i mekem “nyufala heven mo nyufala wol.” (Aesea 2:2-4; 65:17, 18) God i stap “hivimap bakegen olgeta samting long han blong Kraes, ol samting long heven mo ol samting long wol.” (Efesas 1:10, NW) Ol tabu man we bambae oli kasem Kingdom long heven, we God i jusumaot olgeta i stat long taem blong Jisas, hemia nao “ol samting long heven.” Mo bigfala kampani blong ol narafala sipsip, hemia nao ol faswan blong “ol samting long wol.” Sipos yu yu agri mo wok wetem plan ya, yu yu save hapi blong olwe.
Ol Blesing Blong Bigfala Kampani Ya
22. ?Jon i kasem wanem save bakegen long bigfala kampani ya?
22 Nao long rod we God i yusum, Jon i kasem moa save long bigfala kampani ya. Hem i se: “Nao hem [elda ya] i talem long mi, se: ‘Hemia ol man ya we oli pastru long taem blong bigfala trabol. Mo oli wasem klos blong olgeta finis blong mekem oli waet long blad blong Smol Sipsip ya. Taswe oli stanap long fes blong bigfala jea blong God, mo long dei mo long naet, oli stap mekem tabu wok blong hem insaed long haos blong hem. Mo Hemia we i stap sidaon long bigfala jea ya, bambae i pulum haos tapolen blong hem antap long olgeta.’ ”—Revelesen 7:14b, 15, “NW.”
23. ?Wanem ya taem blong bigfala trabol we bigfala kampani i “pastru” long hem?
23 Jisas i talem finis se bambae hem i stanap olsem king, nao bambae hem i rul wetem olgeta paoa blong hem gogo “bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.” (Matyu 24:21, 22) Blong mekem profet tok ya i kamtru, ol enjel bambae oli lego ol fo win ya blong wol blong spolem rabis wol blong Setan. Fastaem, Bigfala Babilon, we hem i minim olgeta gyaman skul long wol, bambae i lus. Biaen, taem bigfala trabol ya i kasem bigfala mak blong hem, Jisas bambae i sevem ol laswan blong 144,000 man long wol wetem ol man long bigfala kampani ya.—Revelesen 7:1; 18:2.
24. ?Olsem wanem ol man long bigfala kampani wanwan oli kam naf blong kasem laef?
24 ?Olsem wanem ol man long bigfala kampani ya wanwan oli kam naf blong kasem laef? Elda ya i talem long Jon se oli “wasem klos blong olgeta finis blong mekem oli waet long blad blong Smol Sipsip ya.” Hemia i minim se oli soemaot bilif long Jisas, se hem i man we i pemaot olgeta. Mo oli givim laef blong olgeta i go long Jeova, oli tekem baptaes long wora blong soemaot samting ya, nao oli mekem ol stret fasin ‘we tingting blong olgeta i no save jajem olgeta from.’ (1 Pita 3:16, 21; Matyu 20:28) From samting ya, Jeova i lukluk olgeta olsem we oli klin mo oli stret man. Mo oli stap klin, ‘we ol samting blong wol oli no save mekem olgeta oli doti.’—Jemes 1:27, NW.
25. (a) ?Olsem wanem bigfala kampani ya i mekem wosip long Jeova ‘long dei mo long naet, insaed long haos blong hem’? (b) ?Olsem wanem Jeova i “pulum haos tapolen blong hem antap” long bigfala kampani ya?
25 Mo tu, oli wok strong blong wetnes long Jeova. “Long dei mo long naet, oli stap mekem tabu wok blong hem insaed long haos blong hem.” ?Yu yu wan long bigfala kampani ya we oli givim laef blong olgeta i go long Jeova? Sipos yes, hemia i wan bigfala blesing, we yu save mekem wok blong Jeova oltaem long wol, long yad blong bigfala haos blong hem long saed blong speret. Tede, bigfala kampani i mekem bighaf blong wok blong prij. Olgeta we tabu speret i makemaot olgeta, oli lidim bigfala kampani long wok ya. Nating we ol man long bigfala kampani oli gat ol narafala responsabiliti tu, be plante handred taosen blong olgeta oli stretem laef blong ol blong oli save mekem fultaem minista wok olsem ol paenia. Nating we yu yu paenia no no gat, be sipos yu wan memba blong bigfala kampani we yu givim laef blong yu i go long Jeova finis, yu yu save haremgud. From we bilif mo ol gudfala wok blong yu i mekem se God i luk yu olsem wan stret man mo wan fren blong hem. Mo hem i tekem yu yu kam insaed long haos tapolen blong hem. (Ol Sam 15:1-5; Jemes 2:21-26) Olsem nao, Jeova we hem i lukaotgud long ol man we oli kam long hem, hem i save “pulum haos tapolen blong hem antap” long olgeta we oli laekem hem, olsem we hem i protektem olgeta.—Proveb 18:10.
26. ?Wanem ol narafala blesing we bambae bigfala kampani i haremgud long olgeta?
26 Nao elda i gohed, i se: “Bambae oli no moa hanggri bakegen, oli no moa tosta bakegen. Bambae san i no moa bonem olgeta bakegen, bigsan bambae i no moa save kasem olgeta nating. From we Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwora ya we i save givim laef. Mo God bambae i ravemaot wora blong ae blong olgeta.” (Revelesen 7:16, 17) !Yes, Jeova i rili mekem welkam long olgeta! ?Be wanem bigfala mining blong ol tok ya?
27. (a) ?Wanem profet tok blong Aesea i kolosap sem mak long tok blong elda ya? (b) ?Wanem i soemaot se profet tok blong Aesea i stat kamtru long Kristin kongregesen long taem blong Pol?
27 Yumi save tingbaot wan profet tok we i kolosap sem mak. Hem i se: “Hemia nao toktok blong Jeova: ‘Long taem blong gladhat, mi mi ansa long yu. Long dei blong sevem man, mi mi givhan long yu. . . . Olgeta bambae oli no hanggri, bambae oli no tosta. Mo hot taem mo bigfala san bambae i no kilim olgeta. From we Hem we i gat sore long olgeta bambae hem i lidim olgeta. Bambae hem i lidim olgeta oli go long springwora.’ ” (Aesea 49:8, 10; mo lukluk tu long Ol Sam 121:5, 6.) Aposol Pol i talem se haf blong profet tok ya i stret long “dei ya blong sevem man” we i stat long Pentekos long 33 K.T. Hem i talem se: “Plis yufala i harem tok blong God. Hem i talem se ‘Long taem ya blong givhan long man, mi mi harem yufala. Long dei ya blong sevem man, mi mi givhan long yufala.’ Yufala i mas harem tok ya. Naoia i taem blong God i givhan long man. Tede i dei blong hem i sevem man.”—2 Korin 6:2.
28, 29. (a) ?Olsem wanem profet tok blong Aesea i kamtru long faswan handred yia? (b) ?Olsem wanem tok blong Revelesen 7:16 i kamtru long bigfala kampani? (c) ?Bambae wanem i kamaot taem Smol Sipsip i lidim bigfala kampani oli “go dring long ol springwora ya we i save givim laef”? (d) ?Olsem wanem bigfala kampani i spesel?
28 ?Olsem wanem promes ya se oli no save hanggri no tosta mo hot san i no save bonem olgeta, i kamtru long olgeta long taem blong Pol? Long faswan handred yia, samtaem ol Kristin man oli hanggri mo oli tosta. (2 Korin 11:23-27) Be long saed blong speret oli gat fulap. Oli no save hanggri no tosta long speret. Mo tu, taem Jeova i spolem fasin blong ol man Isrel long 70 K.T., hem i no kros long ol man blong hem, olsem we hot san i bonem olgeta. No gat. Long sem fasin, tok blong Revelesen 7:16 i stret long saed blong speret long bigfala kampani tede tu. Olgeta wetem ol tabu Kristin, olgeta evriwan oli haremgud long fulap kakae blong speret.—Aesea 65:13; Neham 1:6, 7.
29 Sipos yu yu wan long bigfala kampani ya, gudfala hat blong yu bambae i pusum yu blong “singaot long glad,” nating we yu sot long plante samting mo yu mas winim plante traem long ol laswan yia blong rabis wol ya blong Setan. (Aesea 65:14) Taswe naoia tu, Jeova i save ‘ravemaot wora blong ae blong yu.’ Hot “san” we i minim jajmen blong God, i no moa save bonem yu. Mo taem ol enjel oli lego ol fo win blong spolem wol ya, “bigsan” bambae i no kasem yu. Hemia i min se Jeova i no save kros long yu. Taem olfala fasin blong wol ya i lus finis, Smol Sipsip ya bambae i lidim yu yu “go dring long ol springwora ya we i save givim laef.” Hemia i minim olgeta samting we Jeova i mekem blong givim laef blong olwe long yu. Bilif blong yu long blad blong Smol sipsip ya bambae i win, from we sloslou bambae yu kam stret olgeta. !Yufala evriwan long bigfala kampani we namba blong hem i kasem plante “milyan” man, yufala i spesel, from we neva bambae yufala i ded! Profet tok blong Revelesen bambae i kamtru fulwan long yufala, taem God i ravemaot olgeta wora blong ae blong yufala.—Revelesen 21:4.
Meksua Se Yu Kasem Ol Samting We God i Singaot Yu From
30. ?Vison blong Jon i mekem wanem gudfala pija long tingting blong yumi? ?Hu nao “i naf blong stanap”?
30 !Ol tok ya oli mekem wan nambawan pija long tingting blong yumi! Jeova hem wan i sidaon long jea blong hem. Mo olgeta man blong hem long heven mo long wol oli joen blong presem hem. Ol man blong hem long wol oli tinghae long bigfala blesing ya blong joen long singsing ya blong presem hem. I no longtaem, bambae Jeova mo Jisas Kraes tufala i jajem wol ya. Long taem ya, bigfala voes bambae i singaot, se: “Hemia Bigfala Dei ya blong tufala, we kros blong tufala long sin bambae i kamaot. ?Hu nao bambae i naf blong stanap long Dei ya?” (Revelesen 6:17) ?Wanem ansa long kwestin ya? Smolhaf blong ol man nomo. Haf blong ol 144,000 man we oli gat mak blong God long fes blong olgeta mo oli stap laef yet long wol wetem bigfala kampani blong ol narafala sipsip, olgeta ya nomo bambae oli “naf blong stanap.” Hemia i min se bambae oli stap laef tru long taem ya.—Skelem Jeremaea 35:19; 1 Korin 16:13.
31. ?Olsem wanem mining blong vison blong Jon i mas gat paoa long ol Kristin man, nating we oli blong smol kampani no bigfala kampani?
31 From samting ya, ol tabu Kristin we oli olsem Jon bifo oli traehad mo wok strong blong ‘resis i go stret long mak, we i gat praes blong man we i win. Mo praes ya, hemia we God i singaot olgeta blong olgeta oli joen long Jisas Kraes, olgeta i go stap antap long ples blong hem.’ (Filipae 3:14) Oli save se ol trabol we oli stap kamaot long wol tede oli mekem i hadwok moa blong stanap strong. (Revelesen 13:10) Oli fasgud long wosip blong Jeova plante yia finis, oli stap holemtaet bilif blong olgeta yet, mo oli haremgud from we God i ‘raetemdaon nem blong olgeta, oli stap long heven finis.’ (Luk 10:20; Revelesen 3:5) Olgeta long bigfala kampani tu oli save se “man we i stanap strong gogo olgeta samting ya i finis, bambae God i sevem hem” nomo. (Matyu 24:13) God i makemaot bigfala kampani ya blong pastru long taem blong bigfala trabol. Be ol man long kampani ya wanwan oli mas traehad blong stap klin mo blong gohed strong long wok blong olgeta.
32. ?From we i gat tu grup nomo we oli “naf blong stanap” long dei blong kros blong Jeova, i impoten tumas we naoia nomo ol man oli mekem wanem?
32 Tu kampani ya nomo oli “naf blong stanap” long dei blong kros blong Jeova. I no gat wan samting we i soemaot se sam narafala man bambae oli kasem laef tu. ?Olsem wanem long plante milyan man we evri yia oli kam long Memoriol blong ded blong Jisas blong soemaot respek long sakrifaes blong hem, be oli no gat bilif long sakrifaes ya blong givim laef blong ol i go long Jeova mo tekem baptaes, mo mekem wok blong hem? ?Mo tu, olsem wanem long olgeta we fastaem oli mekem wok blong God, be biaen oli letem ‘tingting blong olgeta i kam slak, from we . . . oli stap tingting tumas long laef ya long wol’? Olgeta ya oli mas wekap. Mo oli mas stap wekap, ‘blong bambae oli gat paoa blong ronwe long olgeta trabol ya, blong bambae oli save stanap long fes blong Pikinini blong Man,’ Jisas Kraes. !Taem ya i sot!—Luk 21:34-36.
[Ol Futnot]
a Lukluk futnot blong New World Translation Reference Bible.
b Wajtaoa (Engglis) Epril 1, 1918, pej 98.
c Prapa mining se “long fored blong hem,” The Kingdom Interlinear Translation of the Greek Scriptures.
[Bokis blong pija long pej 119]
God Nomo i Save Mining Blong Ol Profet Tok
Gogo plante yia i pas, grup ya we i olsem Jon bifo oli traem faenemaot hu nao bigfala kampani ya, be oli no save faenemaot ansa long hem. ?From wanem? Ol tok blong gudfala man ya Josef i givim ansa long yumi. Hem i talem se: “Paoa blong talemaot mining blong drim, hem i stap long God blong mifala nomo.” (Jenesis 40:8) ?Wetaem mo olsem wanem God i talemaot mining blong ol profet tok ya? Kolosap evri taem hem i soemaot mining taem oli rere blong kamtru no taem oli stap kamtru. Hem i mekem olsemia blong ol man blong hem we oli stap lukaot mining blong profet tok ya, oli save luksave klia. Hem i talemaot mining ya long yumi “blong tijim yumi, nao yumi save gat hop, from we yumi stap stanap strong, mo from we ol tok blong Baebol oli stap leftemap tingting blong yumi.”—Rom 15:4, NW.
[Bokis blong pija long pej 124]
Ol memba blong bigfala kampani
▪ oli kamaot long olgeta nesen mo laen mo kantri mo lanwis
▪ oli stanap long fes blong bigfala jea blong Jeova
▪ oli wasem klos blong olgeta blong mekem oli waet long blad blong Smol Sipsip ya
▪ oli presem Jeova mo Jisas from we tufala i sevem olgeta
▪ oli pastru long taem blong bigfala trabol
▪ long dei mo long naet, oli mekem wok blong Jeova insaed long haos blong hem
▪ Jeova i laekem olgeta, nao hem i lukaotgud mo keagud long olgeta
▪ Jisas i lidim olgeta oli go dring long ol springwora we i givim laef
[Tok Blong Pija Long Pej 127]
God mo Smol Sipsip ya tufala i wokem rod blong sevem bigfala kampani
[Tok Blong Pija Long Pej 128]
Smol Sipsip ya bambae i lidim bigfala kampani oli dring long springwora we i givim laef