Wan Bigfala Hif Blong Man Oli Stap Mekem Tabu Wok
“Long dei mo long naet, oli stap mekem tabu wok blong hem insaed long haos blong hem.”—REVELESEN 7:15, NW.
1. ?Wanem bigfala save long saed blong speret we oli kasem long 1935?
LONG Mei 31, 1935, bigfala glad i kamaot long medel blong ol man we oli kam long wan asembli blong ol Wetnes blong Jeova long Wasington. Hemia i fastaem we, folem ol vas blong Baebol mo ol samting we oli stat finis blong kamaot, oli kasem save klia long bigfala kampani (no, bigfala hif blong man) long Revelesen 7:9.
2. ?Wanem i soem se plante moa man oli luksave se God i no singaot olgeta blong kasem laef long heven?
2 Samwe long sikis wik bifo, long lafet blong Kakae blong Masta, we oli mekem long ol kongregesen blong ol Wetnes blong Jeova, 10,681 long ol man we oli kam (samwe long 1 long evri sikis man), oli no tekem bred mo waen we i saen blong bodi mo blad blong Jisas. Mo, long ol man ya, 3,688 oli stap wok strong long wok blong talemaot Kingdom blong God. ?From wanem oli no tekem bred mo waen? From samting we oli lanem long Baebol, oli luksave se God i no singaot olgeta blong kasem laef long heven. Be, long narafala rod, oli save kasem ol gudfala samting we Jeova i givim wetem fasin lav. Taswe, long asembli ya, taem brata we i givim tok i askem se: ?“Olgeta we oli gat hop blong laef foreva long wol, plis, yufala i stanap,” wanem samting i hapen? Plante taosen man oli stanap. Nao olgeta we oli stap, oli glad tumas, oli kilkilim han blong olgeta longtaem.
3. ?From wanem fasin blong makemaot bigfala hif blong man i givim nyufala paoa long saed blong wok blong prij, mo wanem filing blong ol Wetnes long saed ya?
3 Samting we oli lanem long asembli ya, i mekem se oli kasem nyufala paoa blong wok strong long Kristin minista wok blong olgeta. Oli luksave se naoia, bifo long en blong olfala fasin blong wol ya, i no sam taosen man nomo, be wan bigfala hif blong man, bambae Jeova i givim jans long olgeta blong kasem laef folem plan blong Hem. Oli gat hop blong laef foreva long wan paradaes wol. !Mesej ya i mekem se olgeta we oli laekem trutok oli haremgud tumas! Ol Wetnes blong Jeova oli luksave se oli gat bigfala wok blong mekem—wan wok we i givim bigfala glad long olgeta. Sam yia biaen, John Booth, we i kam wan memba blong Hed Kampani, i talem se: “Asembli ya i givim plante samting tumas long yumi blong yumi glad from.”
4. (a) ?Stat long 1935, wok blong hivimap bigfala hif blong man i go kasem wanem mak? (b) ?Olsem wanem bigfala hif blong man oli pruvum bilif blong olgeta?
4 Long ol yia we oli kam biaen, namba blong ol Wetnes blong Jeova i go antap bigwan. Nating se plante taem, long Namba Tu Bigfala Faet blong Wol, ol man oli mekem nogud tumas long olgeta, ten yia biaen, kolosap se namba blong olgeta i go antap tri taem. Mo ol 56,153 pablisa we oli stap prij long 1935, long 1994, namba ya i go antap bitim 4,900,000 man blong talemaot Kingdom long bitim 230 kantri. Bighaf blong ol man ya oli stap wet wetem strong tingting blong joen long olgeta we Jeova i glad blong givim laef we i no save finis long olgeta, long wan paradaes wol. Taem yumi skelem namba blong ol man ya wetem ol sipsip we oli no plante, i tru tumas, se hemia wan bigfala hif blong man. Oli man ya oli no talem nomo se oli bilif, no gat. Be oli soemaot bilif blong olgeta. (Jemes 1:22; 2:14-17) Olgeta evriwan oli serem gud nyus blong Kingdom blong God wetem ol narafala. ?Yu yu wan memba blong bigfala hapi kampani ya? Fasin blong stap olsem wan Wetnes we i wok strong i wan impoten mak blong soemaot se yu yu wan long olgeta. Be i no hemia nomo, i gat sam samting moa yet.
“Oli Stap Stanap Fored Long Bigfala Jea Blong God”
5. ?Fasin ya we bigfala hif blong man oli “stap stanap fored long bigfala jea blong God,” i soemaot wanem?
5 Long vison we aposol Jon i kasem, hem i luk we bigfala hif blong ol man ya oli “stap stanap fored long bigfala jea blong God, mo long fes blong Smol Sipsip.” (Revelesen 7:9, NW) Ol vas raonabaot long vas ya oli givhan long yumi blong kasem save se fasin ya we oli stap stanap fored long bigfala jea blong God, i soem se oli sapotem fulwan hae rul blong Jeova. I gat plante samting we i joen long fasin ya. Eksampel: (1) Oli luksave raet blong Jeova blong talem long ol man blong hem, wanem fasin i gud mo wanem fasin i nogud. (Jenesis 2:16, 17; Aesea 5:20, 21) (2) Oli lesin long Jeova taem hem i toktok long olgeta tru long Tok blong hem. (Dutronome 6:1-3; 2 Pita 1:19-21) (3) Oli luksave from wanem i impoten blong obei long olgeta we Jeova i putumap blong lidim olgeta. (1 Korin 11:3; Efesas 5:22, 23; 6:1-3; Hibrus 13:17) (4) Nating se oli no stretgud olgeta, be oltaem, oli traehad blong folem ol tiokratik oda, we man i no fosem olgeta, be oli rere blong obei wetem hat blong olgeta. (Proveb 3:1; Jemes 3:17, 18) Wetem bigfala respek mo lav, oli stap fored long bigfala jea blong God, oli stap mekem tabu wok long Jeova. Fasin ya we bigfala hif blong man, oli “stanap” fored blong bigfala jea blong God, i soem se Man we i stap sidaon long bigfala jea ya i glad long olgeta. (Lukluk Revelesen 6:16, 17.) ?From wanem Man ya i glad long olgeta?
“Oli Werem Waet Klos”
6. (a) ?Fasin ya we bigfala hif blong man i “werem waet klos” i minim wanem? (b) ?Olsem wanem bigfala kampani oli kam stret man long fes blong Jeova? (c) ?Bilif long blad blong Kraes we i ron i gat wanem paoa long laef blong bigfala hif blong man?
6 Blong tokbaot samting we hem i luk, aposol Jon i talem se ol memba blong bigfala hif blong man ya “oli werem waet klos.” Ol waet klos ya i minim se, long lukluk blong Jeova, fasin blong ol man ya i klin mo i stret. ?Olsem wanem oli kam klin mo stret? Yumi luk finis se long vison blong Jon, oli stap stanap “long fes blong Smol Sipsip.” Oli luksave se Jisas Kraes i olsem “Smol Sipsip blong God, we hem bambae i tekemaot sin blong olgeta man long wol.” (Jon 1:29) Long vison ya, Jon i harem wan long ol elda we oli stap raon long bigfala jea blong God, i eksplenem se: ‘Oli wasem klos blong olgeta finis blong mekem oli waet long blad blong Smol Sipsip ya we i ded. Hemia nao from wanem oli stap fored long bigfala jea blong God.’ (Revelesen 7:14, 15) Wasem klos blong olgeta i minim se oli soemaot bilif long blad blong Kraes we i pemaot olgeta. Oli no kasem save nomo long tijing blong Baebol long saed blong ransom. Be fasin tangkyu blong olgeta long sakrifaes ya i gat paoa long olgeta fasin we stap insaed long olgeta. Olsem nao, “wetem hat” blong olgeta, oli soemaot bilif. (Rom 10:9, 10, NW) Samting ya i gat bigfala paoa long fasin blong laef blong olgeta. Wetem fasin blong bilif, oli givim laef blong olgeta long Jeova mo disisen ya i stanap long sakrifaes blong Kraes. Oli soemaot samting ya taem oli draon fulwan long wora, oli rili soemaot long fasin blong olgeta se oli givim laef blong olgeta long God, mo from samting ya, oli haremgud long fasin fren we oli gat wetem God. !Hemia wan nambawan jans ya—man i mas lukaotgud long hem!—2 Korin 5:14, 15.
7, 8. ?Olsem wanem ogenaesesen blong Jeova i halpem bigfala hif blong man blong lukaotgud long klos blong olgeta blong oli no kam doti?
7 Wetem fasin lav, ogenaesesen blong Jeova i tingbaot fyuja blong olgeta. Taswe, bakegen mo bakegen, hem i poenemaot ol fasin mo tingting we oli save mekem klos we i makemaot wan man i doti. Nao biaen, nating we man ya i talem se hem i gat gudfala fasin, be hem i no rili stret long profet tok blong Revelesen 7:9, 10. (1 Pita 1:15, 16) Blong sapotem samting we oli bin prentem fastaem, Wajtaoa, long 1941 mo biaen, i soemaot plante taem bakegen se, i no stret nating we man i prij long narafala, mo afta, long taem we hem i no prij, hem i joen long ol fasin olsem fasin blong slip olbaot mo fasin blong slip wetem man no woman blong narafala. (1 Tesalonaeka 4:3; Hibrus 13:4) Long 1947, oli talemaot se olgeta kantri, oli mas folem ol rul blong Jeova long saed blong Kristin mared. Nating se kastom blong ol ples ya i olsem wanem, olgeta we oli gat plante woman wantaem, oli no save stap olsem Wetnes blong Jeova.—Matyu 19:4-6; Taetas 1:5, 6.
8 Long 1973, ol Wetnes blong Jeova long fulwol oli kasem advaes se oli mas lego fulwan olgeta fasin we oli save mekem oli doti, olsem fasin blong smok tabak, nomata weples oli stap long hem—i no long Haos Kingdom no long wok blong prij nomo. Be tu, long ples blong wok no long wan ples we i haed. (2 Korin 7:1) Long 1987, long ol distrik asembli blong ol Wetnes blong Jeova, ol yangfala Kristin oli kasem ol strong advaes se sipos oli wantem stap klin long fored blong God, oli mas blokem dabol laef. (Ol Sam 26:1, 4) Bakegen mo bakegen, Wajtaoa i givim woning agens long ol defren kaen fasin we oli joen wetem speret blong wol from we “prapa fasin blong ona long God ya we i Papa blong yumi, we hem i luk se i klingud” i joen long fasin ya we man i holem laef blong hem i klin, we “ol rabis fasin blong wol i no save spolem.”—Jemes 1:27.
9. ?Afta long bigfala trabol, hu ya olgeta we bambae oli stanap yet fored long bigfala jea blong God we God i glad long olgeta?
9 Olgeta ya nomo we fasin blong bilif blong olgeta i pusum olgeta blong gat wan laef we oli stap klin long saed blong speret mo fasin, olgeta nao bambae oli ‘stanap yet long fored blong jea blong God’ olsem ol man blong wok blong God we hem i glad long olgeta afta long bigfala trabol we i stap kam. Ol man ya, oli statem wan Kristin laef, be i no hemia nomo. Oli gohed oltaem blong folem.—Efesas 4:24.
“Oli Stap Holem Lif Kokonas Long Han Blong Olgeta”
10. ?Ol lif kokonas we Jon i luk we bigfala hif blong man i stap holem, oli saen blong wanem?
10 Long ol nambawan samting long saed blong bigfala hif blong man we aposol Jon i luk, i gat fasin ya we “oli holem lif kokonas long han blong olgeta.” ?Wanem mining blong samting ya? I klia nomo se, ol lif kokonas ya oli mekem Jon i tingbaot lafet blong ol haos tapolen we ol man Jyu oli stap mekem. Hemia wan lafet long kalenda blong ol man Jyu we i mekem oli glad tumas bitim ol narafala lafet. Wan lafet we oli mekem afta long taem blong tekem kakae long hot taem. Folem Loa, oli yusum ol han blong pamtri, mo ol han blong ol narafala tri blong mekem ol wansaed haos we oli laef long olgeta taem oli stap mekem lafet ya. (Levitikas 23:39-40; Nehemaea 8:14-18) Mo tu, ol man blong wosip oli holem ol lif kokonas taem oli singsing long Halel long tempel (Ol Sam 113 kasem 118). Ating fasin ya we bigfala hif blong man i stap holem lif kokonas, i mekem Jon i tingbaot tu taem ya we Jisas i sidaon long wan dongki, i wokbaot i go insaed long Jerusalem, nao bigfala hif blong man blong wosip, oli stap holem ol han blong pamtri mo oli stap singaot long fasin glad se: “Hae God, yu blesem man ya we i kam long nem blong yu. Yu blesem king ya blong ol man Isrel.” (Jon 12:12, 13) Olsem nao, fasin ya we wan bigfala hif blong man oli stap holem lif kokonas i soem se oli glad blong leftemap Kingdom blong Jeova mo King we Hem i makemaot.
11. ?From wanem ol man blong God oli rili faenem glad taem oli mekem wok blong Jeova?
11 Naoia, bigfala hif blong man oli soemaot sem bigfala glad taem oli stap mekem wok blong Jeova. Samting ya i no minim se oli no save fesem ol hadtaem no oli no harem nogud no harem i soa, no gat. Be glad we oli kasem taem oli stap mekem wok blong Jeova mo mekem hem i glad i halpem olgeta blong winim ol samting ya. Olsem nao, wan misinari we i wok 45 yia wetem hasban blong hem long Guatemala i tokbaot olsem wanem ples ya i had mo ol trep we oli denja tumas we oli olsem haf blong laef blong tufala, taem tufala i stap traehad blong talemaot mesej blong Kingdom long ol velej blong ol man India. Hem i talem se: “Taem mitufala i stap long kantri ya, hemia nao taem long laef blong mitufala, we mitufala i hapi tumas.” Nating se hem i no haremgud from fasin blong kam olfala mo from sik, long ol laswan tok we hem i raetem long buk we hem i stap yusum blong makem daon ol impoten samting long laef blong hem, hem i se: “Hemia wan gudfala laef, i givim bigfala blesing.” Raonabaot long wol, ol Wetnes blong Jeova oli gat sem filing long saed blong Kristin minista wok blong olgeta.
“Long Dei Mo Long Naet, Oli Stap Mekem Tabu Wok”
12. ?Nating se long dei no long naet, Jeova i luk wanem long wol ya?
12 Ol man ya blong wosip we oli glad tumas, ‘oli stap mekem tabu wok blong God insaed long haos blong hem long dei mo long naet.’ (Revelesen 7:15) Raon long wol, plante milyan man oli stap mekem tabu wok ya. Nating se i medel naet long sam kantri mo ol man oli stap slip, long sam narafala kantri, ples i delaet mo ol Wetnes blong Jeova oli stap bisi long wok blong prij. Taem wol i stap tanem, oltaem, long dei mo long naet, ol man ya oli stap singsing blong presem Jeova. (Ol Sam 86:9) Be wok we oli stap mekem long dei mo long naet we Revelesen 7:15 i tokbaot, hem i go moa long saed blong olgeta wanwan.
13. ?Olsem wanem Baebol i soemaot mining blong fasin ya blong mekem wok long “dei mo long naet”?
13 Ol wanwan man we oli mekemap bigfala hif blong man, oli stap mekem tabu wok long dei mo long naet. ?I minim se evri samting we oli mekem, oli mas tingbaot olsem tabu wok? I tru se wanem samting we oli stap mekem, oli lanem blong mekem long fasin we i givim ona long Jeova. (1 Korin 10:31; Kolosi 3:23) Be, ‘tabu wok’ ya i stret long ol wok we oli joen wetem wosip long God nomo. Fasin ya blong joen long wan wok “long dei mo long naet” i minim se oltaem, oli wok strong, mo tu fasin blong traehad oltaem long wok ya.—Lukluk Josua 1:8; Luk 2:37; Ol Wok 20:31; 2 Tesalonaeka 3:8.
14. ?Wanem i save mekem se fasin blong yumi wanwan blong joen long wok blong prij i stret long vas ya long saed blong mekem wok “long dei mo long naet”?
14 From we oli stap wok long yad blong tempel blong Jeova long saed blong speret long wol ya, olgeta we oli mekemap bigfala hif blong man oli traehad blong joen oltaem mo wok strong olgeta long wok blong prij. Plante long olgeta oli putum mak se evri wik, oli mas tekem sam taem blong joen long wok blong prij. Sam narafala oli traehad blong kam fultaem no haftaem paenia. Plante taem, olgeta ya oli stap bisi blong prij long rod mo long ol stoa eli long moning. Blong halpem olgeta we oli intres, sam Wetnes oli mekem Baebol stadi let long naet. Oli prij taem oli go long stoa, taem oli mekem trep i go long narafala ples, long medel dei taem oli spel long wok, mo long telefon.
15. ?Wetem wok blong prij, wanem i joen long tabu wok blong yumi?
15 Fasin blong joen long ol miting blong kongregesen tu i haf blong tabu wok blong yumi. Mo tu, fasin blong joen long wok blong bildim mo lukaotgud long ol ples we ol Kristin oli mekem miting long olgeta. Fasin traehad we wan man i mekem blong leftemap tingting mo halpem ol Kristin brata mo sista blong hem, long saed blong speret mo long saed blong bodi, blong oli gohed strong long wok blong Jeova, i joen long tabu wok ya tu. Samting ya i joen long wok blong ol Komiti we oli toktokgud wetem ol dokta. Ol defren kaen wok long Betel, mo tu, fasin blong wok olsem volontia long ol asembli, evriwan oli tabu wok. Tru ya, taem yumi mekem fasin fren blong yumi wetem Jeova i bigfala samting long laef blong yumi, laef i fulap long tabu wok. Olsem Baebol i talem, “long dei mo long naet,” ol man blong Jeova “oli stap mekem tabu wok,” mo oli faenem bigfala glad taem oli stap mekem wok ya.—Ol Wok 20:35; 1 Timote 1:11.
‘Oli Kamaot Long Olgeta Nesen, Laen, Kantri, Mo Lanwis’
16. ?Olsem wanem i tru tumas se bigfala hif blong man i stap ‘kamaot long olgeta nesen’?
16 Bigfala hif blong man ya oli kamaot long olgeta nesen. God i stap mekem i sem mak nomo long olgeta man. Mo ransom we hem i mekem tru long Jisas Kraes i save givim blesing long olgeta evriwan. Long 1935, taem oli luksave bigfala hif blong man fastaem tru long ol vas blong Baebol, ol Wetnes blong Jeova oli stap wok strong long 115 kantri. Long ol yia we oli ron biaen long 1990, fasin blong lukaot ol man we oli olsem sipsip i go antap bitim wan taem moa long namba blong ol kantri we oli stap wok long hem.—Mak 13:10.
17. ?Wanem wok i stap halpem ol man blong olgeta ‘laen, kantri, mo lanwis,’ blong oli save joen long bigfala kampani?
17 Blong traem faenem olgeta we bambae oli kam memba blong bigfala hif blong man long fyuja, ol Wetnes blong Jeova oli no prij nomo long olgeta nesen. Be oli prij tu long olgeta laen mo long olgeta kantri mo long olgeta lanwis blong ol nesen ya. Blong kasem ol man ya, ol Wetnes oli prentem ol buk we oli tokbaot Baebol long bitim 300 lanwis. Samting ya i nidim fasin blong trenem ol man mo blong holem ol grup blong man we oli nafgud blong mekem wok blong translesen, givim ol kompyuta we oli save karem olgeta lanwis ya, mo tu blong mekem wok blong prentem. Long ol faef yia we oli pas, oli ademap 36 moa lanwis, we i gat samwe long 98,000,000 man oli stap yusum. Antap long samting ya, ol Wetnes oli traehad blong visitim ol wanwan man ya, blong halpem olgeta blong kasem save long Tok blong God.—Matyu 28:19, 20.
‘Oli Kamaot Long Bigfala Trabol’
18. (a) ?Taem bigfala trabol i faerap, hu ya ol man we bambae God i sevem olgeta? (b) ?Long taem ya, bambae ol man oli talem wanem tok we i soem se oli glad?
18 Taem ol enjel oli lego win blong spolem ol samting, we Revelesen 7:1 i tokbaot, ol “slef blong God blong yumi” we tabu speret i makemaot olgeta, bambae oli luk we Jeova i protektem olgeta wetem fasin lav. Mo i no olgeta nomo. Be bigfala hif blong man ya tu we i joen wetem olgeta long trufala wosip. Aposol Jon i harem tok we i talem se bigfala hif blong man ya bambae oli ‘pastru long bigfala trabol.’ Oli ol man we oli sef. !Long taem ya, bambae oli singaot bigwan blong talem tangkyu mo presem God mo Jisas, se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala”! Mo long heven, ol man blong wok blong God we oli holem strong long hem, bambae oli joen wetem bigfala kampani, nao evriwan oli talem se: “Yes i tru ya. God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkyu long hem, oli mas ona long hem, oli mas talemaot haenem blong hem, mo oli mas talemaot paoa blong hem, gogo i no save finis. Amen.”—Revelesen 7:10-14.
19. ?Ol man we oli sef, bambae oli joen long wanem wok we i mekem oli glad?
19 !Bambae hemia i rili wan hapi taem ya! !Ol man we oli laef, bambae oli man blong wok blong trufala God nomo! Samting we bambae i givim moa glad long olgeta bitim ol narafala samting, hemia taem oli mekem wok blong Jeova. !Bambae i gat plante wok yet blong mekem—wok we i givim bigfala glad! Wol i mas jenis i kam Paradaes. Plante milyan man we oli ded, bambae oli laef bakegen mo bambae ol man oli tijim olgeta long ol rod blong Jeova. !Hemia wan jans we i mekem yumi glad tumas blong joen long wok ya!
?Wanem Ansa Blong Yu?
◻ ?Olsem wanem samting we i kamaot long 1935 i gat paoa long wok blong prij blong ol Wetnes blong Jeova?
◻ ?Fasin ya we bigfala hif blong man i “stap stanap fored long bigfala jea blong God” i soemaot wanem?
◻ ?Olsem wanem fasin tangkyu long blad blong Smol Sipsip i gat paoa long laef blong man?
◻ ?Fasin ya we oli holem lif kokonas i minim wanem?
◻ ?Olsem wanem bigfala hif blong man i stap mekem tabu wok long dei mo long naet?
[Tok blong pija long pej 16, 17]
Long tabu wok blong olgeta, oli soem fasin blong wok oltaem, wok strong, mo oli traehad