Japta 13
Wan Bigfala Kampani i Stanap Long Fored Blong Jea Blong Jeova
1. (a) ?Blong oli kasem pei blong olgeta, ol stret man bifo, mo ol 144,000, oli mas kasem wanem fastaem? (b) ?Be bambae i olsem wanem long wan bigfala kampani we i laef i stap long “bigfala trabol”?
NATING we oli mekem wil blong Jeova, ol stret man blong bifo, i stat long Ebel kasem Jon Baptaes, oli ded mo oli wet long laef bakegen. Ol 144,000 we oli mas stap wetem Kraes long Kingdom blong heven, olgeta tu oli mas ded bifo oli kasem pei blong olgeta. Be defren nao, aposol Jon i kasem wan vison blong wan bigfala kampani we i save sef long “bigfala trabol.” Yes, oli no ded long trabol ya, mo oli gat hop blong kasem itenel laef.—Rev. 7:9-17.
Oli Luksave “Bigfala Kampani”
2. ?Wanem samting i lidim ol man blong oli kasem klia save long “bigfala kampani” blong Revelesen 7:9?
2 Long plante handred yia, oli no luksave “bigfala kampani.” Be lelebet lelebet, oli kasem save long ol profet tok. Long 1923, oli luksave se ol “sipsip” long parabol blong Jisas long Matyu 25:31-46 mo ol “narafala sipsip” long Jon 10:16, oli man naoia we oli gat jans blong stap foreva long wol. Long 1931, oli kasem save long Esikel 9:1-11, we i tokbaot sam man we oli kasem mak long fes blong olgeta from wan sekretari. Oli luksave se ol man ya oli sem mak long “ol sipsip” blong Matyu japta 25. Nao, long 1935, oli luksave se “bigfala kampani” blong Revelesen 7:9-17, i sem mak long ol “sipsip” we Jisas i tokbaot long parabol blong hem blong ol sipsip mo ol nani. Nating we long 1923 oli luksave finis se i gat sam sipsip ya long medel blong olgeta, namba blong ol sipsip ya i gru bigwan nomo i stat long 1935. Tede i gat plante milyan man we oli traehad blong joen long “bigfala kampani ya” blong “ol narafala sipsip” we God i glad long olgeta.
3. ?From wanem fasin blong olgeta blong “stanap long fored blong jea” i no min se oli stap olsem wan kampani blong heven?
3 Olgeta memba blong “bigfala kampani” oli narakaen long ol 144,000 man Isrel blong speret, we sem japta blong Revelesen i tokbaot fastaem. Long vison blong hem, Jon i no luk “bigfala kampani” ya i stap long heven. I tru we “oli stap stanap long fored blong jea ya” (Grik: e·noʹpi·on tou throʹnou, “long lukluk blong jea”) blong God, be hemia i no min se oli stap long heven. Oli stap long “fes” blong God nomo. Hem wan i talem long yumi we hem i stap long heven mo i lukluk ol pikinini blong man. (Rev. 7:9; Sam 11:4; lukluk Sam 100:1, 2, wetem Luk 1:74, 75, mo Wok 10:33, Kingdom Interlinear.) Sem mak nao, Matyu 25:31, 32 i talem we “olgeta nesen” oli stap long fored blong Jea blong Kraes (i minim, “long fes blong hem”). Hemia i no min se oli stap long heven. Antap moa, blong soemaot we “bigfala kampani, we i no gat man i naf blong kaontem,” i no wan kampani blong heven, yumi save jekem ol tok blong Revelesen 7:4-8 mo 14:1-4. Ol vas ya i soemaot klia stret namba blong olgeta we God i tekem long wol blong putum long heven.
4. (a) ?Wanem ya “bigfala trabol” ya we oli mas sef long hem? (b) ?Olsem Revelesen 7:11, 12 i talem, hu ya i stap lukluk “bigfala kampani” mo i stap joen long wosip blong hem?
4 Blong makem “bigfala kampani ya” i hu, Jon i raetem: “Hemia olgeta we oli kamaot long bigfala trabol.” Yes, oli sef long bigfala trabol ya we i winim olgeta narafala trabol we i bin kamaot long wol. (Rev. 7:13, 14; Mat. 24:21) Ol man we oli sef long bigfala dei ya blong Jeova, bambae oli savegud hu ya i sevem olgeta. Long vison blong hem, Jon i luk we oli gat tumas tangkyu long God, mo oli talem se God mo Smol Sipsip i sevem olgeta. Nao ol stret enjel long heven bambae oli joenem voes blong olgeta long wosip ya blong Tru God. Oli talem se: “!Amen! Blesing, glori, waes, fasin tangkyu, ona, paoa, mo ol fasin we oli stronggud, oli blong God blong yumi foreva. Amen.”—Rev.7:11, 12.
Hem i Traem Olgeta Blong Luksave Sipos Oli Stret
5. (a) ?Olsem wanem yumi save luksave wanem samting yumi mas mekem blong joen long “bigfala kampani”? (b) Taem yu yu ansa long ol kwestin we oli stap long en blong haf ya, talem ol samting we yumi mas mekem blong sef long “bigfala trabol.”
5 Jeova i sevem “bigfala kampani ya,” i stret nomo long ol prapa rul blong hem. Ol profet tok blong Baebol oli makemgud ol fasin blong olgeta we bambae oli sef. Taswe ol man we oli laekem stretfasin, oli mas wok naoia blong bambae oli sef. Yumi lukluk finis ol vas we oli stap biaen. Be naoia i gud we yu yu jekemgud olgeta. Yu yu mas yusum ol narafala vas we oli stap. Nao yu yu mas tingtinggud olsem wanem yu yu mas wok blong karem ol fasin we ol profet tok ya oli tokbaot.
“Ol narafala sipsip” we Jon 10:16 i tokbaot
?Wan man we i rili lesin long voes blong Jisas, i mas mekem wanem? (Jon 10:27; Mat. 9:9; Efes. 4:17-24)
?Olsem wanem yumi save soemaot we yumi agri we i gat “wan gad nomo” blong yumi, hemia Kraes? (Mat. 23:10, 11)
“Ol sipsip” long pijatok blong Jisas long saed blong ol sipsip mo ol nani (Mat. 25:31-46)
?“Ol brata” blong Kraes oli hu? (Hib. 2:10, 11; 3:1)
?Nating we i gat hadtaem, olsem wanem ol sipsip oli soemaot we oli stap wetem ol brata blong Kraes? ?Oli joengud long wanem wok? (Rev. 12:12, 17; Mat. 24:14; 28:19, 20)
Ol man we oli kasem mak blong sef from man we i gat pensel blong sekretari (Esikel 9:1-11)
?Olsem wanem oli soemaot gud we oli no joen long ol rabis samting we ol jyos we oli talem se oli Kristin, we Jerusalem bifo i pija blong olgeta, oli stap mekem tede? (Rev. 18:4, 5)
?Wanem “mak ya” i mekem olgeta oli defren long ol gyaman Kristin, mo i mekem olgeta oli save sef? (1 Pita 3:21; Mat. 7:21-27; Jon 13:35)
6. ?Olsem wanem ol tok blong Jon long saed blong “bigfala kampani” oli halpem yumi blong kasem save from wanem oli sef?
6 Long Revelesen 7:9-15, yumi gat sam narafala samting we oli makem “bigfala kampani.” Baebol i talem long yumi olsem wanem long “bigfala kampani” biaen long “bigfala trabol.” From samting ya, hem i pulum tingting blong yumi long sam fasin we i mekem bigfala kampani ya i sef.
7. ?Oli mekem wanem bifo long “bigfala trabol”? ?Olsem wanem ol tok blong Jon oli soemaot samting ya?
7 Nomata we oli kamaot long olgeta nesen, laen, pipol, mo lanwis, oli joen wanples “oli stap stanap long fored blong bigfala jea,” from we oli agri se Jeova, Hemia we i stap sidaon long jea ya, i Hae Rula. Laef blong olgeta i soemaot we oli holemstrong long hae rul blong hem. From we oli “wasem klos blong olgeta, blong mekem olgeta i kam waet long blad blong Smol Sipsip,” samting ya i soemaot we oli agri long sakrafaes we i kavremap sin, hemia blong Jisas, Smol Sipsip blong God. (Jon 1:29; 1 Jon 2:2) Oli gat bilif, taswe oli givim laef blong olgeta i go long God from sakrafaes ya, mo oli soemaot samting ya from baptaes long wora. Ol waet klos blong olgeta i soemaot we naoia oli stanap klin long fes blong God. Oli no fraet blong talemaot we oli bilif long Pikinini blong God. (Mat. 10:32, 33) Taswe, Baebol i soemaot we oli stap long haos blong God, hemia haos ya blong wosip. Oli stap mekem tabu wok long God “long dei mo naet.” Olsem ya nao, ol narafala man oli save se oli man blong holemstrong long tru wosip, mo oli man blong talemaot Kingdom.—Aes. 2:2, 3.
8. ?Blong yumi haremgud from ol tok ya, yumi mas mekem wanem?
8 ?Fasin blong yu i stret long profet tok ya? ?I gat sam samting yet we yu yu mas jenisim long laef blong yu, blong i stret moa long pijatok ya? !Sipos i olsem, be naoia i stret taem blong mekem!
Oli Laef Long Paradaes Blong Speret
9. ?Olsem wanem Jon i soemaot ol blesing blong speret we “bigfala kampani” i kasem naoia?
9 ?Yu yu gat hop blong sef wetem “bigfala kampani” ya? Sipos yu yu mekem laef blong yu i stret long ol rod blong Jeova, yu yu stap haremgud from ol nambawan promes blong Hem. I stret nomo blong kolem ol fasin ya: Paradaes blong speret. Aposol Jon i kasem tok ya: “Bambae oli no moa hanggri mo oli no moa tosta. Bambae san i no moa bonem olgeta, mo i no moa gat hot we i hot tumas, from we Smol Sipsip we i stap long medel blong jea ya, bambae i lukaot long olgeta, mo bambae i lidim olgeta long ol springwora blong laef. Nao God bambae i ravemaot wora blong ae blong olgeta.” (Rev. 7:16, 17) ?Olsem wanem samting ya i kamtru long yu?
10. (a) ?Long saed blong speret, olsem wanem i tru we “bigfala kampani” “i no moa hanggri mo i no moa tosta”? (b) ?Yu yu harem olsem ya finis?
10 ?Taem Gudfala Gad blong sipsip, Jisas Kraes, i no lukaot yet long yu, maet yu yu hanggri mo tosta long stretfasin? (Lukluk Matyu 5:6) Sipos i olsem, be yu yu stap wantem tumas ol samting we Jeova nomo i save givim long yu from Pikinini blong hem. Taem yu yu lanem ol stret rod blong Jeova—plan blong hem blong spolem ol rabis man, mo gladhat blong hem blong sevem ol pikinini blong Adam—nao, tru ya, hemia fastaem long laef blong yu we yu yu rili haremgud. Ogenaesesen blong God i stap seremaot ol kakae mo ol dring blong speret we i kam from Tok blong God. Yu yu save gohed nomo blong haremgud from. (Aes. 65:13, 14) Nao sipos yu yu givim laef blong yu i go long God from Kraes, yu yu gat nao wan tru plan long laef blong yu. (Lukluk Jon 4:32-34.) Naoia yu yu gat hop blong kasem itenel laef long paradaes long wol, from we Smol Sipsip “i lidim [“bigfala kampani”] long ol springwora blong laef.”
11. (a) ?Olsem wanem i tru we ‘san mo hot we i hot tumas i no moa bonem olgeta’? (b) ?Olsem wanem samting ya i impoten long yu?
11 Ol “sipsip” blong “bigfala kampani” oli haremgud, from we Gudfala Gad i stap lukaot long olgeta mo i lidim olgeta i go long sefples. Taswe, ‘san mo hot we i hot tumas i no moa stap bonem olgeta bakegen.’ Samting ya i no min se “bigfala kampani” i no moa kasem trabol from wol. Nogat. Be samting ya i min se yu yu save haremgud, mo yu yu save sef from we yu yu no kasem kros blong God we i olsem fasin we i hot we i hot. Antap bakegen, bambae taem God i mekem ol rabis man oli lus, yu yu no stap wetem olgeta. Bambae gudfala fasin fren ya wetem God i save stanap foreva.—Esikel 38:22, 23; lukluk Sam 11:6; 85:3, 4.
12. ?Olsem wanem God i ravemaot wora blong ae blong olgeta naoia?
12 !Taswe yu yu gat nambawan risen blong haremgud, sipos yu yu wan memba blong “bigfala kampani”! Yu yu gat hop blong luk ol rabis man oli lus blong olwe. Bambae maen mo bodi blong yu i save kam fri olgeta long ol nogud frut blong sin. Be tede finis, yu yu stap haremgud from we yu yu no gat ol soa we oli stap spolem ol man blong wol we oli no save God. Yes, yu yu stap haremgud nao from glad ya blong pipol we Jeova i God blong hem. (Sam 144:15b) Long fasin ya nao, yu yu stap luk we promes blong God i stap kamtru: “God bambae i ravemaot wora blong ae blong olgeta.”
13. ?Wanem samting bambae i joen long glad ya blong paradaes blong speret, taem rul blong Kraes blong wan taosen yia i gohed nomo?
13 Bambae paradaes blong speret i no finis taem fasin ya blong wol i finis. “Bigfala kampani” tu i no lus. Taswe sipos yu yu wan memba blong bigfala kampani, bambae yu yu save haremgud from wan lafet blong speret long ol samting we oli fatfat gud long gris. Hemia lafet ya blong 1,000 yia blong rul blong Kraes. Bambae save blong yu long God hem wan, i save kam dip moa, taem yu luk nambawan plan blong hem we i no save mestem i kamtru. Bambae glad blong yu i save kam bigwan moa taem yu yu mekem welkam long olgeta we oli laef bakegen long ded. Olgeta tu oli save joen wetem yufala long tru wosip. Bambae olgeta stret man blong Jeova oli haremgud nomo from ol blesing we oli kasem long bodi blong olgeta. Oli luksave se hemia i wok blong lav blong Jeova hem wan.—Aes. 25:6-9, Jemes 1:17.
Tingtingbak
● ?Baebol i joenem “bigfala kampani” long wanem bigfala samting we i mas kamtru? ?Olsem wanem?
● ?Sipos yumi rili wantem joen long “bigfala kampani,” yumi mas mekem wanem naoia?
● ?Yu yu stap tingbaot ol blesing blong paradaes blong speret oli impoten olsem wanem?