Gameliel—I Tijim Sol Blong Tasas

WAN bigfala hif blong man oli stanap tugeta we i no gat wan man i toktok. Jes sam menet bifo, kolosap nomo oli bin kilim i ded aposol Pol. Ami blong ol man Rom i bin sevem Pol, we plante man oli save hem olsem Sol blong Tasas. Nao hem i stanap long lada kolosap long haos prea long Jerusalem, mo i lukluk i go long ol man ya.

Pol i mekem saen wetem han blong hem blong ol man oli stap kwaet. Nao hem i toktok long lanwis Hibru, i se: ‘Ol fren. Ol papa blong mi mo ol brata blong mi. Plis yufala i lesin long mi, blong mi talemaot ol poen blong mi long yufala. . . . Mi mi wan man Isrel. Mi bon long Silisia long taon ya Tasas. Be mi gruap long ples ya, long Jerusalem, mi skul kolosap long leg blong tija ya Gameliel. Hem i tijim mi gud long Loa ya blong ol olfala blong yumi, blong mi holem stret. Mo long taem ya, mi strong tumas long ol bisnes blong God, stret olsem yufala ya tede.’​—Ol Wok 22:​1-3.

Long taem ya, laef blong Pol i stap long denja. Taswe, ?from wanem hem i statem toktok blong hem wetem poen ya se Gameliel i tijim hem? ?Hu ya man ya Gameliel, mo olsem wanem hem i tijim ol man? ?Trening we Sol i kasem long man ya, i givhan long hem afta we hem i kam Kristin aposol Pol tu?

?Hu Ya Gameliel?

Gameliel i wan Farisi we ol man oli savegud hem. Hem i smol bubu blong wan man we oli kolem Elda Hilel. Man ya nao i bin statem wan long tufala grup blong ol Farisi long skul blong ol man Jyu.a Ol man oli talem se fasin blong Hilel blong tij i moagud i bitim narafala man ya, Samae, we i agensem hem. Afta we haos prea blong Jerusalem i lus long 70 K.T.,b ol man oli laekem moa Bet Hilel (Haos blong Hilel) i bitim Bet Samae (Haos blong Samae). Haos blong Hilel i kam olsem stampa ples blong skul blong ol man Jyu, from we olgeta narafala smosmol grup blong skul blong ol man Jyu, oli finis olgeta taem haos prea i lus. Plante disisen we Bet Hilel i mekem, loa blong ol man Jyu we i stap long Misna, i stanap long olgeta. Biaen, Talmud i stanap long Misna ya. Ating Gameliel i givhan bigwan blong mekem se Bet Hilel i kam wan impoten ples.

Ol man oli tinghae long Gameliel, taswe oli kolem hem se raban, wan taetel we i hae moa long rabae. Biaen, ol man oli givim bigfala ona long Gameliel mekem se Misna i tokbaot hem olsem se: “Taem elda ya Raban Gameliel i ded, fulwan laet blong Tora i lus, mo fasin blong stap klin mo tabu [long stret lanwis oli talem se “seraot”] oli lus.”​—Sota 9:​15.

Gameliel i Tijim Hem​—?Olsem Wanem?

Taem aposol Pol i talem long bigfala hif man long Jerusalem se ‘mi skul kolosap long leg blong tija ya Gameliel,’ ?hem i minim wanem? ?Taem wan man i wan disaepol blong tija ya Gameliel, hem i mas mekem wanem?

Dov Zlotnick, tija long wan haeskul long Amerika, we i tijim ol save long saed blong skul blong ol man Jyu, i tokbaot trening ya, se: “Blong loa ya we oli talem nomo i stretgud mo man i save trastem, samting ya i dipen bigwan long gudfala fasin fren we tija mo disaepol tufala i gat. Tija i mas lukaotgud taem hem i tijim loa, mo disaepol i mas wantem tumas blong lanem loa ya. . . . Taswe, ol disaepol oli mas sidaon long floa raon long tija blong olgeta . . . ‘mo oli mas dring olgeta tok blong hem olsem we oli tosta tumas.’ ”​—Avot 1:4, Misna.

Long buk ya A History of the Jewish People in the Time of Jesus Christ, Emil Schürer i talem plante samting long saed blong fasin blong tij blong ol rabae long faswan handred yia. Hem i raetem se: “Plante taem, ol Rabae we oli gat gudfala fasin blong tij oli hivimap plante yangfala we oli wantem lanem moa, raon long olgeta, nao oli tijim ol yangfala ya blong savegud olgeta defren ‘loa we oli talem nomo,’ we oli plante tumas. . . . Ol tija ya oli talem bakegen mo bakegen, blong mekem ol yangfala ya oli rimemba ol save ya. . . . Tija i askem plante kwestin long saed blong loa long ol studen blong hem, nao hem i letem ol studen ya oli tingtinggud long saed ya mo ansa. Sipos no, hem nomo i ansarem ol kwestin ya. Ol studen oli gat raet blong askem kwestin long tija tu.”

Long tingting blong ol rabae, studen i mas tingbaot save ya olsem we i moa impoten bitim we hem i wantem kasem wan gudfala mak nomo. Tija i givim woning long ol yangfala ya se: “Eni man we i fogetem wan samting we hem i lanem​—hanraet i talem se i fol blong hem, olsem we hem i save lusum laef blong hem from.” (Avot 3:8) Bigfala ona i go long wan studen we i olsem “wel we oli wokem long simen, we i no gat wan wora i save lik tru long hem.” (Avot 2:8) Hemia nao trening we Pol, we ol man bifo oli save hem long Hibru nem ya, Sol blong Tasas, i kasem.

Tingting Biaen Long Ol Tijing Blong Gameliel

Stret long tijing blong ol Farisi, Gameliel i pulum ol man blong bilif long loa we oli talem nomo, oli no raetem. Long rod ya, hem i tijim moa long saed blong ol kastom we ol rabae oli tijim longtaem finis i kam, i bitim we oli tijim Tok blong God. (Matyu 15:​3-9) Misna i talem bakegen tok we Gameliel i bin talem se: “Faenem wan tija [wan rabae] blong yu, nao bambae yu kam fri long ol tingting we oli hafhaf. Yu no mas givim wan presen we i bitim mak i go long God, from we yu nomo yu ting se i stret.” (Avot 1:​16) Samting ya i minim se taem Hibru hanraet blong Baebol i no talem stret wanem samting blong mekem, wan man i no mas folem prapa tingting no save blong hem blong mekem wan disisen. Be, hem i mas faenem wan rabae we i gat gud save, blong hem nao i mekem disisen blong hem. Gameliel i talem se long rod ya nomo, wan man i save blokem sin.​—Skelem wetem Rom 14:​1-​12.

Be, long ol loa we Gameliel i mekem long saed blong jyos, hem i no strong tumas, hem i mekem i isi moa long ol man. Eksampel, hem i soem se hem i tingbaot ol woman taem hem i putum rul ya se “wan waef i save mared bakegen sipos hem i gat wan wetnes nomo [blong pruvum se man blong hem i ded].” (Yevamot 16:7, Misna) Mo tu, blong givhan long woman no man we hasban no waef blong hem i mekem divos long hem, Gameliel i stanemap sam rul long saed blong leta blong divos.

Yumi luksave fasin ya blong Gameliel we hem i kasem save long tingting blong narafala, taem yumi luk samting we hem i mekem long ol man blong Jisas Kraes bifo. Buk blong Ol Wok i tokbaot taem ya we ol lida blong ol man Jyu oli wantem kilim i ded sam aposol blong Jisas. Oli bin holem ol aposol ya from we oli stap prij. Nao ‘wan long olgeta we hem i Farisi, i tija blong Loa, we olgeta oli stap ona long hem, nem blong hem Gameliel, hem i stanap insaed long Kaonsel. Hem i talem long ol soldia blong oli tekem ol aposol oli go afsaed fastaem. Nao hem i tok long ol Kaonsel, i se “Ol man Isrel. Yufala i mas tingtinggud long samting ya we yufala i wantem mekem long olgeta ya. . . . Hemia tok blong mi long bisnes ya. Yufala i mas livim ol man ya oli stap olsem nomo. Yufala i mas letem olgeta oli gofri. . . . Sipos no, maet bambae yufala i faenem we yufala i stap faet long God.” ’ Ol man oli folem advaes blong Gameliel, ale, oli letem ol aposol oli gofri.​—Ol Wok 5:​34-​40.

?Trening Ya i Mekem Wanem Long Pol?

Pol i bin kasem trening mo edukesen long wan rabae we i wan nambawan tija long faswan handred yia K.T. Ating taem aposol ya i tokbaot Gameliel, samting ya i mekem bigfala hif blong man ya long Jerusalem i lesingud long tok blong hem. Be Pol i tokbaot wan narafala Tija we i hae moa long Gameliel​—hemia Jisas, Mesaea. Taem Pol i stap toktok long hif man ya, hem i no moa disaepol blong Gameliel be hem i wan disaepol blong Jisas.​—Ol Wok 22:​4-​21.

?Trening we Gameliel i givim long Pol, i givhan long hem taem hem i kasem tijing olsem wan Kristin? Ating, klia tijing we Pol i kasem long saed blong Baebol mo loa blong ol man Jyu, i givhan long hem long wok blong hem olsem wan Kristin tija. Be, ol leta we tabu speret i pusum Pol blong raetem, we yumi save faenem insaed long Baebol, oli soemaot klia se hem i sakemaot ol stampa bilif blong ol Farisi we Gameliel i bin tijim long hem. Pol i pulum ol man Jyu mo ol narafala man tu, oli go long Jisas Kraes. Hem i no pulum olgeta oli go long ol rabae blong skul blong ol man Jyu, no long ol kastom we man nomo i stanemap.​—Rom 10:​1-4.

Sipos Pol i bin gohed blong stap olsem wan disaepol blong Gameliel, hem i save kam wan man we i gat haenem. Sam narafala man we oli gat hae save olsem Gameliel, oli givhan blong mekem skul blong ol man Jyu i kam strong. Wan long olgeta ya, hemia Saemon, pikinini boe blong Gameliel. Ating Saemon i studen semtaem wetem Pol, mo hem i joen bigwan wetem ol man Jyu we oli rebel agensem gavman blong Rom. Afta we haos prea i lus, smol bubu blong Gameliel, nem blong hem Gameliel 2, i mekem se Kaonsel ya Sanedrin i kasem paoa bakegen. Hem i muvum Kaonsel ya i go long velej blong Yavne. Smol bubu blong Gameliel 2, nem blong hem Juda Ha-Nasi, hem i joenem olgeta haf blong Misna i kam wan buk, mo kam kasem tede, buk ya, Misna, i stap olsem faondesen blong tingting blong ol man Jyu.

From we Sol blong Tasas i wan studen blong Gameliel, hem i gat jans blong kam wan haeman long skul blong ol man Jyu. Be, long saed blong jans ya, Pol i raetem se: “From Kraes, ol fasin ya we bifo mi luk olgeta olsem we oli blong mekem mi mi win, naoia mi luk olgeta olsem we oli blong mekem mi mi lus nomo. Be i no finis long ples ya. Naoia mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. From Kraes, mi mi sakem olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.”​—Filipae 3:​7, 8.

Pol i lego jans ya we hem i gat olsem wan Farisi, mo hem i kam wan man blong Jisas Kraes. Long rod ya, Pol i stap folem gudfala advaes blong tija blong hem bifo, we i talem se man i mas lukaot se hem i no “stap faet long God.” Taem Pol i no moa ronem ol disaepol blong Jisas, i olsem we hem i no moa faet agensem God. Taem hem i kam wan man blong Kraes, hem i “joen wetem God blong mekem wok blong hem.”​—1 Korin 3:9.

Ol Wetnes blong Jeova tede, oli gohed strong blong talemaot mesej blong trufala Kristin skul. Olsem Pol, plante long olgeta ya oli jenisim plante fasin long laef blong olgeta. Samfala oli lego gudfala wok we oli kasem bigfala mane from, blong mekem se oli save joen moa long wok blong talemaot Kingdom, hemia i rili wok “blong God.” (Ol Wok 5:39) Oli glad tumas we oli bin folem eksampel blong Pol i bitim eksampel blong tija blong hem fastaem, Gameliel.

[Ol futnot]

[Tok blong pija long pej 28]

Taem Sol blong Tasas i kam aposol Pol, hem i talemaot gud nyus long ol man blong olgeta nesen