“Yufala i Mas Tabu, Yufala i Mas Klingud”

“God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud. Long Baebol God i talem finis se, ‘Yufala i mas tabu, yufala i mas klin gud, olsem we mi mi tabu, mi mi klin gud.’ ”​—1 PITA 1:​15, 16.

1. ?From wanem Pita i leftemap tingting blong ol Kristin blong stap tabu?

?FROM wanem aposol Pita i givim advaes ya antap? From we hem i luksave se ol wanwan Kristin oli mas bos long tingting mo fasin blong olgeta, blong mekem oli laenap oltaem wetem tabu fasin blong Jeova. Taswe, bifo we hem i talem tok ya antap, hem i talem se: “Yufala i mas mekem tingting blong yufala i rere. Tingting blong yufala i mas klia gud. . . . Yufala i mas obei long God. Yufala i no letem ol samting ya we yufala i bin wantem bifo, taem we yufala i no save hem, bambae oli pulum fasin blong yufala.”​—1 Pita 1:​13, 14.

2. ?From wanem ol samting we yumi wantem tumas bifo we yumi lanem trutok oli doti?

² Ol samting ya we yumi bin wantem bifo oli no klin. ?From wanem? From we plante long yumi i bin folem ol fasin blong wol, bifo we yumi akseptem Kristin trutok. Pita i save samting ya. Hem i talem stret se: “Longtaem tumas yufala i stap long fasin blong hiten man. Bifo, oltaem yufala i stap mekem i nogud wetem woman, yufala i stap wantem ol samting nogud, mo yufala i stap dring we yufala i lusum hed. Bifo, oltaem yufala i stap mekem lafet blong ronem woman mo blong dring grog blong kam fuldrong. Mo yufala i stap prea long ol narafala god long ol fasin we i no stret nating.” Yes, Pita i no talem ol doti fasin we oli stap kamaot long taem blong yumi, from we ol man long taem blong hem oli no save long ol fasin ya yet.​—1 Pita 4:​3, 4.

3, 4. (a) ?Olsem wanem yumi save blokem fasin blong wantem samting we i no stret? (b) ?Ol Kristin oli mas stap olsem we oli no gat filing nating? Eksplenem.

³ Makemgud se, ol samting ya we man i wantem tumas, hemia ol samting we oli stap pulum bodi, tingting, mo filing blong hem. Taem yumi letem ol samting ya oli winim yumi, i isi nomo blong ol tingting mo fasin blong yumi oli kam doti. Samting ya i soem from wanem yumi mas letem paoa blong tingting i stap bos long ol fasin blong yumi. Pol i tokbaot samting ya, i se: ‘Ol brata mo sista. From we God i mekem i gud tumas long yumi long plante samting, mi mi talem strong long yufala, se plis yufala i mas givim olgeta laef blong yufala i go nomo long God. Hemia wan presen we yufala i save givim blong mekem wosip long hem, wan presen we i laef, we i tabu, mo we God i glad blong tekem. Hemia i olsem prapa wosip long God, we i stanap long paoa blong tingting.’​—Rom 12:​1, 2.

⁴ Blong givim wan tabu presen i go long God, yumi mas letem paoa blong tingting, be i no filing, i lidim yumi. !Plante oli foldaon long fasin nogud long saed blong seks, from we oli letem filing blong olgeta i bos long fasin blong olgeta! Samting ya i no min se yumi mas blokem ol filing blong yumi. Sipos yumi blokem ol filing, ?olsem wanem yumi save soem glad long wok blong Jeova? Be, sipos yumi wantem wokem ol frut blong tabu speret, bitim ol samting we bodi nomo i wantem, yumi mas jenisim tingting blong yumi, yumi mas gat tingting olsem Kraes.​—Galesia 5:​22, 23; Filipae 2:5.

Tabu Laef, Tabu Praes

5. ?From wanem Pita i wari long fasin ya blong stap tabu?

⁵ ?From wanem Pita i wari long nid blong ol Kristin blong stap tabu? From we hem i savegud tabu praes ya we i pemaot ol man we oli obei. Hem i raetem se: “Yufala i save finis wanem samting we God i yusum blong pemaot yufala, blong mekem yufala i fri long rabis laef ya we yufala i kasem long ol olfala blong yufala bifo. Hem i no yusum samting we i save kam nogud, olsem selva no gol. Blong pemaot yufala, hem i yusum blad blong Kraes we i ded long [pos]. Blad ya i olsem blad blong wan smol sipsip we i no gat soa long hem, i no gat wan samting i spolem hem. Mo long fes blong God, blad ya blong Kraes i gud tumas.” (1 Pita 1:​18, 19) Yes, Stampa blong fasin tabu, Jeova God, i sanem Pikinini blong hem, wan nomo we hem i gat, “Tabu Man ya blong God,” i kam long wol blong i pem wan praes we i givim jans long ol man blong frengud wetem God.⁠—Jon 3:​16; 6:​69; Eksodas 28:36; Matyu 20:28.

6. (a) ?From wanem i no isi blong folem ol fasin we oli tabu? (b) ?Wanem i save halpem yumi blong mekem ol fasin we oli tabu oltaem?

⁶ Be yumi mas luksave se, long wol ya blong Setan we i fulap long rabis fasin, i no isi blong gat wan laef we i tabu mo i klingud. Setan i putum plante trap blong kasem ol trufala Kristin, we oli stap traehad blong winim ol trabol blong wol ya. (Efesas 6:​12; 1 Timote 6:​9, 10) I gat ol wari long saed blong wok, famle i agensem yumi, ol pikinini long skul oli jikim yumi, mo ol rabis fren oli traem pulum yumi. Taswe, i impoten blong stap strong long saed blong speret, sipos yumi wantem stap tabu. Pol i givim advaes long Timote se: “Yu yu mas holem stret toktok ya we mi tijim yu finis long hem. Ol toktok ya i blong soemaot rod long yu, blong yu save folem ol fasin blong bilif mo blong laekem tumas ol man, ol fasin ya we yumi stap folem from we yumi joen long Jisas Kraes.” (2 Timote 1:​13) Yumi harem ol stret toktok ya long Haos Kingdom mo taem yumi mekem prapa Baebol stadi blong yumi wan. Oli save givhan long yumi blong stap tabu long evri samting we yumi mekem long evri dei laef blong yumi.

Tabu Fasin Insaed Long Famle

7. ?Olsem wanem fasin tabu i mas givhan insaed long famle?

⁷ Taem Pita i talem bakegen tok we i stap long Levitikas 11:44, hem i yusum Grik wod ya haʹgi·os, we i minim, “seraot long sin, mo from samting ya, i blong God nomo, i klin.” (An Expository Dictionary of New Testament Words, we W. E. Vine i raetem) ?Olsem wanem fasin ya i save stap insaed long wan Kristin famle? Lav i mas stap olsem bigfala fasin insaed long famle, from we ‘God i stampa blong lav.’ (1 Jon 4:8) Lav we i pusum yumi blong livim samting we yumi nomo i wantem, hem i mekem gudfala fasin fren i gohed oltaem bitwin hasban mo waef, mo bitwin papa mama mo ol pikinini.​—1 Korin 13:​4-8; Efesas 5:​28, 29, 33; 6:4; Kolosi 3:​18, 21.

8, 9. (a) ?Samtaem wanem samting i save kamaot insaed long Kristin famle? (b) ?Baebol i givim wanem gudfala advaes long bisnes ya?

⁸ Maet yumi stap tingting se lav ya i mas kamaot olsem nomo insaed long wan Kristin famle. Be yumi luk se long sam Kristin famle, i no gat plante lav i stap. Ating taem yumi stap long Haos Kingdom, yumi soem se yumi gat lav. Be taem yumi stap long haos blong yumi, i isi nomo blong lusum fasin tabu. Ale, maet kwiktaem nomo yumi fogetem se waef blong yumi, hem i Kristin sista blong yumi yet, mo hasban hem i sem brata ya (no ating man blong givhan no elda) we yumi bin soem respek long hem long Haos Kingdom. Maet yumi kam kros, mo wan bigfala rao i save kamaot. Fasin tu fes i save kam insaed long laef blong yumi. Hasban mo waef, tufala i no moa folem eksampel blong Kraes long fasin blong tufala blong frengud tugeta, be naoia tufala i kam olsem wan man mo woman nomo, we tufala i stap rao oltaem. Tufala i fogetem se famle i mas wan ples we tabu fasin i stap insaed long hem. Maet tufala i stat blong sakem ol tok we i olsem ol man blong wol nomo. !Long taem olsem, i isi nomo blong tufala i stikim tufala wetem ol tok we i nogud mo i strong tumas!​—Proveb 12:18; skelem wetem Ol Wok 15:37-​39.

⁹ Pol i givim advaes se: “Long ol toktok blong yufala, yufala i mas no talem ol rabis tok [Grik, loʹgos sa·prosʹ, ‘ol doti tok,’ hemia ol tok we i no tabu] we i save spolem man. Yufala i mas talem ol gudfala tok, we i save mekem ol man we oli slak oli kam strong moa. Tok olsem i save givhan moa long ol man we oli harem.” Mo hemia i minim evriwan long famle we oli harem, olsem ol pikinini tu.​—Efesas 4:​29; Jemes 3:​8-​10.

10. ?Olsem wanem ol advaes long fasin tabu i stret long ol pikinini tu?

¹⁰ Ol pikinini long wan Kristin famle, olgeta tu oli mas folem advaes ya blong stap tabu. !Taem oli aot long skul mo kambak long haos, i isi nomo blong folem ol pikinini blong wol mo tok wetem fasin rebel no long fasin we i no soem respek! Ol pikinini, yufala i no mas tekem fasin blong ol stronghed boe ya we oli bin tok nogud long profet blong Jeova, wan fasin we plante yangfala tede oli gat taem oli tok swea mo yusum ol doti tok. (2 King 2:​23, 24) Ol tok blong yufala i no mas kam doti wetem ol rabis tok blong rod we ol man oli stap talem taem oli les tumas blong toktokgud, mo taem oli no tingbaot narafala. Yumi ol Kristin, yumi mas talem ol tok we i tabu, i gud, i leftemap tingting, i kaen, mo i mekem ‘ol man oli haremgud.’ Toktok blong yumi i mas soem se yumi defren long ol narafala man.​—Kolosi 3:​8-​10; 4:6.

Fasin Tabu Mo Ol Famle Blong Yumi We Oli No Bilif

11. ?From wanem fasin we man i ting se hem i stret i no minim se hem i gat fasin tabu?

¹¹ Yumi mas traehad blong mekem ol fasin we oli tabu. Be, yumi no mas kam flas, mo mekem olsem we yumi stret moa bitim narafala, antap moa sipos i gat sam famle blong yumi we oli no bilif. Kristin fasin blong yumi blong kaen long ol man, i mas givhan long olgeta blong luk se yumi defren long ol narafala long wan gudfala rod, mo se yumi save olsem wanem blong soem lav mo sore, olsem gudfala man Sameria long parabol blong Jisas.​—Luk 10:30-​37.

12. ?Olsem wanem Kristin hasban no waef i save mekem se trutok i pulum moa tingting blong hemia we hem i mared wetem?

¹² Pita i soem from wanem i impoten blong gat stret tingting long saed blong olgeta insaed long famle we oli no bilif. Hem i talem long ol Kristin waef se: “Yufala woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man ya blong yufala oli luk we fasin blong yufala i klin gud, mo i blong ona nomo, hemia i naf blong pulum olgeta. Bambae i no moa gat sam samting se yufala i mas go tok long olgeta.” Wan Kristin waef (mo hasban tu), i save mekem trutok i pulum hasban no waef blong hem we i no bilif, sipos ol fasin blong hem oli klin, hem i tingbaot hasban no waef blong hem, mo i gat respek. Hemia i min se hem i mas rere blong jenisim sam samting long tiokratik program blong hem, blong soem se hem i no fogetem no tanem baksaed long hasban no waef blong hem we i no bilif.a​—1 Pita 3:​1, 2.

13. ?Olsem wanem ol elda mo ol man blong givhan oli save halpem ol hasban we oli no bilif, blong oli luksave trutok?

¹³ Samtaem ol elda mo ol man blong givhan oli save halpem wan famle olsem. Oli save joen wanples wetem hasban mo waef ya, blong traem save moa hasban ya we i no bilif. Long rod ya, maet hasban i luk se ol Wetnes oli no ol narakaen man, be oli gudfala man we oli intres long plante samting, i no jes long Baebol nomo. Wan elda i bin soem intres long wan hasban we hem i laekem blong go huk. Samting ya i mekem se tufala i stat blong frengud. Biaen, hasban ya i tekem baptaes mo i kam wan brata. Wan narafala eksampel, wan hasban we i no bilif i intres tumas long ol pijin ya kanari. Ol elda oli no fogetem hem. !Wan elda i stadi long saed blong pijin ya, mekem se long nekis taem we hem i mitim hasban ya, hem i stat storeyan long poen ya we man ya i intres tumas long hem! Taswe, blong stap tabu, i no minim se man i mas gat fasin we i strong tumas mo we hem i tingting long wan samting nomo.​—1 Korin 9:​20-​23.

?Olsem Wanem Yumi Save Stap Tabu Long Kongregesen?

14. (a) ?Wanem wan rod we Setan i stap yusum blong traem spolem kongregesen? (b) ?Olsem wanem yumi save blokem trap blong Setan?

¹⁴ Devel Setan i man blong spolem nem blong narafala. Grik wod ya di·aʹbo·los, blong talem Devel i minim “man blong agens” no “man blong spolem nem blong narafala.” Fasin blong spolem nem blong narafala i wan bigfala fasin blong Setan. Hem i stap traem blong yusum fasin ya insaed long kongregesen. Nambawan rod we hem i yusum, hemia fasin blong tokbaot narafala blong daonem hem. ?Olsem wanem long yu? ?Hem i stap trikim yu blong mekem fasin ya we i no tabu? ?Olsem wanem samting ya i save hapen? I save hapen taem yu nao yu statem wan toktok blong daonem narafala, taem yu talem bakegen sam tok we narafala i bin talem long yu, no taem yu lesin long ol tok ya. Wan waes proveb i talem se: “Man blong wokem trik, hem i mekem rao i kamaot. Mo man we i toktok blong spolem nem blong narafala, hem i mekem ol fren oli seraot.” (Proveb 16:28) ?Olsem wanem blong blokem fasin blong tokbaot narafala mo fasin blong spolem nem blong narafala? Yumi mas mekem sua se oltaem, ol tok blong yumi i mas leftemap tingting mo i mas stanap long lav. Sipos yumi lukaot ol gudfala fasin bitim ol slak fasin blong ol brata blong yumi, bambae ol toktok blong yumi oli gud oltaem mo oli long saed blong speret. Tingbaot se, i isi nomo blong toktok smol agensem narafala. !Mo man we i tokbaot narafala long yu, maet hem i save tokbaot yu long narafala tu!​—1 Timote 5:​13; Taetas 2:3.

15. ?Wanem ol fasin blong Kraes we bambae oli halpem evriwan insaed long kongregesen blong stap tabu?

¹⁵ Blong mekem kongregesen i stap tabu, yumi evriwan i mas gat tingting olsem Kraes. Yumi save se bigfala fasin blong hem, hemia lav. Taswe, Pol i givim advaes long ol Kristin long Kolosi blong oli gat fasin sore olsem Kraes. Hem i talem se: “Oraet, yufala i tabu, yufala i man blong God. Hem i laekem yufala tumas, mo hem i jusumaot yufala finis, blong yufala i man blong hem. From samting ya, yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong yufala i mas stap daon. Yufala i mas kwaet man. Mo tingting blong yufala i mas longfala. . . . Yufala i mas fofogivim yufala . . . Mo wetem ol fasin ya, yufala i mas laekem tumas ol man. From we fasin ya blong laekem tumas ol man, hem i save joenem olgeta samting, blong oli kam wan nomo stret.” Biaen, hem i gohed olsem: “Mo yufala i mas letem pis ya we Kraes i stap givim long yufala i holem tingting blong yufala, i lidim yufala long rod blong Kraes.” Tru ya, taem yumi gat fasin ya blong fogivim narafala, yumi save holemtaet fasin joengud mo fasin tabu insaed long kongregesen.​—Kolosi 3:​12-​15.

?Ol Man Raonabaot Long Yumi Oli Luk Fasin Tabu Blong Yumi?

16. ?From wanem tabu wosip blong yumi i mas hapi wosip?

¹⁶ ?Olsem wanem long ol man raonabaot long yumi? ?Oli tingbaot yumi olsem wanem? ?Yumi stap soemaot we trutok i mekem yumi glad, no yumi mekem olsem we trutok i wan baden? Sipos yumi tabu, olsem we Jeova i tabu, ale yumi mas soemaot samting ya long ol toktok mo fasin blong yumi. Yumi mas soem klia se tabu wosip blong yumi hem i wosip we i hapi. ?From wanem? From we Jeova, God blong yumi, hem i wan hapi God. Mo hem i wantem se ol man we oli wosip long hem oli mas glad tu. Taswe, man blong raetem Ol Sam i save talem long saed blong ol man blong Jeova bifo, se: ‘Olgeta we Jeova i God blong olgeta, olgeta ya bambae oli haremgud.’ ?Yumi stap soem se yumi haremgud olsem? ?Olsem wanem long ol pikinini blong yumi? ?Oli soem se oli glad blong stap long medel blong ol man blong Jeova long Haos Kingdom mo long ol asembli?​—Ol Sam 89:15, 16; 144:15b.

17. ?Wanem sam samting we yumi save mekem blong soem stret tingting long saed blong fasin tabu?

¹⁷ Mo tu, yumi save soem stret tingting long tabu wosip blong yumi, taem yumi joengud mo yumi soem kaengud fasin long ol man raonabaot long yumi. Samtaem, yumi nidim blong wok wanples wetem olgeta, maet blong klinim velej blong yufala no, olsem long sam kantri, blong fiksimap ol smol rod mo ol bigfala rod. Yumi soemaot tabu fasin ya tu, taem yumi klinimgud garen, yad mo olting blong yumi. Sipos yumi livim ol doti oli stap olbaot long yad, olsem wan rotin trak we olgeta man oli save luk, mekem se ples i no luk naes, ?yu ting se yumi stap soem respek long ol man raonabaot long yumi?​—Revelesen 11:18.

Fasin Tabu Long Ples Blong Wok Mo Long Skul

18. (a) ?Ol Kristin tede oli stap long medel blong ol man we oli gat wanem fasin? (b) ?Olsem wanem yumi save stap defren long wol?

¹⁸ Aposol Pol i raet i go long ol Kristin long taon blong Korin we i fulap long ol doti fasin. Hem i talem se: “Long leta ya we mi raetem finis long yufala, mi talem long yufala se ‘Yufala i mas no go joen wetem ol man we oli stap mekem ol fasin nogud wetem woman.’ Be mi mi no min se ‘Yufala i mas no go joen wetem ol man we oli no Kristin.’ Yes, olgeta ya oli stap mekem ol fasin nogud wetem woman, oli stap wantem tumas samting, oli stap stil mo oli stap mekem prea long ol narafala god. Be sipos yufala i wantem we yufala i no go joen wetem olgeta ya samtaem, bambae yufala i mas livim wol ya olgeta.” (1 Korin 5:​9, 10) Evri dei, ol Kristin oli mas stap long medel blong ol man we oli mekem ol rabis fasin ya. Samting ya i traem bigwan fasin blong olgeta blong holemstrong long God, antap moa, sipos oli stap long ol kantri we ol man oli sapotem no leftemap ol doti fasin long saed blong seks, ol kruked fasin, mo fasin blong gyaman. Long ples blong wok mo long skul, yumi no save lego ol gudfala fasin blong yumi, blong traem kam “sem mak” olsem olgeta we oli stap raonabaot long yumi. Kristin fasin blong yumi we i defren long ol narafala, mo kaen fasin we yumi soem long ol narafala, i mas pulum ae blong ol man we oli gat fasin luksave. Hemia olgeta we oli luksave nid blong olgeta long saed blong speret mo oli stap lukaot samting we i moa gud.​—Matyu 5:3; 1 Pita 3:​16, 17.

19. (a) ?Ol pikinini yufala i stap kasem wanem traem long skul? (b) ?Ol papa mo mama oli save mekem wanem blong sapotem ol pikinini blong olgeta mo fasin tabu blong olgeta?

¹⁹ I sem mak, ol pikinini blong yumi oli stap fesem plante traem long skul. ?Ol papa mo mama, yufala i stap visitim skul blong ol pikinini blong yufala? ?Yufala i save ol samting we oli stap hapen long skul? ?Yufala i savegud ol tija? ?From wanem ol kwestin ya oli impoten? From we long plante bigfala taon long wol, ol skul oli stap kam olsem ol ples blong faet, yusum drag, mo seks. ?Olsem wanem ol pikinini blong yu oli save holemstrong long God mo gat ol fasin we oli tabu sipos yu no sapotem olgeta fulwan wetem fasin sore? I stret nomo we Pol i givim advaes long ol papa mama, se: ‘Yufala ol papa, bambae yufala i no mekem ol pikinini blong yufala oli kros. From we sipos yufala i mekem olsem, bambae tingting blong olgeta i foldaon.’ (Kolosi 3:​21) Wan samting we i save mekem pikinini i kros, hemia taem papa mo mama, tufala i no kasem save long ol problem mo ol traem we hem i stap kasem evri dei. Ol pikinini oli mas rere blong fesem ol traem long skul. Insaed long wan Kristin famle we i tinghae long ol samting long saed blong speret, hemia nao ples blong rere from samting ya.​—Dutronome 6:​6-9; Proveb 22:6.

20. ?From wanem i impoten we yumi evriwan i gat fasin tabu?

²⁰ Laswan samting se, ?from wanem fasin tabu i impoten long yumi evriwan? From we hem i blokem ol fasin blong wol blong Setan mo tingting blong hem, blong oli no kasem yumi. Hem i wan blesing naoia mo bambae i wan blesing long fyuja. Hem i halpem yumi blong kam naf blong kasem laef long nyufala wol we bambae i fulap long stret fasin. Hem i givhan long yumi blong kam ol Kristin we oli gat stret tingting, ol narafala oli no fraet blong toktok wetem yumi, mo yumi save storeyangud wetem narafala​—yumi no ol krangke man wetem fasin we i strong tumas. Blong talem long sotfala tok, fasin tabu i mekem yumi kam olsem Kraes.​—1 Timote 6:​19.

[Futnot]

?Yu Yu Rimemba?

◻ ?From wanem Pita i luk se ol Kristin oli nidim advaes long saed blong fasin tabu?

◻ ?From wanem i no isi blong gat wan laef we i tabu?

◻ ?Yumi evriwan i save mekem wanem blong mekem fasin tabu i kam bigwan moa insaed long famle?

◻ ?Blong givhan long kongregesen blong stap tabu, yumi mas blokem wanem doti fasin?

◻ ?Olsem wanem yumi save stap tabu long ples blong wok mo long skul?

[Tok blong pija long pej 16]

Yumi ol Wetnes blong Jeova, yumi mas glad blong mekem wok blong Jeova mo ol narafala wok