Michael Faraday Man Blong Sayens Mo Man Blong Bilif

“Papa blong Paoa blong Lektrik.” “Man blong sayens we i traem faenemaot moa save bitim ol narafala man blong sayens.” Hemia tufala rod blong eksplenem Michael Faraday, we hem i bon long Engglan, long 1791. Hem i faswan man blong faenemaot olsem wanem blong mekem paoa blong lektrik taem yu putum waea kolosap long wan stil we i pulum hem. Biaen, samting ya i lidim ol man blong wokem ol enjin we oli wok wetem letrik mo ol enjin we oli givim paoa blong lektrik.

FARADAY i givim plante tok long Royal Institusen blong London, long saed blong fasin blong joenem ol kemikol, mo ol wanwan samting we oli stap insaed long evri samting. Ol tok we hem i givim blong mekem sayens i kam antap, oli givhan long ol yangfala blong kasem save long plante dip tingting. Plante yunivesiti oli presem hem. Be hem i no wantem se ol man oli leftemap hem. Hem i wan man we i strong long saed blong skul, mo hem i glad blong stap nomo long haos blong hem we i gat tri rum, wetem famle blong hem mo sam narafala we oli gat sem bilif olsem hem. Faraday i stap joen wetem wan grup we hem i kolem “wan smosmol grup blong Kristin we oli folem wan man, mo we ol man oli no laekem olgeta . . . oli kolem olgeta ol Sandemanian.” ?Hu ya ol man ya? ?Wanem bilif blong olgeta? ?Mo bilif blong olgeta i mekem wanem long Faraday?

Ol Sandemanian

Geoffrey Cantor, man we i raetem buk ya, Michael Faraday: Sandemanian and Scientist, i talem se: “Ol olfala bubu blong Michael Faraday nao oli mekem famle Faraday i joengud wetem jyos blong ol Sandemanian.” Ol bubu ya blong Faraday, oli stap joen wetem ol man blong wan prija we i stap mekem trep i go long ol narafala ples blong prij, mo i gat tingting we i defren long ol jyos long taem ya. Prija ya, ol fren blong hem oli leftemap bilif blong ol Sandemanian.

Robert Sandeman (1718-​1771) i wan studen long yunivesiti blong Edinbeg. Hem i stap stadi long saed blong matematik, Grik lanwis, mo sam narafala lanwis. Wan dei, hem i lesin long prija John Glass, we bifo i wan pasta blong Presbiterian. Samting we hem i harem i pusum hem blong finis long yunivesiti, gobak long ples blong hem long Pet, mo joen wetem Glass mo ol fren blong hem.

Long ol yia bitwin 1720 mo 1730, John Glass i stat blong no agri fulwan long sam tijing blong Jyos blong Skotlan. Stadi we hem i stap mekem long Tok blong God i lidim hem blong bilif se nesen blong Isrel long Baebol i pija blong wan nesen long saed blong speret, we ol man blong hem oli kamaot long plante kantri. Hem i no faenem long Baebol se ol wanwan nesen oli mas gat prapa jyos blong olgeta.

Glass i no moa bilif fulwan long jyos blong hem long Tiling, afsaed long Dandi, Skotlan. Taswe, hem i lego Jyos blong Skotlan mo i stanemap ol prapa miting blong hem. Samwe long wan handred man oli joen wetem hem. Mo long stat blong grup ya olgeta, evriwan oli harem se oli mas joengud tugeta. Oli mekem disisen blong folem oda blong Kraes long Matyu japta 18, vas 15 kasem 17, blong stretem ol rao we maet oli save kamaot bitwin long olgeta. Biaen, oli mekem miting evri wik. Long ol miting ya, olgeta we oli gat sem bilif, oli joen wanples blong prea mo blong kasem advaes.

Taem i gat plante man lelebet oli stap kam oltaem long ol miting ya long ol defren grup, oli nidim sam gudfala man blong lidim wosip blong olgeta. ?Be hu i naf blong mekem wok ya? John Glass mo ol fren blong hem oli tingtinggud long tok we aposol Pol i talem long saed blong bisnes ya. (1 Timote 3:​1-7; Taetas 1:​5-9) Oli no faenem tok long Baebol blong pusum olgeta blong stadi long yunivesiti mo blong kasem save long Hibru mo Grik lanwis. Taswe, afta we oli prea mo tingting dip long ol advaes blong Baebol, oli putumap sam man we oli nafgud, olsem ol elda. Olgeta we oli holemstrong long Jyos blong Skotlan oli ting se taem ol man we oli no skulgud, we oli “gruap blong wokem kaliko, somap, mo wokem garen” oli gyaman se oli kasem save long Baebol mo oli talemaot mesej blong hem long ol narafala, samting ya i olsem we “oli tok nogud long God.” Long 1733, Glass mo ol man blong hem oli bildim jyos haos blong olgeta long taon blong Pet. Nao ol lida blong skul long ples ya oli traem pusum ol jaj long kot blong ronemaot olgeta. Be oli no winim, mo grup ya i gru i kam bigwan.

Robert Sandeman i maredem fasbon gel blong Glass mo, taem hem i gat 26 yia, hem i kam wan elda long kongregesena blong Glasaet long Pet. Wok blong hem olsem wan elda i plante tumas, taswe hem i mekem disisen blong givim olgeta taem blong hem blong mekem wok blong lukaot long ol sipsip. Wan buk we i tokbaot laef blong man ya, i talem se biaen, afta we waef blong Robert i ded, hem “i glad blong mekem wok blong God long eniples we oli nidim hem.”

Bilif Blong Ol Sandemanian i Kasem Plante Ples

Sandeman i mekem wok blong hem i go moa, i kavremap Skotlan mo i go kasem Engglan. Long ples ya, sam nyufala grup blong ol man we oli gat sem bilif i stanap. Long taem ya, ol man blong Calvin long Engglan oli stap rao. Sam long olgeta oli bilif se God i makemaot olgeta finis blong i sevem olgeta. Be Sandeman i sapotem olgeta we oli talem se man i mas gat bilif blong God i sevem hem. Blong soemaot tingting ya, hem i raetem wan buk we oli prentem fo taem bakegen, mo tu, i kamaot long tu buk long Amerika. Geoffrey Cantor i talem se, buk ya “i bigfala samting we i leftemap grup blong ol [Sandemanian] i go antap, bitim tingting ya se hem i wan smol skul nomo we i kamaot long Skotlan.”

Long 1764, Sandeman mo ol narafala elda blong ol Glasaet, oli mekem wan trep i go long Amerika. Samting ya i mekem plante rao mo fasin agens i kamaot. Nating se i olsem, i mekem wan grup blong ol Kristin we oli gat sem tingting i stanap long Danbari, Konetikut.b Long ples ya, long 1771, Sandeman i ded.

Ol Bilif Blong Faraday

Yangfala Michael i kasem ol tijing blong Sandeman long papa mo mama blong hem. Hem i lanem se ol Sandemanian oli mas seraot long olgeta we oli no mekem samting we Baebol i tijim. Eksampel, oli no wantem joen long sevis blong mared blong ol Anglikan. Oli jusum blong mekem seremoni blong mared nomo we i folem loa.

Ol Sandemanian oli obei long gavman, be oli no joen long politik. Nating se ol manples blong olgeta oli respektem olgeta, oli no akseptem ol hae posisen. Wanwan blong olgeta oli akseptem hae posisen, be oli no joen long wan politik pati. From we oli stanap strong long saed ya, ol man oli tok nogud long olgeta. (Skelem wetem Jon 17:14.) Ol Sandemanian oli bilif se Kingdom blong God long heven, hemia nao gavman we i stretgud olgeta. Cantor i talem se, long tingting blong olgeta, politik i “wan rabis pleplei we i no impoten, mo i no gat wan gudfala fasin i joen wetem hem.”

Nating se oli seraot long ol narafala, oli no gat flas tingting olsem ol Farisi. Oli talem se: “Mifala i luk se i impoten tumas we mifala i no folem Tingting mo Fasin blong ol Farisi bifo. Olgeta oli ademap moa Sin mo Wok bitim wanem we Baebol i tokbaot. Mo oli mekem ol Loa blong God oli kam nating nomo from ol kastom blong man mo ol gyaman toktok blong olgeta.”

Oli folem fasin ya we Baebol i talem blong sakemaot eni memba blong grup blong olgeta we i dring tumas alkol, i stil, i slip olbaot, no i stap mekem wan narafala bigfala sin. Sipos man ya i rili tanem tingting blong hem, oli traem blong givhan long hem blong kam strong bakegen. Sipos no, oli folem oda ya blong Baebol blong “putumaot man ya we i stap mekem sin oltaem.”​—1 Korin 5:​5, 11, 13.

Ol Sandemanian oli obei long oda blong Baebol blong no tekem blad. (Ol Wok 15:29) John Glass i bin talem se ol man blong God oli mas obei long rul ya long saed blong blad. Rul ya i sem mak long hemia we God i givim long faswan man mo woman, se tufala i no mas kakae frut blong tri ya we i save mekem tufala i save ol fasin we i gud mo ol fasin we i nogud. (Jenesis 2:​16, 17) Man we i no obei long oda ya long saed blong blad, i olsem we hem i sakemaot stret fasin blong yusum blad blong Kraes, hemia blong kavremap sin. Glass i talem se: “Loa ya blong no kakae blad i bin stap olwe nomo, mo hem i stap yet olsem wan rul we i hae moa mo i impoten moa bitim ol narafala rul.”

Ol Sandemanian oli stadigud long Baebol. Samting ya i halpem olgeta blong blokem plante trap. Eksampel, long saed blong ol pleplei, oli lukluk long ol tijing blong Kraes olsem rod blong lidim olgeta. Oli talem se: “Yumi no save putumap ol Loa sipos Kraes i no putumap, mo yumi no save sakemaot wan Loa we hem i givim long yumi. From samting ya, yumi no save faenem ol tok blong talem se Pleplei, long pablik no long haos blong yumi, i tabu. Yumi save talem se eni Pleplei we i no joen wetem wan samting we i wan sin, i gud.”

Olsem nao, plante bilif blong ol Sandemanian oli stanap long Baebol. Nating se i olsem, oli no kasem save se i impoten tumas blong mekem wok we i makemaot ol Kristin, hemia se olgeta wanwan oli mas talemaot gud nyus blong Kingdom long ol narafala. (Matyu 24:14) Be, eni man i save kam joen long ol miting blong olgeta. Mo long ples ya, oli traehad blong eksplenem long ol man ol bilif we oli putum tingting blong olgeta i strong long olgeta.​—1 Pita 3:​15.

?Ol bilif ya oli mekem wanem long man blong sayens ya Michael Faraday?

Faraday i Wan Sandemanian

Nating se oli respektem, givim ona mo tinghae long Michael Faraday from ol nambawan samting we hem i faenemaot, hem i no stap laef long fasin we i flas. Taem ol man we oli gat haenem oli ded, mo ol man long hae posisen oli mas go long sevis blong berem olgeta, Faraday i no save go. Tingting blong hem bambae i jajem hem sipos hem i go joen long wan sevis blong Anglikan Jyos.

Long wok blong hem olsem wan man blong sayens, Faraday i holemstrong long ol samting we hem i save pruvum se oli tru. Taswe, hem i no kampani tumas wetem ol man blong hae save we oli leftemap prapa tingting blong olgeta mo we oli joen long ol rao. Wan taem, hem i talem long wan grup blong man se, ‘oltaem i gat samting blong pruvum ol stampa trutok blong sayens, taswe i no save mekem yumi harem nogud.’ Hem i talem se sayens i stanap long ‘ol samting we oli tru.’ Taem hem i klosem wan tok blong hem long saed blong ol samting raonabaot long yumi we God i wokem, Faraday i pulum ol man we oli lesin long hem blong tingbaot “Hemia we i wokem olgeta samting.” Ale hem i talem bakegen tok ya blong Kristin aposol Pol, se: “Yumi no save luk ol fasin ya blong Hem stret long ae blong yumi. Hem i God we i blong stap oltaem, mo paoa blong hem i no save finis. Be i stat long taem ya we God i mekem wol ya fastaem, i kam kasem naoia, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya, we hem i bin mekem.”​—Rom 1:​20, King James Version.

Samting we i mekem se Faraday i defren long plante narafala man blong sayens, hemia se hem i wantem tumas blong stadi long Buk blong God, mo tu long ol samting raonabaot long yumi we God i wokem. Cantor i talem se: “Tru long Sandemanian bilif blong hem, hem i faenemaot olsem wanem blong obei long ol loa blong God long saed blong ol fasin mo long promes blong laef we i no save finis. Tru long ol samting we hem i lanem long saed blong sayens, hem i kasem save long ol loa we God i yusum blong rul antap long skae mo wol.” Faraday i bilif se “sayens i no save daonem Baebol from we Baebol i hae olgeta mo i tru olgeta. Be sayens, sipos man i folem long trufala Kristin fasin, i save givim moa save long saed blong ol samting we God i wokem.”

Wetem tingtingdaon, Faraday i no akseptem ona we ol narafala oli wantem givim long hem. Plante taem, hem i talem se i no wantem we oli givim wan haenem long hem. Hem i wantem stap olsem ‘Masta Faraday’ nomo. Hem i givim plante taem blong hem blong mekem wok olsem wan elda, mo blong mekem trep stat long London i go long wan velej blong Nofok, blong lukaot long wan smol grup we oli gat sem bilif olsem hem.

Michael Faraday i ded long Ogis 25, 1867, mo oli berem hem long beregraon blong Haeget long not blong London. Man we i raetem store blong laef blong hem, John Thomas, i talem se Faraday “i livim long ol man we oli kam biaen long hem, bigfala save we hem i kasem long saed blong sayens, we i bitim save blong ol narafala man blong sayens. Mo ol samting we hem i faenemaot, oli jenisim bigwan fasin blong laef blong ol man.” Woman blong Faraday, Sarah, i raetem se: “Mi save poen i go nomo long Nyutesteman olsem advaes mo rul we hem i folem. Hem i bilif se Nyutesteman i Tok blong God . . . we i stret long ol Kristin tede olsem we i stret long ol Kristin long taem we oli raetem.” Hemia gudfala tok long saed blong nambawan man blong sayens we i folem strong bilif blong hem long laef blong hem.

[Ol futnot]

[Bokis blong pija long pej 29]

Olsem wan tija long Royal Institusen long Briten, Michael Faraday i tijim sayens long wan fasin we ol yangfala tu oli save kasem save long hem. Long ol advaes we hem i givim long ol man we oli stap tij wetem hem, hem i talem sam gudfala poen we ol Kristin tede we oli stap tij long fored blong ol narafala man oli save tingbaot.

◻ “Hem i no mas tok kwik mo hareap, we ol man oli no save kasem save long hem. Be hem i mas tok slou mo talemgud evri wod.”

◻ Wan man blong givim tok i mas traehad blong pulum ol man blong intres long samting we hem i stap tokbaot, “long stat blong tok blong hem. Mo sloslou, long fasin we ol man oli no luksave, hem i save go long ol wanwan poen, mo holem intres blong ol man go kasem we tok blong hem i finis.”

◻ “Wan man blong givim tok i no pulum ol man blong respektem hem taem hem i traehad blong mekem ol man oli klaphan, mo i talem ol gudfala toktok blong leftemap hem.”

◻ Hem i tokbaot fasin blong yusum ol not, se: “Oltaem mi mas . . . raetemdaon ol [bigfala poen] blong tok blong mi long wan pepa, mo taem mi tingbaot ol bigfala poen ya bakegen, maet from we mi joenem olgeta wetem wan tingting blong mi no long wan narafala rod, mi save faenem ol prapa tok blong mi blong talemaot olgeta. . . . Mi raetem ol bigbigfala stampa tok mo ol smosmol wan long stret oda, mo mi yusum plan ya blong wokem ol narafala toktok blong mi.”

[Foto Credit Line blong pija long pej 26]

Both pictures: By courtesy of the Royal Institution