Oli Mekem Samting We Jeova i Wantem

Pita i Prij Long Pentekos

HEM i wan naesfala moning long taem we ol tri oli stap putum flaoa, long yia 33 K.T.a !Ples i fulap long toktok blong ol hapi man! Plante man Jyu mo man blong ol narafala nesen we oli joen long skul blong ol man Jyu, oli fasfas nomo long ol rod blong Jerusalem. Ol man ya oli kam long ol ples olbaot, olsem Elam, Mesopotamia, Kapadosia, Ijip, mo Rom. !Hem i nambawan tumas blong luk ol man ya we oli werem kastom klos blong olgeta, mo oli toktok long ol defdefren lanwis! Samfala oli bin wokbaot kolosap tu taosen kilomita blong kam long spesel taem ya. ?Wanem spesel samting ya? Pentekos​—wan bigfala lafet blong ol man Jyu we i fulap long glad, mo i makem se taem blong hivimap sid ya bali i finis.​—Levitikas 23:15-​21.

Smok i kamaot long ol sakrifaes we ol man oli mekem long olta blong haos prea, mo ol Livaet oli singsing long ol sing blong Halel (Ol Sam 113 kasem 118). Jes bifo 9 klok long moning, wan narakaen samting i hapen. Wan “noes i kamaot long skae, we i olsem wan bigfala win i blu.” Win ya i fulumap haos ya we ol 120 disaepol blong Jisas Kraes oli stap hivap long hem. Baebol i talem se: ‘Olgeta ya oli luk wan samting we i olsem faea i laet. Faea ya i seraot, nao laet blong hem i kam kasem evri man. Mo olgeta evriwan, tabu speret i kam fulap long olgeta, nao oli stat toktok long ol lanwis blong ol narafala man, olsem we speret ya i givim paoa long olgeta blong oli save toktok olsem.’​—Ol Wok 2:​1-4.

Ol Wanwan Man Oli Harem Prapa Lanwis Blong Olgeta

I no longtaem biaen, plante disaepol oli stap kamaot long haos ya. !Oli sapraes bigwan se oli naf blong toktok long prapa lanwis blong ol wanwan man we oli stap olbaot! Tingbaot olsem wanem we man Pesia mo man Ijip i sapraes taem i harem wan man Galili i toktok long prapa lanwis blong hem. I klia se, ol man ya oli rili sapraes bigwan. Oli askem se: “!Ei olgeta! ?Wanem samting ya?” Samfala oli stat jikim ol disaepol ya se: “A, ol man ya oli drong ya.”​—Ol Wok 2:​12, 13.

Nao aposol Pita i stanap mo i toktok long ol man ya. Hem i eksplenem se merikel ya blong toktok long defren lanwis, i kamaot folem promes we God i mekem tru long profet Joel, se: ‘Bambae mi mi givim speret blong mi long olgeta man.’ (Ol Wok 2:​14-​21; Joel 2:​28-​32) Yes, God i jes bin sanem tabu speret blong hem i kamdaon long ol disaepol blong Jisas. Hemia i soemaot klia se Jisas i laef bakegen finis long ded, mo naoia hem i stap sidaon long raethan blong God long heven. Pita i talem se: “From samting ya, yumi man Isrel evriwan, yumi mas savegud se i tru we God i tekem Jisas ya we bifo yufala i nilim hem long [pos], nao hem i mekem hem i Masta blong yumi, mo i Mesaea tu.”​—Ol Wok 2:​22-​36.

?Ol man we oli lesin long ol tok ya oli mekem wanem? Baebol i talem se: “Oli harem we i stikim olgeta tumas. Nao oli askem long Pita mo ol narafala aposol, oli se ‘Ol brata. ?Bambae mifala i mekem olsem wanem?’ ” Pita i ansa se: “Yufala i mas tanem tingting blong yufala from ol sin blong yufala, mo yufala evriwan i mas baptaes.” !Samwe 3,000 man oli mekem samting ya! Stat long taem ya, oli stap “lesin long ol tok ya we ol aposol oli stap tijim olgeta long hem.”​—Ol Wok 2:​37-​42.

Taem Pita i girap mo i toktok long impoten taem ya, hem i yusum faswan ‘ki blong kingdom blong heven’ we Jisas i bin promes blong givim long hem. (Matyu 16:19) Ol ki ya oli openem rod long ol defren grup blong man blong kasem sam spesel blesing. Faswan ki ya i openem rod long ol man Jyu blong kam ol Kristin we tabu speret i makemaot olgeta. Biaen, namba tu mo namba tri ki, oli mekem rod i open blong ol man Sameria mo ol hiten man oli save kasem blesing ya tu.​—Ol Wok 8:​14-​17; 10:44-​48.

Ol Samting We Yumi Lanem

Nating se kampani blong ol man Jyu ya mo ol man blong ol nesen we oli joen long skul blong ol man Jyu, oli gat fol from ded blong Pikinini blong God, be Pita i toktok long olgeta wetem respek, i singaotem olgeta se “ol brata.” (Ol Wok 2:​29) Hem i wantem pulum ol man ya blong oli tanem tingting blong olgeta from sin blong olgeta, hem i no traem blong jajem olgeta. Taswe, hem i yusum ol gudfala toktok we i leftemap tingting. Hem i talem trutok, mo i yusum Baebol blong sapotem ol tok blong hem.

I gud sipos olgeta we oli stap talemaot gud nyus tede, oli traehad blong folem eksampel blong Pita. Oli mas traem tokbaot samting we man i intres long hem, mo biaen, long waes fasin, oli save mekem hem i tingtinggud long ol vas blong Baebol. Taem oli talemaot trutok blong Baebol long fasin we i leftemap tingting blong wan man, ale, sipos hat blong man ya i stret, bambae hem i lesin.​—Ol Wok 13:48.

Fasin blong Pita blong glad blong toktok mo strongfala tingting we hem i soemaot long dei blong Pentekos, oli defren olgeta long fasin we hem i gat seven wik bifo, taem hem i gyaman se hem i no save Jisas. Long taem ya, Pita i lusum gudfala tingting blong hem from we hem i fraet tumas long ol man. (Matyu 26:69-​75) Be, Jisas i prea long God blong i fogivim Pita. (Luk 22:31, 32) I klia se, taem Jisas i laef bakegen long ded nao i kamtru long Pita, samting ya i mekem Pita i kam strong moa. (1 Korin 15:5) From samting ya, bilif blong Pita i no foldaon. Smoltaem biaen, hem i gohed strong long wok blong prij. Yes, hem i no jes prij long Pentekos nomo, be long ful laef blong hem biaen.

?Olsem wanem sipos yumi bin mekem wan mastik, olsem we Pita i mekem? I gud yumi soemaot se yumi tanem tingting blong yumi from sin ya, prea blong askem God blong i fogivim yumi, mo tekem aksin blong kasem help long saed blong speret. (Jemes 5:​14-​16) Nao yumi save gohed wetem strong tingting, se gudfala Papa blong yumi long heven, Jeova, we i gat sore, i agri long tabu wok we yumi mekem.​—Eksodas 34:6.

[Futnot]