?Ol Drim Oli Save Soemaot Fyuja?

I STAT bifo i kam, ol man oli intres tumas long ol drim. Ol man Ijip oli raetem ol buk we oli givim plante save long fasin blong talem mining blong ol drim, mo ol man Babilon oli gat ol spesel man blong talem mining blong ol drim. Kastom blong ol man Gris se, oli putum ol sikman long ol haos wosip blong Eskulapias, blong oli kasem drim we i soem rod blong winim sik blong olgeta. Afta long yia 100 Kristin Taem, Atemidoras i raetem wan buk we i givim mining blong ol saen we man i save luk long ol drim blong hem. Stat long taem ya, ol man oli raetem plante narafala buk we oli stanap long buk blong hem. Kam kasem naoia, oli stap traehad blong talem mining blong ol drim. ?Be ol drim oli rili soemaot ol samting we bambae oli hapen long fyuja?

Blong soemaot fyuja, i mas gat wan paoa we i hae moa long yumi, i stap givim ol drim. Long Baebol, i gat plante eksampel we oli soem se God i stampa blong wan paoa olsem. Hem i givim ol drim we oli soemaot fyuja, long ol man blong hem, mo tu, long samfala we oli no wosip long hem. Job 33:14-​16 i talem se: “God i toktok . . . long wan drim, wan vison long naet, taem ol man oli slip ded, oli stap slip long bed blong olgeta. Hemia nao taem we hem i openem sora blong ol man.”

God i mekem samting ya long Fero blong Ijip long taem blong Josef, hemia bitim 1,700 yia bifo long Kristin Taem. Yumi faenem drim ya blong Fero long Jenesis 41:​1-7. Long vas 25 kasem 32, Josef i talemaot mining blong drim ya se bambae “i gat plante kakae long Ijip” blong seven yia, mo biaen, bambae kakae i sot blong seven yia. Josef i eksplenem long Fero se: “God i stap soemaot ol samting ya long yu we bambae hem i mekem.” (Jenesis 41:28) Drim ya i olsem wan profet tok we i kamaot tru biaen.

Sem samting i hapen long wan strongfala king blong Babilon. Nebukadnesa i kasem wan drim we i mekem se hem i wari we i wari, be hem i no save rimemba drim ya. Ale, hem i singaot ol kleva blong oli talem drim ya mo mining blong hem. Ol kleva oli no naf blong mekem samting ya we king i askem.​—Daniel 2:​1-​11.

From we God i givim drim ya long king, Hem i givhan long profet Daniel blong talemaot drim ya mo mining blong hem. Daniel 2:​19 i talem se: “Nao, long wan vison blong naet, God i soemaot long hem samting we i haed.” Daniel i givim olgeta ona i go long God from drim ya. Hem i talem se: “Samting we i haed we king i askem, ol waes man, ol kleva, ol pris we oli mekem majik, mo ol man blong talemaot fyuja from ol sta, oli no save soemaot long king. Be, i gat wan God i stap long heven, we hem i Man blong soemaot ol samting we oli haed. Hem nao i mekem King Nebukadnesa i save ol samting we bambae oli kamaot long ol laswan dei.”​—Daniel 2:​27, 28.

Samtaem God i yusum ol drim blong talem ol tok blong hem long ol man blong hem, mo samtaem blong soem long olgeta se hem i glad long olgeta, no blong halpem olgeta blong luksave olsem wanem hem i stap givhan long olgeta. Long saed blong Jekob, God i givim wan drim long hem blong soemaot se hem i agri long hem.​—Jenesis 48:​3, 4.

Taem Josef, papa blong Jisas long wol ya, i faenemaot se Meri i gat bel, hem i wantem mekem divos long hem. Be hem i kasem wan drim we i talem se hem i no mas mekem olsem. Matyu 1:​20 i talem se: “Taem we hem i stap tingbaot blong mekem olsem, wan enjel blong Hae God i kamtru long hem, long wan drim blong hem, long naet. Nao enjel ya i talem long hem, i se ‘Josef, yu laen blong Deved, yu no fraet blong tekem woman ya Meri, blong i woman blong yu. ‘From we Tabu Speret i givim pikinini ya long hem.’ ” Biaen, hem i kasem wan drim we i givim woning ya: “Wan enjel blong Hae God i kamtru long Josef long wan drim blong hem, i talem long hem se ‘Yu girap, yu tekem pikinini ya wetem mama blong hem, yufala i ronwe i go long Ijip.’ ”​—Matyu 2:​13.

Ol Drim We Oli No Kamaot Long God

Plante man we oli no man blong God oli folem fasin ya blong putum mining long ol drim. Samting ya i soem se i no stret blong bilif se ol drim oli soemaot fyuja. Long taem blong profet blong God, Jeremaea, ol gyaman profet oli stap talem se: “!Mi bin kasem wan drim! !Mi bin kasem wan drim!” (Jeremaea 23:25) Plan blong olgeta i blong pulum ol man blong tingting se God i stap yusum olgeta blong talemaot ol tok blong hem. God i pusum Jeremaea blong talem long saed blong ol man ya blong drim se: “Hemia tok we Jeova blong ol ami, God blong Isrel, i talem: ‘Yufala i no letem ol profet we oli stap long medel blong yufala, mo olgeta we oli stap yusum paoa blong ol rabis speret blong talemaot fyuja, oli gyaman long yufala, mo yufala i no lesin long ol drim we oli stap kasem. From we “oli stap gyaman nomo taem oli stap talem profet tok long nem blong mi . . . ,” hemia tok blong Jeova.’ ”​—Jeremaea 29:​8, 9.

From we ol gyaman profet ya oli “stap yusum paoa blong ol rabis speret blong talemaot fyuja,” maet ol rabis speret nao oli kontrolem ol drim blong olgeta, blong oli save gyaman long ol man. Sekaraea 10:2 i soemaot samting ya, i se: “Ol aedol oli talemaot ol tok we i narakaen. Mo ol man we oli yusum paoa blong rabis speret blong talemaot fyuja, oli kasem ol drim we oli gyaman nomo, mo oli stap talemaot ol drim we oli blong nating nomo.”

Devel Setan i jif blong ol man blong gyaman. Plante taosen yia finis hem i yusum ol lida blong skul, blong gyaman se God i stap toktok long olgeta long ol vison mo drim. Hemia i sem mak olsem ol tok blong ol gyaman profet long taem blong Jeremaea mo Sekaraea. Long saed blong ol man ya, tabu speret i pusum Jud blong raetem wan haf blong Baebol i go long ol Kristin long faswan handred yia, se: “Sam man oli kam insaed long kampani blong yufala. Longtaem finis, Baebol i talemaot jajmen blong ol man ya. Oli no ona long God, mo oli yusum gladhat blong God blong yumi olsem eskyus blong olgeta blong mekem ol rabis fasin blong olgeta. Mo oli tanem baksaed long Masta blong yumi, we yumi blong hem nomo, Jisas Kraes.” Hem i talem se ol man ya “oli stap luk ol drim.”​—Jud 4, 8.

Pruvum Ol Tok Blong Olgeta

Maet wan man i talem se God i toktok long hem long wan drim, no se ol drim blong hem long saed blong fyuja oli kamtru. Nating se hem i talem olsem, hemia i no wan gudfala risen blong bilif long hem no blong folem hem. Makemgud tok we i go long ol man Isrel, long Dutronome 13:​1-3, 5: “Sipos wan profet no wan man blong drim i girap long medel blong yufala mo i mekem wan saen no merikel blong talemaot fyuja, nao saen no merikel ya i kamtru, mo hem i bin talem se: ‘Yufala i kam, yumi folem ol narafala god, we yufala i no save olgeta bifo, mo yumi wosip long olgeta,’ ale yufala i no lesin long profet ya no man ya we i drim . . . Mo profet ya no man ya blong drim, yufala i mas kilim hem i ded.” God i letem ol man olsem oli gyaman, blong oli traem fasin blong ol man blong hem blong fasgud long hem.

Yumi no mas kwik blong bilivim ol man ya blong drim we oli gat paoa blong pulum filing blong man. Fastaem, i waes blong faenem pruf blong ol tok blong olgeta. Olsem nao, bambae yumi no go krangke folem speret man ya we i jif blong ol man blong gyaman, mo we “i gyaman long olgeta man long wol finis.” (Revelesen 12:9) ?Be olsem wanem blong faenem pruf long saed blong ol man ya?

God i givim Tok blong hem Baebol, blong i lidim yumi blong faenemaot trutok. Long saed blong Tok ya blong God, Jisas Kraes i talem se: “Tok blong yu, hemia trutok ya.” (Jon 17:17) Ale, long 1 Jon 4⁠:​1, yumi kasem advaes ya se: “Ol fren. I gat plante profet we oli stap talem se ‘Speret blong God i stap long mi,’ be i nogud yufala i stap bilif long olgeta evriwan. Yufala i mas traem olgeta blong haremsave se speret we i stap long olgeta i kamaot long God, no i no olsem, from we i gat plante gyaman profet oli stap go olbaot long wol.” Taem yumi skelemgud ol man ya wetem Baebol, bambae yumi faenemaot se ol samting we oli talem, ol waes tok mo fasin blong olgeta oli no laenap nating wetem Baebol. Tok blong God nao i save talem sipos wan samting i tru no i no tru.

?Ol man ya blong drim we oli talem se oli gat spesel save, oli stap yusum paoa blong ol rabis speret no wan narafala wok we i joen wetem ol rabis speret? Sipos yes, Tok blong God i agensem fasin ya. “Long laen blong yu bambae i no mas gat wan man . . . blong talemaot ol samting we oli stap haed, no man blong mekem majik, no man blong lukaot ol saen, no man blong mekem posen, no man we i stap wokem nakaemas long narafala man, no man we i go luk kleva, no man we i stap soemaot ol samting we bambae oli save kamtru, no man we i wantem toktok wetem ol dedman. From we long tingting blong Jeova, ol man we oli stap mekem ol samting ya oli rabis nomo.”​—Dutronome 18:10-​12.

Sipos man ya i talem se hem i gat wan sol we i no save ded, hem i stap agensem Tok blong God we i talem klia se: “Sol we i mekem sin​—⁠hem bambae i ded.” (Esikel 18:4) ?Olsem wanem? ?Hem i wan man we i stap leftemap hem wan antap long ol narafala mo i stap pulum ol man blong folem hem? Matyu 23:12 i givim woning ya se: “Man we hem nomo i leftemap hem blong i kam haeman, bambae God i mekem hem i stap daon.” Mo Ol Wok 20:30 i givim woning long ol Kristin se: “Sam man blong yufala bambae oli save girap, oli gyaman nomo blong lidim ol man blong Jisas oli biaen long olgeta, oli go krangke.”

?Man ya, hem i sapotem ol raf fasin? Jemes 3:​17, 18 i no agri long man olsem: “Fasin blong man we i kasem waes long heven, hem i narafala. Nambawan samting blong hem, laef blong hem i klin gud. Hem i man blong pis, i kwaet man, i man blong joen gud long narafala man, mo i man we i gat sore. Waes blong man ya i gat plante gudfala frut long laef blong hem. Man ya i no save jajem man long fasin we i no stret, mo hem i no gat tu tingting. Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.” ?Hem i lukaot haenem long politik no i wantem kasem bigfala paoa long wol? Tok blong God i agensem strong wan man olsem se: “Man we i stap folem ol fasin blong wol, olsem we i mekem fren wetem olgeta, wantaem nomo hem i mekem badfren long God.” Taswe, Baebol i soemaot klia ol samting we oli gyaman.​—Jemes 4:4.

Sipos wan man i drim se wan memba blong famle no wan fren blong hem i ded, maet hemia from we hem i stap wari tumas long man ya. Sipos hem i ded long sem naet we man ya i drim se hem i ded, samting ya i no pruvum se drim ya i talemaot fyuja. Maet i luk olsem se drim ya i tru, be long semtaem, i gat plante handred drim we oli no kamtru.

Bifo, God i yusum ol drim blong soemaot ol samting we bambae oli hapen long fyuja, mo blong givim ol toktok long ol man taem oli stap raetem Baebol. Be naoia, hem i no moa nidim blong yusum ol drim. Long Baebol, yumi faenem ol toktok blong God we yumi nidim long taem blong yumi, mo ol profet tok blong hem long saed blong ol samting we bambae oli kamtru bitim wan taosen yia long fyuja. (2 Timote 3:​16, 17) Taswe, yumi save nao se taem yumi drim, hemia i no min se God i stap soemaot ol samting we bambae oli kamaot long fyuja, be hem i wan impoten wok blong bren blong mekem se tingting blong yumi i stap wokgud oltaem.

[Tok blong pija long pej 7]

Drim blong Fero i soem samting we i kamtru biaen. Long sem fasin, Tok blong God i givim save long saed blong fyuja