I Stret We Yumi Drim

?YU YU drim samtaem? Yu save ansa yes, from we yumi evriwan i drim taem yumi stap slip, nating sipos yumi talem se yumi neva drim. Ating bitim 95 pesen blong ol drim blong yumi, yumi no moa rimemba. ?Yu yu rimemba weswan? Kolosap oltaem, ol drim we yumi rimemba, hemia ol drim we yumi kasem jes bifo we yumi wekap.

Ol man blong stadi long ol drim, oli faenemaot se slip i stap jenis taem ol haoa oli pas. Long ol faswan haoa we man i slip, hem i slip ded, nao afta, hem i no moa slip ded. Long taem ya we man i slip mo ae blong hem i stap muvmuf, hem i drim moa. Oli kolem taem ya REM (rapid eye movement). Afta long taem ya, ae i no moa muvmuf blong kolosap 90 menet. Biaen ae i muvmuf bakegen. Ol jenis ya oli save gohed faef no sikis taem long wan naet, wetem laswan jes bifo we hem i wekap.

I rong blong ting se bren blong yu i no stap wok tumas taem yu slip. Ol man blong stadi oli faenem se, taem yumi drim, bren blong yumi i wok moa bitim sam haf blong dei we yumi wekap. Nomo, se sam smosmol string we oli stap pasem signal i go long bren, oli wok moa long dei. Ol string ya, oli joen wetem fasin blong yumi blong tingting longtaem long wan samting, mo blong rimemba. I luk olsem se oli spel taem yumi slip we ae blong yumi i muvmuf. Be ol narafala smosmol string long bren, oli stap gohed blong pasem mesej i go long wanwan blong olgeta.

Bren blong yumi i rili samting blong sapraes, mo man i no naf blong kasem save fulwan long hem. Plante bilyan haf blong hem oli stap pasem samwe long wan handred kasem tu no tri handred signal long wan seken. Ol haf insaed long bren blong man, oli plante moa bitim namba blong ol man long wol. Sam man blong mekem dip stadi oli talem se maet bren blong man i gat 20 bilyan kasem 50 bilyan haf blong hem. Fasin ya we man i no naf blong kasem save long bren blong yumi, i agri long tok blong man ya blong raetem haf blong Baebol, Deved. Hem i talem se: “Yu yu hae tumas, i stret blong man i bodaon long yu i ona long yu, mo mi mi presem yu from. Olgeta samting we yu yu mekem oli narafala mo oli nambawan tu. Mi mi save we mi savegud samting ya.”​—Ol Sam 139:14.

Ol Drim

Taem we yumi no slip, fasin blong yumi blong lukluk, harem, smelem, testem mo filim ol samting, oli stap givim ol save mo pija long bren blong yumi. Be taem yumi slip, samting ya i no hapen. Long taem ya, bren hem wan i wokem ol pija blong hem, be ol faefala samting oli no givim save long hem. Hemia nao from wanem samtaem yumi luk mo mekem ol krangke samting long ol drim. Taswe, yumi save mekem ol samting we yumi no naf blong mekem, olsem Pita Pan we hem i flae, no maet yumi foldaon long wan klif be yumi no kasem kil. Maet ol samting we oli hapen longtaem finis, yumi luk olsem we oli stap hapen naoia nomo. No sipos yumi stap traem blong ronwe, i luk olsem we yumi no save muvum bodi blong yumi​—⁠yumi traem blong muvum ol leg blong yumi be oli no save muf. I tru, ol wari mo ol samting we oli hapen long yumi taem we yumi no slip, oli save kamaot long ol drim blong yumi. Plante man we oli bin luk ol nogud samting we oli hapen long ol bigfala faet, oli no save fogetem olgeta kwiktaem. Samfala oli no save fogetem filing we oli kasem taem wan man blong brekem loa i bin kilim no mekem nogud long olgeta. Ol rabis samting ya we oli hapen long yumi taem yumi no slip, oli save kamaot bakegen long ol drim blong yumi, mo oli save mekem yumi fraet tumas. Mo tu, ol smosmol samting we yumi stap tingbaot taem yumi go slip, oli save kamaot bakegen long ol drim.

Samtaem, taem yumi stap traem blong winim wan problem, rod blong stretem problem ya i save kasem yumi taem yumi stap slip. Samting ya i soem se man i no stap drim oltaem long slip blong hem. Samtaem, hem i tingting tu.

Wan buk we i tokbaot ol drim mo bren blong yumi, i talem se: “Bigfala samting we bren i mekem taem yumi slip, i no drim, be tingting. Taem yumi stap tingting long slip blong yumi, tingting blong yumi i no joen wetem ol samting we yumi luk, harem, smelem, testem mo filim. Mo ol samting we yumi tingbaot oli no narakaen. Ol samting we yumi stap tingbaot oltaem, oli save kambak long tingting bakegen. Olsem ol samting we oli bin hapen yestede no we bambae oli hapen tumora. Mo plante taem, ol samting ya oli no impoten tumas, oli no pulum intres blong yumi, mo yumi stap luk sem samting bakegen mo bakegen.”

Samfala oli ting se ol drim oli givim spesel mesej long olgeta. Blong eksplenem mining blong ol drim ya, oli putum wan buk i stap kolosap long bed blong olgeta. Nao taem oli wekap oli save raetemdaon drim we oli bin kasem. Long saed blong ol buk we oli traem talem mining blong ol drim, buk ya The Dream Game we Ann Faraday i raetem, i talem se: “Ol buk we yu yusum blong faenemaot mining blong ol samting we yu luk long ol drim, oli blong nating nomo, nating se oli folem ol tingting blong bifo, no oli stanap long tingting blong ol man we oli stadi long bren blong man tede.”

From we i luk olsem se bren nao i stampa blong ol drim, i no stret blong ting se ol drim oli talemaot wan spesel mesej long yumi. Yumi mas tingbaot olgeta olsem wan wok we bren i mekem, we i givhan long hem blong stap gud oltaem.

?Be olsem wanem long ol man we oli talem se oli drim se wan famle no fren blong olgeta i ded, nao long nekis dei, oli faenem se man ya i ded? Samting ya i soemaot se ol drim oli save talemaot fyuja, ?no? Long haf we i kam biaen, bambae yumi tokbaot stampa blong ol drim we oli talemaot samting we bambae i kam.