Seremaot Ol Gudfala Samting We Jeova i Givim Blong Mekem Man i Haremgud
“Tingting blong mifala long yufala i stap strong yet. Mifala i save finis se, yufala i kasem plante hadtaem olsem mifala. Nao long sem fasin, bambae yufala i save serem samting blong mekem yufala i haremgud olsem mifala.”—2 KORIN 1:7, NW.
1, 2. ?Wanem tingting blong plante man we oli jes kam Kristin i no longtaem i pas?
PLANTE man we oli ridim ol Wajtaoa, oli no bin gruap wetem save long saed blong trutok blong God. Ating samting ya i tru long saed blong yu tu. Sipos yes, tingbaot filing blong yu taem yu stat blong luksave trutok blong God. Eksampel, taem yu kasem save se ol dedman oli no stap safa be oli stap slip nomo, ating tingting blong yu i no moa trabol. Mo taem yu kasem save long hop blong ol dedman, se plante bilyan man bambae oli laef bakegen long nyufala wol blong God, ating yu haremgud.—Eklesiastis 9:5, 10; Jon 5:28, 29.
2 ?Olsem wanem long promes blong God blong finisim olgeta rabis fasin mo blong jenisim wol ya i kam wan paradaes? Taem yu lanem samting ya, ating yu yu haremgud mo yu wantem tumas blong luk samting ya, ?i tru no? ?Wanem filing blong yu taem yu lanem fastaem se i gat rod blong man i neva ded samtaem, be blong stap laef gogo Paradaes i kamtru long wol ya? I sua se yu yu glad tumas. Yes, long taem ya, yu yu kasem gudfala mesej blong God we i mekem man i haremgud, we naoia ol Wetnes blong Jeova oli stap talemaot long olgeta ples blong wol.—Ol Sam 37:9-11, 29; Jon 11:26; Revelesen 21:3-5.
3. ?From wanem olgeta ya we oli stap serem gudfala mesej blong God we i mekem man i haremgud, oli kasem trabol tu?
3 Be, ating taem yu traem serem mesej blong Baebol wetem ol narafala, yu luksave se “i no olgeta man evriwan we oli bilif.” (2 Tesalonaeka 3:2) Maet samfala we oli fren blong yu bifo, oli jikim yu from we yu soemaot se yu bilif long ol promes blong Baebol. Mo tu, maet oli agensem yu from we yu gohed blong stadi Baebol mo joen wetem ol Wetnes blong Jeova. Ating fasin agens ya i kam antap moa taem yu stat jenisim sam samting blong mekem laef blong yu i laenap wetem ol rul blong Baebol. Yu stat blong kasem trabol we Setan mo wol blong hem oli mekem long olgeta man we oli bilif long samting we God i givim blong mekem man i haremgud.
4. ?Wanem samting we maet ol nyuwan we oli soemaot intres long trutok oli save mekem taem oli kasem trabol?
4 Sore tumas, olsem Jisas i bin talemaot, ol trabol ya i mekem samfala oli foldaon, mo oli no moa joen wetem Kristin kongregesen. (Matyu 13:5, 6, 20, 21) Sam narafala oli stanap strong tru long ol trabol, from we oli putum tingting blong olgeta i stap strong long ol gudfala promes we oli stap lanem, ol promes we i mekem olgeta oli haremgud. Biaen, oli givim laef blong olgeta long Jeova mo tekem baptaes olsem ol disaepol blong Pikinini blong hem, Jisas Kraes. (Matyu 28:19, 20; Mak 8:34) Tru tumas, ol trabol oli no stop taem wan Kristin i baptaes finis. Eksampel, wan man we bifo hem i mekem rabis fasin long saed blong seks, maet hem i mas faet strong blong folem oltaem ol fasin we oli klingud. Sam narafala oli stap fesem fasin agens oltaem from ol famle blong olgeta. Nomata wanem trabol i kamaot, olgeta evriwan we oli gohed strong blong givim ful laef blong olgeta long God, oli save sua long wan samting. Long prapa laef blong olgeta wanwan, bambae oli haremsave se God i stap halpem olgeta mo mekem olgeta oli haremgud.
‘God Ya We i Stampa Blong Olgeta Fasin Blong Haremgud’
5. ?Antap long ol traem we Pol i kasem, hem i kasem wanem bakegen?
5 Wan man we i rili gat tangkyu long God from fasin blong hem blong mekem man i haremgud, hemia aposol Pol. Afta we hem i bin kasem hadtaem long Esia mo Masedonia, hem i haremgud taem hem i kasem nyus se kongregesen blong Korin i lesin long ol tok blong stretem olgeta long leta blong hem. Samting ya i pusum hem blong raetem wan narafala leta, we i gat tok ya long hem blong presem God se: “I gud yumi stap talem tangkyu long God ya we i God mo Papa blong Jisas Kraes, Masta blong yumi. Hem i Papa blong ol kaengud filing, hem i God ya we i stampa blong olgeta fasin blong mekem man i haremgud. Hem i stap givhan long mifala long olgeta trabol blong mifala, blong mekem mifala i haremgud.”—2 Korin 1:3, 4, NW.
6. ?Yumi lanem wanem from tok blong Pol long 2 Korin 1:3, 4?
6 Ol tok ya we oli kamaot long God, oli gat bigfala mining. I gud yumi stadi long ol tok ya. Taem Pol i presem mo i talem tangkyu long God, mo taem hem i askem wan samting long God long ol leta blong hem, plante taem yumi faenem se hem i soemaot tangkyu long Jisas tu, we hem i Hed blong Kristin kongregesen. (Rom 1:8; 7:25; Efesas 1:3; Hibrus 13:20, 21) Taswe, Pol i talem tok ya blong presem “God ya we i God mo Papa blong Jisas Kraes, Masta blong yumi.” Biaen, hem i yusum wan Grik tok, we hem i no yusum bifo long ol leta blong hem, mining blong tok ya se “ol kaengud filing.” Tok ya i kamaot long wan wod we man i yusum blong talemaot sore we hem i gat long narafala we i stap safa. Taswe, Pol i tokbaot filing blong sore we God i gat long olgeta man blong Hem we oli stap harem nogud long trabol. Hemia ol gudfala filing we oli pusum God blong mekem wan samting blong soemaot sore long olgeta. Laswan samting se, Pol i lukluk i go long Jeova olsem stampa blong gudfala fasin ya, taem hem i talem se hem i “Papa blong ol kaengud filing.”
7. ?From wanem yumi save talem se Jeova hem i “God ya we i stampa blong olgeta fasin blong mekem man i haremgud”?
7 “Ol kaengud filing” blong God oli mekem man we i safa from ol trabol, i haremgud. Taswe, Pol i gohed blong tokbaot Jeova se “God ya we i stampa blong olgeta fasin blong mekem man i haremgud.” From samting ya, olgeta samting we ol narafala brata mo sista oli mekem wetem kaen fasin blong givhan long yumi blong haremgud, yumi save talem se Jeova nao i stampa blong ol samting ya. I no gat wan samting we i save mekem man i haremgud blong longtaem, we i no kamaot long God. Mo tu, hem i wokem man olsem wan pija blong hem, taswe yumi naf blong mekem narafala i haremgud. Tabu speret blong God nao i pusum ol man blong hem blong soemaot kaengud filing long olgeta we oli nidim blong haremgud bakegen.
Kasem Trening Blong Mekem Man i Haremgud
8. Nating se God i no stampa blong ol traem we yumi kasem, ?olsem wanem fasin blong stanap strong tru long ol traem ya i save givhan long yumi?
8 I tru se, Jeova God i stap letem ol defdefren kaen traem oli kasem ol man blong hem, be neva yumi save talem se hem i stampa blong ol traem ya. (Jemes 1:13) Rod we hem i yusum blong mekem yumi haremgud taem yumi stap gotru long ol trabol, i save tijim yumi blong luksave help we narafala i nidim. ?Wanem risal blong samting ya? “Nao taem ol narafala man oli gat trabol, mifala i save givhan long olgeta, blong mekem olgeta oli harem gud long sem fasin, from we God i givhan finis long mifala.” (2 Korin 1:4) Taswe, Jeova i stap tijim yumi blong kamgud moa long fasin blong serem ol samting we hem i givim blong mekem yumi haremgud, wetem ol Kristin brata mo sista blong yumi, mo wetem ol man we yumi mitim olgeta long wok blong prij. Olsem nao, yumi stap folem fasin blong Kraes blong “leftemap tingting blong olgeta we oli stap krae.”—Aesea 61:2; Matyu 5:4.
9. (a) ?Wanem samting i save halpem yumi blong stanap strong tru long ol hadtaem? (b) ?Olsem wanem yumi mekem ol narafala oli haremgud taem yumi stanap strong tru long ol trabol?
9 Pol i stanap strong tru long plante trabol from ol gudfala samting we God i givim tru long Kraes, blong mekem hem i haremgud. (2 Korin 1:5) Yumi save haremgud bigwan tu taem yumi tingting dip long ol nambawan promes blong God, taem yumi prea long hem blong i givhan long yumi wetem tabu speret blong hem, mo taem yumi kasem ansa long ol prea blong yumi. Long rod ya, bambae yumi strong moa, we yumi naf blong gohed blong sapotem hae rul blong Jeova, mo blong pruvum se Setan i wan man blong gyaman nomo. (Job 2:4; Proveb 27:11) Taem yumi stanap strong tru long wan trabol, yumi mas mekem olsem Pol, we i presem Jeova from. Hem nao i mekem ol Kristin oli haremgud we oli naf blong stap strong tru long ol traem. Fasin blong ol trufala Kristin blong stanap strong long taem blong trabol, i save mekem fulwan kampani blong ol brata i haremgud, mo i givim paoa long plante narafala blong ‘stanap strong tru long ol hadtaem.’—2 Korin 1:6.
10, 11. (a) ?Wanem sam samting we oli mekem kongregesen blong Korin bifo, i harem nogud? (b) ?Olsem wanem Pol i mekem kongregesen blong Korin i haremgud bakegen, mo hem i soem se tingting blong hem i stap strong long wanem samting?
10 Ol man Korin oli bin kasem ol hadtaem olsem ol narafala trufala Kristin oli kasem. Antap long samting ya, oli bin nidim advaes blong sakemaot wan man we i no wantem tanem tingting blong hem from rabis fasin long saed blong seks we hem i stap mekem. (1 Korin 5:1, 2, 11, 13) From we oli no bin mekem samting ya fastaem, mo oli no stopem ol rao mo fasin seraot, kongregesen i kam doti. Be biaen oli folem advaes blong Pol, mo oli soemaot se oli rili tanem tingting blong olgeta from sin. From samting ya, hem i toktokgud long olgeta, mo hem i talem se gudfala fasin we oli mekem blong lesin long ol advaes long leta blong hem, i mekem hem i haremgud. (2 Korin 7:8, 10, 11, 13) I luk olsem se, man ya we oli bin sakemaot hem, i tanem tingting blong hem from sin blong hem tu. Taswe Pol i givim advaes long olgeta se oli mas ‘fogivim hem, mo leftemap tingting blong hem, sipos no, bambae man ya i harem nogud tumas, nao bambae hem i finis olgeta.’—2 Korin 2:7.
11 Ating namba tu leta blong Pol i mekem kongregesen blong Korin i haremgud. Hemia nao samting we Pol i wantem mekem taem hem i raetem leta ya. Hem i eksplenem se: “Tingting blong mifala long yufala i stap strong yet. Mifala i save finis se, yufala i kasem plante hadtaem olsem mifala. Nao long sem fasin, bambae yufala i save serem samting blong mekem yufala i haremgud olsem mifala.” (2 Korin 1:7, NW) Long en blong leta blong hem, Pol i talem long olgeta se: “Gohed blong . . . haremgud, . . . nao God ya we i laekem ol man tumas, mo we i stap givim pis oltaem, bambae i kampani wetem yufala.”—2 Korin 13:11, NW.
12. ?Olgeta Kristin oli nidim wanem?
12 !Yumi save lanem wan impoten lesen from samting ya! Olgeta memba blong Kristin kongregesen oli mas ‘serem samting blong mekem olgeta i haremgud,’ we God i stap givim tru long Tok blong hem, tabu speret blong hem, mo ogenaesesen blong hem long wol. Sipos ol man we kongregesen i bin sakemaot olgeta, oli tanem tingting blong olgeta from sin we oli bin mekem mo oli stretem nogud fasin blong olgeta, olgeta tu oli nidim we narafala i mekem olgeta oli haremgud. From samting ya, ‘slef we i stret mo waes’ i mekem wan rod we i rili soem sore, blong givhan long olgeta ya. Wan taem evri yia, tu elda blong kongregesen oli save visitim sam man we kongregesen i bin sakemaot olgeta. Maet ol man ya oli no moa gat fasin rebel mo maet oli no moa stap mekem bigfala sin, mo maet oli nidim se narafala i givhan long olgeta blong folem stret rod blong joen bakegen wetem kongregesen.—Matyu 24:45; Esikel 34:16.
Trabol We Pol i Kasem Long Esia
13, 14. (a) ?Pol i talem wanem long saed blong wan bigfala trabol we hem i kasem long Esia? (b) ?Ating long taem ya Pol i stap tingbaot wanem samting?
13 Hadtaem we kongregesen blong Korin i kasem, i no bigwan olsem ol bigfala trabol we Pol i bin kasem. Taswe, hem i mekem olgeta oli tingbaot se: “Ol brata mo sista. Mifala i wantem blong yufala i savegud we bifo, mifala i kasem plante trabol long Esia. Mifala i harem we ol trabol ya i bigfala tumas, i hevi tumas, nao mifala i no moa tingbaot se bambae mifala i laef. Mifala i harem olsem we oli jajem mifala finis, se bambae mifala i mas ded. Be ol samting ya oli kamtru long mifala blong mekem mifala i no moa stap strong long paoa blong mifala. Oli kam blong mekem mifala i stap strong long paoa blong God nomo, we hem i save mekem ol dedman oli laef bakegen long ded. God i sevem mifala finis, we kolosap nomo mifala i ded, mo bambae hem i save sevem mifala bakegen. Mifala i putum tingting blong mifala i stap strong long hem finis, blong bambae hem i sevem mifala bakegen.”—2 Korin 1:8-10.
14 Samfala man blong stadi Baebol oli ting se Pol i stap tokbaot wan faet we i bin kamaot long Efesas. Faet ya i mekem se Pol wetem tu narafala man Masedonia we oli stap wokbaot wetem hem, Gaeas mo Aristakas, kolosap trifala evriwan oli ded. Ol man oli fosem tufala Kristin ya Gaeas mo Aristakas blong go insaed long wan bigfala haos blong sinema we i fulap long ol man, nao ol man ya oli stap singaot strong se “ ‘!Hurei long Atemis [woman god ya] blong Efesas!’ Mo oli stap singaot olsem long tu ful haoa.” Biaen, wan haeman blong taon ya i mekem bigfala hif man ya oli kam kwaet. Denja ya we i kasem Gaeas mo Aristakas ating i mekem Pol i harem nogud tumas. Yes, hem i rere blong go insaed long haos ya blong traem toktok wetem hif man ya we oli stap mekem krangke fasin ya. Be sam man oli blokem hem from we hif man ya oli save kilim hem i ded.—Ol Wok 19:26-41.
15. ?Maet Pol i stap tokbaot wanem nogud trabol long 1 Korin 15:32?
15 Be, ating Pol i stap tokbaot wan trabol we i denja moa i bitim hemia we yumi jes tokbaot. Long faswan leta we Pol i raetem i go long ol man Korin, hem i talem se: “Long Efesas, i olsem we mi mi faet long ol wael anamol.” (1 Korin 15:32) Samting ya i save minim se laef blong Pol i stap long denja from sam man we oli olsem ol wael anamol. Be hem i save minim tu se Pol i bin stap long denja from sam prapa wael anamol long stad blong Efesas. Blong panisim ol man blong brekem loa, samtaem oli fosem olgeta blong faetem ol wael anamol, mo fulap man we oli wantem tumas blong luk plante blad i ron, oli stap lukluk. Sipos Pol i minim se hem i bin fesem ol trufala wael anamol, maet God i mekem wan merikel blong sevem hem long laswan menet bifo we hem i ded long wan nogud fasin, olsem we God i sevem Daniel i aot long maot blong ol laeon.—Daniel 6:22.
Sam Eksampel Long Taem Blong Yumi
16. (a) ?From wanem plante Wetnes blong Jeova oli kasem save long ol trabol we Pol i bin kasem? (b) ?Yumi save sua long wanem samting long saed blong olgeta we oli ded from bilif blong olgeta? (c) ?Store blong sam Kristin we wan samting i sevem olgeta blong oli no ded, i bin mekem wanem gudfala samting i kamaot?
16 Plante Kristin tede oli kasem save long ol trabol we Pol i bin kasem. (2 Korin 11:23-27) Plante oli bin kasem ‘trabol we i bigfala tumas, i hevi tumas, i bitim samting we oli naf blong winim.’ Mo plante oli bin kasem trabol we oli ‘no moa tingbaot se bambae oli save laef.’ (2 Korin 1:8) Samfala oli ded long han blong ol man we oli kilim i ded ol grup blong man, mo we oli mekem raf fasin bitim mak blong mekem olgeta oli harem nogud tumas. Yumi save sua se paoa blong God we i mekem man i haremgud, i mekem se oli naf blong stanap strong, mo se oli ded wetem hat mo tingting we i stap strong long hop blong olgeta, nating se hop ya i blong go long heven no blong stap long wol ya nomo. (1 Korin 10:13; Filipae 4:13; Revelesen 2:10) Long sam narafala taem, Jeova i lidim ol samting nao hem i sevem ol brata blong yumi long ded. I sua se olgeta ya we God i sevem olgeta, biaen oli trastem God moa se “hem i save mekem ol dedman oli laef bakegen long ded.” (2 Korin 1:9) Afta long samting ya, oli save sua moa long toktok blong olgeta taem oli stap seremaot gudfala mesej blong God we i mekem narafala i haremgud.—Matyu 24:14.
17-19. ?Wanem ol store we oli soemaot se ol brata blong yumi long Ruwanda oli bin kasem fasin blong haremgud we God i givim?
17 I no longtaem i pas, ol gudfala brata blong yumi long Ruwanda oli kasem trabol we i sem mak long hemia we Pol mo ol fren blong hem oli kasem. Plante oli lusum laef blong olgeta, be Setan i no naf blong spolem bilif blong olgeta. Yes, ol brata blong yumi long kantri ya oli luksave se God i bin givhan long plante rod long olgeta wanwan, blong oli stap haremgud. Long faet we i kamaot bitwin ol Tutsi mo Hutu we oli stap long Ruwanda, i gat sam Hutu we kolosap oli lusum laef blong olgeta blong sevem sam Tutsi, mo sam Tutsi we oli rere blong lusum laef blong olgeta blong sevem sam Hutu. Sam long ol Wetnes ya oli ded long han blong ol narakaen grup blong politik, taem oli traem blong sevem sam Kristin brata blong olgeta. Eksampel, sam man oli kilim i ded Gahizi, wan Wetnes we hem i Hutu, afta we hem i bin haedem wan sista we hem i Tutsi, nem blong hem Chantal. Long wan narafala ples, wan Hutu sista we nem blong hem Charlotte, i haedem Jean, hemia man blong Chantal, we hem i wan Tutsi. Jean wetem wan narafala Tutsi brata, tufala i haed blong 40 dei long wan bigfala paep blong haos, we smok blong faea i stap kamaot long hem. Tufala i stap kamaot long naet nomo, blong smoltaem. Long ol 40 dei ya, Charlotte i givim kakae long tufala mo i lukaotgud long tufala, nating se haos blong hem i stap kolosap nomo long wan kamp blong ami blong ol Hutu. Long pej ya, yu save luk pija blong Jean mo Chantal we tufala i joen tugeta bakegen. Tufala ya i talem tangkyu, from we ol Hutu brata blong olgeta oli ‘rere blong lusum laef blong olgeta’ blong sevem tufala, long sem fasin we Prisila mo Akwila oli mekem long aposol Pol.—Rom 16:3, 4.
18 Wan nyuspepa we nem blong hem Intaremara, i presem wan narafala Wetnes we hem i Hutu, nem blong hem Rwakabubu, from we hem i lukaot long sam Kristin brata blong hem we oli Tutsi.a Nyuspepa ya i talem se: “Mo tu, i gat Rwakabubu, wan Wetnes blong Jeova, we i haedem ol brata (hemia nem we oli yusum blong singaotem olgeta we oli gat sem bilif) blong hem long plante defren ples. Man ya i spenem ful dei blong karem kakae mo wora i go long ol brata ya blong hem, nating se hem i gat sotwin. Be God i mekem se hem i gat bigfala paoa i bitim prapa paoa blong hem.”
19 Mo tu, tingbaot wan man mo woman blong hem we tufala i Hutu. Tufala ya, we nem blong tufala Nicodeme mo Athanasie, oli intres long trutok. Bifo we tufala laen oli stat faet long kantri ya, man ya mo woman blong hem tufala i bin stadi Baebol wetem wan Wetnes we hem i wan Tutsi, nem blong hem Alphonse. Nao taem trabol i kamaot, tufala i haedem Alphonse long haos blong tufala, nating se maet tufala i lusum laef blong tufala from. Biaen, tufala i luksave se haos blong tufala i no wan sefples blong brata ya, from we ol man we oli laef kolosap long olgeta, we oli Hutu, oli save se i gat wan Tutsi fren i stap long haos blong tufala. Taswe, Nicodeme mo Athanasie tufala i haedem Alphonse long wan hol long yad blong haos blong tufala. Hemia wan gudfala plan, from we ol man raonabaot long olgeta oli kam blong traem faenem Alphonse kolosap evri dei. Taem Alphonse i stap ledaon long hol ya blong 28 dei, hem i tingting dip long ol store blong Baebol, olsem store ya blong Rehab we i haedem tufala man Isrel long ruf blong haos blong hem long Jeriko. (Josua 6:17) Naoia, Alphonse i stap gohed wetem wok blong talemaot gud nyus long Ruwanda, mo hem i gat bigfala tangkyu from we tufala Hutu studen ya blong Baebol oli rere blong lusum laef blong tufala blong sevem hem. ?Mo, olsem wanem long Nicodeme mo Athanasie? Naoia tufala ya i baptaes finis olsem Wetnes blong Jeova, mo tufala i stap mekem bitim 20 Baebol stadi wetem ol man we oli intres long trutok.
20. ?Long wanem rod Jeova i bin mekem ol brata blong yumi long Ruwanda oli haremgud, be plante blong olgeta oli nidim wanem samting yet?
20 Long taem ya we faet i jes kamaot long Ruwanda mo oli stat kilim plante man i ded, i gat 2,500 man we oli stap talemaot gud nyus long kantri ya. Nating se plante handred man oli lusum laef blong olgeta, no oli mas ronwe i go long wan narafala kantri, namba blong ol Wetnes long ples ya i go antap i bitim 3,000. Hemia wan pruf se God i rili bin mekem ol brata blong yumi oli haremgud long hadtaem ya. ?Olsem wanem long ol pikinini we oli bin lusum papa mama blong olgeta mo ol woman we we oli lusum man blong olgeta, we oli Wetnes blong Jeova? Yes, olgeta ya oli stap harem nogud yet, mo oli nidim we ol narafala oli gohed blong givhan long olgeta blong haremgud bakegen. (Jemes 1:27) Taem bambae God i mekem ol dedman oli laef bakegen long nyufala wol blong hem, long taem ya nomo, wora blong ae blong olgeta bambae i lus fulwan. Be, oli naf blong gohed naoia from we ol brata blong olgeta oli stap givhan long olgeta, mo tu, from we oli stap mekem wosip long “God ya we i stampa blong olgeta fasin blong mekem man i haremgud.”
21. (a) ?Long weples bakegen ol brata blong yumi oli rili nidim we God i mekem olgeta oli haremgud, mo talem wan rod we yumi evriwan i save halpem olgeta ya? (Lukluk bokis ya “Help Blong Haremgud Long Ol Fo Yia Blong Faet.”) (b) ?Wetaem bambae yumi kasem fasin blong haremgud fulwan olsem yumi nidim?
21 Long plante narafala ples olsem Eritrea, Singapo, mo ples ya we bifo oli kolem Yugoslavia, ol brata blong yumi oli gohed blong mekem wok blong Jeova nating se oli kasem hadtaem. I gud we yumi halpem ol brata ya tru long ol prea blong yumi blong askem God oltaem blong mekem olgeta oli haremgud. (2 Korin 1:11) Mo i gud we yumi stanap strong wetem ful bilif gogo kasem taem ya we bambae God i yusum Jisas Kraes blong “ravemaot wora blong ae blong [yumi]” fulwan. Ale, bambae yumi save kasem fulwan, fasin ya blong haremgud we bambae Jeova i givim long nyufala wol blong hem, we i fulap long stret fasin nomo.—Revelesen 7:17; 21:4; 2 Pita 3:13.
[Futnot]
a Wajtaoa blong Janewari 1, 1995, pej 26, i tokbaot store blong pikinini gel blong Rwakabubu, Deborah, we wan grup blong ol Hutu soldia oli harem prea blong hem, nao oli no kilim famle blong hem i ded.
?Yu Yu Save?
◻ ?From wanem Jeova i “God ya we i stampa blong olgeta fasin blong mekem man i haremgud”?
◻ ?Yumi mas gat wanem tingting long saed blong ol hadtaem we yumi kasem?
◻ ?Yumi save serem ol samting we oli mekem yumi haremgud wetem hu ya?
◻ ?Olsem wanem bambae yumi haremgud fulwan olsem yumi nidim?
[Tok blong pija long pej 17]
Nating se Jean mo Chantal, tufala i Tutsi Wetnes, ol Hutu Wetnes oli haedem tufala long tu defren ples, taem faet i kamaot bitwin tufala laen ya long Ruwanda
[Tok blong pija long pej 17]
Ol Wetnes blong Jeova long Ruwanda oli gohed blong serem gudfala mesej blong God we i mekem man i haremgud, wetem ol man raonabaot long olgeta