Taem Ol Disasta We Man i No Mekem Oli Kamaot

Akra, Gana, Julae 4, 1995: Wan ren we i bigwan moa i bitim ol narawan we oli foldaon long ol 60 yia we oli pas, i mekem wora i kam antap long olgeta ples. Samwe 200,000 man oli lusum olting blong olgeta, 500,000 oli mas aot long haos blong olgeta, mo 22 man oli ded.

San Enjelo, Teksas, Yunaeted Stet, Mei 28, 1995: Ol bigfala strong win mo aes we i foldaon long skae, oli spolemgud taon ya we i gat 90,000 man i stap long hem. Ol man oli spenem kolosap 120 milyan dola (kolosap 12 bilyan vatu) blong fiksimap trabol we i kamaot.

Kobe, Japan, Janewari 17, 1995: Graon we i seksek blong 20 seken nomo i kilim i ded plante taosen man, plante taosen moa oli kasem kil, mo plante handred taosen man oli lusum haos blong olgeta.

YUMI stap laef long wan taem we maet yumi save talem se hem i taem blong ol disasta nomo. Wan ripot blong Yunaeted Nesen i soemaot se long 30 yia, stat long 1963 kasem 1992, namba blong ol man we oli ded, oli kasem kil, no oli mas ronwe long ples blong olgeta from ol disasta, i bin go antap 6 pesen evri yia. Trabol ya i pusum Yunaeted Nesen blong makemaot ol yia we oli kam biaen long 1990 olsem “Ol Yia Blong Daonem Trabol Blong Ol Disasta Long Fulwol.”

Yes, i tru se paoa blong ol samting raonabaot long yumi​—olsem wan strong win, volkeno i faerap, no graon i seksek​—oli no mekem trabol i kamaot evri taem. Ol kaen samting olsem oli hapen plante handred taem evri yia we oli no mekem trabol long ol man. Be taem oli spolem laef mo olting blong plante man ale, i stret nomo we yumi talem se hemia nao wan disasta.

I luk olsem se namba blong ol disasta bambae i stap kam antap nomo naoia. Buk ya Natural Disasters​—Acts of God or Acts of Man? i talem se: “Ol man oli stap jenisim ol samting raonabaot long olgeta, mekem se i isi moa blong sam kaen disasta oli kasem olgeta. Mo tu, ol fasin blong ol man i mekem rod blong ol trabol olsemia oli save kasem olgeta.” Buk ya i givim wan eksampel se: “Sipos long wan taon ol man oli bildim haos blong olgeta long sofmad mo olgeta haos ya oli stap long saed blong wan bigfala hil, ating taem graon i seksek bambae hem i wan disasta, from we plante man oli save ded mo harem nogud. Be ?disasta ya i kamaot from we graon i seksek no from we ol man ya oli laef long ol nogud haos we oli bildim long wan ples we i denja?”

I gat wan narafala risen from wanem ol man we oli stadi Baebol oli no sapraes we namba blong ol disasta ya oli stap kam antap. Kolosap 2,000 yia bifo, Jisas Kraes i talemaot sam samting we bambae oli makemaot ‘en blong wol blong naoia,’ hemia se, ‘hadtaem blong kasem kakae, mo olbaot long wol, graon i seksek.’ (Matyu 24:​3, 6-8) Mo tu, Baebol i talemaot se long ‘ol las dei,’ ol man bambae oli save laekem olgeta nomo, oli laekem mane tumas, oli no gat sore, mo oli no laekem ol gudfala fasin.a (2 Timote 3:​1-5) Plante taem, ol fasin ya nao oli mekem se man i spolem ol samting raonabaot long hem. From samting ya, i isi moa blong man i kasem trabol from paoa blong ol samting ya raonabaot long hem. Ol disasta we man i mekem tu, oli olsem frut blong fasin blong ol man we yumi mas laef long medel blong olgeta tede, we oli no gat lav.

Wol ya i stap kam fulap moa long ol man. Fasin blong plante man i mekem se ol man oli kasem moa trabol. Mo ol man oli no moa lukaotgud long ol gudfala samting long wol ya. From ol samting ya, bambae fulap disasta oli gohed blong kasem ol man. Haf we i kam biaen i soemaot olsem wanem bambae i hadwok blong winim trabol ya.

[Futnot]

[Foto Credit Line blong pija long pej 3]

Top: Information Services Department, Ghana; right: San Angelo Standard-Times

[Foto Credit Line blong pija long pej 2]

COVER: Maxie Roberts/Courtesy of THE STATE