Namba 101 Klas Blong Gilead—Oli Strong Blong Mekem Ol Gudfala Wok

MAN ya we i Wokem yumi, Jeova God, hem i strong blong mekem ol gudfala wok, mo Pikinini blong hem, Jisas Kraes tu. Jisas, we hem i eksampel blong yumi, hem i strong blong mekem olgeta wok we God i givim long hem blong mekem. Wan long ol wok ya, hemia blong “givim laef blong hem blong . . . mekem yumi olsem wan kampani we laef blong yumi i klin, yumi man blong hem nomo, mo yumi strong blong mekem ol gudfala samting.” (Taetas 2:​14) Ol 48 memba blong namba 101 klas blong Wajtaoa Baebol Skul blong Gilead, oli soemaot klia se oli strong blong mekem ol gudfala wok. Miting blong givimaot ol stefeket long ol misinari ya, oli mekem long Septemba 7, 1996, long Wajtaoa Edukesen Senta long Pateson, Nyu Yok.

Gudfala Advaes Blong Gohed Blong Wok Strong

Jeaman blong miting ya blong givimaot ol stefeket, hem i Carey Barber, wan memba blong Hed Kampani, we hem i bin mekem fultaem wok blong God blong bitim 70 yia. Long fastok blong hem, Brata Barber i pulum tingting blong ol man i go long wok blong prij mo tij we Jisas i mekem, olsem “laet blong ol man long wol.” (Jon 8:​12) Hem i soemaot se Jisas i no kipim impoten wok ya blong hem wan nomo, be hem i pulum ol disaepol blong hem tu blong oli letem laet blong olgeta i saenaot. (Matyu 5:​14-​16) Jans blong joen long wok ya i mekem se laef blong ol Kristin i gat moa mining. Mo tu, hem i putum wan bigfala wok i stap long solda blong olgeta man we oli ‘wokbaot olsem ol pikinini blong delaet.’​—Efesas 5:8.

Afta long faswan tok ya, Don Adams blong Ol Ekseketif Ofis long hedkwota blong Bruklin, i givim wan tok. Nem blong tok blong hem se “Muf i Go Fored, i No Biaen.” Brata Adams i pulum tingting blong ol man i go long Gilead Skul mo stampa wok we hem i mekem​—hemia blong givhan long wok blong talemaot gud nyus blong i go long ol kantri farawe. Hem i tokbaot olsem wanem ogenaesesen blong God i stap gohed kwik, mo olsem wanem hem i wokem plante buk long olgeta ples blong wol long bitim 300 lanwis. Buk ya Save Blong Lidim Yu Long Laef We i No Save Finis, we oli wokem long 1995, naoia i kamaot long 111 lanwis, mo plan i stap blong prentem buk ya long plante moa lanwis bakegen. Buk ya i wokgud finis blong halpem plante nyufala disaepol blong Jisas blong givim laef blong olgeta long God mo tekem baptaes afta long sam manis nomo. Taswe, ol nyufala misinari ya oli save yusum ol nyufala buk olsem, blong mekem Baebol stadi long ol man.

Nao, Lyman Swingle, wan memba blong Hed Kampani, i givim tok ya “Gohed Blong Mekem Tabu Wok Blong Jeova,” we i stanap long Revelesen 7:15. From we Jeova hem i wan God we i hapi, taem yumi mekem wok blong hem oltaem, bambae yumi hapi tu. (1 Timote 1:​11) From we wok ya i mekem man i glad, wan bigfala kampani blong ol man we oli kamaot long olgeta kantri blong wol oli joen blong wosipim hem. Long ol yia we oli pas, olgeta we oli kasem trening long Skul blong Gilead, oli halpem plante long ol man ya blong kasem stret save long saed blong trutok. Taswe, yumi gat gudfala risen blong bilif se bambae Jeova i gohed blong blesem olgeta we naoia oli stap goaot, blong pulum moa memba oli kam joen long bigfala kampani ya we i stap kam bigwan moa.

“Soemaot Glad Blong Jeova,” hemia nem blong tok we Daniel Sydlik, wan memba blong Hed Kampani tu, i givim. Hem i soemaot se olgeta man blong God, wetem ol nyufala misinari ya tu, oli gat jans blong tijim ol man blong faenem rod we i go kasem laef blong olwe, mo rod blong gat gudfala laef naoia tu. Brata Sydlik i talem se: “Tijing hem i wan wok we i karem blesing i kam long tija tu. Yumi luksave samting ya long fes blong ol man we oli tijim ol narafala, mo long fes blong ol man we oli kasem tijing.” (Ol Sam 16:​8-​11) Hem i talemaot tok blong wan misinari blong Estonia se: “Yumi gat wan mesej we i impoten moa i bitim ol narafala mesej long wol ya, mo fes blong yumi nao hem i soemaot klia mesej ya.” Fes blong yumi i save pulum man i lesin long yumi mo i save wekemap intres blong man. Ol man oli wantem save wanem samting i mekem ol man blong Jeova oli hapi. Brata Sydlik i givim advaes ya se: “Taswe, lukaotgud long samting we yu soemaot long fes blong yu. Ol man oli haremgud taem oli luk ol man we oli hapi.”

Ulysses Glass, wan long ol tija long Gilead skul stat long namba 12 klas long yia 1949, i givim tok ya, “Wetem Longfala Tingting, Lukaot Long Sol Blong Yu.” ?Wanem ya longfala tingting? Hem i karem mining ya se yumi wet wetem kwaet fasin from wan samting, yumi no kros taem narafala i agensem yumi no taem yumi kasem traem. Man we i gat longfala tingting hem i stap kwaet oltaem; man we i no gat longfala tingting hem i no tingtinggud bifo we hem i mekem wan samting, mo hem i kam kros tu. Brata Glass i talem se: “Plante man oli ting se man we i gat longfala tingting hem i slak mo hem i no save mekem wan disisen. Be long tingting blong Jeova, fasin ya i soemaot se man i strong mo i gat wan stampa tingting we hem i stap folem.” (Proveb 16:32) ?Longfala tingting i save karem wanem blesing? Wan waes tok blong ol man Jaena i talem se: “Sipos yu yusum longfala tingting taem yu kros, bambae samting ya i sevem yu long wan handred dei blong harem nogud.” Brata Glass i talem se: “Longfala tingting i mekem prapa fasin blong wan man i naes moa. I olsem we hem i mekem ol narafala gudfala fasin blong man ya oli stap longtaem moa. Hem i mekem se ol narafala man oli wantem kasem bilif blong man ya, hem i mekem pis i stap longtaem, mo hem i mekem we lav i no save foldaon.”

Mark Noumair, we i mekem wok blong misinari long Kenya blong 11 yia, mo naoia hem i wan tija blong Gilead, hem i talem se: “I wan bigfala blesing blong kasem wan wok long Jeova God tru long ogenaesesen blong hem.” Nem blong tok blong Brata Noumair se, “Sipos Yu No Gat Bilif, Yu No Save Stanap Strong Longtaem.” Hem i pulum tingting i go long eksampel blong King Ehas blong Juda. Aesea i promes long king ya se Jeova bambae i sapotem hem long wok blong hem, be Ehas i no trastem God. (Aesea 7:​2-9) Nao Brata Noumair i soem se ol misinari​—yes, yumi evriwan​—i nidim blong gat bilif long Jeova, nao bambae yumi save stap longtaem long tiokratik wok we yumi mekem. Blong winim ol strongfala traem we ol misinari oli save kasem long ples we oli go wok long hem, oli nidim strong bilif. Brata Noumair i talem se: “Neva fogetem se yumi no save gat wan laef no stap long wan ples we i stretgud olgeta long wol ya naoia.”

Ol Store We Oli Leftemap Tingting Blong Wok Strong

Long taem blong trening ya long Gilead, ol studen oli spenem taem evri wiken long wok blong prij, hemia bigfala samting we bambae oli mekem long misinari wok blong olgeta biaen. Wallace Liverance, wan long grup ya we oli lukaot long skul blong Gilead, i askem ol kwestin long 15 studen, we oli talem store blong olgeta. Afta long samting ya, Leon Weaver blong Sevis Dipatmen Komiti mo Lon Schilling blong Komiti we i lukaot long ol Betel haos, tufala i askem kwestin long sam memba blong komiti blong hedkwota blong sam ples long Afrika mo Latin Amerika. Olgeta ya oli talem sam store long wok blong misinari, mo oli givim sam gudfala advaes long ol misinari ya we oli jes kasem stefeket blong olgeta. Oli talem se, long Siera Leon, raonabaot 90 pesen blong olgeta we oli baptaes long 1995 sevis yia, ol misinari nao oli bin givhan long olgeta. !Hemia i rili wan gudfala ripot long fasin blong wok strong!

Milton Henschel, presiden blong Sosaeti, i givim laswan tok long 2,734 man ya we oli stap. Nem blong tok blong hem se, “I No Gat Wan Narafala Ogenaesesen Long Wol We i Olsem Ogenaesesen blong Jeova.” ?Wanem samting i mekem se ogenaesesen blong God i defren long ol narawan? Hemia i no from we hem i bigwan no from we hem i gat bigfala paoa, no gat. Be hem i from we ol stretfala rul mo loa blong God oli stap lidim ogenaesesen ya. Long taem bifo, Jeova i givim ol tabu tok blong hem long ol man blong Hem, nesen blong Isrel, mo samting ya nao i mekem nesen ya i defren long olgeta narafala nesen. (Rom 3:​1, 2) Tede, ogenaesesen blong Jeova i joengud blong wok aninit long Jisas Kraes we i stap lidim hem. (Matyu 28:19, 20) Ogenaesesen ya i stap karem plante frut, mo i stap kam bigwan moa. ?I gat wan narafala ogenaesesen long wol we Hed Kampani blong hem i lukluk i go long Tok blong God, Baebol, bifo we hem i mekem ol impoten disisen? From samting ya, mo long sam narafala rod bakegen, ogenaesesen blong Jeova long wol ya i defren long olgeta narafala ogenaesesen.

Gudfala miting ya i finis afta we oli givimaot ol stefeket, mo ridim leta we klas ya i raetem blong talem tangkyu from spesel trening we oli kasem.

[Bokis blong pija long pej 22]

Kaontem Klas Ya

Oli kamaot long hamas kantri: 9

Oli go wok long hamas kantri: 12

Hamas studen: 48

Oli gat hamas yia: 31.7

Hamas yia long trutok: 13.8

Hamas yia finis oli prij fultaem: 9.8

[Bokis blong pija long pej 23]

Olgeta Long Klas Namba 101 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo ol nem oli stat long lefsaed i go long raetsaed long wanwan laen.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.