Kasem Tijing Blong Mekem Samting We Jeova i Wantem
“Yu yu God blong mi, plis yu tijim mi blong mi mekem ol samting we yu yu wantem.”—OL SAM 143:10.
1, 2. (a) ?Wetaem yumi gat jans blong kasem tijing, mo wetem wanem trutok long tingting blong yumi? (b) ?From wanem i impoten blong kasem tijing blong Jeova?
EVRI dei we wan man i stap laef mo hem i naf blong mekem wan samting, hem i save lanem samting we i givhan long hem. Samting ya i tru long saed blong yu, mo long saed blong ol narafala man tu. Be, ?wanem i hapen taem man i ded? Long taem olsem, man i no moa save kasem tijing mo lanem wan samting. Baebol i talemaot klia se ol dedman oli “no save wan samting nating.” I no gat save long Seol, hemia beregraon blong ol man. (Eklesiastis 9:5, 10) ?Samting ya i minim se i blong nating nomo we yumi kasem tijing mo karem plante save? Hemia i dipen nomo long wanem tijing we yumi kasem, mo olsem wanem yumi yusum save ya.
2 Sipos yumi kasem tijing blong wol nomo, bambae yumi no gat wan gudfala fyuja blong olwe. Be, yumi glad se, plante milyan man long olgeta nesen oli stap kasem tijing blong mekem ol samting we God i wantem, nao bambae oli save gat laef we i no save finis. Faondesen blong hop ya i blong kasem tijing long Jeova, Stampa blong save ya we i givim laef.—Ol Sam 94:9-12.
3. (a) ?From wanem yumi save talem se Jisas hem i faswan we God i tijim hem? (b) ?Wanem tok i soem se bambae Jeova i tijim ol man, mo wanem frut bambae i kamaot from?
3 Fasbon pikinini blong God, we i faswan studen blong hem, i kasem tijing blong mekem samting we Papa blong hem i wantem. (Proveb 8:22-30; Jon 8:28) Biaen, Jisas i soemaot se plante milyan man bambae oli kasem tijing blong Papa blong hem. ?Wanem hop blong yumi ya we God i stap tijim yumi? Jisas i talem se: “Ol profet bifo oli bin raetem tok se ‘God ya bambae i tijim olgeta.’ Man we i harem tok blong Papa blong mi mo i lan long hem, hemia man we i save kam long mi. . . . Tru mi talem long yufala, olgeta man we oli bilif long mi, oli gat laef ya we i no save finis.”—Jon 6:45-47.
4. ?Tijing blong God i stap mekem wanem long plante milyan man, mo wanem hop we olgeta ya oli gat?
4 Jisas i stap tokbaot vas blong Aesea 54:13, we i go long woman blong God long saed blong speret, hemia Saeon long heven. Profet tok ya i gat bigfala mining moa long ol pikinini blong God, hemia ol 144,000 disaepol blong Jisas Kraes we tabu speret i makemaot olgeta. Wan smol haf blong ol tabu pikinini ya oli bisi tede, oli stap lidim wan bigfala program blong tijim ol man long olgeta ples blong wol. From samting ya, plante milyan narafala man we oli olsem ‘wan bigfala kampani,’ oli haremgud tu from we Jeova i stap tijim olgeta. Oli gat spesel hop ya blong gohed blong lanem plante samting, we ded bambae i no blokem olgeta. ?Olsem wanem? Yes, olgeta ya oli save laef tru long ‘bigfala trabol’ we i stap kam kwiktaem, mo bambae oli haremgud long laef we i no save finis long paradaes long wol ya.—Revelesen 7:9, 10, 13-17.
Traehad Moa Blong Mekem Samting We God i Wantem
5. (a) ?Wanem stampa vas blong yia 1997? (b) ?Yumi mas gat wanem filing long saed blong ol Kristin miting?
5 Long yia 1997, ol Wetnes blong Jeova long bitim 80,000 kongregesen raon long wol, bambae oli tingbaot oltaem ol faswan tok blong Ol Sam 143:10 se: “Plis yu tijim mi blong mi mekem ol samting we yu yu wantem.” Hemia nao stampa vas blong yia 1997. Tok ya bambae i stap long klia ples long olgeta Haos Kingdom. Bambae hem i mekem ol man oli tingbaot se nambawan ples blong kasem ol tijing blong God, hemia long ol miting blong kongregesen. Long ples ya, yumi save joen long wan program blong tijim yumi we i stap gohed nomo. Taem yumi joen wetem ol brata mo sista blong yumi long ol miting blong kasem tijing long Bigfala Tija blong yumi, yumi save gat sem filing olsem man blong raetem Sam ya, we i talem se: “Taem ol man oli talem long mi se ‘Yumi go long haos blong Hae God,’ mi mi glad tumas.’ ”—Ol Sam 122:1; Aesea 30:20.
6. ?Yumi luksave wanem samting olsem tok blong Deved i soem?
6 Yes, yumi wantem kasem tijing long saed blong samting we God i wantem, i bitim samting we enemi blong yumi, Setan, i wantem, no samting we ol sinman oli wantem. Taswe, olsem Deved, yumi presem God ya we yumi stap wosipim hem mo mekem wok blong hem, se: “Yu yu God blong mi . . . Speret blong yu i gud tumas, i gud hem i lidim mi long rod we i sef.” (Ol Sam 143:10) Deved i laekem moa blong stap long ples we ol man oli stap wosip long Jeova, i bitim we hem i joen wetem ol man blong gyaman. (Ol Sam 26:4-6) Taem speret blong God i lidim Deved, hem i naf blong wokbaot long stret fasin.—Ol Sam 17:5; 23:3.
7. ?Olsem wanem speret blong God i bin wok long Kristin kongregesen?
7 Bigfala Deved, Jisas Kraes, i promes long ol aposol blong hem se bambae tabu speret i tijim olgeta long evri samting, mo bambae hem i mekem olgeta oli rimemba olgeta samting we hem i bin talem long olgeta. (Jon 14:26) Stat long taem blong Pentekos i go, sloslou Jeova i soemaot klia ol ‘dip save blong God’ we i stap long Tok blong hem, Baebol. (1 Korin 2:10-13) Hem i mekem samting ya tru long wan rod long wol ya, we Jisas i kolem ‘slef we i stret mo waes.’ Slef ya i stap givim kakae long saed blong speret tru long program blong tijim ol man, we ol kongregesen blong ol man blong God long olgeta ples blong wol, oli folem.—Matyu 24:45-47.
Ol Miting Oli Tijim Yumi Blong Mekem Samting We Jeova i Wantem
8. ?From wanem i impoten tumas blong joen long miting blong stadi Wajtaoa?
8 Ol save we i kamaot long Wajtaoa Stadi blong kongregesen evri wik, plante taem hem i soemaot olsem wanem blong mekem ol rul blong Baebol oli wok long laef blong yumi. Samting ya i stap givhan long yumi bigwan blong winim ol wari we yumi stap kasem long laef blong yumi. Long ol narafala stadi, yumi tokbaot ol dip trutok long saed blong speret mo sam profet tok blong Baebol. !Yumi rili lanem plante samting long ol stadi olsem! Long plante kantri, ol Haos Kingdom oli fulapgud long taem blong ol miting olsem. Be, long sam kantri, namba blong ol man we oli kam long ol miting i godaon. ?Yu ting se wanem nao risen blong samting ya? ?Ating samfala oli stap letem wok blong olgeta blong winim mane i blokem olgeta blong kam joen wetem ol brata mo sista evri wik, blong yumi “mekem yumi strong blong laekem ol man, mo blong mekem ol gudfala fasin”? Sipos no, ?ating oli spenem plante tumas haoa long ol pleplei no blong lukluk televisin, nao oli no moa gat taem blong go long olgeta miting? Tingbaot oda long Hibrus 10:23-25 we i kamaot long God. ?Yu no ting se fasin blong kam wanples blong kasem tijing blong God i impoten moa naoia, taem yumi “luk we Dei ya we Masta blong yumi bambae i jajem olgeta man, hem i kam kolosap finis”?
9. (a) ?Olsem wanem Miting Blong Kingdom Wok i save mekem yumi reregud blong prij? (b) ?Yumi mas gat wanem tingting long saed blong wok blong prij?
9 Wan long ol faswan bigfala samting we yumi mas mekem, hemia blong prij olsem ol man blong wok blong God. Miting Blong Kingdom Wok i blong tijim yumi olsem wanem blong mekemgud wok ya. Yumi lanem olsem wanem blong stat storeyan wetem ol man, wanem samting blong talem long olgeta, wanem blong mekem taem ol man oli glad long ol tok we yumi talem, mo wanem blong talem taem oli no wantem lesin long mesej blong yumi. (Luk 10:1-11) Taem ol brata oli tokbaot ol gudfala rod blong storeyan mo oli mekem pleplei blong soemaot ol rod ya long miting evri wik, yumi rere moa blong toktok wetem ol man long ol haos wanwan. Be tu, yumi reregud blong toktok wetem ol man long rod, long ol ples blong putum trak long taon, long ol bas mo taksi, long ol epot, long ol bisnes ofis, mo long skul. Yumi stap askem long God se, ‘Plis yu tijim mi blong mi mekem ol samting we yu yu wantem.’ Taswe, yumi mas tekem evri jans blong mekem olsem Masta blong yumi i talem: “Letem laet blong yufala i saenaot i kasem ol man, . . . Nao bambae ol man ya oli save leftemap nem blong Papa blong yufala, we i stap long heven.”—Matyu 5:16.
10. ?Olsem wanem yumi rili save halpem ‘ol gudfala man’?
10 Long ol miting ya blong kongregesen, yumi lanem tu olsem wanem blong mekem ol narafala oli kam disaepol blong Kraes. Taem yumi faenem wan man we i intres no yumi livim wan buk wetem wan man, mak blong yumi taem yumi visitim hem bakegen i blong statem wan Baebol stadi wetem hem. Samting ya i sem mak olsem taem ol disaepol blong Jisas oli ‘stap wetem ol gudfala man,’ blong tijim olgeta long ol samting we Jisas i givim oda blong mekem. (Matyu 10:11; 28:19, 20) Yumi gat plante nambawan samting blong halpem yumi, olsem buk ya Save Blong Lidim Yu Long Laef We i No Save Finis. Ol buk olsem oli mekem se yumi reregud blong prij olsem ol gudfala man blong wok. (2 Timote 4:5) Evri wik, taem yu go long Miting Blong Kingdom Wok mo Tiokratik Skul, traehad blong lesingud mo yusum ol gudfala poen we oli save halpem yu olsem wan man blong wok blong God we i gat gudhan, mo we i stap mekem samting we God i wantem.—2 Korin 3:3, 5; 4:1, 2.
11. ?Olsem wanem samfala oli soemaot bilif long ol tok blong Matyu 6:33?
11 God i wantem se yumi gohed blong ‘lukaot kingdom blong Hem mo stret fasin blong hem, fastaem long laef blong yumi.’ (Matyu 6:33) Traem tingbaot se, ‘?Olsem wanem bambae mi folem rul ya sipos wok blong mi [no wok blong hasban no waef blong mi] i stap blokem mi blong joen oltaem long ol miting?’ Plante man we oli bigman long saed blong speret oli go toktok wetem masta blong olgeta long saed ya. Wan fultaem paenia i talem long masta blong hem se hem i mas karem smol taem evri wik blong joen long ol miting blong kongregesen. Masta i agri long samting we sista ya i wantem. Be masta i wantem save wanem i stap hapen long ol miting ya, ale hem i askem sipos hem tu i save kam. Long miting ya, hem i harem mesej long saed blong wan distrik asembli we i stap kam. From samting ya, masta ya i mekem plan blong kam wan fuldei long asembli ya. ?Yu yu lanem wanem samting from store ya?
Kasem Tijing Blong Mekem Samting We Jeova i Wantem Long Papa Mama We Oli Obei Long God
12. ?Blong tijim ol pikinini blong mekem samting we Jeova i wantem, ol Kristin papa mama oli mas mekem wanem wetem longfala tingting mo strong tingting?
12 Be i no long ol miting blong kongregesen mo ol asembli nomo, we yumi save kasem tijing blong mekem samting we God i wantem. Ol papa mama we oli obei long God oli kasem oda ya blong trenem, stretem, mo tijim pikinini blong olgeta blong presem Jeova mo blong mekem samting we hem i wantem. (Ol Sam 148:12, 13; Proveb 22:6, 15) Blong mekem olsem, yumi mas tekem “ol smol pikinini” blong yumi oli go long ol miting, nao oli save ‘lesingud mo kasem save.’ Be, ?yumi stap tijim olgeta long haos tu long saed blong ol tabu tok blong Baebol? (Dutronome 31:12; 2 Timote 3:15) Plante famle oli stat folem wan plan blong mekem famle Baebol stadi evri wik, be biaen oli kam slak mo oli no moa folem plan ya. ?Samting ya i hapen finis long yu? ?Yu yu gat tingting ya se fasin ya blong mekem stadi evri wik hem i no stret long yu, no se plan ya i no save wokgud long famle blong yu from we oli defren? Nating se famle blong yu i olsem wanem, i gud we olgeta papa mo mama oli lukluk bakegen long ol nambawan haf ya, “Ol Rij Samting Long Saed Blong Speret We Mifala i Kasem From Ol Olfala Blong Mifala” mo “Ol Blesing From Strong Tingting Blong Gohed,” we oli stap long Wajtaoa blong Ogis 1, 1995.
13. ?Olsem wanem ol famle oli save kasem blesing taem oli tokbaot vas blong dei evri dei?
13 I gud sipos ol famle oli lan long fasin blong ridim vas blong dei we i kamaot long buk ya Ridimgud Ol Tok Blong Baebol Evri Dei. I gud sipos yumi jes ridim vas blong dei mo smol tok we i kamaot biaen, be i moa gud sipos yumi tokbaot vas ya mo luk olsem wanem blong mekem i wok long laef blong yumi. Eksampel, sipos vas ya i kamaot long Efesas 5:15-17, ol memba blong famle oli save tokbaot olsem wanem blong ‘pemaot taem’ blong mekem stadi wanwan, blong joen long wok blong prij fultaem, mo blong mekem ol narafala tiokratik wok. Yes, sipos famle i tokbaot vas blong dei oltaem, samting ya i save lidim wan no plante blong ‘save moa olgeta samting we God i wantem olgeta blong mekem.’
14. ?Dutronome 6:6, 7 i soemaot se ol papa mama oli mas wanem kaen tija, mo samting ya i minim se oli mas mekem wanem?
14 Ol papa mama oli mas traehad oltaem blong tijim ol pikinini blong olgeta. (Dutronome 6:6, 7) Be, samting ya i no minim se oli stretem mo givim oda nomo long ol pikinini blong olgeta. Ol papa mo mama oli mas lesin tu. Long rod ya, bambae oli luksave moa wanem samting oli nidim blong eksplenem, mekem i moa klia, talem wan pijatok blong eksplenem, no talem bakegen mo bakegen, long ol pikinini blong olgeta. Long wan Kristin famle, papa mama i pulum olgeta memba blong famle blong toktokgud tugeta, taem tufala i leftemap tingting blong ol pikinini blong askem kwestin long saed blong ol samting we oli no kasem save long hem no we oli wari long hem. Long rod ya, tufala i faenemaot se i hadwok long wan boe blong tufala we i bigwan finis, blong kasem save se Jeova i neva stat samtaem. Papa mama ya i yusum sam buk blong Watch Tower Sosaeti blong soemaot long boe ya se taem mo spes tu i no gat stat mo en blong olgeta. Tufala i yusum samting ya olsem wan eksampel blong eksplenem poen ya, ale boe blong tufala i kasem save. Taswe, yu mas tektaem blong givim ol ansa we oli klia mo we oli stanap long Baebol, taem pikinini blong yu i askem kwestin. Halpem olgeta blong luksave se oli save haremgud tumas taem oli stap lanem blong mekem ol samting we God i wantem. ?Wanem sam narafala tijing we ol man blong God—ol yangfala mo ol olfala—oli stap kasem tede?
Tijing Blong Laekem Ol Man Mo Blong Faet
15. ?Wetaem maet wan samting i traem lav blong yumi long ol brata se i tru no no gat?
15 Folem nyufala loa we Jisas i givim, ‘God i stap tijim yumi, se yumi mas laeklaekem yumi.’ (1 Tesalonaeka 4:9) Taem ol samting oli kwaet mo oli go gud nomo, maet yumi harem se yumi laekem olgeta brata blong yumi. Be, ?wanem i hapen taem tingting blong narafala i defren long tingting blong yumi, no taem yumi harem nogud long samting we wan narafala Kristin i talem no i mekem long yumi? Ating samting olsemia i save traem lav blong yumi, se hem i rili tru no no gat. (Skelem wetem 2 Korin 8:8.) ?Baebol i tijim yumi blong mekem wanem long taem olsem? Wan samting, hemia blong traehad blong soemaot lav fulwan. (1 Pita 4:8) Bitim we yumi mekem samting we yumi nomo i wantem, no yumi kros from wan smol mastik blong narafala, no yumi stap kros longtaem from rong we narafala i mekem long yumi, yumi mas traehad blong letem lav i kavremap ol sin blong narafala. (1 Korin 13:5) Yumi save se hemia samting we God i wantem, from we hemia samting we Tok blong hem i tijim.
16. (a) ?Ol Kristin oli kasem tijing blong joen long wanem kaen faet? (b) ?Olsem wanem yumi reregud from faet ya?
16 Maet plante man oli no save joenem lav wetem ol faet. Be yumi stap kasem tijing blong mekem wan faet, we i defren long ol narafala faet. Deved i luksave se hem i dipen long Jeova blong tijim hem olsem wanem blong faet. Be, i tru se, long taem blong hem, hem i yusum ol prapa tul blong faet, blong agensem ol enemi blong Isrel. (1 Samuel 17:45-51; 19:8; 1 King 5:3; Ol Sam 144:1) ?Olsem wanem long faet blong yumi tede? Ol tul blong faet blong yumi oli no ol prapa tul blong faet. (2 Korin 10:4) Faet blong yumi hem i long saed blong speret. Mo blong reregud from, yumi nidim blong putum ol klos blong faet long saed blong speret. (Efesas 6:10-13) Tru long Tok blong hem mo kampani blong ol man blong hem, Jeova i stap tijim yumi blong mekem mo blong winim faet blong yumi long saed blong speret.
17. (a) ?Wanem ol trik we Setan i stap yusum blong traem mekem yumi foldaon? (b) ?Yumi mas waes blong stap longwe long wanem samting?
17 Long ol rod we oli haed mo oli trikim man, Setan i stap yusum ol samting blong wol ya, ol man we oli lego trutok, mo sam narafala man we oli agensem trutok, blong traem pulum yumi blong tingbaot ol samting we oli no impoten tumas. (1 Timote 6:3-5, 11; Taetas 3:9-11) I olsem we Setan i luksave se hem i no save winim yumi taem hem i faet agensem yumi stret, wetem ol samting we yumi save luk. Taswe, hem i traem mekem yumi foldaon, taem hem i pulum yumi blong komplen no blong askem ol krangke kwestin, we oli no save givhan nating long saed blong speret. Olsem ol man blong faet we oli stap lukaotgud, yumi mas wekapgud blong luksave ol denja ya, long sem fasin we yumi lukaotgud taem Setan i faet agensem yumi stret.—1 Timote 1:3, 4.
18. ?Yumi mas mekem wanem blong soemaot se yumi no moa laef blong mekem ol samting we yumi nomo i wantem?
18 Yumi no sapotem ol samting we ol man nomo oli wantem no samting we ol nesen oli wantem. Jeova i tijim yumi tru long eksampel blong Jisas se yumi no moa laef blong mekem samting we yumi nomo i wantem. Be, yumi mas gat semkaen tingting olsem Jisas Kraes, mo yumi mas stap laef blong mekem samting we God i wantem. (2 Korin 5:14, 15) Maet bifo, yumi gat wan laef we i olbaot nomo, i fulap long rabis fasin, mo we yumi westem plante gudfala taem we i impoten. Ol wael lafet, fasin blong dring grog blong kam fuldrong, mo ol rabis fasin long saed blong seks, hemia nao ol fasin blong rabis wol ya. Naoia we yumi kasem tijing blong mekem samting we God i wantem, ?yumi gat tangkyu from we yumi seraot long wol ya we i fulap long rabis fasin? Taswe, yumi mas faet strong long saed blong speret, blong bambae yumi no joen bakegen long enikaen fasin blong wol ya we i save mekem yumi kam doti.—1 Pita 4:1-3.
Ol Tijing We Oli Mekem i Gud Long Yumi
19. ?Taem yumi kasem tijing long ol samting we Jeova i wantem mo biaen yumi mekem olgeta, bambae yumi kasem wanem blesing?
19 I impoten tumas blong luksave se taem yumi kasem tijing blong mekem ol samting we Jeova i wantem, yumi save kasem blesing from. I klia se, yumi mas mekem sam samting tu. Yumi mas lesingud blong lanem ol samting, mo biaen, yumi mas folem ol tijing we yumi kasem tru long Pikinini blong God, Tok blong God, mo kampani blong ol man blong hem. (Aesea 48:17, 18; Hibrus 2:1) Sipos yumi mekem olsem, bambae yumi kasem paoa blong stanap strong tru long ol hadtaem, mo winim ol trabol we bambae oli kam yet. (Matyu 7:24-27) Naoia finis, yumi save mekem God i glad taem yumi mekem samting we hem i wantem. Mo long rod ya, yumi save sua se bambae hem i ansarem ol prea blong yumi. (Jon 9:31; 1 Jon 3:22) Mo bambae yumi kasem trufala glad.—Jon 13:17.
20. ?Taem yu stap lukluk stampa vas blong 1997, i gud we yu tingting dip long wanem samting?
20 Long yia 1997, bambae yumi gat plante jans blong ridim mo tingbaot stampa vas blong yia ya, Ol Sam 143:10: “Plis yu tijim mi blong mi mekem ol samting we yu yu wantem.” Taem yumi mekem olsem, yumi mas yusum ol jans we yumi gat blong tingbaot ol gudfala samting we God i stap mekem blong tijim yumi, olsem yumi tokbaot finis antap. Mo yumi mas tingting dip long ol tok ya blong oli save pusum yumi blong folem samting we oli talem. Hemia from we, yumi save se, “man we i stap mekem ol samting we God i wantem, hem i stap we bambae i no save lus samtaem.”—1 Jon 2:17.
?Bambae Yu Ansa Olsem Wanem?
◻ ?Hu olgeta tede we oli stap kasem tijing blong mekem ol samting we Jeova i wantem?
◻ ?Ol Sam 143:10 i mas mekem wanem samting long yumi long yia 1997?
◻ ?Olsem wanem yumi stap kasem tijing blong mekem ol samting we Jeova i wantem?
◻ ?Ol Kristin papa mama oli mas mekem wanem taem oli stap tijim ol pikinini blong olgeta?