Nekis Program Blong Spesel Dei Asembli
1 Stampa tok blong nekis spesel dei asembli samtaem afta Septemba, hemia “Stap Olsem Ol Man We Jeova i Stap Tijim Olgeta.” (Jon 6:45) Tijing we i kamaot long Jeova i rili givhan long yumi blong haremgud long laef. Hem i wokem insaed long yumi wan strong fasin tangkyu from ol samting we yumi kasem long saed blong speret. Fasin traehad blong yumi blong halpem ol narafala blong harem gud nyus, i mekem se yumi mekem wan gudfala wok long ol man raonabaot long yumi. Spesel dei asembli bambae i makem ol blesing we ol man we Jeova i stap tijim olgeta, oli kasem.
2 Program bambae i soem olsem wanem tijing blong God i defren long ol denja we oli kamaot from ol waes blong wol. Bambae yumi luk moa klia olsem wanem Jeova i givim beswan edukesen long yumi—edukesen we i stanap long Tok blong hem, Baebol. Bambae oli tokbaot tri haf blong wosip blong yumi we yumi haremgud long tijing blong God. Mo tu, bambae i gat ol toktok blong leftemap tingting blong ol yangfala blong folem ol gudfala eksampel long Baebol, olsem Deved mo Timote, mo blong mekem ol wok long saed blong speret i stap olsem stampa samting long laef blong olgeta. Mo tu, bilif blong yumi bambae i kam strong moa, taem oli tokbaot fasin fasgud blong ol olfala brata mo sista. Olgeta we oli jes givim laef blong olgeta i go long Jeova mo we oli naf, bambae oli tekem baptaes. Longtaem lelebet bifo long asembli, oli mas talemaot samting ya long presiden elda.
3 Bigfala tok blong spesel dei asembli, hemia, “Jeova i Stap Tijim Yumi Blong Mekem Samting We Hem i Wantem.” Bambae tok ya i makem ol risen from wanem yumi evriwan i mas gohed blong kasem save, kam strong moa long bilif, mo gohed moa. Bambae hem i pusum yumi blong folem Jeova tru long fasin we yumi tijim ol narafala long trutok we i save lidim olgeta blong kasem laef we i no save finis. Bambae i gat sam gudfala ekspiryens blong soem olsem wanem ol buk blong Sosaeti oli givhan long plante blong kasem tijing blong Jeova. Bambae oli tokbaot ol gudfala samting we oli kamaot long wol from program blong Jeova blong tijim ol man.
4 Mekem sua se yu kam. Pulum olgeta we oli intres tu blong kam. Yu save tingrere long plante gudfala tijing we bambae yumi kasem long Nambawan Tija blong yumi.—Aes. 30:20.