Program Blong Spesel Dei Asembli Long Yia 2010
1. (a) ?Sam spesel dei asembli we oli pas finis, oli karem wanem stamba tok we i kamaot long Baebol? (b) ?I gat sam advaes long ol spesel dei asembli we oli pas finis, we i bin givhan long yu long wok blong prij?
1 “Yufala i Mas Sua Blong Mekem Ol Samting We Oli Impoten Moa,” “Wan Kampani Blong Sipsip We i Stanap Strong,” “Gohed Blong Witnes Long Trutok” mo “Yumi Olsem Graon—Jeova i Man Blong Wokem Graonpot.” (Fil. 1:9, 10, 27, NW; Jon 18:37, NW; Aes. 64:8) Hemia sam nomo long ol stamba tok blong ol spesel dei asembli we oli pas finis. ?Olsem wanem? ?Yu yu wantem tumas blong go long spesel dei asembli blong seves yia 2010? Stamba tok blong asembli ya, hemia: ‘I No Gat Plante Taem i Stap,’ we i stanap long 1 Korin 7:29.
2. ?Yumi save mekem wanem blong bambae yumi glad tumas blong stap long asembli ya?
2 Taem oli talemaot stret dei blong asembli ya long kongregesen blong yumi, i gud yumi stat blong tokbaot wetem ol brata mo sista, blong yumi givgivhan long yumi blong glad blong stap long asembli ya. Sam papa mama oli makem dei ya long kalenda, mo oli putum wan mak long ol wanwan dei go kasem stret dei blong asembli. Mo tu, oli pinim wan lis i stap long kalenda, blong talem ol samting we evriwan oli mas karem i go long asembli. Ol samting ya i givhan long famle blong wet wetem glad from asembli ya. Long naet blong Famle Wosip blong yufala, maet yufala i save luklukbak long ol not we yufala i bin raetem long sam spesel dei asembli we oli pas finis. Mo tu, yu save rerem hat blong yu from asembli ya sipos yu ridim bakegen pej 13-16 blong buk ya Benefit From Theocratic Ministry School Education. Samting ya i save halpem yu mo famle blong yu blong lesingud mo ‘tingting gud long ol tok we yufala i stap harem.’—Luk 8:18.
3. ?Olsem wanem blong mekem se ol save we yumi harem long asembli bambae i givhan fulwan long yumi?
3 Mekem Samting We Yu Lanem i Wok: Long en blong wan asembli, yumi harem plante man oli talem se, “!Program blong asembli ya i nambawan!” Oltaem samting ya i tru, from we hemia wan long ol gudgudfala samting we Jeova i stap givim long yumi. (Prov. 10:22) Be, blong mekem se ol save ya i karem frut, yu mas tingting dip long hem mo holem i stap long hat blong yu. (Luk 8:15) Afta long asembli, taem yu mo famle blong yu i stap wokbaot blong gobak long haos, no taem yu stap tekem samfala oli gobak long haos blong olgeta long trak blong yu, i gud yufala i tektaem blong tokbaot program ya. Tokbaot ol mak we yufala wanwan i wantem kasem, mo ol save we bambae i givhan long yufala long wok blong prij. Sipos yufala i mekem olsem, ol save we yufala i harem long asembli bambae i gohed blong givhan long yufala, longtaem afta we asembli i finis.—Jem. 1:25.
4. ?From wanem asembli ya bambae i spesel long yumi?
4 Taem yumi kasem wan presen we yumi save yusum mo hem i stret samting we yumi nidim, yumi harem se i spesel. ?Yu yu glad tumas blong tingbaot wanem presen we maet Jeova bambae i givim long yumi long nekis spesel dei asembli? Yumi sua se bambae hem i wan samting we yumi save yusum gud. Yumi save se Papa blong yumi long heven, Jeova, bambae i givim stret presen we yumi nidim, taem yumi kasem ol gudfala tok blong leftemap tingting, mo trening blong halpem yumi blong gohed long wok ya we hem i givim long yumi.—2 Tim. 4:2; Jem. 1:17.