Tok Blong God i Gat Paoa
1. ?Wanem stamba tok blong asembli blong wan dei?
1 Baebol i gat paoa blong jenisim yumi. Hem i save stretem ol tingting blong yumi blong oli laenap long samting we Jehova i wantem. Hemia wan samting we yumi ol man yumi no save mekem. ?Tok blong God i gat paoa olsem wanem? ?Yumi save yusum paoa ya long laef blong yumi olsem wanem? ?Yumi save yusum gud tok blong God olsem wanem blong givhan long ol narafala? Yumi sua se bilif blong yumi evriwan bambae i kam strong moa, taem yumi kasem ansa blong ol kwestin ya long asembli blong wan dei blong 2014. Stamba tok blong hem i stanap long Hibrus 4:12, mo i talem se “Tok Blong God i Gat Paoa.”
2. ?Wanem ol kwestin we bambae yumi faenem ansa blong olgeta?
2 Yu Traem Faenem Ansa Blong Ol Kwestin Ya: Taem yu stap lesin long ol tok, yu makemgud ansa blong ol kwestin ya.
• ?From wanem yumi mas trastem Tok blong Jehova? (Sam 29:4)
• ?Yumi mas mekem wanem blong Tok blong God i gat paoa long laef blong yumi? (Sam 34:8)
• ?Yu save letem paoa blong Tok blong God i lidim yu long wok blong prij olsem wanem? (2 Tim. 3:16, 17)
• ?Yumi save mekem wanem blong paoa blong wol blong Setan i no save trikim yumi? (1 Jon 5:19)
• ?Ol yangfala, yufala i save mekem wanem blong yufala i kam ol gudfala man blong wok blong God? (Jer. 17:7)
• ?Olsem wanem yumi save kasem paoa taem yumi no gat paoa? (2 Kor. 12:10)
• ?Wanem i save givhan long yumi blong gohed blong jenis, nating se yumi gat ol strong fasin long hat blong yumi? (Efes. 4:23)
3. ?Asembli ya bambae i givhan long yumi olsem wanem?
3 !Bambae yumi glad tumas blong kasem ol impoten save ya! Mo tu, asembli ya wetem asembli blong tu dei mo asembli blong tri dei, bambae oli givhan long yumi blong joen gud moa wetem ol brata mo sista blong yumi long ol defren kongregesen. (Sam 133:1-3; 2 Kor. 6:11-13) From samting ya, i gud we yu joen gud wetem ol fren blong yu mo yu traem faenem sam niufala fren. Sipos wan brata long branj ofis no long Betel i kam blong givim tok long asembli ya, i gud yumi welkamem hem mo waef blong hem. !Yes, yumi gat plante risen blong wet long asembli blong wan dei we i stap kam!