Nyufala Program Blong Spesel Dei Asembli

Program ya blong spesel dei asembli i bin stat long 1987. Hem i wan miting we i tekem wan dei. Miting ya i rili mekem se ol man blong Jeova mo olgeta we oli intres oli strong long saed blong bilif. Stat long Septemba 1998, bambae yumi kasem wan nyufala program blong spesel dei asembli. Ol naen tok blong asembli ya mo ol haf we oli askem kwestin long sam brata sista, wetem ol ekspiryens, bambae oli givhan bigwan long yu long saed blong speret.

“Soem Bigfala Tangkyu From Ol Kakae blong Blong Jeova.” Hemia nao stampa tok blong nyufala program ya. (Aes. 65:14; 1 Kor. 10:21) Tok ya bambae i givim paoa long strong tingting we yumi gat blong putum wosip blong Jeova long fasples long laef blong yumi. (Ol Sam 27:4) Bambae seket elda i givim tok ya, “Luklukgud Long Samting We i Pusum Hat Blong Yumi,” we i tokbaot fasin blong go long ol miting. Wan brata bambae i soemaot long yumi olsem wanem “Kakae Long Tebel Blong Jeova i Save Mekem Yumi Strong Oltaem Long Saed Blong Speret.” Ol yangfala long ogenaesesen blong Jeova bambae oli kasem ol advaes we oli wokgud, blong oli gohed strong oltaem long wok blong God. Bigfala tok blong brata we bambae i visitim yumi, hemia “Kam Strong Long Saed Blong Speret Blong Givim Wan Strongfala Wetnes.” Bambae tok ya i soem olsem wanem ol help we yumi kasem tru long kongregesen oli save mekem yumi nafgud blong givim strongfala wetnes long saed blong Kingdom. Yes, yumi evriwan i wantem kasem blesing from program ya.

Olgeta we oli jes givim laef blong olgeta long Jeova, mo oli wantem baptaes, oli mas talemaot kwiktaem long presiden elda. Mifala i sua se taem yumi statem namba 12 yia blong spesel dei asembli, evriwan we oli joen long program ya, bambae oli kam strong long saed blong speret blong mekem ol wok we oli stap yet.