Program Blong Nekis Spesel Dei Asembli

“Mekem Olgeta Samting From Gud Nyus,” hemia stampa tok blong nekis spesel dei asembli we bambae i kamaot samtaem afta Septemba. (1 Kor. 9:​23) Gud nyus blong Kingdom i moa impoten bitim ol narafala nyus tede. Asembli ya bambae i givhan long yumi blong luksave spesel blesing we yumi gat blong karem nambawan nyus ya i go long ol man. Mo tu, bambae i mekem yumi strong blong gohed nomo blong talemaot gud nyus ya.​—Wok 5:⁠42.

Program ya bambae i soem long yumi olsem wanem blong yusum fulwan ol tiokratik trening we yumi kasem, blong karem moa frut long wok blong prij. Bambae yumi harem tok blong samfala we oli bin jenisim sam samting long laef blong olgeta blong mekem moa, wetem sam yangfala tu we oli stap givim laef blong olgeta fulwan blong mekem gud nyus i go moa.​—Skelem wetem Filipae 2:​22.

Wan brata bambae i kam long asembli ya blong givim bigfala tok blong asembli, we i makem nid blong stap “stret blong karem gud nyus ya.” (1 Tes. 2:4) Bambae yumi kasem save se sipos yumi wantem holem blesing ya blong seremaot gud nyus long ol narafala, ol fasin mo tingting blong yumi oli mas laenap oltaem wetem ol loa mo rul blong God. Bambae hem i tokbaot ol blesing we yumi save kasem taem yumi mekem olsemia.

Yu no mas mestem impoten asembli ya. Olgeta we oli jes givim laef blong olgeta long Jeova mo oli wantem tekem baptaes long spesel dei asembli ya, oli mas talemaot kwiktaem long presiden elda. Singaot olgeta we yu stadi wetem olgeta blong kam. Yumi mas letem Jeova i givim paoa long yumi blong mekem olgeta samting from gud nyus. Olsem nao, bambae yumi finisim wok ya we i bigwan moa bitim ol narafala wok bifo Amageden.