!Olgeta We Oli Stap Wekapgud Bambae Oli Haremgud!
‘Yufala i lesin. Bambae mi mi kamtru long yufala olsem we man blong stil i kam. Man we i stap wekapgud, i no tekemaot klos blong hem blong i slip, bambae hem i save haremgud.’—REVELESEN 16:15.
1. ?From we dei blong Jeova i kolosap, yumi save se wanem samting bambae i kamaot?
!BIGFALA dei blong Jeova i kolosap, mo samting ya i minim se wan faet bambae i kamaot! Long vison, aposol Jon i luk “tri rabis devel” we trifala i olsem frog. Oli go long olgeta “king,” no rula blong wol. ?Blong mekem wanem? Yes, “blong tekem olgeta oli kam wanples, blong oli mekem faet long bigfala Dei blong God ya we i gat olgeta paoa.” Jon i talem tu se: “Trifala devel ya, trifala i tekem ol king oli kam wanples long ples ya we long lanwis blong ol man Isrel oli talem se ‘Amageden’ we i min se ‘Bigfala Hil blong Megido.’ ”—Revelesen 16:13-16.
2. ?Hu ya Gog blong Magog, mo wanem bambae i hapen taem hem i girap agensem ol man blong Jeova?
2 I no longtaem, bambae Jeova i pusum ol politik gavman blong wol ya blong spolem Bigfala Babilon, hemia olgeta gyaman skul blong wol. (Revelesen 17:1-5, 15-17) Biaen, Gog blong Magog, Setan, we oli sakemaot hem long heven i kamdaon long wol ya finis, bambae i lidim ol ami blong hem blong agensem fulwan ol man blong Jeova, we oli stap long pis mo i olsem se i no gat wan samting i blokem olgeta. (Esikel 38:1-12) Be God bambae i tekem aksin blong sevem ol man blong hem. Samting ya bambae i makem stat blong “bigfala dei blong Jeova we i mekem man i fraet.”—Joel 2:31; Esikel 38:18-20.
3. ?Olsem wanem yu save eksplenem samting we Esikel 38:21-23 i tokbaot?
3 Yes, taem ol fasin blong wol ya oli kasem mak we Amageden i kamtru, bambae Jeova i sevem ol man blong hem mo i spolem olgeta laswan haf blong wol blong Setan. Ridim profet tok blong Esikel 38:21-23, mo traem mekem pija long tingting blong yu. Bambae Jeova i yusum paoa blong hem blong mekem bigbigfala ren i foldaon, ol bigfala ston blong aes we oli spolem ol samting, faea i laet long skae, mo bigfala sik blong givim ded. Bigfala fraet bambae i kasem olgeta man long wol, taem God i mekem tingting blong ol ami blong Gog i fasfas, nao oli kilkilim olgeta bakegen. Ol enemi blong God ya we i gat Olgeta Paoa, we oli stap yet long taem ya, bambae Jeova i kilim olgeta oli ded, taem hem i yusum bigfala paoa blong hem blong mekem ol samting blong sapraes blong sevem ol man blong hem. Afta long “bigfala trabol” we Baebol i tokbaot, bambae i no moa gat wan haf nating blong rabis wol blong Setan, i stap. (Matyu 24:21) Be long taem ya we ol rabis man oli stap harem nogud mo kolosap oli ded, bambae oli kasem save hu nao i mekem trabol ya long olgeta. God blong yumi we i win, hem nao i talem se: “Bambae oli save se mi mi Jeova.” Ol bigbigfala trabol ya bambae oli kamaot long taem blong yumi, taem ya we Kraes i stap bakegen.
Kam Olsem Man Blong Stil
4. ?Long wanem fasin bambae Jisas i kam blong spolem ol nogud fasin blong wol ya?
4 Masta Jisas Kraes we God i givim bigfala paoa long hem, i talem se: “Yufala i lesin. Bambae mi mi kamtru long yufala olsem we man blong stil i kam.” Wan man blong stil i kam wantaem nomo, long wan taem we ol man oli no tingbaot, taem bighaf blong olgeta oli stap slip. Taem Jisas i kam olsem wan man blong stil blong spolem ol rabis fasin blong wol ya, bambae hem i sevem olgeta we oli rili stap wekapgud. Hem i talem long Jon se: ‘Man we i stap wekapgud, i no tekemaot klos blong hem blong i slip, bambae hem i save haremgud. Bambae hem i no wokbaot neked, we ol man oli luk we hem i sem.’ (Revelesen 16:15) ?Ol tok ya oli minim wanem? ?Mo olsem wanem yumi save stap wekap long saed blong speret?
5. ?Wanem plan we oli folem blong mekem wok insaed long haos prea, taem Jisas i stap long wol?
5 Naoia, oli no stap tekemaot klos blong wan gad sipos hem i slip long wok blong hem. Be oli mekem samting ya long haos prea long Jerusalem taem Jisas i stap long wol, mo taem ol kampani blong pris mo Livaet oli stap wok long haos prea long Jerusalem. Hem i long ol yia 1100 kasem 1000 B.K.T. we King Deved i seraotem ol handred pris blong Isrel mo ol taosen Livaet we oli givhan long olgeta, oli go long 24 kampani. (1 Kronikel 24:1-18) I gat bitim wan taosen man blong wok long ol kampani ya wanwan, mo ol man ya oli kasem gudfala trening. Wanwan long ol kampani ya oli gat prapa taem blong olgeta blong mekem wok long haos prea, hemia blong wan ful wik, tu taem long wan yia. Be long Lafet blong ol Wansaed Haos, ol 24 kampani ya, evriwan oli mekem wok. Oli nidim moa help tu long lafet blong Pasova.
6. ?Maet Jisas i stap tingbaot wanem samting taem hem i talem se, ‘Man we i stap wekapgud, i no tekemaot klos blong hem blong i slip, bambae hem i save haremgud’?
6 Taem Jisas i talem se, ‘Man we i stap wekapgud, i no tekemaot klos blong hem blong i slip, bambae hem i save haremgud,’ maet hem i stap tingbaot wan plan we oli folem taem oli mekem gad long tempel. Misna blong ol man Jyu i talem se: “Ol pris oli mekem gad long trifala ples long Haos Prea: long Rum blong Abtinas, long Rum blong Smok, mo long Rum blong Faea. Mo ol livaet oli mekem gad long twante-wan ples: faef gad long ol faef get blong Hil blong Haos Prea, fo long ol fo kona blong hem insaed, faef long ol faef get long Kot blong Tempel, fo long ol fo kona blong hem afsaed, wan long Rum blong Givim Ol Presen, wan long Rum blong Kaliko, mo wan biaen long ples we Jea blong Sore i stap long hem [afsaed long wol we i stap long en blong Tabu Ples we i Tabu Tumas]. Man we i lukaot long Hil blong Haos Prea, i goraon wetem wan laet, i jekem evriwan we oli stap mekem gad. Sipos wan gad i no stanap mo talem long hem se, ‘!O, man blong lukaot long Hil blong Haos Prea, pis i stap wetem yu!’ mo i klia se gad ya i stap slip, bambae hem i kilim gad ya wetem stik blong hem, mo hem i gat raet tu blong bonem klos blong hem.”—Misna, Midot (“Measurements”), 1, paragraf 1-2, we Herbert Danby i tanem i kam long Engglis.
7. ?From wanem ol pris mo ol Livaet we oli mekem gad long haos prea oli mas stap wekap?
7 Ol Livaet mo pris long ol kampani ya we oli stap wok, oli mas wekap long ful naet blong mekem gad, mo blong blokem eni man we hem i no klin blong i no kam insaed long yad blong haos prea. Long evri naet, “man we i stap lukaot long Hil blong Haos Prea,” no “kapten blong haos prea,” i goraon long ol 24 ples we ol gad oli stanap long olgeta. Taswe, ol wanwan gad oli mas stap wekap. Sipos no, kapten blong haos prea i save faenem we oli no stap lukaotgud long wok blong olgeta.—Ol Wok 4:1.
8. ?Wanem samting we i olsem klos blong ol Kristin?
8 Ol tabu Kristin mo ol man we oli wok wetem olgeta, oli mas stap wekapgud long saed blong speret, mo oli no mas tekemaot samting we i olsem klos blong olgeta. Hemia ol samting we oli soem se Jeova i givim wok long yumi long haos prea blong Hem long saed blong speret. Blong pruvum samting ya, yumi gat tabu speret, no strongfala paoa blong God, blong givhan long yumi blong mekem wok, mo blong tekem ol jans olsem ol man blong talemaot Kingdom. Sipos yumi slip long wok blong yumi olsem ol Kristin minista blong God, yumi stap long bigfala denja, from we Jisas Kraes, Kapten blong bigfala haos prea long saed blong speret, bambae i faenem yumi. Sipos hem i faenem se yumi stap slip long saed blong speret, bambae i olsem se hem i tekemaot klos blong yumi mo i bonem olgeta. Taswe, ?olsem wanem yumi save stap wekap long saed blong speret?
?Olsem Wanem Yumi Save Stap Wekap?
9. ?From wanem i impoten tumas blong stadi long Baebol wetem ol Kristin buk blong givhan long yumi?
9 Fasin blong stadi oltaem long Baebol mo ol Kristin buk i save givhan long yumi blong stap wekapgud long saed blong speret. Stadi olsem bambae i mekem se yumi nafgud blong mekem Kristin minista wok blong yumi, bambae hem i givhan long yumi blong fesem ol trabol, mo bambae hem i soem rod blong kasem glad we i no save finis. (Proveb 8:34, 35; Jemes 1:5-8) Yumi mas mekemgud stadi blong yumi mo gohed oltaem blong lanem ol nyufala samting. (Hibrus 5:14 kasem 6:3) Sipos yumi tekem gudfala kakae oltaem, samting ya i save givhan long yumi blong stap wekap mo lukaotgud. Hem i save blokem yumi blong no kam slak, wan saen we i save soem se yumi hanggri. Yumi no gat risen blong hanggri mo slip long saed blong speret, from we God i stap givim plante kakae long yumi long saed blong speret, tru long tabu “slef ya we i stret mo waes.” (Matyu 24:45-47, NW) Fasin blong tekem kakae long saed blong speret oltaem tru long stadi wanwan mo famle stadi, hemia wan rod blong stap wekap mo blong ‘mekem fasin blong bilif i kam strong moa.’—Taetas 1:13.
10. ?Olsem wanem ol Kristin miting mo asembli, oli givhan long yumi blong stap wekap long saed blong speret?
10 Ol Kristin miting, mo ol asembli, oli givhan long yumi blong stap wekap long saed blong speret. Oli leftemap tingting mo givim ol jans long yumi blong ‘laekem ol man mo mekem ol gudfala fasin.’ I impoten we yumi joen wanples oltaem from we “dei ya we Masta blong yumi bambae i jajem olgeta man, hem i kam kolosap finis.” Naoia, dei ya i kolosap tumas. Hem i “dei blong Jeova.” Long dei ya, hae rul blong hem bambae i win. Sipos dei ya i rili impoten long yumi—mo i mas olsem—bambae yumi no save “lego ol miting.”—Hibrus 10:24, 25; 2 Pita 3:10.
11. ?From wanem yumi save talem se Kristin wok blong prij i impoten tumas blong mekem yumi stap wekapgud long saed blong speret?
11 Fasin blong joen long Kristin wok blong prij wetem ful hat blong yumi i impoten tumas blong mekem yumi stap wekapgud long saed blong speret. Fasin blong joen oltaem mo wok strong long wok blong talemaot gud nyus i mekem se yumi stap lukaotgud. Wok blong prij i givim plante jans long yumi blong toktok wetem ol man long saed blong Tok blong God, Kingdom blong hem, mo ol stampa tingting blong hem. Yumi haremgud taem yumi prij long ol haos wanwan, mekem ol visit, mo mekem Baebol stadi long haos blong ol man wetem ol buk olsem Save Blong Lidim Yu Long Laef We i No Save Finis. Ol elda long Efesas bifo oli save talem se Pol i tijim olgeta ‘long fes blong ol man mo long ol haos wanwan.’ (Ol Wok 20:20, 21) I tru, sam Wetnes blong Jeova we oli gat strong bilif, oli gat bigfala problem long saed blong helt. From samting ya, oli no save mekem plante long wok blong prij. Be oli faenem ol narafala rod blong talemaot Jeova mo rul blong hem. Mo samting ya i mekem oli haremgud tumas.—Ol Sam 145:10-14.
12, 13. ?From wanem yumi mas blokem fasin blong kakae mo dring bitim mak?
12 Blokem fasin blong kakae mo dring bitim mak, bambae i halpem yumi blong stap wekapgud long saed blong speret. Taem Jisas i stap tokbaot se bambae hem i stap bakegen, hem i talem long ol aposol blong hem se: “Yufala i mas lukaot gud. Sipos yufala i letem tingting blong yufala i kam slak, from we yufala i stap ronem lafet, mo yufala i stap drong mo yufala i stap tingting tumas long laef ya long wol, bambae dei ya blong mi i kam kasem yufala wantaem, olsem we trap i sat. From we bambae dei ya i save kamtru long olgeta man long wol.” (Luk 21:7, 34, 35) Fasin blong kakae bitim mak mo drong, oli no laenap wetem ol rul blong Baebol. (Dutronome 21:18-21) Proveb 23:20, 21 i talem se: “Yu no mas kam wan man we i dring tumas waen, no we i kakae mit bitim mak. From we man blong drong mo blong kakae bitim mak bambae i kam puaman, mo fasin slak bambae i mekem klos blong man i brobrok olbaot.”—Proveb 28:7.
13 Maet wan man we i kakae mo dring tumas i no kasem mak we vas ya i tokbaot, be fasin ya i save mekem se hem i slak, maet hem i les mo i no tinghevi long wok blong God. I tru, oltaem i gat ol wari long saed blong famle, helt, mo sam narafala wari bakegen. Be, bambae yumi glad sipos yumi putum ol samting long saed blong Kingdom long fasples long laef blong yumi, mo sipos yumi trastem Papa blong yumi long heven se bambae hem i givim ol samting we yumi nidim. (Matyu 6:25-34) Sipos no, “dei ya” bambae i kasem yumi olsem “we trap i sat,” maet olsem wan trap we oli haedem mo i kasem yumi from we yumi no luk hem. Sipos no, maet i olsem wan trap we i gat bet long hem, olsem hemia we i pulum anamol i kam nao i kasem hem wantaem nomo. Samting ya bambae i no hapen sipos yumi stap wekap, mo sipos yumi stap tingbaot oltaem se yumi stap long “taem blong en.”—Daniel 12:4.
14. ?From wanem yumi mas prea wetem fulhat blong yumi?
14 Fasin blong prea wetem fulhat i wan narafala rod blong givhan long yumi blong stap wekap long saed blong speret. Long bigfala profet tok we Jisas i givim, hem i talem se: “Oltaem, yufala i mas stap lukaot gud. Yufala i mas prea blong bambae yufala i gat paoa blong ronwe long olgeta trabol ya, blong bambae yufala i save stanap long fes blong mi, mi Pikinini blong Man.” (Luk 21:36) Yes, yumi mas prea se bambae yumi stap oltaem long saed blong Jeova, mo se bambae Jisas, Pikinini blong Man, i glad long yumi taem hem i kam blong spolem ol nogud fasin blong wol ya. Blong mekem i gud long yumi mo blong mekem i gud long ol brata mo sista blong yumi we yumi prea from olgeta, yumi mas ‘stap wekap long saed blong prea.’—Kolosi 4:2; Efesas 6:18-20.
I Gat Smoltaem Nomo i Stap
15. ?Wanem samting i kamaot from wok blong yumi olsem ol prija blong talemaot stret fasin?
15 Taem yumi stap wet long bigfala dei blong Jeova, i sua se yumi wantem mekem olgeta samting we yumi naf blong mekem, long wok blong hem. Sipos yumi prea long saed ya wetem ful hat blong yumi, maet ‘wan doa i open long yumi blong mekem wan gudfala wok.’ (1 Korin 16:8, 9) Long taem we God i makemaot finis, bambae Jisas i mekem jajmen mo putum ol “sipsip” we oli gat stret fasin, mo we oli stret blong kasem laef we i no save finis, oli go wansaed, mo putum ol “nani” we oli no ona long God mo we oli stret blong lus blong olwe, oli go narasaed. (Jon 5:22) I no yumi we i stap seraotem ol sipsip long ol nani. Be wok blong yumi naoia, olsem ol prija blong talemaot stret fasin, i stap givim jans long ol man blong jusum blong mekem ol samting we God i wantem long laef blong olgeta. From samting ya, oli save gat hop blong stap wetem ol man we Jisas i putum olgeta oli stap wansaed blong kasem laef, taem hem “i kam wetem olgeta paoa blong hem.” From we i gat smoltaem nomo i stap bifo we ol fasin blong wol ya oli finis, samting ya i makem long yumi se yumi mas wok wetem fulhat blong yumi, taem yumi stap traehad blong faenem olgeta we ‘oli stret blong kasem laef we i no save finis.’—Matyu 25:31-46; Ol Wok 13:48.
16. ?From wanem yumi mas wok strong olsem ol man blong talemaot Kingdom?
16 Long taem blong Noa, taem ya we God i makemaot blong wol i finis, i kasem en blong hem. Mo kolosap nao, taem ya we hem i makemaot blong wol ya i finis, bambae i kasem en blong hem tu. From samting ya, yumi mas wok strong blong talemaot Kingdom. Wok blong yumi blong prij i stap karem plante frut. Evri yia, i gat plante handred taosen man oli tekem baptaes blong soem se oli givim laef blong olgeta long God. Oli stap kam insaed long ogenaesesen blong Jeova we hem i stap blesem, hemia ‘ol man blong hem, ol sipsip blong hem.’ (Ol Sam 100:3) !Yumi glad tumas blong joen long wok blong talemaot Kingdom we i givim hop long plante man, bifo long “bigfala dei blong Jeova we i mekem man i fraet”!
17, 18. (a) ?Taem yumi stap prij, yumi save se bambae sam man oli mekem wanem fasin long yumi? (b) ?Wanem samting i sua blong hapen long ol man we oli stap laf long yumi?
17 Olsem Noa, God i stap sapotem mo protektem yumi. Yes, ol man, ol enjel we oli tekem bodi olsem man, mo ol Nefilim, ating oli laf long mesej we Noa i talemaot. Be samting ya i no blokem Noa. Tede, samfala oli laf taem yumi talemaot plante pruf blong soem se yumi stap long ‘ol las dei.’ (2 Timote 3:1-5) Fasin olsem i stret long profet tok blong Baebol long saed blong taem ya we Kraes i stap bakegen. Pita i raetem se: ‘Long ol las dei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli askem se “?Olsem wanem nao? ?Hem i promes finis blong kam, be hem i stap wea? Ol olfala blong yumi, ol man oli berem olgeta finis, be i no gat wan samting i jenis, i stat bifo olgeta, i kam kasem tede. Evri samting oli stap olsem nomo.” ’—2 Pita 1:16; 3:3, 4.
18 Tede, ol man ya we oli laf long yumi, maet oli stap tingting olsem se: ‘Stat long taem we God i mekem wol, kam kasem naoia, i no gat wan samting i jenis. Laef i stap gohed sem mak nomo, ol man oli stap kakae, oli stap dring, oli mared, mo oli gat pikinini. Nating sipos Jisas i stap finis, bambae hem i no jajem ol man long taem blong mi.’ !Ol man ya oli rong olgeta! Sipos oli no ded bifo we dei blong Jeova i kam, bambae dei ya we i mekem man i fraet, i sua blong spolem olgeta, olsem we ol rabis man long taem blong Noa oli lus long wan bigfala fasin taem Bigfala Wora i ron.—Matyu 24:34.
!I Impoten Tumas We Yumi Stap Wekap!
19. ?Olsem wanem yumi mas tingbaot wok blong yumi blong mekem disaepol?
19 Sipos yumi givim laef blong yumi finis long Jeova, yumi no mas letem ol tingting we oli no stret oli mekem yumi slip. Hemia taem blong stap wekap, taem blong soem bilif long ol profet tok blong God, mo blong gohed long wok blong ‘pulum ol man long olgeta ples blong wol oli kam man blong Jisas.’ (Matyu 28:19, 20) Naoia, we i kolosap tumas long taem we ol rabis fasin blong wol ya bambae oli lus blong olwe, i no gat wan blesing we i moagud i bitim we yumi mekem wok blong Jeova God, we Jisas Kraes i lidim yumi long hem, mo tu, blong joen long bigfala wok blong ‘talemaot gud nyus blong kingdom’ long olgeta ples blong wol, bifo we en i kam.—Matyu 24:14; Mak 13:10.
20. ?Kaleb mo Josua, tufala i soem wanem eksampel, mo eksampel blong tufala i soemaot wanem long yumi?
20 Sam long ol man blong Jeova oli bin mekem wok blong Jeova blong plante yia finis, maet blong ful laef blong olgeta. Be, nating sipos yumi jes stat blong folem trufala wosip i no longtaem, i gud yumi mekem olsem man Isrel ya Kaleb, we hem i “folem Jeova fulwan.” (Dutronome 1:34-36) Hem mo Josua, tufala i reregud blong go insaed long Promes Lan, smoltaem afta we ol man Isrel oli kamfri long Ijip we oli bin stap kalabus. Be, ol man Isrel we oli bigman finis, olsem wan grup, oli sot long bilif. From samting ya, oli mas stap 40 yia long draeples, mo oli ded long ples ya. Kaleb mo Josua, tufala i stanap strong tru long ol hadtaem we tufala i kasem wetem olgeta long taem ya. Be biaen, tufala man ya i go insaed long Promes Lan. (Namba 14:30-34; Josua 14:6-15) Sipos yumi “folem Jeova fulwan,” mo stap wekap long saed blong speret, bambae yumi kasem glad ya blong go insaed long nyufala wol we God i promes long hem.
21. ?Wanem bambae i kamaot long yumi sipos yumi stap wekap long saed blong speret?
21 I gat pruf we i soem klia se yumi stap laef long taem blong en, mo se bigfala dei blong Jeova i kolosap. Naoia i no taem blong wantem slip mo blong no tinghevi long wok blong God. I gat wan rod nomo blong kasem blesing, hemia blong stap wekap long saed blong speret, mo no tekemaot klos we i makem yumi olsem ol Kristin minista mo man blong Jeova. I gud yumi mekem tingting blong yumi i strong blong ‘stap wekap, stanap strong long bilif, gohed olsem ol strong man, mo kasem paoa.’ (1 Korin 16:13) I gud se yumi ol man blong Jeova, yumi evriwan i stanap strong mo no fraet. Olsem nao, bambae yumi stap long medel blong ol man we oli rere taem bigfala dei blong Jeova i kamtru, bambae yumi stap wok wetem strong bilif long medel blong ol hapi man we oli stap wekap.
?Bambae Yu Yu Ansa Olsem Wanem?
◻ ?Olsem wanem yu save eksplenem samting we i olsem klos blong yumi, mo yumi save mekem wanem blong no tekemaot klos ya?
◻ ?Wanem sam rod blong stap wekap long saed blong speret?
◻ ?From wanem yumi save se bambae ol man oli laf long yumi, mo yumi mas gat wanem tingting long saed blong ol man ya?
◻ ?Yumi mas gat wanem tingting long saed blong wok blong yumi blong mekem disaepol long ol las dei ya?
[Tok makem poen long pej 16]
Ol Kristin oli gat tabu speret blong God blong givhan long olgeta blong stap wekap, mo blong mekem wok
[Tok blong pija long pej 15]
?Yu yu gat strong tingting blong stap wekap long saed blong speret mo no tekemaot samting we i olsem klos blong yu?