“Mi Mi Wan Nomo Long Plante Man We Yu Givhan Long Olgeta”
LONG Janewari 1996, Carol i kasem sik ya, kansa blong bren. Hem i gat bitim 60 yia. Kam kasem taem ya, hem i glad oltaem, hem i strong long bodi, mo ol tok blong hem oli leftemap tingting blong ol narafala. Be naoia, ol dokta oli stap traehad blong winim nogud sik ya we hem i save ded from. Taem Carol i stap harem nogud from sik ya, hem i kasem leta ya:
“Halo Carol:
“Mi sore tumas we yu gat problem long saed blong helt. Yumi glad se yumi gat trufala hop, we Baebol i givhan long yumi blong kasem save long hem mo blong laekem tumas. Hemia hop long saed blong Kingdom blong Jeova se bambae hem i rulum wol, nao yumi save laef long paradaes. Hemia wan taem we yumi stap wet long hem.
“Mi mi wantem talemaot long yu se wok blong prij we yu yu mekem i sevem plante man, blong oli no ded blong olwe. Mi mi wan long ol man ya. Mi no save sipos yu rimemba faswan taem we yu kam luk mi. Long taem ya, mi mi gat 20 yia. Mi mi gat longfala hea, mi stap salem drag, mo mi stap joen wetem wan grup blong ol stronghed yangfala. Mifala evriwan i karem masket, mo mifala i no gat trufala lav long eni man, mifala i tingbaot mifala nomo.
“Yu wetem wan narafala Wetnes, yutufala i kam long haos blong mi mo yu soem Wajtaoa mo Wekap! long mi. Mi wantem givim wan dola long yu, mo mi talem long yu se mi no wantem tufala buk ya. Yu talem long mi se yu no kam blong kasem mane long ol man, mo se yu stap givhan long ol man blong ridim Baebol. Mi no rimemba sipos mi bin tekem mo ridim tufala buk ya. Be, yu planem sid blong trutok long laef blong mi.
“Sam yia biaen, wan narafala Wetnes, Gary, i kam long haos blong mama blong mi, mo mi stap long taem ya. Mi talem long hem se yu bin kam luk mi sam yia bifo. Gary i stadi Baebol wetem mi blong longtaem, gogo mi mi tekem baptaes long 1984. Naoia, mi stap tijim ol pikinini blong mi long trutok long saed blong Kingdom blong God.
“Mi sua se mi mi wan nomo long plante man we yu bin givhan long olgeta, long ol yia we yu bin holemstrong long wok blong prij. Be, tru long kaen fasin ya wetem lav, yu yu mekem se mi mo famle blong mi, mifala i kasem save long God ya we i Hae Olgeta, Jeova, mo Pikinini blong hem, Jisas Kraes. Mi stap wet long taem ya we bambae mi luk yu long nyufala wol, taem Jeova bambae i ravemaot wora blong ae blong yumi, nao bambae i no moa gat ded.—Revelesen 21:4.
“Long saed blong mi mo famle blong mi, mifala i glad se mifala i gat jans blong save yu mo blong stap olsem frut blong wok blong prij we yu yu mekem. Tangkyu.
“Wetem Kristin lav,
Peter”
Long Maj 1996, Carol i ded afta we hem i bin sik blong sikis manis. Hem i planem plante sid blong trutok long ol 35 yia we hem i stap wok strong blong talemaot gud nyus. Hem i luksave se yumi no save wetaem bambae wan sid i karem frut, maet plante yia biaen nomo.—Matyu 13:23.