Wan Loea i Faenemaot Moa Long Saed Blong Ol Witnes Blong Jeova

“MI NO save plante samting long saed blong ol Witnes blong Jeova.” Hemia wanem we Les Civin i talem. Hem i wan loea mo daerekta blong wan kampani blong loa long Saot Afrika. ?Wanem i mekem se hem i wantem save moa long saed blong bilif blong ol Witnes? ?Wanem tingting blong hem long bilif blong olgeta? Ol haf we oli kam biaen oli ol ansa we hem i talem long Wekap!

?Yu yu gruap long wanem jos?

Famle blong mi oli folem skul blong ol man Jiu, be long stat blong ol yia 1970 mi mi mared long Carol we hem i Anglikan. Carol i no intres nating long ol jos, mo ol jos oli no gat paoa nating long laef blong mifala long taem ya. Be taem boe blong mitufala Andrew, i gat eit yia blong hem, Carol i harem se mitufala i mas mekem wan samting blong tijim hem, blong i save wan jos. Wan tija blong skul blong ol man Jiu i talem long mi se sipos Carol i joenem skul blong mi, bambae samting ya i mekem se Andrew i kam wan Jiu tu. Mo taem Andrew i gat 13 yia, bambae hem i save mekem Bar Mitzvah we i wan spesel seremoni blong ol man Jiu. Ale mifala i stat blong go evri wik long haos prea, long ol kos blong man we i wantem joenem skul blong ol man Jiu.

?Wanem i mekem se yu storian wetem ol Witnes blong Jeova?

Taem ol Witnes oli kam long haos blong mifala, oltaem mi sakem wan tok blong blokem olgeta. Mi talem long olgeta se: “Mi mi wan Jiu mo mi no bilif long Niutesteman.” Wan dei, Carol i talem long mi se wan fren blong hem i wan Witnes, mo woman ya i save gud Baebol. Carol i talem se maet i gud blong mitufala i traem lanem moa long saed blong Baebol. Ale mi mi agri blong stadi wetem ol Witnes, be tingting blong mi i no strong long stadi ya.

?Wanem tingting blong yu long Baebol stadi ya?

Mi mi ting se mi gat moa save bitim Witnes we i mekem stadi long mi. Mi mi kam strong bakegen long ol bilif blong skul blong ol man Jiu mo mi harem se mi mi stap long spesel neson ya we God i jusumaot. Tingting blong mi se, ‘olgeta ya oli no save tijim wan samting long mi.’ Long faswan storian we mitufala i gat wetem Witnes we i kam long haos blong mitufala, mi mi talem long hem se: “Mi mi bon long skul blong ol man Jiu. Hemia jos blong mi, mo bambae mi mi ded long skul blong ol man Jiu. Yu no save talem wan samting we bambae i jenisim tingting blong mi.” Long kaen fasin, Witnes ya i soemaot se hem i kasem save long tingting blong mi. Ale long Fraede mo Mande naet, mitufala i go long ol kos blong joen long skul blong ol man Jiu, mo long Sande moning (sipos mi no gat eksius) mitufala i stadi wetem ol Witnes. Be mi makem se olgeta oli mekem stadi long man fri nomo, i no olsem ol kos long haos prea blong ol man Jiu.

Mi mi yusum Baebol blong ol man Jiu, from we mi ting se ol Witnes oli yusum wan Baebol we i folem tingting blong olgeta nomo. Be mi sapraes taem mi luk se tufala Baebol ya oli tokbaot sem samting nomo. Samting ya i mekem se tingting blong mi i kam strong moa, blong soemaot se samting we ol Witnes oli stap talem i no stret.

Afta we mitufala i go long sam kos we tija blong skul blong man Jiu i givim, Carol i talem se long tingting blong hem, tija ya i no save gud Baebol. Carol i talem long mi se bambae hem i no moa go long ol kos, mo se hem i no save sakemaot Jisas olsem Mesaea mo Kraes. Mi mi harem nogud tumas mo mi tingbaot blong divos long hem. Be afta, taem tingting blong mi i godaon, mi tingbaot blong yusum wan narafala rod. Bambae mi yusum save blong mi olsem wan loea, blong pruvum long Carol se ol Witnes oli rong, oli wan ‘krangke grup’ nomo.

?Olsem wanem? ?Yu winim hem?

Wan tija blong skul blong mi i givim wan buk long mi we i blong pruvum se ol profet tok long saed blong Mesaea, oli no kamtru long Jisas. Blong 18 manis, mi mo Carol, mitufala i stadi long buk ya tugeta. Mo mitufala i gohed blong stadi evri wik wetem ol Witnes tu. Be taem mitufala i stadi long wanwan profet tok we i stap long buk blong tija ya, tingting blong mi i trabol moa. Nomata wanem samting we buk ya i talem, be ol profet tok long Baebol oli kamtru evritaem long wan man nomo, hemia Jisas Kraes. Samting ya i jes kam klia gud long mi taem mifala i stadi long profet tok we i stap long Daniel 9:24-27. Profet tok ya i talemaot se bambae Mesaea i kamtru long yia 29 K.T.a Witnes we i mekem stadi blong mitufala, i karem wan Baebol we i stap long Hibru lanwis. Long Baebol ya, aninit long wanwan Hibru tok, i gat Inglis tok blong hem. Mi mi jekem gud ol tok ya, mi kaontem ol yia we profet tok ya i talem, mo mi talem se: “Oraet, profet tok ya i pulum tingting blong yumi i go long yia 29 K.T. ?Be afta? ?Olsem wanem samting ya i joen wetem Jisas?”

Witnes ya i talem se: “Hemia yia we Jisas i baptaes.”

!Mi mi sapraes bigwan! Mo mi sapraes blong luk olsem wanem ol profet tok blong Baebol oli kamtru stret olsem we oli talem mo oli joen gud.

?Wanem tingting blong ol fren blong yu taem oli luk se tingting blong yu i jenis?

Samfala oli wari bigwan. Oli ting se ol Witnes oli stap fosem mitufala blong bilif long ol tijing blong olgeta, ale oli talem se bambae oli tekem mi mo woman blong mi, blong mitufala i go storian wetem ol man we oli save givhan long mitufala blong luksave samting ya. Be mitufala i lukaot plante save blong jekemap ol samting ya we mitufala i lanem, mo mitufala i luk se ol tijing ya oli stret nomo, mekem se mitufala i bilif long olgeta. I no gat man i fosem mitufala nating.

?Wanem i mekem se yu wantem kam wan Witnes?

Fastaem, mi mi go long sam miting long Haos Kingdom wetem woman blong mi we hem i kam wan Witnes finis.b Long ol miting ya, mi mi sapraes long kaen fasin blong ol Witnes mo long fasin blong olgeta blong lavlavem olgeta, nating se oli blong ol defdefren laen. Mi mi no luk samting ya long jos blong mi. Taswe, mi gohed blong stadi wetem olgeta gogo samwe long tri yia, afta mi baptaes.

?Yu harem olsem wanem from desisen blong yu blong kam wan Witnes?

Mi mi harem gud tumas blong talem se, “Mi mi wan Witnes blong Jeova.” Taem mi tingtingbak long fasin blong mi we mi traem agensem trutok, mi harem se Jeova i mekem i gud tumas long mi from we hem i blesem mi bigwan. Bambae mi neva sore we mi mekem desisen blong kam wan Witnes blong Jeova.

?Wanem ol blesing we yu yu kasem?

Mi mi kasem plante plante blesing. Wan samting se, mi tinghae long nambawan janis we mi gat blong mekem wok blong elda, no wok ya blong lukaot long olgeta we oli olsem ol sipsip blong God. Mi gat janis tu blong givhan long branj ofis blong ol Witnes blong Jeova long Saot Afrika, long saed blong Depatmen blong Loa. Blesing we i bigwan moa, hemia se mi save Jeova mo Pikinini blong hem. Mo mi glad tumas blong save we yumi laef long wan taem we i impoten tumas, mo mi glad we mi kasem save mining blong ol samting we oli stap hapen long taem blong yumi.

[Ol futnot]

[Tok blong makem poen long pej 11]

Mi mi sapraes blong luk olsem wanem ol profet tok blong Baebol oli kamtru stret olsem we oli talem mo oli joen gud