?Olgeta We Oli Trabol Soa Bambae Oli Gat Pis Samtaem?

?YU YU wantem se fasin blong safa i lus, long saed blong yu wan mo long ol narafala man tu? Tingbaot ol eksampel ya:

Sonia i safa bitim mak.a Fastaem, hem i faenemaot se long ol ten yia we oli pas, hasban blong hem i bin stap karem wan narafala woman. Biaen, lasbon pikinini boe blong hem i kasem sik ya AIDS mo i ded. Tu yia biaen, narafala pikinini boe blong hem i sik, mo hem tu i ded from AIDS. Sonia i tingtingbak se: “Bifo we sik ya i winim hem olgeta, hem i harem nogud tumas. Tingting blong hem i foldaon fulwan, hem i lusum hea blong hem, mo i no save lukluk klia. Samting ya i rili mekem mi mi sore tumas.”

Fabiana, wan studen blong yunivesiti long Brasil, i wari bigwan long saed blong ol trabol we oli kamaot long laef blong ol man wanwan. Biaen, hem wan i kasem wan bigfala trabol long laef blong hem. Brata blong hem i harem nogud tumas long tingting blong hem, ale hem i kilim hem wan i ded. Taem Fabiana i lusum wok blong hem, wan fren i talem long hem se hem i mas go luk wan pai-​de-​santo (kleva). !Hem i talem se, nogud samting ya i kamaot long Fabiana from we wan man i mekem nakaemas long hem! Be pai-​de-​santo ya i no mekem hem i haremgud bakegen. Defren olgeta, Fabiana i harem olsem se hem i stap safa moa. Hem i no moa save slipgud from we hem i trabol tumas.

Ana i safa long stat blong laef blong hem finis. Hem i talem se: “Taem mi gat wan yia nomo blong mi, mama blong mi i lego mi, ale, bubu woman blong mi i lukaot long mi.” Be, taem Ana i gat tri yia nomo, bubu woman blong hem i ded. Nao Ana i go long wan haos blong ol pikinini we oli no gat papa mama, long Rio de Janero. Hem i stap long ples ya gogo kasem we hem i gat 13 yia. Hem i se: “Oli mekem nogud long mifala long haos ya, mo mi mi kam stronghed. Taem mi gruap, mi mi faet agensem evri samting.”

Trabol soa i stap kasem laef blong evri man, long wan rod no long narafala rod. Yes, evri dei yumi harem nyus blong ol trabol we i kasem ol man​—evri taem we yumi lukluk, ridim, no lesin long nyus. Dokta Mary Sykes Wylie i raetem se: “Long taem blong yumi . . . we yumi save kasem nyus long olgeta ples blong wol kwik moa i bitim bifo, yumi no save ronwe long ol rabis nyus we i stap kasem yumi wantaem nomo. Ol faet, disasta, bigfala trabol long ol faktri, akseden long trak, fasin blong kilim man i ded, ol teroris, nogud fasin long saed blong seks, fasin blong repem woman, raf fasin insaed long famle​—olgeta samting ya oli mekem fasin blong safa i wan nogud samting we i kamaot evri dei nomo long ol yia 1900.” Long toktok we i sot nomo, Kristin aposol Pol i tokbaot laef blong man long fasin we i tru tumas, i se: “Olgeta samting ya we God i mekem i stap krae, from we olgeta i stap harem nogud.”​—Rom 8:​22.

?Olsem wanem long yu? ?Yu yu stap safa? ?Wanem hop i stap blong yu save lukluk i go long hem? ?I gat wan taem we bambae yu save kasem trufala pis? !Sonia, Fabiana, mo Ana, oli faenem trufala fasin blong haremgud mo bigfala pis long tingting blong olgeta! Yu save ridim moa long saed ya long nekis haf we i kam biaen.

[Futnot]