‘God Blong Pis’ i Stap Lukaot Long Olgeta We Oli Trabol Soa
BAEBOL i soemaot klia se Deved blong bifo, hem i savegud wanem ya fasin blong safa. Blong plante yia, hem i laef olsem wan man blong rod nomo, from we hem i stap ronwe long wan rabis king we fasin blong hem i strong tumas, mo i wantem kilim Deved i ded. Long taem ya we Deved i trabol tumas, hem i haed long ol ples longwe, we i no gat man long olgeta. Be hem i mekem wan narafala samting tu. Hem i prea strong long Jeova long saed blong ol trabol we hem i kasem. Biaen, hem i tokbaot traem ya we hem i kasem, i se: “Mi mi singaot i go long Hae God blong hem i givhan long mi, . . . Mi kam talem long hem olgeta samting we i mekem mi mi harem nogud, mi talemaot long hem olgeta trabol blong mi.”—Ol Sam 142:1, 2.
Tede, samfala oli laf long fasin blong Deved blong dipen long God. Oli talem se prea i jes wan trik blong mekem man i tingting nomo se i gat hop, be trufala samting se, hem i westem taem nomo. Nating se oli talem olsemia, fasin blong Deved blong trastem God i no blong nating nomo, from we biaen, ol enemi blong hem oli lus. Deved i tingtingbak long trabol taem ya, nao i raetem se: “Taem ol man oli stap spolem mi, mi singaot i go long Hae God, nao hem i harem mi, i tekemaot mi long olgeta trabol blong mi.” (Ol Sam 34:6) Long narafala ples long Baebol, trufala God ya we Deved i lukluk i go long hem, i karem nem ya se, “God ya we i stampa blong pis.” (Filipae 4:9; Hibrus 13:20) ?Bambae hem i mekem man i fri long fasin blong safa, mo givim pis long yumi?
Jeova i Tingbaot Yu
Jeova i no stap longwe, we hem i no intres taem hem i luk trabol we ol man blong hem oli stap kasem. (Ol Sam 34:15) Hem i lesingud long ol samting we kampani blong ol man blong hem oli nidim, mo tu, ol samting we ol man wanwan we oli stap fraetgud long hem oli nidim. Taem Solomon i openem nyufala haos prea long Jerusalem bifo, hem i prea long Jeova blong i lesin long “olgeta prea, olgeta toktok blong askem fogif we eniman i talem, no we olgeta man blong yu, Isrel, oli talem, from we olgeta wanwan oli savegud prapa trabol mo soa blong olgeta.” (2 Kronikel 6:29) Olsem Solomon i luksave, olgeta man wanwan oli gat prapa trabol soa blong olgeta, we oli mas stanap strong tru long hem. Long wan man, maet trabol ya hemia sik blong bodi. Wan narafala, maet hem i harem nogud long filing blong hem. Maet samfala oli safa from wan famle no fren we oli laekem hem tumas, i ded. No gat wok, hadtaem blong kasem mane, problem long famle, olgeta samting ya oli kasem plante man long ol taem ya we laef i strong tumas.
Tingbaot ‘prapa trabol mo soa blong yu’ blong smoltaem. Maet samtaem yu gat sem filing olsem Deved, man we i raetem Sam ya: “Mi stap wet blong man i sore long mi, i kam luk mi, be i no gat man i mekem olsem. Mi stap wet blong man i kam leftemap tingting blong mi bakegen, be mi no luk wan i kam.” Nating se i olsem, yu save sua se God i tingbaot trabol we yu kasem, from we long semfala Sam ya, Deved i gohed blong raetem se: “Hae God i stap lesin long olgeta we oli sot long ol samting, mo hem i no save fogetem ol man blong hem we oli stap long kalabus.”—Ol Sam 69:20, 33.
Sipos yumi tingbaot ol tok blong Deved olsem we oli stret long olgeta man long wol, yumi save sua se Man ya we i Wokem olgeta man, i stap lesin long prea blong olgeta we i olsem se, oli stap kalabus long trabol soa. Antap long samting ya, hem i gat filing long olgeta. Tingbaot ol tok we oli kam biaen. Oli soemaot klia se Jeova i sore long olgeta we oli stap safa.
“Bambae yufala i no spolem ol widowoman mo ol pikinini we papa blong olgeta i ded. Mi mi Hae God, mo sipos yufala i mekem i strong long olgeta, nao oli krae i kam long mi blong mi givhan long olgeta, bambae mi mi save harem olgeta. Nao bambae mi kros long yufala.”—Eksodas 22:22-24.
“?Yufala i ting se ol man blong [God] we hem i jusumaot olgeta, oli save krae long hem long dei mo long naet, be hem i no save stretem bisnes blong olgeta? ?Yufala i ting se hem i no save mekem kwik?”—Luk 18:7.
“Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, we oli no gat man blong lukaot long olgeta. Hem bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”—Ol Sam 72:12-14.
“Hemia we i tajem yufala [ol man blong God long wol], i tajem ae blong mi stret.”—Sekaraea 2:8.
Hemia i jes sam eksampel blong soemaot se Man ya we i Wokem yumi i rili kea long ol man blong hem mo i wantem se oli stapgud. Taswe, yumi gat gudfala risen blong folem advaes blong aposol Pita se: “Yufala i mas putum ol trabol blong yufala long han blong hem, from we oltaem hem i stap tingbaot yufala.” (1 Pita 5:7) ?Be olsem wanem God i save halpem yumi taem yumi stap safa?
?Olsem Wanem God i Save Halpem Olgeta We Oli Safa?
Yumi luk finis se, taem Deved i harem nogud from trabol soa, hem i prea wetem fulhat blong hem, blong God i lidim hem. Be, long semtaem, hem i mekem sam samting blong traem stretem trabol ya. Hem i yusum waes blong hem blong lukaot ol rod blong ronwe long olgeta we oli stap traem blong kilim hem. Taswe, fasin blong dipen long Jeova mo fasin traehad, tufala tugeta oli givhan long Deved blong stanap strong tru long hadtaem we hem i kasem. ?Store ya i tijim yumi long wanem samting?
Taem yumi stap safa, i gud blong traem mekem wan samting blong stretem problem blong yumi. Eksampel, sipos wan Kristin i lusum wok blong hem, i sua se bambae hem i traehad blong faenem wan narafala wok. Sipos hem i stap sik long saed blong bodi, i sua se bambae hem i go luk wan dokta. Yes, Jisas tu, we i gat paoa blong finisim olkaen sik, hem i luksave se ‘olgeta we oli sik oli nidim wan dokta.’ (Matyu 9:12; skelem wetem 1 Timote 5:23.) Be i tru se, i gat sam trabol we yumi no naf blong stretem. Yumi mas gohed nomo blong stanap strong tru long ol trabol ya. Wan trufala Kristin i no stap ting se ol trabol soa ya i wan samting we i gud, olsem samfala man oli tingting. (Skelem wetem 1 King 18:28.) Defren olgeta, Kristin ya bambae i traehad blong faenem rod blong winim trabol soa we hem i kasem.
Be, long semtaem, i stret blong tokbaot bisnes ya wetem Jeova long prea. ?From wanem? Faswan samting se, taem yumi prea long Man ya we i Wokem yumi mo dipen long hem, samting ya bambae i givhan long yumi blong “jusumaot wanem fasin i stret gud olgeta.” (Filipae 1:10) Eksampel, taem yumi stap traem blong faenem wan wok, fasin blong prea mo dipen long God bambae i halpem yumi blong no tekem wan wok we i agensem ol rul blong Baebol. Mo tu, bambae i halpem yumi blong blokem fasin blong laekem mane tumas, olsem nao, bambae yumi no “gowe long fasin blong bilif.” (1 Timote 6:10) Tru tumas, taem yumi mekem ol bigfala disisen—long saed blong wok mo ol narafala samting long laef—yumi mas folem advaes blong Deved se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.”—Ol Sam 55:22.
Mo tu, prea i save halpem yumi blong holemtaet stret tingting, nao trabol soa blong yumi i no save winim yumi olgeta. Aposol Pol i raetem se: “Sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem.” ?Wanem samting bambae i kamaot from? “Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” (Filipae 4:6, 7) Yes, pis, pis ya we God i save putum. Pis ya i “bitim save blong yumi olgeta.” Taswe, hem i naf blong mekem yumi holem stret tingting taem ol filing blong harem nogud oli kam hevi tumas long yumi. Pis ya i save ‘lukaot long hat mo tingting blong yumi.’ Long rod ya, bambae hem i halpem yumi blong no kwik tumas blong mekem wan samting we maet i no waes, we i save mekem trabol soa blong yumi i kam moa nogud.—Eklesiastis 7:7.
Prea i save mekem moa yet. Hem i save mekem se jenis i kamaot long laef blong yumi blong stretem problem ya. Tingbaot wan eksampel long Baebol. Taem aposol Pol i stap kalabus long Rom, hem i leftemap tingting blong ol Kristin brata blong hem blong prea from hem. ?From wanem? Hem i raetem tok ya long olgeta se: “Mi mi wantem tumas se yufala i mas askem long God blong mi save kambak bakegen long yufala, kwiktaem.” (Hibrus 13:19) Pol i save se sipos ol brata blong hem long saed blong bilif, oli gohed blong prea from hem, samting ya i save mekem jenis i kamaot long saed blong wetaem nao bambae hem i gofri.—Faelimon 22.
?Prea bambae i tekemaot trabol soa blong yu? Maet hem i save mekem olsem. Be, yumi mas luksave se i no oltaem we Jeova i ansarem prea blong yumi long fasin we yumi wantem hem blong mekem. Eksampel, Pol i prea plante taem long saed blong trabol blong hem we i “olsem nil blong aranis”—maet hemia wan sik long bodi we i mekem hem i gat wan problem long ae blong hem. God i no karemaot trabol soa ya blong Pol, be hem i talem se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.”—2 Korin 12:7-9.
Taswe, maet ol trabol soa i no lus. Be, long taem olsem, yumi gat jans blong soem se yumi dipen long Man we i wokem yumi. (Ol Wok 14:22) Mo tu, yumi save sua se nating sipos Jeova i no karemaot trabol soa ya, bambae hem i ‘mekem rod blong yumi, blong yumi naf blong stanap strong.’ (1 Korin 10:13) Yes, i stret nomo we Jeova i karem nem ya se ‘God we i stampa blong givhan, we i stap givhan long yumi long olgeta trabol blong yumi.’ (2 Korin 1:3, 4) Hem i givim ol samting we yumi nidim blong stanap strong longtaem, mo long semtaem, blong gat pis we i bigwan lelebet.
I No Longtaem—!Wan Wol We i No Moa Gat Trabol Soa!
Man ya we i Wokem yumi i promes se tru long Kingdom blong hem, bambae hem i karemaot olgeta trabol soa blong man. ?Olsem wanem bambae hem i mekem samting ya? Bambae hem i karemaot Devel Setan. Hem i bigfala man blong mekem trabol soa long ol man mo hem i nambawan enemi blong pis, we Baebol i tokbaot hem se “rabis god blong wol ya.” (2 Korin 4:4) Be i no longtaem, paoa blong hem antap long olgeta man bambae i finis. Taem we hem i lus, samting ya bambae i mekem rod blong plante blesing oli kam long olgeta we oli fraetgud long God. Baebol i promes se bambae Jeova i “ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:1-4.
Long tingting blong yu, ?yu faenem i had blong bilif se i save gat wan wol we i fri long trabol soa? From we yumi lan finis blong laef wetem trabol soa oltaem, i hadwok long yumi blong tingbaot se bambae hem i save finis samtaem. Be fasin blong fri long fraet, wari, mo trabol, hemia nao sam stampa tingting we God i gat taem hem i wokem man. Mo ol stampa tingting ya blong hem bambae oli kamtru.—Aesea 55:10, 11.
Hemia nao hop we Sonia, Fabiana, mo Ana, we yumi tokbaot olgeta finis, oli bin faenem. Sonia, we tufala pikinini boe blong hem oli ded from sik ya AIDS, hem i kasem bigfala pis from hop we Baebol i givim—ol stret man mo ol man we oli no stret bambae oli laef bakegen long ded. (Ol Wok 24:15) Hem i talem se: “Wan samting we mi sua long hem se, hop we yumi gat i bigwan moa i bitim enikaen soa we yumi gat.”
Taem Ana i stap laef yet long haos blong ol pikinini we oli no gat papa mama, wan Wetnes blong Jeova i kam luk hem. Ana i talem se: “Hem i soem long mi, nem blong Jeova we i stap long Baebol, mo mi krae from we mi glad tumas. Long taem ya, mi rili nidim tumas we wan man i halpem mi, mo mi faenemaot se i gat wan God i stap we hem i kea long yumi.” Afta we Ana i aot long haos ya blong ol pikinini we oli no gat papa mama, hem i agri blong stadi Baebol mo lanem moa long saed blong ol promes blong Jeova. Biaen, hem i givim laef blong hem i go long Jeova, mo i soemaot samting ya taem hem i tekem baptaes long wora. “Stat long taem ya, mi gohed blong trastem Jeova tru long prea, mo mi haremgud from we mi save se bambae hem i halpem mi.”
Fabiana tu, i faenem pis long tingting long hem mo i haremgud bakegen long trabol soa blong hem, taem hem i kasem save long ol promes blong God long saed blong fyuja. “Taem man i kasem save long trutok blong Baebol, i olsem we hem i aot long wan rum we i tudak mo we i mekem hem i harem nogud, nao i go long wan narafala rum we i kliagud, i gat laet, mo i mekem hem i haremgud.”—Skelem wetem Ol Sam 118:5.
Be, ?olsem wanem mo wetaem trufala pis bambae i kasem olgeta ples blong wol? Bambae yumi luk samting ya long ol nekiswan haf we oli kam biaen.
[Bokis blong pija long pej 6]
Ol Samting We Oli Givim Trabol Soa
▪ Kolosap wan long evri fo man long wol ya oli pua bitim mak. Mo plante milyan narafala man oli stap laef long ol ples we oli nogud olgeta, we oli denja long laef blong ol man ya.
▪ Bitim 200 milyan pikinini oli no kasem naf kakae.
▪ Evri yia, samwe long tri milyan pikinini we oli no gat faef yia yet, oli ded from sik ya sitsitwora.
▪ Long yia 1993 nomo, samwe long 16.5 milyan man oli ded from ol rabis sik we oli save pas kwiktaem i go long ol man. From we samfala kantri oli putum defren nem long ol sik ya, maet stret namba i bigwan moa.
▪ Samwe 500 milyan man oli gat problem ya we oli sik long tingting.
▪ Namba blong ol yangfala we oli kilim olgeta wan i ded, i stap kam antap kwik moa i bitim ol man we oli moa olfala.
▪ The Unesco Courier i talem se: “Hanggri mo no gat wok, oli olsem ol bigfala mak we oli spolem wol ya. I gat 35 milyan man we oli no gat wok, long seven kantri blong wol we oli rij moa. Mo long Brasil nomo, i gat 20 milyan man blong wok we pei blong olgeta i no naf nating blong pem kakae we oli nidim.”
[Tok blong pija long pej 7]
Prea i save halpem yumi blong tingting oltaem long promes blong God se bambae i no moa gat trabol soa long wol ya