Wan Kwestin

?Yumi save talem se nyufala save we yumi kasem i no longtaem long saed blong “ol man we oli stap laef naoia” (generation) long Matyu 24:​34, i karem mining ya se en blong rabis wol ya i stap longwe yet long fyuja?

No gat. Defren olgeta, nyufala save ya i mas halpem yumi blong stap wekap mo rere oltaem from en ya. ?Olsem wanem?

Wajtaoa blong Novemba 1, 1995, i eksplenem se, Jisas i yusum tok ya “ol man we oli stap laef naoia” blong tokbaot ol rabis man we oli laef long wan taem. (Matyu 11:​7, 16-​19; 12:39, 45; 17:14-​17; Ol Wok 2:​5, 6, 14, 40) Be, tok ya blong hem i no makem wan stret taem, we i stat long wan stret dei mo i finis long wan stret dei.

Haf ya “Wan Kwestin” long sem Wajtaoa ya, i tokbaot tu bigfala stampa poen, se: “Yumi no save talem se ol man we oli laef long wan taem, i minim wan stret namba blong yia.” Mo tu: “Ol man we oli laef long wan taem, oli laef blong smol taem nomo, i no wan longfala taem, taem yumi skelem wetem olgeta yia long histri.”

Plante taem, yumi yusum tok ya “ol man we oli stap laef naoia” (generation) long fasin ya. Eksampel, maet yumi talem se: ‘Ol soldia we oli stap laef long taem blong Napoléon oli no save wan samting long saed blong ol plen mo atomik bom.’ Taem yumi talem olsem, ?yumi stap minim nomo ol soldia we oli bon long semfala yia olsem Napoléon? ?Yumi minim nomo ol Franis soldia we oli ded bifo long Napoléon? No gat. Mo i no minim tu se, sipos yumi yusum tok ya ‘ol man we oli stap laef long taem ya,’ ale yumi stap traem blong makemaot wan stret namba blong yia. Be, i minim se yumi stap tokbaot wan sotfala taem, taem yumi skelem wetem ol yia blong histri, i no wan taem we i kavremap plante handred yia stat long taem blong Napoléon i go long fyuja.

Hemia i sem mak long save we yumi gat long saed blong profet tok we Jisas i givim antap long Hil blong ol Oliftri. Ol defren haf blong profet tok ya we oli stap kamtru, oli pruvum se en blong wol ya i kolosap. (Matyu 24:32, 33) Rimemba se, folem Revelesen 12:​9, 10, taem Kingdom blong God i stanap long heven long 1914, oli sakemaot Setan i kamdaon long wol ya. Revelesen i talem tu se Setan i kros bigwan naoia. ?From wanem? From we hem i save se “i gat smol taem nomo blong hem i stap yet.”​—Revelesen 12:12.

Taswe, i stret nomo we Wajtaoa blong Novemba 1 i karem smol stampa tok ya se “!Stap Lukaotgud!” Paragraf we i kam afta long stampa tok ya i talem stret nomo se: “Yumi no nid blong save stret taem blong ol samting we oli mas kamtru. Tingting blong yumi i mas stap long fasin blong lukaotgud. Yumi mas mekem bilif blong yumi i kam strong, mo stap bisi long wok blong Jeova, be i no blong traem faenemaot wan stret dei.” Nao hem i yusum ol tok blong Jisas se: “Yufala i mas stap lukaotgud, oltaem yufala i mas stap wekap, from we yufala i no save taem ya we olgeta samting ya bambae oli kam . . . Tok ya we mi talem long yufala, mi stap talem long olgeta man, se ‘Yufala i mas stap lukaotgud.’ ”​—Mak 13:33, 37.