?Yu Yu Bilif Se Man i Save Laef Bakegen Long Wan Narafala Bodi Afta Ded?
MUKUNDBHAI i raet i go long boe blong hem we i stap skul long yunivesiti long Yunaeted Stet, i se: “?Yu yu rimemba yet gel ya we i stap kolosap long haos blong yumi bifo? Hemia gel ya we yu bin laekem hem tumas taem yu stap gruap long ples ya, India. Bambae hem i mared long ol wik we oli stap kam. Mi jes ting se i gud blong talemaot samting ya long yu.”
?From wanem papa ya i talemaot nyus ya long boe blong hem? Plante yia bifo finis, Mukundbhai nao i bin blokem fasin fren blong boe blong hem wetem gel ya. Mo tu, boe blong hem i stap go long haeskul long Yunaeted Stet blong sikis yia finis. Hem i no moa toktok long gel ya no luk hem long ol yia ya, mo Mukundbhai i save samting ya.
Taswe, ?from wanem Mukundbhai i wari long saed ya? Hemia from we, hem i bilif se afta we man i ded, hem i laef bakegen long wan narafala bodi, no i bon bakegen insaed long wan narafala man no anamol.a Hem i bilif se maet tufala ya i bin laeklaekem tufala taem tufala i smol, from we tufala i mared long wan narafala laef bifo. Sipos i olsem, i no stret blong mekem tufala i stap longwe long tufala naoia, taem tufala i gat naf yia blong mared. Mukundbhai i jes wantem se boe blong hem i save samting ya, bifo we gel ya i kam waef blong wan narafala man long laef ya naoia.
Tingbaot wan narafala eksampel. Wan gel we i gat fo yia i bin slip plante taem long hospital long Mambae, India, from we hem i sik tumas. Hem i gat wan problem long hat blong hem. Papa mama blong hem we tufala i rij, tufala i no wantem nating we pikinini blong tufala i safa. Be tufala i tingting olsem se: “Mitufala i mas glad nomo. Maet hem i sik from we hem i bin mekem wan nogud samting long wan narafala laef bifo.”
Bilif ya se yumi laef bakegen long wan narafala bodi afta ded, i impoten tumas long tingting blong plante milyan man Hindu, Budis, Jen, Sik, mo plante narafala skul bakegen we India i stampa blong olgeta. Enikaen samting we i hapen long laef—olsem taem we man mo woman tufala i laeklaekem tufala, no taem man i safa bigwan—oli frut we i kamaot from samting we man ya i bin mekem long wan narafala laef no plante laef we hem i gat bifo.
Plante man long ol kantri blong Wes tu oli intres long tijing ya. Wan woman Amerika we i plei long ol sinema, Shirley MacLaine, i talem se hem i bilif long samting ya. Wan woman blong raetem ol buk, Laurel Phelan blong Vankuva, Britis Kolombia, Kanada, i talem se hem i save rimemba 50 defren laef we hem i bin gat bifo. Long 1994, wan kampani blong nyus we oli kolem CNN/USA i mekem wan stadi. Long ol 1,016 man we oli bin toktok wetem olgeta, i gat bitim 270 we oli talem se oli bilif long samting ya. Mo tu, bilif ya se yumi laef bakegen long wan narafala bodi afta ded, hem i wan bilif blong ol man we oli folem fasin blong laef we oli kolem Nyu Ej. ?Be i gat wanem pruf blong sapotem bilif ya?
Ol man we oli bilif se man i laef bakegen long wan narafala bodi afta ded, oli talem se, “!Pruf hemia se ol man oli save rimemba wan narafala laef bifo!” Eksampel, long Bankok, Ratana we i gat tri yia blong hem, i stat blong “rimemba wan laef we hem i bin gat bifo, we hem i wan woman blong jyos mo i ded taem hem i gat 60 yia.” Ale, plante man oli bilivim store blong hem olsem trufala pruf se yumi laef bakegen afta ded long wan narafala bodi.
Be, i gat plante man we oli ting se bilif ya i no tru. Mo tu, i gat sam narafala risen from wanem ol man oli ting se oli rimemba wan laef bifo.b Long buk ya Hinduism: Its Meaning for the Liberation of the Spirit, man ya Nikhilananda we i wan waesman blong ol Hindu, i talem se, ‘save we man i tingtinggud long hem, i no save pruvum ol samting we oli kamaot long man afta we hem i ded.’ Nating se i olsem, hem i talem se “bilif ya we man i bon bakegen long wan narafala laef afta ded, ating i gat moa samting blong soem se i tru i bitim we i no tru.”
?Be Baebol i sapotem tijing ya? ?Mo wanem hop we Tok blong God i givim long ol dedman?
[Ol futnot]
a Buk ya, The New Encyclopædia Britannica, i talem se “fasin ya blong laef bakegen long wan narafala bodi,” i minim se “sol i bon bakegen wan taem no plante taem, olsem wan man, anamol, no, maet, wan tri.” Oli yusum tok ya “bon bakegen” blong tokbaot bilif ya, be plante moa man oli yusum tok ya “laef bakegen long wan narafala bodi.” Plante diksonari long ol lanwis blong India, oli givim sem mining nomo long tufala tok ya.
b Lukluk Wekap! blong Jun 8, 1994, pej 5 kasem 7 (Engglis mo Franis).
[Tok blong pija long pej 4]
?Hem i stap kasem panis from ol sin we hem i bin mekem long wan narafala laef bifo?