Lukaot Blong No Gat Nogud Tingting Long Saed Blong Narafala

WAN bigman blong jyos we i stap prij long televisen, i tok nogud long saed blong wan narafala man blong jyos blong hem, from we hem i stilim woman blong wan narafala man. Be, wan yia nomo biaen, oli faenemaot se bigman ya we i prij long televisen, i stap mekem nogud wetem wan woman blong rod.

Wan narafala eksampel se, wan gavman we i gat bigfala paoa, i sanem sam man blong hem oli go long narafala kantri, blong traem mekem pis bitwin tu ami we oli faet. Be long semtaem, long kwaet fasin, gavman ya i sanem sam man blong hem oli go long sam narafala kantri blong salem ol tul blong faet, we bambae hem i winim plante bilyan dola from.

From we fasin tu fes olsemia i kamaot moa naoia, ating yumi no sapraes taem ol man oli no moa trastem ol narafala, be oli tingting nogud long saed blong ol narafala. Fasin ya blong tingting nogud long saed blong ol narafala, i kam olsem prapa fasin blong plante man tede.

Be, yumi ol Kristin, yumi mas lukaotgud blong no letem ol tingting olsemia, oli spolem fasin fren blong yumi wetem ol brata mo sista blong yumi long saed blong bilif. I tru, Jisas Kraes i talem se yumi mas ‘waes olsem snek,’ taem yumi stap long medel blong ol enemi blong yumi. Be, hem i no minim se yumi mas gat tingting we yumi no trastem ol trufala man blong hem. (Matyu 10:16) Taswe, ?wanem sam trabol we oli save kamaot from fasin ya blong tingting nogud long narafala? ?Long wetaem nao yumi mas lukaot moa blong no tingting olsemia? Mo ?olsem wanem yumi save holem gudfala fasin fren we yumi gat wetem ol narafala Kristin?

Wan Lesen Blong Bifo

Taem yumi tingting nogud long saed blong narafala we yumi no gat wan stret risen blong mekem olsem, i sem mak olsem we yumi stap jajem hem. I olsem we yumi stap jajem ol tok mo wok blong hem se, oli blong haedem wan nogud no gyaman fasin blong hem. Plante taem, stampa blong problem se, yumi no gat stret tingting. Yumi luksave problem ya long store blong Josua japta 22.

Ol man Isrel oli winim ol faet blong olgeta finis blong kasem Promes Lan, mo olgeta laen wanwan oli jes kasem graon blong olgeta. Laen blong Ruben mo Gad, wetem haf laen blong Manase, oli bildim wan olta kolosap long Jodan Reva. Olta ya i “pulum ae blong ol man.” Ol narafala laen oli gat rong tingting ya, se oli stap girap agensem trufala wosip. Oli ting se trifala laen ya bambae oli yusum bigfala olta ya blong mekem sakrifaes, i bitim we oli go long haos tapolen long Silo, we hem i stampa ples blong wosip. Wantaem nomo, ol laen ya we oli gat nogud tingting ya, oli mekemrere blong go faet agensem trifala laen ya.​—Josua 22:10-​12.

I gud nomo we Finehas i lidim wan grup blong man oli go fastaem, blong toktok wetem ol brata blong olgeta long trifala laen ya blong Isrel. Taem trifala laen ya oli harem tingting blong ol narafala laen se oli girap agensem trufala wosip, mo se oli rebel, mo oli no stap tru long Jeova, ale, oli eksplenem risen from wanem oli bildim bigfala olta ya. Olta ya i no wan ples blong mekem sakrifaes. Hem i blong givim “wan wetnes,” se olgeta laen blong Isrel oli stap joengud blong wosipim Jeova. (Josua 22:26, 27) Nao smol grup ya oli gobak long ples blong olgeta wetem gudfala tingting ya se ol brata blong olgeta oli no mekem i rong. Long rod ya, oli blokem wan faet bitwin ol laen blong Isrel we i save mekem plante tumas blad i ron.

!Store ya i tijim yumi se yumi no mas kwik blong gat nogud tingting long saed blong ol narafala! Plante taem, samting we man i ting se i tru taem i lukluk kwik, i defren olgeta taem hem i luklukgud long bisnes ya. Samting ya i tru long plante haf blong laef blong wan Kristin.

Tingting Blong Yumi Long Saed Blong Ol Elda

Long wok blong ol elda blong ‘lukaot long kongregesena blong God,’ samtaem oli mas givim advaes long samfala insaed long kongregesen. (Ol Wok 20:28) Eksampel, ?wanem tingting blong yumi sipos wan elda i toktok long yumi long saed blong ol yangfala blong yumi, se oli stap joen wetem ol rabis fren, no se oli no mekem gudfala fasin wetem boefren no gelfren blong olgeta? ?Yumi tingting se elda ya i gat wan nogud tingting long yumi? ?Yumi stap tingting olsem se, ‘A, hem i neva bin laekem famle blong mi’? Sipos yumi letem ol filing olsem oli kam antap, maet biaen bambae yumi sore from. Maet ol pikinini blong yumi oli stap long denja long saed blong speret, mo yumi mas glad long gudfala advaes blong Baebol we yumi kasem.​—Proveb 12:15.

Taem wan elda long kongregesen i givim advaes long yumi, i nogud yumi traem lukaot wan nogud tingting we i stap pusum elda ya blong mekem olsem. I moagud blong tingbaot olsem wanem advaes blong Baebol we hem i givim, i save givhan long yumi. Aposol Pol i raetem se: “Yumi save finis, se sipos God i panisim wan man, bambae panis ya i no save mekem man ya i harem gud, i mas mekem hem i harem nogud. Be biaen, olgeta we God i panisim olgeta, blong stretem olgeta, oli save faenem frut blong panis ya blong hem. Bambae oli gat kwaet laef we i stret nomo long fes blong God.” (Hibrus 12:11) Taswe, yumi mas gat tangkyu from ol advaes, mo tingtinggud long hem, we filing blong yumi i no pulum yumi. Rimemba se, plante taem i hadwok long ol elda blong givim advaes long yumi, olsem we i hadwok long yumi blong lesin long advaes ya.

Filing Long Saed Blong Papa Mama

Taem papa mama i blokem ol yangfala blong olgeta long sam samting, samtaem ol yangfala ya oli tingting nogud long papa mama blong olgeta. Maet oli talem se: ‘?From wanem papa mama blong mi i putumap plante tumas rul? Ating tufala i no wantem se mi mi haremgud long laef.’ Bitim we ol yangfala oli tingting olsemia, i moagud we oli tingbaot bisnes ya long fasin we filing blong olgeta i no pulum olgeta.

Ol papa mama oli lukaotgud long ol pikinini blong olgeta blong plante yia. Blong mekem olsem, oli lego plante samting we olgeta oli wantem, long saed blong bodi mo sam narafala samting bakegen. Taswe, ?i stret blong ting se naoia oli wantem mekem yangfala blong olgeta i harem nogud? Ating i moa stret blong tingting se lav nao i stap pusum papa mama ya blong lukaotgud mo kea long pikinini blong olgeta. Mo ating sem kaen lav ya nao i stap pusum olgeta blong putumap sam rul we pikinini i mas folem, from we hem i fesem sam nyufala traem long laef blong hem. !Yumi no gat kaengud fasin mo tangkyu sipos yumi tingting nogud long ol papa mama we oli laekem yumi tumas!​—Efesas 6:​1-3.

Tingting Blong Yumi Long Saed Blong Ol Narafala Kristin

Plante man oli traem jajem narafala mo makemaot fasin blong hem folem prapa tingting blong olgeta. ?Olsem wanem sipos yumi bin gat wan tingting olsem, mo yumi no bin trastem samfala? ?Ating yumi stap karem ol tingting blong wol long saed ya?

Eksampel, maet wan brata blong yumi long saed blong bilif i gat wan naesfala haos mo wan trak we i sas. ?I stret we yumi kwik blong tingting se brata ya i gat fasin blong ronem ol sas samting, mo i no stap putum Kingdom long fasples long laef blong hem? Maet sam Kristin oli gat naf mane blong pem sam naesfala samting, be hemia i no min se tingting blong olgeta i no stret, mo se oli no stap ‘lukaot Kingdom fastaem.’ Maet oli bisi tumas long ol wok long saed blong speret, mo oli yusum ol sas samting blong olgeta blong sapotem wok blong Kingdom. Be maet oli no soemaot fasin ya fored long olgeta man.​—Matyu 6:​1-4, 33.

Kristin kongregesen long faswan handred yia i fulap long ol defdefren kaen man​—ol rijman mo ol puaman. (Ol Wok 17:34; 1 Timote 2:​3, 4; 6:​17; Jemes 2:5) God i no jajem wan man from ol sas samting we hem i gat, mo yumi no mas mekem olsem tu. Yumi mas laekem olgeta narafala man blong bilif, we oli bin stanap strong tru long plante traem mo we oli stap tru long God. “I nogud yu mekem wan fasin long wan man mo narafala fasin long narafala man.”​—1 Timote 5:​21.

Long wol ya we i stap long paoa blong Setan, ol man oli yusum plante defren rod blong makemaot fasin blong narafala folem prapa tingting blong olgeta, mo blong no trastem narafala. Wan eksampel, maet samfala oli ting se wan man i raf no i stap ronem ol sas samting, jes from fasin blong laef we man ya i gruap long hem. Be, yumi ol Kristin, yumi no mas foldaon long ol tingting olsem. Long ogenaesesen blong Jeova, i no gat fasin we wan i agensem narawan we i defren long hem, fasin blong no trastem narafala. Olgeta trufala Kristin oli mas folem fasin blong Jeova God, we hem ‘i gat stret fasin oltaem mo i stap mekem i sem mak nomo long olgeta man.’​—2 Kronikel 19:7; Ol Wok 10:34, 35.

Lav i Mas Pusum Yumi

Baebol i talem klia se, “olgeta evriwan oli mekem nogud finis, mo oli stap longwe long ol gudgudfala fasin blong God.” (Rom 3:​23) Taswe, yumi mas gat tingting long saed blong ol narafala man blong wosip se, oli stap traehad wetem yumi blong mekem wok blong Jeova long fasin we Jeova i agri long hem. Sipos yumi bin letem tingting blong no trastem narafala, no sam narafala filing we oli no stret, oli spolem fasin fren blong yumi wetem wan brata no sista long saed blong speret, i gud yumi prea long God blong halpem yumi blong faet agensem tingting ya. Nao bambae yumi no foldaon long trap blong Setan. (Matyu 6:​13) Setan i mekem Iv i bilif se wan nogud tingting i pusum Jeova, se hem i no kea long laef blong Iv, mo se hem i stap blokem fasin fri blong Iv long sam samting we oli save givim trufala glad long hem. (Jenesis 3:​1-5) Sipos yumi gat nogud tingting long saed blong ol brata blong yumi, ale yumi stap folem rod we Setan i wantem.​—2 Korin 2:​11; 1 Pita 5:8.

Sipos yumi faenem se yumi gat nogud tingting long saed blong narafala, tingbaot eksampel blong Jisas Kraes. Nating se hem i Pikinini blong God we i stretgud olgeta, hem i no traem jajem ol disaepol blong hem. Defren olgeta, Jisas i traem faenem ol gudfala fasin blong olgeta. Taem ol disaepol blong hem oli rao from we olgeta wanwan oli wantem ples we i hae moa long narawan, hem i no gat tingting ya se oli nogud ale i moagud we hem i go faenem 12 nyufala aposol blong tekem ples blong olgeta. No gat. (Mak 9:​34, 35) From we oli sinman, maet ol kastom blong ol man Jyu we oli lego trufala wosip, oli pulum olgeta. Hemia ol kastom we oli leftemap flas fasin, mo tingting ya se sam man oli hae moa mo sam man oli daon moa. Jisas i save se stampa fasin we i pusum ol man ya blong hem, hemia lav we oli gat long Jeova. From we oli soemaot lav ya mo oli stanap strong long saed blong Jisas, oli kasem bigfala blesing.​—Luk 22:28-​30.

Sipos yumi no trastem ol narafala man we oli stanap strong long bilif, i olsem we yumi stap lukluk wan samting wetem glas we i no klia. Olsem nao, yumi no stap luk samting ya long trufala fasin. Taswe, i moagud yumi yusum glas ya we i olsem lav blong lukluk ol narafala. I gat plante pruf blong soemaot se ol trufala Kristin brata blong yumi oli laekem yumi tumas, mo se i stret we yumi tinghae long olgeta wetem kaen fasin. (1 Korin 13:​4-8) Ale, yumi mas soemaot lav long olgeta mo lukaot blong no gat nogud tingting long saed blong olgeta.

[Futnot]

[Tok blong pija long pej 26]

?Wanem tingting blong yu long saed blong ol narafala man we oli stap holemstrong long wosip blong God?

[Tok blong pija long pej 27]

Fasin blong trastem mo respektem narafala i mekem se ol Wetnes blong Jeova oli olsem wan hapi famle nomo