God i Sevem Yumi From Gladhat Blong Hem, i No From Ol Wok Blong Yumi Nomo
“[God ] i sevem yufala, from we yufala i bilif . . . i no from ol samting we yufala i mekem . . . blong bambae i no gat wan long yufala we i save tok flas from.”—EFESAS 2:8, 9.
1. ?Olsem wanem ol trufala Kristin oli defren long ol narafala man long saed blong wok we oli mekem, mo from wanem oli defren?
OL MAN tede oli praod long ol samting we olgeta oli mekem, mo oli hareap blong tokflas from. Be ol Kristin oli defren. Oli no leftemap olgeta from ol wok we oli mekem, nating sipos wok ya i long saed blong trufala wosip nomo. Oli glad tumas long samting we fulwan kampani blong ol man blong Jeova oli mekem, be oli no tokbaot samting we olgeta wanwan oli mekem. Oli save se long saed blong wok blong Jeova, samting we i moa impoten i bitim wok we oli mekem, hemia tingting we i pusum olgeta blong mekem wok ya. Ol man we bambae oli kasem laef blong olwe, bambae oli no kasem from wok we olgeta wanwan oli bin mekem, be bambae oli kasem from bilif blong olgeta mo gladhat blong God.—Luk 17:10; Jon 3:16.
2, 3. ?Pol i tok flas long saed blong wanem samting? ?From wanem hem i tok flas?
2 Aposol Pol i savegud samting ya. Tri taem hem i prea blong askem God blong tekemaot wan trabol, we i olsem ‘nil blong aranis we i stap stikim hem.’ Jeova i ansa long hem olsemia: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” Pol i gat tingting daon, ale hem i akseptem desisen ya blong Jeova. Hem i se: “From samting ya, mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem.” Yumi mas gat tingting daon olsem Pol.—2 Korin 12:7-9.
3 Pol i mekem plante bigfala Kristin wok. Be hem i save se sipos wok blong hem i karem frut, hemia i no from sam spesel save no fasin blong hem wan. Nogat. Tingting daon i pulum hem blong talem se: “Mi mi no haeman, mi daon moa long ol narafala man blong God. Be long gladhat blong God, hem i givhan long mi blong mi mekem gudfala wok ya. Hem i putumap mi blong mi go long ol man we oli no laen blong Isrel blong talemaot gud nius blong ol gudgudfala samting ya blong Kraes, we i no gat man i save kaontem.” (Efesas 3:8) Long ples ya, Pol i no tokflas nating, mo i no leftemap hem wan olsem we i gud moa long ol narafala. “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (Jemes 4:6; 1 Pita 5:5) ?Yu yu folem eksampol blong Pol? ?Yu yu tingbaot yu wan olsem we yu daon moa long ol narafala man blong God?
“Luk Ol Narafala Man Olsem We Oli Gud Moa”
4. ?From wanem i no isi blong luk ol narafala olsem we oli gud moa long yumi?
4 Aposol Pol i givim advaes ya long ol Kristin se: “I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala.” (Filipae 2:3) Maet i no isi blong mekem olsem, antap moa, sipos yumi gat wan spesel wok. Maet i hadwok from we fasin blong ol man blong wol we oli traem winim narafala oltaem, i gat paoa long yumi. Taem yumi pikinini, maet papa mama blong yumi i bin pulum yumi blong traem winim ol brata sista blong yumi, no ol yangfala long klas blong yumi. Long skul, maet tija i bin pulum yumi blong traehad blong kam jampion blong spot, no blong kam nambawan studen. I no rong blong traehad fulwan long ol gudfala samting we yumi mekem, hemia i gud nomo. Be long saed blong ol Kristin, oli no mekem bes blong olgeta blong pulum ol man blong lukluk olgeta, nogat. Oli mekem bes blong olgeta blong oli save haremgud fulwan long wok blong olgeta, mo blong oli save givhangud long ol narafala. Sipos yumi wantem we narafala i presem yumi oltaem se yumi beswan long wok blong yumi, yumi save kasem trabol. ?Wanem trabol?
5. ?Sipos yumi no stretem fasin blong wantem winim ol narafala, yumi save kam olsem wanem?
5 Sipos yumi no stretem fasin ya blong wantem winim ol narafala mo leftemap yumi, yumi save kam olsem we yumi no moa gat respek long narafala mo yumi flas. Yumi save jalus long ol narafala from save mo wok we oli gat. Ol Proveb 28:22 i talem se: “Man we i griri [“jalus,” NW ], oltaem nomo hem i stap hareap blong kasem plante samting moa blong mekem hem i kam rijman. Hem i no save tingbaot se i isi nomo blong trabol i kam spolem hem wantaem nomo.” Man olsem, flas tingting i save lidim hem blong traem kasem wan posisen we hem i no gat raet blong kasem. Blong mekem eskius from fasin blong hem, maet hem i stat toktok smol agens long ol narafala. Hemia ol fasin we Kristin i mas stap longwe long olgeta. (Jemes 3:14-16) Man we i gat ol fasin ya i stap long denja, from we hem i save kam olsem we i tingbaot hem wan nomo.
6. ?Baebol i givim wanem woning long saed blong fasin ya blong traem winim narafala?
6 From samting ya, Baebol i talem long ol Kristin se: “I nogud yumi stap praod, no yumi stap mekem yumi nomo i stap kros long yumi, no yumi nomo i stap jalus long yumi.” (Galesia 5:26) Aposol Jon i tokbaot wan Kristin we i foldaon long fasin ya, i talem se: “Mi mi raetem wan sotfala leta i go finis long ol Kristin man long ples blong yu. Be Diotrefes, hem i laekem tumas blong i lida blong olgeta, nao hem i no save lesin long tok blong mifala. Oraet, taem mi mi kam, bambae mi talemaot long ol man blong jos ol fasin we hem i stap mekem, mo bambae mi talemaot ol giaman toktok we hem i stap talem blong spolem mifala.” !Sore tumas long Kristin we i foldaon long fasin ya!—3 Jon 9, 10.
7. ?Wan Kristin i mas lukaot blong no mekem wanem fasin long saed blong wok blong hem blong kasem vatu?
7 I tru se i gat sam samting long laef blong ol Kristin we oli mas traehad blong winim narafala long hem. Maet long wok we Kristin i mekem blong kasem vatu. Ating hem i mas traem winim sam narafala man no sam narafala kampani we oli salem sem samting no oli mekem semkaen wok olsem hem. Be long taem ya tu, Kristin i mas mekem bisnes wetem respek mo lav, mo hem i mas tingbaot narafala. Hem i no mas folem sam fasin we oli agensem loa blong kantri no oli agensem Kristin fasin. Mo i nogud sipos ol man oli luk hem olsem wan man we i glad blong daonem narafala from we hem i wantem win nomo. Hem i no mas ting se bigfala samting long laef, hemia blong stap nambawan long evri samting we hem i mekem. !Sipos i stret blong blokem tingting ya long wok blong yumi blong kasem mane mo ol narafala wok, ale yumi mas strong moa blong blokem tingting ya long wosip blong yumi!
“I No From Wok Blong Sam Narafala Man”
8, 9. (a) ?From wanem ol Kristin elda wanwan oli no mas traem winim ol narafala elda? (b) ?From wanem 1 Pita 4:10 i stret long olgeta man blong God?
8 Long saed blong wosip, God i talem tingting we ol Kristin oli mas gat, i se: “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.” (Galesia 6:4) Ol elda long kongregesen oli save se oli mas wokgud tugeta olsem wan bodi nomo, i no se wan i traem winim narawan. Oli glad long wok we wanwan long olgeta i mekem blong givhan long kongregesen. Olsem nao, oli no gat fasin ya blong traem winim narafala, we i save mekem rao i kamaot. Mo oli givim wan gudfala eksampol long ol narafala long kongregesen, olsem wanem blong joengud.
9 Maet sam elda oli karem moa frut long wok blong olgeta i bitim ol narafala elda. Ating oli olfala moa, oli bin winim plante moa trabol long laef blong olgeta, oli gat gudhan long sam wok, no maet oli gat fasin luksave moa i bitim ol narafala elda. From samting ya nao ol elda oli gat ol defdefren wok insaed long ogenaesesen blong Jeova. Oli no skelem olgeta wetem ol narafala elda, be oli tingbaot advaes ya se: “Long gladhat blong God, hem i givim ol defdefren kaen paoa long yufala blong mekem ol wok blong hem. Yufala i mas yusum ol paoa ya blong hem blong givgivhan long yufala.” (1 Pita 4:10) Vas ya i stret long olgeta man blong Jeova, i no ol elda nomo. Evriwan oli kasem presen ya blong stret save, mo evriwan oli gat blesing ya blong joen long Kristin wok blong prij.
10. ?Wanem samting nomo i save mekem se Jeova i glad long tabu wok blong yumi?
10 Wan samting nomo i save mekem Jeova i glad long tabu wok we yumi mekem, hemia sipos yumi mekem from we yumi lavem hem mo from we yumi wantem wosip long hem wetem fulhat blong yumi. Hem i no save glad sipos yumi mekem wok blong hem blong leftemap yumi i go antap long ol narafala. From samting ya, i impoten we yumi gat stret tingting long saed blong wok we yumi mekem blong givhan long trufala wosip. I no gat wan man we i naf blong save wanem tingting i stap pusum narafala blong wok. Jeova nomo i naf blong ‘skelem tingting blong yumi.’ (Ol Proveb 24:12; 1 Samuel 16:7) Taswe, i gud we sam samtaem yumi traem ansa long kwestin ya: ‘?Wanem tingting i stap pusum mi blong mekem wok blong Jeova?’—Ol Sam 24:3, 4; Matiu 5:8.
Stret Tingting Long Wok Blong Yumi
11. ?I stret we yumi faenem ansa long wanem kwestin long saed blong wok blong prij blong yumi?
11 ?Sipos tingting we i pusum yumi blong wok i bigfala samting we i mekem Jeova i glad, yumi rili nidim blong mekem ol wok we i soemaot bilif? ?Sipos stret tingting we i pusum yumi blong mekem wok blong God i impoten samting, from wanem yumi mas givim ripot blong soem hamas wok mo wanem wok yumi mekem? Hemia ol gudfala kwestin, from we yumi no mas ting se ol namba oli moa impoten i bitim wok we i soemaot bilif, mo yumi no mas ting se bigfala samting long saed blong Kristin wok blong yumi i blong gat ol hae namba long ripot blong yumi.
12, 13. (a) ?From wanem yumi mas givim ripot blong wok blong prij? (b) ?From wanem yumi glad taem yumi ridim ripot long wok blong prij long fulwol?
12 I gud blong makem tok we i kamaot long buk ya Organized to Do Jehovah’s Will says: ‘Bifo, ol man blong Jisas Kraes oli glad blong harem sam ripot long wok blong prij. (Mak 6:30) . . . Buk blong Ol Wok i talem se samwe long 120 disaepol oli stap wanples, nao tabu spirit i kam long olgeta. Smoltaem afta, namba blong ol Kristin i gru, i kasem 3,000, mo biaen 5,000. . . . (Ol Wok 1:15; 2:5-11, 41, 47; 4:4; 6:7) !Ating ol disaepol oli glad blong harem ol ripot ya, se ol man blong Jeova oli stap kam plante moa!’ From semfala risen ya, ol Witnes blong Jeova tede oli raetemdaon ol namba blong soemaot wok we i stap gohed raon long wol folem profet tok ya blong Jisas: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei [“en,” NW ] i save kam.” (Matiu 24:14) Ol ripot ya oli soemaot klia wanem wok i stap gohed long fulwol. Oli soemaot ol ples we i nidim moa man blong prij, wanem kaen buk mo hamas buk ol man long ol defren ples oli nidim, blong mekem wok blong prij i gohed.
13 Taswe, ol ripot long wok blong prij oli givhan long yumi blong talemaot gud nius blong Kingdom long fasin we i karem moa frut. Mo tu, ol ripot long wok blong ol brata blong yumi long ol defren ples blong wol oli leftemap tingting blong yumi. Taem yumi harem olsem wanem wok i stap gru mo goaot long ol niufala ples, yumi glad, yumi wantem wok moa, mo yumi luksave se Jeova i stap blesem wok blong yumi. !Mo yumi haremgud blong save se ripot blong yumi wan i stap insaed long ripot blong fulwol! I tru, ripot blong yumi wan i smol nomo taem yumi skelem wetem ripot blong fulwol. Be nating, Jeova i makem hadwok blong yumi. (Mak 12:42, 43) Tingbaot, sipos i no gat ripot blong yu, ripot blong fulwol i no stret.
14. ?Antap long wok blong prij mo tij, wanem ol narafala wok we i joen wetem wosip blong yumi long Jeova?
14 I tru se, plante wok we ol Witnes oli mekem taem oli givim laef blong olgeta i go long Jeova finis, oli no raetem long ripot blong olgeta. Oli no raetem long ripot hamas taem olgeta wanwan oli spenem long prapa Baebol stadi blong olgeta, mo blong go long ol Kristin miting, mo blong mekem ol wok insaed long kongregesen, mo blong givhan long ol narafala Kristin we oli nidim help. Oli no raetemdaon hamas presen mane oli givim blong halpem wok blong Kingdom long fulwol, mo plante narafala samting olsem. Taswe, nating we ripot blong prij i mekem wan impoten wok blong givhan long yumi blong gohed blong wok strong mo no kam slak, be yumi mas holem stret tingting long saed blong ripot ya. Yumi no mas ting se hem i olsem wan laesens no paspot we bambae i givim raet long yumi blong kasem laef we i no save finis.
“Strong Blong Mekem Ol Gudfala Samting”
15. ?Nating se ol wok nomo oli no save sevem yumi, be from wanem yumi mas mekem olgeta?
15 I tru se ol wok blong yumi nomo i no save sevem yumi. Nating se i olsem, i klia se yumi mas mekem ol wok ya. From samting ya, Baebol i talem se ol Kristin we God i mekem olgeta ‘oli kam wan famle nomo mo oli man blong hem, oli strong blong mekem ol gudfala samting.’ Mo Baebol i pulum ol Kristin tu blong oli ‘givgivhan long olgeta blong mekem olgeta oli strong blong lavem ol man, mo blong mekem ol gudfala fasin.’ (Taetas 2:14; Hibrus 10:24) Blong talem i klia moa, Jemes, we hem tu i raetem haf blong Baebol, i yusum ol isi tok ya se: “Bodi we i no gat win blong hem, hem i ded. Mo long sem fasin, man we i bilif be i no mekem gudfala wok, bilif blong hem tu i ded.”—Jemes 2:26.
16. ?Wanem i moa impoten i bitim ol wok blong yumi? ?Be yumi mas lukaotgud blong no mekem wanem?
16 Ol gudfala wok oli impoten, be tingting we i pusum yumi blong mekem ol gudfala wok ya, hem i moa impoten. From samting ya, i waes we sam samtaem yumi jekemap tingting blong yumi. Be yumi mas lukaotgud blong no jajem narafala man. Yumi mas rimemba se, i no gat man we i naf blong save wanem tingting i pusum narafala blong wok. Baebol i talem se: “Yu yu no gat raet blong jajem man blong wok blong narafala man. Masta blong hem nomo i save talem se hem i mekem gudfala wok no nogat.” (Rom 14:4) Bigfala Masta blong olgeta man, Jeova, wetem Jaj we hem i putumap, Jisas Kraes, bambae tufala ya nao i jajem yumi. Bambae tufala i no jajem yumi from ol wok blong yumi nomo, be from ol tingting we oli pusum yumi blong wok, from fasin blong yumi blong tekem janis blong mekem plante wok, from lav we yumi gat, mo from we yumi mekem wosip long God wetem fulhat blong yumi. Jeova mo Jisas Kraes nomo i save jajem yumi stret, se yumi mekem samting we aposol Pol i talem long ol Kristin blong mekem no nogat. Hem i talem se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.”—2 Timoti 2:15; 2 Pita 1:10; 3:14.
17. ?Taem yumi stap traehad long evri rod, from wanem yumi mas tingbaot advaes blong Jemes 3:17?
17 Jeova i no askem yumi blong mekem samting we i strong tumas. Jemes 3:17 i talem se “waes we i kam long heven” i mekem we man i “kwaet man [“i no bitim mak long samting we hem i ting se man i mas mekem,” NW ].” ?Yu ting se i waes blong folem advaes ya mo mekem olsem Jeova? ?Hemia i wan gudfala mak we yumi save traehad blong kasem? Yes. Yumi no mas traem kasem ol mak we oli hae tumas mo oli strong tumas blong kasem, mo yumi no mas ting se ol Kristin brata blong yumi oli mas kasem ol hae mak olsem tu.
18. ?Taem yumi holem stret tingting long saed blong ol wok blong yumi mo gladhat blong Jeova, yumi save wet wetem glad long wanem fiuja?
18 Sipos yumi holem stret tingting long saed blong ol wok we oli soemaot bilif mo stret tingting long saed blong gladhat blong Jeova, bambae yumi holemtaet glad ya we i makemaot ol trufala man blong Jeova. (Aesea 65:13, 14) Yumi save glad tumas long ol blesing we Jeova i stap givim long ol man blong hem olsem wan grup, nomata sipos yumi wan yumi naf blong mekem plante wok no smol nomo. Yumi mas gohed blong ‘prea long God from evri samting, talem tangkiu long hem,’ mo askem hem blong halpem yumi blong traehad long evri rod. Nao yumi save sua se “pis we hem i givim, we i bigfala moa, i bitim save blong yumi, bambae hem i putum long tingting blong [yumi], blong lukaot gud long [yumi] ya we [yumi] joen long Jisas Kraes.” (Filipae 4:4-7) !Yes, Jeova bambae i sevem yumi from gladhat blong hem, i no from ol wok blong yumi nomo! !Save ya i leftemap tingting blong yumi mo i mekem yumi haremgud!
?Yu Yu Save Eksplenem From Wanem Ol Kristin
• oli no tok flas from wok we olgeta wanwan oli mekem?
• oli no traem winim narafala?
• oli givim ripot blong ol Kristin wok blong prij we oli mekem?
• oli no jajem narafala Kristin?
[Tok blong pija long pej 15]
“Mi mi save givhan long yu long gladhat blong mi, mo hemia i naf blong holem yu”
[Tok blong pija long pej 17]
Ol elda oli glad long wok we wanwan long olgeta i mekem blong givhan long kongregesen
[Tok blong pija long pej 19]
Sipos i no gat ripot blong yu, ripot blong fulwol bambae i no stret