‘Oli Folem Ol Samting We Oli Lanem Long Jyos’

WAN woman blong Miami, Florida, long Yunaeted Stet, i sanem leta ya i go long wan nyuspepa blong ples ya: “Long Desemba 10, boe blong mi i stap long wan maket, mo wan man i stilim paos blong hem long poket blong hem. Insaed long paos ya, i gat pepa blong hem blong draev, kad we hem i nidim blong kasem help long gavman, sam narafala pepa, mo 26,000 vatu.

“Ale, hem i ripotem bisnes ya long maneja blong maket, nao hem i kambak long haos. Long sapa, wan woman we i toktok long lanwis blong Spen, i telefon i kam long hem. Wan man we i wok long ol telefon long postofis i tanem tok blong woman ya i kam long lanwis blong mifala. Ale, woman ya i talem se hem i faenem paos blong boe blong mi.

“Hem i givim adres blong hem long boe blong mi. . . . Hem i givim paos ya long hem we i gat evri samting i stap insaed long hem yet, wetem 26,000 vatu ya tu.

“Woman ya i bin luk stilman ya taem hem i tekem paos ya, mo hem i bin singaot bigfala. Ale, stilman ya i sakem paos mo i ronwe. Long taem ya, woman ya i no moa save faenem boe blong mi, ale, hem i tekem paos ya long haos blong hem mo hem i telefon i kam.

“Hem mo famle blong hem oli Wetnes blong Jeova. I klia se oli folem ol samting we oli lanem long jyos blong olgeta.”

Ol Wetnes blong Jeova oli gat stret fasin, be i no from we oli wantem se ol man blong wol oli presem olgeta. (Efesas 6:7) Defren olgeta, oli gat strong tingting blong presem Papa blong olgeta we i stap long heven, Jeova. (1 Korin 10:31) Lav we oli gat long God mo long ol man raonabaot long olgeta, i pulum olgeta blong talemaot “gud nyus” blong Kingdom blong God. (Matyu 24:14) Promes blong God i blong yusum Kingdom blong jenisim wol ya mo blong mekem i kam wan naesfala paradaes. Long taem ya, wol bambae i kam wan ples we i naes tumas, be antap long hemia, bambae hem i fulap long ol gudfala fasin. Bambae i gat stret fasin long hem blong olwe.​—Hibrus 13:18; 2 Pita 3:13.