Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w97 12/1 pp. 29-31
  • ?Olkaen Fasin Blong Toktok Smol Agens Oli Nogud?

I no gat video yet long haf ya.

Sori, i gat problem taem i stap lodem video ya.

  • ?Olkaen Fasin Blong Toktok Smol Agens Oli Nogud?
  • Wajtaoa—1997
  • Ol Sabtaetol
  • Sem Samting
  • Nogud Frut i Save Kamaot Long Yumi Mo Ol Narafala Tu
  • ?Olgeta Fasin Blong Toktok Smol Agens Oli Nogud?
  • Kristin Kongregesen
  • Long Man We i Gat Paoa Blong Stretem
  • Man Blong Toktok Smol Agens, i No Glad Long Laef Blong Hem
    Wajtaoa—1993
  • ?From Wanem Yu Mas Blokem Fasin Blong Komplen?
    Kristin Wok Mo Laef​—Miting Wokbuk 2021
  • Yumi No Mas Tok Smosmol Agensem Narafala
    Wajtaoa—2006
  • Gohed Blong Wok We Solda i Joen Long Solda
    Wajtaoa—2002
Luk Moa Samting
Wajtaoa—1997
w97 12/1 pp. 29-31

?Olkaen Fasin Blong Toktok Smol Agens Oli Nogud?

Long olgeta smosmol samting we oli hambag long yumi, hemia we yumi no save komplen from, bambae i mekem yumi harem nogud moa.​—⁠Marquis De Custine, 1790-​1857.

WAN woman i harem nogud from we long tu yia finis, wan man we i wok wetem hem i stap traem blong mekem ol doti fasin long saed blong seks wetem hem. Taem hem i tok agensem fasin ya, man ya i swea long hem mo i no moa wantem toktok wetem hem. From we tingting blong woman ya i wok tumas, helt blong hem i trabol. Be, hem i no save mekem wan samting. Sem mak long wan studen we i kasem ol hae mak long skulwok blong hem. Nating se i olsem, skul i sakemaot studen ya taem hem i no wantem joen long wan spot we i olsem karate. Woman blong wok mo studen ya we yumi jes tokbaot, tufala tugeta oli harem se narafala i mekem i nogud long olgeta, ?be i stret blong oli toktok smol from, no nogat? Sipos yes, ?bambae oli save stretem trabol ya no bambae oli jes mekem i kam nogud moa?

Wol ya we yumi laef long hem, i fulap long trabol mo long ol man we oli no stretgud. Taswe, plante taem yumi harem ol man oli toktok smol from ol trabol we i kasem olgeta. I gat ol defren samting we ol man oli toktok smol from, i stat long tok blong soemaot se oli harem nogud long wan samting, oli sore, oli soa no oli kros, i go kasem bigfala toktok mo trabol we oli save mekem agensem narafala man. Bighaf blong ol man oli laekem moa blong no toktok smol agensem narafala, mo blong no tok agensem man stret long fes blong hem tu. Be, ?i stret blong stap kwaet oltaem? ?Wanem tingting blong Baebol?

Nogud Frut i Save Kamaot Long Yumi Mo Ol Narafala Tu

I klia se, fasin blong toktok smol oltaem agensem narafala, hemia i wan denja, mo Baebol i agensem fasin ya. Wan man we i toktok smol oltaem i mekem nogud long hem wan long saed blong bodi mo speret. Mo tu, hem i save mekem ol narafala we hem i toktok smol agensem, oli harem nogud tumas. Wan proveb long Baebol i tokbaot waef we i toktok smol oltaem, i se: “Wan ruf we i lik i stap mekem man i ronwe long taem blong bigfala ren. Sem samting i save kamaot taem waef i raorao oltaem.” (Proveb 27:15) Fasin blong toktok smol agensem Jeova, no agensem wan samting we hem i givim long yumi, i wan bigfala sin ya. Tru long wan merikel, God i sanem mana i kam long nesen blong Isrel taem oli stap 40 yia long draeples. Be, olgeta ya oli toktok smol long saed ya, se mana ya i olsem “rabis bred.” From samting ya, Jeova i sanem ol posen snek oli kam blong panisim olgeta ya we oli toktok smol agens long hem. Nao plante oli ded from we oli no gat respek.​—Namba 21:​5, 6.

Mo tu, Jisas i givim advaes long ol man blong hem blong oli no toktok smol from “smol pis wud” we oli luk long ae blong narafala, hemia ol slak fasin blong olgeta. Be, fastaem yumi mas lukluk bigfala “timba” we i stap long ae blong yumi, hemia ol slak fasin we yumi wanwan i gat. (Matyu 7:​1-5) Sem mak nao, Pol i agensem fasin blong jajem narafala (we i wan fasin blong toktok smol agens), se: “?Weswe yu stap jajem ol narafala man? . . . from we taem yu jajem sam narafala man be yu tu yu stap mekem sem samting nomo we olgeta oli stap mekem.” Ol woning ya oli mas pusum yumi blong no jikim narafala oltaem no toktok smol agens.​—Rom 2:1.

?Olgeta Fasin Blong Toktok Smol Agens Oli Nogud?

From samting ya, ?yumi mas tingting se olkaen fasin blong toktok smol agens, oli nogud? No gat, yumi no mas tingting olsem. Baebol i soemaot se i gat plante fasin no stret long wol ya, we i nidim man blong stretem. Long wan pijatok, Jisas i tokbaot wan jaj we i gat fasin blong mekem i no stret long narafala. Jaj ya i fosem hem nomo blong mekem i stret long wan wido woman we i trabol gud, from we wido ya “i stap kam, kam, kam, gogo [jaj i] no save winim.” (Luk 18:​1-8) Samtaem, yumi mas gohed blong toktok smol agensem sam rong gogo i gat man i stretem olgeta.

Taem Jisas i tijim yumi blong prea from Kingdom blong God se bambae i kam, hem i pulum yumi blong luksave se wol ya i fulap long trabol, mo yumi mas ‘kraeaot’ long God blong i stretem olgeta, ?i tru no? (Matyu 6:​10) Taem Jeova i harem ‘poen we ol man oli stap talem agensem’ Sodom mo Gomora from rabis fasin we i stap gohed long tufala taon ya, hem i sanem sam enjel i go blong ‘faenemaot sipos ol poen ya we hem i harem, oli tru,’ mo blong stretem bisnes ya. (Jenesis 18:20, 21) Olgeta we oli tok agensem trabol ya, oli haremgud taem Jeova i spolem tufala taon ya mo ol man we oli stap mekem rabis fasin.

Kristin Kongregesen

?Olsem wanem insaed long Kristin kongregesen?a ?Ol Kristin brata mo sista, oli mas toktok smol agens? Nating se ol Kristin oli sin man mo woman, oli stap traehad blong mekem wok blong God long pis mo wetem fasin blong joengud. Be, samtaem, trabol i save kam antap we i mekem yumi toktok smol agens mo we i nidim man blong stretem. Long faswan handred yia, wan problem i kamaot long kongregesen blong ol tabu brata smoltaem afta long Pentekos. Plante long ol nyufala Kristin oli stap longtaem lelebet long Jerusalem blong kasem moa tijing, mo blong kampani wetem ol narafala blong kam strong moa. Olgeta evriwan oli seremaot kakae blong olgeta blong mekem se i no gat samfala we oli sot long kakae. Be, ‘ol man Jyu we oli stap toktok long lanwis blong Gris, oli stat toktok smol agensem ol man Jyu we oli toktok lanwis Hibru, from we evri dei, taem we ol man oli seraot ol mane mo kakae, oli no lukaotgud long ol wido long saed blong olgeta.’ Ol aposol oli no tok strong long olgeta ya we oli toktok smol se oli man blong mekem trabol nomo, no gat. Oli stretem bisnes ya. Yes, sipos wan man i gat gudfala risen blong toktok smol from wan samting, nao i soem respek long ol toktok blong hem, mo gudfala tingting i pusum hem, bambae ol elda long kongregesen oli lesin long hem wetem tingting daon, mo bambae oli mekem samting we i stret blong mekem.​—Ol Wok 6:​1-6; 1 Pita 5:3.

Long Man We i Gat Paoa Blong Stretem

Long ol eksampel ya we yumi jes tokbaot antap, ?yu yu luksave se taem yumi toktok smol agensem wan samting, i mas gat gudfala tingting i pusum yumi mo yumi mas mekem i go long man we i naf blong stretem bisnes ya? Eksampel, sipos yumi go long polis nao yumi toktok smol from we ol takis oli antap tumas, olgeta ya oli no save mekem wan samting blong stretem problem ya. Mo sipos yumi go luk wan jaj blong toktok smol from wan sik we yumi gat, hemia i blong nating nomo. Long sem fasin, sipos wan problem i kamaot insaed long kongregesen no afsaed long hem, i blong nating nomo we yumi toktok smol long wan man we i no gat paoa blong stretem problem ya, no we i no naf blong halpem yumi.

Long plante kantri tede, i gat ol kot mo ol narafala haeman bakegen we oli save givhan long ol man blong stretem trabol blong olgeta. Taem studen ya we yumi bin tokbaot long stat blong store ya, i karem trabol blong hem i go long kot, jaj i mekem disisen we i sapotem hem. Ale, skul i karembak hem mo oli talem sore from rong we oli bin mekem long hem. Long sem fasin, woman ya we i bin kasem trabol long wok blong hem from wan wokman we i stap traem blong mekem nogud long hem long saed blong seks, hem i go tokbaot bisnes ya wetem Yunion blong ol Woman we oli Wok. Ale, komiti blong skul we woman ya i wok long hem, i talem sore long hem from trabol we hem i bin kasem. Naoia, oli stap traem blong faenem sam rod blong blokem olkaen fasin blong spolem ol woman long wok.

Be, yumi no mas gat tingting ya se evri taem we yumi toktok smol from wan samting, bambae i gat wan man we i stretem trabol blong yumi. Waes King Solomon i talem tru se: “Samting we i kruked finis i no save kam stret bakegen.” (Eklesiastis 1:​15) Yumi mas luksave se i gat samfala trabol we God nomo i save stretem, mo yumi mas wet long hem blong mekem olsem long stret taem blong hem.

[Futnot]

a Wan grup blong man we oli joen wanples blong wosip.

[Tok Blong Pija Long Pej 31]

Ol elda oli lesin mo traem stretem trabol we man i toktok smol from

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem