Mekem Bilif Blong Yumi Long Tok Blong God i Kam Strong Moa

I GAT moa man we oli bin ridim Baebol i bitim olgeta narafala buk. ?Be hamas man oli soemaot bilif long ol tok blong Baebol? Baebol i talem se “i no olgeta man evriwan we oli bilif.” (2 Tesalonaeka 3:2) I klia se, yumi no gat bilif taem yumi bon. Yumi mas kasem bilif. Nating se man i gat smol bilif nomo, hem i no mas ting nating long bilif ya. Bilif i save kam slak mo lus. Taswe, yumi mas hadwok blong holem ‘fasin blong bilif we i stretgud.’​—Taetas 2:2.

Hemia nao from wanem Hed Kampani blong ol Wetnes blong Jeova oli jusum stampa tok ya, “Bilif Long Tok Blong God,” blong ol distrik asembli long 1997. From samting ya, plante milyan Wetnes mo ol narafala, oli bin gat blesing blong kam wanples, blong mekem bilif blong olgeta i kam strong moa long Tok blong God.

Tok Blong God i Trutok—⁠Stampa Blong Bilif Blong Yumi

Hemia nao stampa tok blong faswan dei blong asembli ya. Fastaem, i gat ol tok blong talem tangkyu long ol man we oli kam long asembli ya. Ol man ya oli soem se oli respektem Baebol taem oli kam long asembli. Be, sam bigfala kwestin oli stanap long saed blong bilif blong yumi: ‘?Yumi save talemaot from wanem yumi bilif olsem, mo yusum Tok blong God blong pruvum? ?Yumi gat tangkyu from ol kakae long saed blong speret? ?Yumi tinghae long Baebol, ol miting blong kongregesen,a mo ol buk we oli tokbaot Baebol? ?Yumi stap kam strong moa long fasin blong laekem ol man, kasem stret save, mo soemaot fasin luksave?’ Brata we i toktok, i pulum evriwan blong lesingud. Hem i talem se, “Distrik Asembli ya, ‘Bilif Long Tok Blong God,’ i blong givhan long yumi wanwan blong luklukgud long laef blong yumi, mo faenemaot sipos bilif blong yumi i strong mo i stretgud.”

Stampa tok blong asembli hemia se, “Yumi Stap Wokbaot From Bilif, i No From Ol Samting We Yumi Luk.” (2 Korin 5:7) Man we i givim tok ya i talem se: “Bilif blong ol man we oli joen wetem ol Wetnes blong Jeova, i no stanap long ol tok we i no gat pruf blong hem. No gat.” !Hemia i tru tumas! Trufala bilif i no stanap long ol samting we i no gat pruf blong hem. Hem i stanap long ol trufala samting. Hibrus 11:1 i talem se: “Fasin ya we yumi bilif long God, hem i soemaot long yumi we olgeta samting ya we yumi stap putum tingting blong yumi i strong long hem, be oli tru. Fasin ya i soemaot long yumi we olgeta samting ya we yumi no save luk, be oli stap.” Man we i givim tok ya i talem se: “Blong rili wokbaot from bilif, yumi nidim bilif we i stanap long wan gudfala faondesen.”

Taem yumi wokbaot from bilif i no from ol samting we yumi luk, yumi no nidim blong save olsem wanem mo wetaem stret Jeova bambae i mekem evri smosmol haf blong stampa tingting blong hem i kamtru. Ol save we yumi gat finis long saed blong hem, i mekem se yumi trastem hem fulwan. Yumi save se hem i naf blong mekem ol promes blong hem oli kamtru wetem lav mo stret fasin.

Tok ya, “Ol Kristin Yangfala​—⁠Oli Impoten Long Kongregesen,” i mekem ol yangfala oli tingbaot se oli sas tumas long ae blong Jeova. Tok ya i pulum olgeta blong traem gruap moa long saed blong speret. Blong mekem olsem, oli mas traehad blong ridim fulwan Baebol, mo kam naf blong givim laef blong olgeta i go long Jeova mo tekem baptaes. I stap long ol yangfala wetem ol papa mama blong olgeta blong tekem disisen long hamas edukesen bambae oli kasem. Be, sipos oli jusum blong kasem hae edukesen, oltaem oli mas holem tingting ya se, hemia i blong givhan long olgeta blong mekem wok blong God long fasin we i moagud. Ol yia long skul oli save givhan bigwan long yumi, sipos yumi ‘luksave ol samting we oli impoten moa’ we oli joen wetem bilif blong yumi.​—Filipae 1:9, 10.

Biaen, i gat wan tok wetem tri haf blong hem, nem blong tok ya, “?Yu Yu Folem Ol Rul Blong Hu?” Bilif long Tok blong God i pusum yumi blong folem ol rul blong Baebol. Ol Kristin oli obei long ol loa mo rul blong Jeova. Eksampel, Baebol i talem long yumi blong no tok swea, mo blong no sakem ol tok nogud. (Efesas 4:​31, 32) Man we i givim tok ya i askem se: “Taem yu yu kros no yu harem nogud long wan samting, ?yu yu singaot bigwan mo tok nogud long hasban no waef blong yu no ol pikinini blong yu?” Tru ya, fasin ya i no stret nating long wan Kristin. God i putumap ol rul tu long saed blong klos mo hea. Ol Kristin oli mas putum klos “we i stret nomo, i no blong pulum ae blong man, mo i no blong flas.” (1 Timote 2:​9, 10) Tok ya “stret nomo” i karem tingting se yumi respektem yumi wan, yumi luksave se yumi gat raet blong kasem ona, yumi no flas, mo yumi no bitim mak. Lav we yumi gat long ol narafala i stap pusum yumi, mo ol rul blong Baebol wetem stret tingting oli stap lidim yumi.

Tufala tok we oli kam biaen, oli eksplenem ol wanwan vas blong Hibrus 3:​7-​15 mo 4:​1-​16. Ol vas ya blong Baebol oli givim woning long saed blong wan denja, hemia se, ‘sin i save pulum yumi blong mekem hed blong yumi i strong.’ (Hibrus 3:​13) ?Olsem wanem yumi save winim faet blong yumi agensem sin? Jeova i givim Baebol long yumi blong givhan. Tru ya, “Tok blong God i wan samting we i laef, mo we i stap wok, . . . i save jajem olgeta tingting blong man, mo ol samting we man i wantem long tingting blong hem.”​—Hibrus 4:​12.

Laswan tok long faswan dei blong asembli hemia, “Wan Buk Blong Olgeta Man.” Hem i tokbaot Baebol, se i tru, i stretgud, mo i givhan long yumi long laef. I gud tumas blong harem nyus se i gat wan nyufala buk blong 32 pej, nem blong hem, A Book for All People! Oli wokem nyufala buk ya blong givhan long ol man we oli skulgud, be maet ol man ya oli save smol nomo long saed blong Baebol. Lastok blong haf ya se: “Ol man wanwan oli nidim blong stadi Baebol. !Yumi save se sipos oli tekem taem blong lukluk dip long Baebol, bambae oli luksave se spesel buk ya i rili wan buk blong olgeta man!”

Folem Eksampel Blong ‘Bigfala Man We i Mekem Bilif Blong Yumi i Stretgud’

Hemia stampa tok blong namba tu dei blong asembli. Hem i pulum ol man blong tingbaot Jisas Kraes, ‘Bigfala Man Blong Mekem Bilif blong Yumi i Stretgud.’ Yumi mas “biaen long hem.” (Hibrus 12:2; 1 Pita 2:​21) Plante man blong Krisendomb oli kasem advaes ya: ‘!Bilif long Masta Jisas, mo bambae God i sevem yu!’ ?Be, i gat samting ya nomo we i joen wetem bilif? No gat. Baebol i talem se, ‘bilif we i no gat wok i joen wetem, hem i ded.’ (Jemes 2:​26) Taswe, antap long fasin blong bilif long Jisas, yumi mas mekem ol wok we hem i bin mekem, antap moa, wok blong talemaot gud nyus blong Kingdom blong God.

Ol tok long moning ya oli tokbaot wok blong prij. Olsem Pol, yumi mas wantem tumas blong talemaot gud nyus we i save sevem man. (Rom 1:​14-​16) Jisas i prij long ol man long evri ples. Nating se yumi kasem gudfala frut long wok blong prij long ol haos wanwan, yumi luk se plante moa man oli no stap taem yumi go long haos blong olgeta. (Ol Wok 20:20) Plante oli stap long skul, long wok, long stoa, no oli stap wokbaot. Taswe, yumi mas prij long ol pablik ples tu, mo long eniples we i gat man.

Tok ya, “Yumi Mas Putum Rus i Godaon Dip mo Stanap Strong Long Trutok,” i tokbaot bigfala namba blong ol nyufala disaepol we oli stap tekem baptaes​—⁠!bitim 1,000 evri dei! I impoten tumas we olgeta ya oli putum rus blong olgeta i godaon dip mo stanap strong long bilif. (Kolosi 2:​6, 7) Man we i givim tok ya, i eksplenem se rus blong ol tri oli karemaot wora mo ol gudfala samting long graon olsem kakae blong olgeta, mo long semtaem, oli olsem wan faondesen no sapot blong tri ya. Long sem fasin, wan gudfala program blong stadi Baebol, mo joen wetem ol gudfala fren, i save mekem ol nyufala disaepol oli stanap strong long trutok.

Advaes ya i stretgud long olgeta we oli rere blong tekem baptaes. Yes, long namba tu dei ya blong asembli, fulap nyufala disaepol oli tekem baptaes, folem eksampel blong Jisas. Tok ya, “Bilif Long Tok Blong God i Lidim Yumi Blong Tekem Baptaes,” i pulum olgeta we oli rere blong tekem baptaes blong tingbaot se, fasin blong draon fulwan long wora i olsem wan pijatok, we i soemaot se oli ded long olfala fasin blong laef we oli stap tingbaot olgeta nomo. Taem oli kamaot long wora, i olsem se oli laef bakegen blong mekem ol samting we God i wantem.

Tok ya, “Faet Strong Blong Holemtaet Bilif,” i stanap long buk blong Jud long Baebol. Tok ya i pulum yumi blong lukaotgud long bilif blong yumi. Blong mekem olsem, yumi mas blokem ol samting we oli save spolem bilif ya, olsem rabis fasin long saed blong seks, fasin rebel, mo apostasi.c Tok we i kam biaen, “Givim Ol Samting We Famle Blong Yu i Nidim,” i givim spesel advaes long ol papa mama​—⁠antap moa, ol papa. Baebol i talem se oli gat wok blong givim ol samting we famle i nidim, long saed blong speret, bodi, mo filing. (1 Timote 5:8) Blong mekem olsem, oli mas spenem plante taem wetem ol pikinini blong olgeta, toktokgud wetem olgeta, mo laeklaekem olgeta. Jeova God i glad tumas long ol hadwok we ol Kristin papa mama oli mekem blong halpem ol pikinini blong olgeta blong gruap long trutok.

Nekiswan tok we i gat tri haf blong hem, “Bambae Yumi Go Long Haos Blong Jeova,” i mekem se yumi gat moa tangkyu from ol Kristin miting. Ol miting ya oli mekem tingting blong yumi i spel long ol wari blong wol. Yumi gat jans long ol miting blong harem mo talem ol toktok we i leftemap tingting, mo yumi save soem lav long ol Kristin brata mo sista blong yumi. (Hibrus 10:24, 25) Mo tu, ol miting oli givhan long yumi blong kamgud moa long fasin blong tij, mo blong kasem save moa long stampa tingting blong God. (Proveb 27:17) Yumi neva mas lego kongregesen. Oltaem yumi mas tingbaot tok blong Jisas se: “Taem tu tri man oli joen wanples long nem blong mi, mi mi stap long medel blong olgeta.”​—Matyu 18:20.

Laswan tok blong dei ya hemia, “Plante Samting i Traem Bilif Blong Yu Finis.” Bilif we i no bin kasem traem i no sas tumas, mo yumi no save sipos i strong no nogat. Hem i olsem wan jek we yumi no karem i go long bang yet blong kasem mane blong hem. ?Hem i gat bigfala praes we oli raetem long hem? No gat. Long sem fasin, bilif blong yumi i mas kasem traem blong pruvum se i strong mo i tru. (1 Pita 1:​6, 7) Man blong givim tok ya i talem se: “Samtaem, ol lida blong skul mo ol man blong apostasi oli pulum ol man blong nyuspepa mo televisen blong tok gyaman long saed blong yumi, mo long saed blong Kristin bilif mo fasin blong laef blong yumi.. ?Bambae yumi letem ol man ya we Setan i blaenem ae blong olgeta oli mekem yumi fraet, mekem tingting blong yumi i foldaon, mo mekem yumi sem long gud nyus? ?Bambae yumi letem ol gyaman toktok i blokem yumi blong go long miting mo prij? no ?Bambae yumi stanap strong, we yumi no fraet, mo bambae yumi mekem tingting blong yumi i strong moa blong gohed blong talemaot trutok long saed blong Jeova mo Kingdom blong hem?”

Man We i Bilif i Save Kasem Laef

Stampa tok blong namba tri dei blong asembli ya i stanap long tok blong Pol se: “I klia gud we man i no save kam stret man long fes blong God from we i stap folem Loa. Baebol i talem se ‘Man we i kam stret man long fes blong God from we i bilif, hem i save kasem laef.’ ” (Galesia 3:​11) Wan tok we i gat tri haf blong hem, “Ol Profet Tok Blong Joel We Oli Stret Long Taem Blong Yumi,” i wan impoten tok long moning ya. Buk blong Joel i tokbaot taem blong yumi, mo long fasin we i wekemap tingting, hem i talem se: “!Sore long dei ya, from we dei blong Jeova i kolosap, mo bambae i kamtru olsem samting we Hae God i mekem blong spolem ol samting!” (Joel 1:​15) Ol tabu Kristin oli wok long fasin we i kolosap sem mak long ol lokis. Oli no letem wan samting nating i blokem wok blong olgeta blong talemaot Kingdom long taem blong en ya.

Buk blong Joel i givim gudfala hop ya tu, i se: “Ol man we oli singaot long nem blong Jeova, bambae hem i sevem olgeta.” (Joel 2:​32) Tok ya i no minim se yumi mas talem nem blong Jeova nomo. No gat. Yumi mas tanem tingting blong yumi from sin wetem fulhat blong yumi, mo hemia i min se yumi mas sakemaot fulwan ol nogud fasin. (Joel 2:​12, 13) Yumi no mas tektaem tumas, from we kolosap nao bambae Jeova i mekem jajmen blong hem i kamtru long ol nesen, olsem we hem i bin mekem long Moab, Amon, mo Sir we i stap antap long ol bigfala hil, long taem blong king blong Juda, Jeosafat.​—2 Kronikel 20:​1-​30; Joel 3:2, 12.

Tok ya, “Soem Bilif Tru Long Fasin Blong Wet Long Jeova,” i leftemap tingting blong yumi evriwan. Naoia, we yumi stap kolosap tumas long en, yumi save tingtingbak long plante promes blong Jeova we oli kamtru finis. Mo yumi intres tumas long ol samting we bambae oli kamtru yet. Ol man blong Jeova oli mas gohed blong soemaot longfala tingting, mo oli no mas fogetem se olgeta samting we Jeova i promes finis, bambae oli kamtru.​—⁠Taetas 2:​13; 2 Pita 3:​9, 10.

Drama ya, “Mekem Ae Blong Yu i Kliagud,” i laswan haf blong asembli long moning ya. Plei ya we i stretgud long laef blong yumi, i pulum yumi blong skelemgud tingting blong yumi long saed blong ol sas samting blong laef. Nomata weples yumi laef long hem, sipos yumi no wantem wari tumas, yumi mas folem advaes blong Jisas blong mekem ae blong yumi i kliagud, hemia se, yumi mas putum tingting blong yumi i stap strong long Kingdom blong God nomo.​—Matyu 6:​22.

Nem blong pablik tok i pulum intres blong ol man, “Bilif Mo Fyuja Blong Yu.” Hem i givim pruf se ol lida blong wol oli no naf blong stretem ol problem blong man. (Jeremaea 10:23) Ol semfala samting we oli bin kamaot long ol yia we oli pas finis, oli stap kamaot bakegen mo bakegen​—⁠be oli moa nogud mo oli spolem moa man. ?Wanem tingting blong ol Wetnes blong Jeova long saed blong fyuja? Yumi bilif se ol man we oli holemstrong long God, oli save gat wan gudfala fyuja aninit long Kingdom blong God. (Matyu 5:5) Bambae God i mekem ol promes blong hem oli kamtru, blong mekem i gud long olgeta we oli gat bilif long Tok ya blong hem, se: “Yufala i mas lukaot Jeova, taem yufala i gat jans yet blong faenem hem. Singaot long hem taem hem i stap kolosap yet.”​—Aesea 55:6.

Jisas i stap tingbaot taem blong yumi, nao hem i stanemap wan impoten kwestin, i se: “?Taem we mi, mi Pikinini blong Man, mi kambak long wol, bambae mi save faenem plante man blong bilif, no bambae i no olsem?” (Luk 18:8) Laswan tok i talem bakegen ol bigfala poen blong asembli, mo i soem olsem wanem asembli ya i givim bigfala pruf se bilif long Tok blong God i stap strong yet, nating se ol man blong wol ya oli no gat bilif mo oli tingbaot ol samting blong wol nomo.

Be, yumi wanwan i mas tingbaot se: ‘?Mi mi wan long olgeta we bilif long God mo Tok blong hem i stanap strong?’ Distrik Asembli ya “Bilif Long Tok Blong God,” i mas givhan long yumi blong ansa ‘yes’ long kwestin ya. !Mo yumi talem bigfala tangkyu long Jeova from we hem i mekem bilif blong yumi i kam strong moa long hem, mo long Tok blong hem, Baebol!

[Ol futnot]

[Tok blong pija long pej 24]

Ol man oli glad blong wok fri nomo blong givhan long plante taosen man we oli kam long asembli

[Tok blong pija long pej 25]

Long plante ples blong wol, oli mekem asembli long ol bigfala stad olsem hemia

[Tok blong pija long pej 25]

L. A. Swingle blong Hed Kampani i soemaot nyufala buk

[Tok blong pija long pej 26]

Plante oli tekem baptaes blong soem se oli givim laef blong olgeta i go long Jeova

[Tok blong pija long pej 27]

Ol man long asembli oli singsing wetem glad long saed blong Kingdom. Smol pija: drama ya “Mekem Ae Blong Yu i Kliagud”