Ripot Long Wok Blong Kingdom

“Ol Man Blong Yu Bambae Oli Glad Blong Kam Joen Long Yu”

NEMAN i wan bigfala jif long ami blong Siria. Man ya I kasem leprosi. Sipos wan man we i kasem rabis sik ya i no save faenem meresin blong givhan long hem, sik ya i save spolem ol haf blong bodi blong hem, mo i save ded from tu. ?Neman i save mekem wanem? Long haos blong Neman i gat wan smol gel, wan “slef we i kam long kantri blong Isrel.” Gel ya i no fraet blong talem se profet Elaeja nao i save mekem sik blong Neman i finis.​—2 King 5:​1-​3.

Strong tingting blong gel ya i pusum Neman blong go faenem Elaeja, blong hem i save kamgud bakegen long bodi blong hem. Afta long samting ya, Neman i kam wan man blong wosipim Jeova. Store ya we i stap long Baebol, i hapen long ol yia 900 B.K.T.a (2 King 5:​4-​15) Tede, plante yangfala oli soem strong tingting olsemia, taem oli talemaot Kingdom. Store ya we i kam long Mosambik, i pruvum samting ya.

Nuno i gat sikis yia, mo hem i wan pablisa blong talemaot gud nyus we i no baptaes yet. Bifo we Nuno i kam wan pablisa we i no baptaes, hem i stap singaot ol pikinini blong velej oli kam wanples, i mekem wan prea, mo i tijim olgeta long Baebol wetem buk ya My Book of Bible Stories.

Plante taem Nuno i wekap eli long Sarede moning, mo i mekem famle blong hem i tingbaot se: “Tede yumi go prij.” Hem i soem strong tingting long saed blong wok blong prij long sam narafala rod tu. Taem hem i go prij long rod long Maputo wetem papa mama blong hem, plante taem hem i go toktok wetem ol man hem wan nomo. Wan dei, wan bisnesman i askem long hem se: “?From wanem yu yu stap salem ol buk ya?” Nuno i talem long hem se: “Mi no stap salem ol buk ya, be mi glad blong akseptem presen mane we i save givhan long wok blong prij.” Bisnesman ya i ansa long hem se: “Nating se mi no intres, be mi sapraes long fasin blong yu mo gudhan we yu gat blong mekem wok ya. Mi wantem givim presen mane blong halpem wok ya.”

Long wan narafala taem, Nuno i toktok wetem wan man long rod mo i soem wan buk long hem, nem blong buk ya, True Peace and Security​—How Can You Find It? Man ya i askem se: “Yu yu go long skul long ples ya ?no?” Nuno i ansa se: “Yes, mi stap go long skul ya, be tede mi stap talemaot wan impoten mesej we buk ya i tokbaot. Buk ya i talem se yu save laef long nyufala wol we bambae God i mekem, olsem pija ya i soem.” Smol Nuno i no luksave se hem i stap toktok wetem wan tija long skul blong hem. Tija ya i karem buk ya, mo naoia hem i stap kasem Wajtaoa mo Wekap oltaem long Nuno.

Samfala oli askem long Nuno from wanem i laekem wok blong prij, nao hem i ansa se: “Mi wantem storeyan wetem ol man, mo tijim olgeta long saed blong Jeova mo Pikinini blong hem Jisas Kraes.” Hem i gohed i se: “Mo sipos sam man oli no wantem lesin, hemia i no wan risen blong harem nogud.”

I gat plante taosen yangfala olsem Nuno long olgeta ples blong wol, we oli “glad blong kam joen” blong talemaot Kingdom blong God mo tijim ol man long saed ya. (Ol Sam 110:3) Be samting ya i no hapen olsem nomo. Ol papa mama we oli tijim ol pikinini blong olgeta long saed blong Jeova stat taem oli smol nomo, mo we oli givim wan gudfala eksampel long olgeta long wok blong prij, mo oli gohed strong long ol wok blong Kingdom, bambae oli kasem bigfala blesing from.

[Futnot]